(((((( بعض العرب حبّه يوردك الجنون ))))))

**نسر البوادي** · 26-09-2016, 08:15 AM

بعض العرب حبّه يوردك الجنون
ولا يوصف له غلاه حكاك له

ما يقنعه وصف الغلا لو وش يكون
لو كل حرف بالحرير إيحاك له

الموت جاك وهو تقلبه الظنون
ولا لك إلا الصّبر وش وداك له

إن قلت ضايق قال هونها تهون
ما يدري إن ضيقتك له وإبكاك له

تقعد تحبه وأنت ساكت ومغبون
يمكن بيوم يقاله موفاك له

وكأنّك مشكك هو يمون أو ما يمون
تخيّل إن عفت الصّبر فرقاك له

غلاه من فوق الغلا ماهو بدون
وحكاه سمعك يجبرك برخاك له

ودّك تحطّه فالعيون من العيون
وتبسط على رمض الثرى يمناك له

وتظلّه من الشّمس في ظلّ الجفون ولا يمر أُذنه سوى لباك له

وتسج من غير لو أنّهم يذكرون
ومنين ما سجت القدم ممشاك له

غروٍٍ يميله الترف ميل الغضون
غصنٍ ليان ومكرمه بسكاك له

وجديله إلا أقفى ستر منه المتون
كني بريحه لا اتلفت لدعاك له

كيك وعسل لكن ماهو في صحون
ودعاك من عين الحسود غطاك له

الله لا يعطيه ناسٍ ينضلون
ويستر عليه من النحل لا يآكله

الوصف والتعبير في وصفه يخون
غير إطلب الله يستجيب دعاك له

وعذال قلبك في محبته يهبون
سكينهم عن قطع حبله حاك له

ناس عن أعراض العرب ما يعرضون
ودايم على نفس الشكل والشاكله

اللي من لحوم الأوادم يآكلون
وحلوقهم دافع البلا متواكله

في سلمهم أولى بالأكل الاقربون
وأطيبهم اللي صيدته شكواك له

يدعيهم الشيطان للذنب ويجون
هذا يقطعله وهذاك يواكله

يا جعلهم فدوة ثرى الغض الفتون
اللي على الدرب الطويل خطاك له

طيفه إذا نام البشر زارك بهون
وطيفك إذا نام البشر سراك له

حبه دفان ومقبرة خضر الطعون
بين العظام العوج كنك ناكله

اللي كذا حبه ولو تموت مغبون
ولالك إلا الصبر وش وداك له