قصة بعنوان:
عمري ماراح انساه
http://archive.omaniaa.co/showthread.php?t=749838

يسعد صباحكم / مساكم
هلا بالجميع ...

من جديد نلتقي ايها الأحبه وقصه اخرى بقلمي يغلب عليها الطابع الكوميدي كالعاده ..
طبعا اللي شاف العنوان افتكرها قصه رومانسيه انا ادري وتعمدت هالشي اصلا ههههه ..
هالقصه صارت معي من 8 سنوات تقريبا .. يوم من الايام وقبل المغرب تقريبا مر علي واحد من الشباب وقال لي : يالله نتمشى شوي ..
قلت له : تم ولايهمك ..
طلعنا نتمشى بسيارته واحنا بالسياره كنا نسولف وفجأه قال لي : تصدق ..!! نفسي اضارب حد اليوم .. صار لي فتره ماتضاربت مع حد ياخي..! ..
انا ضحكت ورديت عليه : شو هالكلام بس ..!؟ .. الله يهديك .. ! وانتقلنا انا وهو للحديث عن مواضيع عديده واحنا نتمشى بالسياره .. وكنا بالشارع المخصص لنا وفجأه من بعيد لمحت سياره واقفه فيها 4 شباب تبي تعبر الشارع .. بأمانه طنشت الموضوع لأنه وضع عادي وماتوقعت اللي راح يصير ...
واحنا قريب جدا من السياره إلا فجأه يعبر قدامنا ..!!؟ كنا على وشك نصطدم به بس الحمد لله الله ستر وكانت سرعتنا بسيطه ..
بحركة غضب حركت ايدي يمين .. يسار ورسمت نظاره على وجهي وانا أأشر بيدي على سايق هذيك السياره وكأني اقوله ( شو فيك انته ماتشوف .. روح البس نظاره احسنلك ) .. وتحركنا بطريقنا انا وصاحبي ...
واحنا نمشي لاحظت ان فيه سياره تتبعنا وصاحبها يولع انارة السياره وطبعا معناها يبي يوقفنا .. ركزت ع السياره إلا وصاحبنا هذاك اللي انا سويت له هذيك الحركه ..
قلت لصاحبي : تبي تضارب هااه ؟ شل عن راسك عيل جووك الربع هههههه ..
صاحبي اول ماشافهم من مرآة السايق قال : ياربي هذولا 4 وكل واحد فيهم جثه .. اسمينا غبنا اليوم نعم .. شو الحل ؟ اوقف لهم ؟
رديت عليه : شو توقف لهم بالله عليك ..!!؟ احنا 2 وهم 4 وكل واحد فيهم عن 2 .. يعني بيغسلونا غسل على اصول اليوم ...
رد علي : طيب شو الحل هذولا مصرّين يوقفونا ؟
ققلت له : لحظه بتصل ف فلان ... فلان هذا صاحبنا ماشاء الله عليه رياضي مثل اللي يلعبون كمال اجسام ويشتغل بأحد الاجهزه الامنيه ..
موبايله يرن وايد واحنا على اعصابنا ..
فجأه استلم المكالمه وبدون مقدمات قلت له : اطلع من البيت وانتظرنا عند باب الحوش الحين ضروري ..
قال لي بإستغراب : خير .. شو فيه ؟
رديت عليه : اطلع انت بس .. لا تيلس تسأل وايد .. بعدين راح تعرف ..
شوي ووصلنا عند باب حوش بيته وهو يفتح الباب وهذولاك الشباب يصفطوا جنبنا .. اول ماشافوا زميلنا هذاك طلعت عيونهم من مكانها .. وانا اطالعهم بكل ثقه هههههه ...
سألهم صاحبنا : خير شباب شو صاير ؟
رد عليه سايق هذيك السياره وقال : صاحبك هذا ( يقصدني انا ) سووالنا حركه واحنا نعبر الشارع قدامهم .. شو يعني انا ما اشوف ..!؟ وقمنا كل حد من صوب يحكي له القصه واللي صار ..
قام صاحبنا يهدي الوضع وطبعا هم هدوا من شافوا هذاك العملاق جنبي هههههه وهم يتحركوا لسيارتهم قال لي السايق : ماعليك .. مصيري اشوفك مره بروحك وبتشوف ان ماتفتفت ضلوعك .. صاحبنا رد عليه : عطني رخصة قيادتك اشوفك قمت تهدد وقدامي بعد ..!! مع انك انته الغلطان ..! بس مارد عليه وركب سيارته هو وربعه وتحركوا بسرعه ...
بعدما راحوا صاحبنا ركب معنا وطلعنا نتمشى مع بعض ... اعترف مر علي شهر تقريبا لما اتحرك بروحي نادر انزل من السياره ومن اوقف التفت يمين .. يسار لا يكون حد مترصد لي بعد وانا ياغافلين لكم الله ههههههه ..
بعد مرور شهر وزياده على ذيك السالفه انا نسيت الموضوع وخلاص تراها سالفه وانتهت ..
الى ان حصل في يوم من الايام وبعد مرور اكثر من سنه .. مرضت على آخر الليل وتقريبا كانت الساعه 2 الفجر والمركز الصحي اللي بمنطقتنا يغلق على 9 بالليل وفي هالحاله لازم اروح مركز( ..... ) .. اللي بمنطقة ( .... ) ... ركبت سيارتي ورحت ووصلت المركز وكان بس قدامي مريض واحد ..
عطيت الموظف اللي ع الشباك هويتي وبطاقة المركز اللي انا فيه وكنت الاحظ انه يطالعني ويبتسم .. انا على بالي بس كذي طبعه من باب الألفه او ربما مشبّه علي ..
وانا انتظر دوري عند غرفة الطبيب بعد هذاك المريض اللي دخل قبلي ..
جاني ممرض وكان شايب وقال لي وهو يبتسم : تعرفه الموظف اللي على شباك المراجعين ؟
قلت له : لا الوالد .. ما اعرفه بصراحه ..!
رد علي بثقه وقال : بس هو يعرفك حتى قال لي هالولد عمري ماراح انساه ..!!
انا استغربت من كلامه وانا ياي ارد عليه طلع هذاك المريض من عند الطبيب ودخلت انا بداله وجلست مع الطبيب وخبرته شو فيني وكتب لي ادويه وحبوب وطلعت صرفتهم من الصيدليه وانا طالع قلت لازم امر على هالموظف على الاقل اعرف من هو ومن وين يعرفني ...!
قربت منه وسلمت عليه وقلت له : اعذرني اخي ماتذكرتك للحين .. مع ان هذاك الممرض قال لي انك تعرفني وبدرجه كبيره بعد ..!!
رد علي بإبتسامه : ماتتذكرني ؟
قلت له بكل صدق : لا بصراحه .. اعذرني بس اكيد اتمنى اتشرف بإسمك ومعرفتك ..
رد علي وقال : تذكر من زمان شخص طلع عليكم بالشارع في منطقه كذا وانت سويت له حركه وطاردكم هو وربعه ووقفتوا عند بيت واحد جسمه عملاق ..؟
انا بسرعه تذكرت الموقف وقلت وطبعا دقات القلب تزيد ههههه : ايوا .. تذكرت اخي العزيز .. ياخي اعذرني انا فعلا غلطت هذاك اليوم مع انك انت بعد غلطان لأنك طلعت فجأه قدامنا وكنا شوي ونصطدم بك ..
رد علي : فعلا انا كنت غلطان هذاك اليوم والسموحه منك ياخي بس صراحه حركتك نرفزتني ..
عاد انا من تطمنت ان الوضع عادي سألته : شو سالفة انك ماراح تنسى هذاك الولد اللي خبرني عنها هذاك الممرض ؟
قال لي : الله يسلمك لما رحت اجدد سيارتي شفت مسجل لي مخالفه ( عدم تقديم رخصة قياده لرجل الأمن ) ودفعت بسببها مبلغ محترم .. كله منك هههههه هو على باله انا اشتغل بأحد الاجهزه الامنيه وبلغت عنه بس اللي يشتغل كان صاحبنا اللي لجأنا له هذاك اليوم هههههه ..
بعدما تصافت القلوب اخذ رقمي واخذت رقمه وظلينا نتواصل لحد اليوم وكلما تذكرنا هذاك الموقف نضحك وخبرته اني بسببه كنت شهر اراقب اي حد يقرب من سيارتي هههههه ..

انتهى .. بقلمي

اخوكم / رايق البال