قصة بعنوان:

ياسلاااام عليك يالذذيب

http://archive.omaniaa.co/showthread.php?t=755523

يسعد صباحكم / مساكم
هلا بالجميع ...
عوده اخرى لقلمي وقصه حصلت معي زمان .. ادري الكل راح يقول الرايق راعي مشاكل وخاصه الصديق والآخ العزيز / عابر سبيل هههههه بس شو اسوي هذا اللي يحصل معي والله هههههه كما اني لا اجيد الكتابه بشكل تراجيدي وانما قلمي يميل للكوميديا ...
زمان كانت المديريه اللي اشتغل فيها ليس لها مجّمع يضم كل الدوائر التابعه لها كما هو الوضع الآن وكان حالها حال كل المديريات اللي تتبع جهة عملي لديها مجموعة شقق في عماره وحده تستخدمها كمكاتب لدوائرها ..
هالمديريه اللي انا اشتغل فيها لها 4 دوائر وكنت اشتغل في دائرة الشؤون الإداريه حالي حال اي موظف ..
كانت الشقه الخاصه بدائرتي تتكون من اربع غرف تستخدم كمكاتب ( مكتب لمدير الدائره _ مكتب لنائبه _ مكتب كبير للموظفين وهو عباره عن صاله كبيره _ مكتب احتياط ) ويفصل بيينا احنا الموظفين اللي نتواجد بالصاله وبين مكتب المدير ونائبه باب كبير ..
احنا مجموعة موظفين كل مننا عنده وظيفه يؤديها .. موظف للصادر .. موظف للوارد . موظف للإرشيف .. الخ ..
مدير الدائره طويل شوي ماشاء الله عليه هههههه اما نائبه حجم جسمه عادي مثل الكل وكانوا ولا زالوا ناس افاضل وبكل امانه لا زلت اتواصل معهم هاتفيا لحد الحين رغم اني انتقلت لدائره ثانيه كما هو الوضع مع الموظفين فيما يسمى بعملية التدوير الوظيفي لإكتساب المزيد من الخبره .. تواصلي معهم من باب التقدير لهم لأنهم يعاملونا مثلما يعاملوا اولادهم مش موظفين عندهم بالدائره ...
انا وظيفتي كانت الصادر وطاولتي آخر شي وبعيده عن باب الصاله .. وانا اشتغل مرات اتسدح على الطاوله وايلس اكتب رقم الرساله وتاريخها وموضوعها بالسجل وعقبها اختمها واحطها بظرف وعاد المراسل اللي معانا يتولى عملية تسليمها للجهه المرسله لها ...
وانا اشتغل تسدحت على الطاوله كالعاده هههههه وكلما مسكت رساله وبعد ماكتبت فيها رقم الصادر وتاريخه وسجلتها بالسجل اختمها وانا اقول .. عيني ياعيني اسميني ماشاء الله علي مامقصر نعم طاااخ ( اضرب الختم بقوه على الرساله ) .. وامسك الرساله الثانيه ونفس الموال .. عينكم علي تندااه شباب ( بارده بالهندي ) .. طاااخ .. الخ من عبارات روووعه اقولها هههههه والشباب عاد كل شوي واحد فيهم يصرخ .. ياخي هلكتنا تراك .. بسك عاد صدعتنا .. الخ من هالتعليقات اللي تفرح الخاطر وتسعد القلب الحزين ههههههه وانا مطنشهم عشان احرق اعصابهم اكثر ...
لين يوم من الايام وانا امارس هالهوايه ويالس اعلق وانا اختم الرسايل .. دلع نفسك ياولد .. ياسلااام عليك يالذيب .. الخ ... فجـأه لاحظت هدوء تام ..!! ولا واحد من الشباب كان يعلق او ينازعني ..!! قلت فنفسي اكيد فيه شي مش طبيعي ولا ليش يعني هذولا ساكتين ماينازعوني ويعلقوا علي ..!!
شوي شوي ارفع راسي من الطاوله .. وانا ارفع راسي إلا اشوف حد واقف قدامي ..
بلعت ريقي وعيوني طلعت ودقات القلب تزيد وانا اشوف هالمارد واقف قدام طاولتي هههههه وقلت فنفسي ( بسم الله الرحيم .. تبارك الرحمن فيما خلق .. هالداهيه من متى بس واقف قدامي وان اسوي هالربشه ..!!؟ وانا اقول ليش الشباب ساكتين ..!!؟ .. اتاري هو موجود ..) ...
بسرعه قمت وانا اعتذر له واقول : انا آسف استاذ والله ما انتبهت لوجودك وكنت مشغول بالعمل .. حتى شوف خلصت كل شي ولا غلطه معي ..
نظر لي مدير الدائره وابتسم وقال : ادري انك ماغلطت بس خف من الربشه اللي مسونها عشان تركز اكثر فعملك وبنفس الوقت تخلي الشباب يشتغلوا ويركزوا زين فعملهم ..
بسرعه انا رديت عليه : حاضر استاذ .. ولايهمك .. انا آسف ..
اقوله كذا وعيني على الشباب اللي اشوفهم ميتين ضحك علي طبعا بس كاتمين ضحكتهم ذيك الساعه عشان هو موجود ..
اول ماتحرك وراح إلا كل واحد يضحك علي من صوب ههههههه لا والبعض منهم يقول : ايوا صح خلينا نشتغل .. ريحنا شوي من ربشتك .. تستاهل اللي ياك ..
كان اعصب عليهم واقول : انتوا مافيكم خير .. ليش ماخبرتوني ان المدير واقف قدامي ..؟ طيب المدير وماراح يقول شي اعرفه انسان طيب ... بس شو راح يكون موقفي لو كان المدير العام هو اللي كان بداله ..؟ ياخي على الاقل واحد فيكم يكح .. يقول احم .. يحسسني ان فيه حد موجود عشان انتبه ..
عاد هنا رد البعض : تستاهل .. ياما قلنالك هههههه
بصراحه من هذاك اليوم تبت وصرت هادي شوي لأن مو كل مره تسلم الجره هههههه ...
انتهى .. بقلمي
اخوكم / رايق البال