( ... ❤ كان لي عندك حكايه ❤ ... )

[رايق البال]

قصيدة :
عندك خبر ...!!!!

http://omaniaa.co/showthread.php?t=50469
يسعد صباحكم / مساكم

لقاء آخر يجمعنا ايها الأحبه واتمنى نصي المتواضع ينال اعجابكم ...



عندك خبر ..!!؟
في غيبتك ذقت الأمرّ
تاه الفكر .. ضاق الصبر .. وشوقي تعاظم وانتثر ..
ولا جنّ ليلي ياغلاي .. يكبر عناي .. وهمّي وشقاي
واظل انتظر ..
طيفك يمر .. مثل البدر .. يروي صحاري خافقي برشّة مطر ..
عندك خبر .. وفعلاً على بالك أمّر ..!!!؟

عندك خبر ..!!؟
اني تجرعت الغرام .. منّك وقام .. قلب(ن) تولّع بك وهام
يسكب حنين .. ورجوى سنين .. وبك يستعين
يامن انا بك مستهام ..
واظل انتظر ..
طيفك يمر .. مثل البدر .. يروي صحاري خافقي برشّة مطر ..
عندك خبر .. وفعلاً على بالك أمّر ..!!؟

عندك خبر ..!!؟
انك وربّي الوحيد .. وعشق(ن) فريد
اشتاقلك وانته معي .. واشتاقلك وانته بعيد ..
ومنك استحاله لي مفرّ .. وهذا جديد .. ماقد على بالي خطر ....!!
واظل انتظر ..
طيفك يمر .. مثل البدر .. يروي صحاري خافقي برشّة مطر ..
عندك خبر .. وفعلاً على بالك أمرّ ..!!؟

اخوكم / رايق البال


~~~~~~~

قصيدة: نفسي أسألك

http://omaniaa.co/showthread.php?t=41237

يسعد مساكم / صباحكم
لكل الأحبه اهدي بوح قلمي والظاهر القريحه هالايام مطنشتني شوي ههههه سبق نشر هالنص هنا في 13 / 12/ 2011 ...

نفسي اسألكْ
وشْ آخرةْ حبي إلكْ ..!؟
راحْ تقتربْ ...
ولا الهوى بعدهْ حبيبي
(م ) اشْغلكْ ...!؟
ولاجرّبتْ مثلي سهرْ
واشواقْ تاخذني وتمرّْ
وليل(ن ) طويلْ
فيه إتْخّيلني مثلْ
مانا ليالي اتْخيّلكْ ..!
لك اعترفْ ...
ان الحزن فيني طغى
والشوق عمره ماطفى
ولا غبت عني ياغلاي
كلها دقايق بس واجيكْ
وانا ابتسملكْ واحتويكْ
واقول لكْ ...
ماقلّتلكْ ..!؟
انه فراقكْ ...
هدّني ...
ماقلّتلكْ ..!؟
يامن هويتْ ...
حسْ بي وخذني للأمان
كافي دلالْ
بسّْك تعالْ
ولاّ وربّي اللي خلقْ
وبقدرتهْ ...
الطفلْ في مهْدهْ نطقْ
لا اذوّقكْ نار الغرامْ
واشّْعلْ فتيلهْ والهيامْ
واحرمّْكْ لذاّت المنامْ
وارقصّْ الشيطانْ لكْ ..!
للموت احبكْ واهْتويكْ
انت الغرام اللي اقول
وانته هوايا والميول
وكلّي إلكْ
يامن انا لك مملكه
وبْخافقي ...
إنت الملكْ ...
انت الملكْ ...
انت الملكْ ...!

اخوكم / رايق البال

~~~~~~~

قصيدة : على فكره

http://omaniaa.co/showthread.php?t=23534

يسعد مساكم / صباحكم

لقاء جديد يجمعنا احبتي ونص بسيط للرايق اتمنى ينال رضاكم ...


على فكره ...!
بعدك تذكر العشره ؟
وماضي كان يجمعنا
وحلم(ن) كان يشغلنا
وسوالف بيننا ياما
وجنح الليل يسترنا
وينثر على اللقاء عطره .. على فكره ..!

على فكره .. !
تبي تعرف عن احساسي؟
احبك ولا لك ناسي ؟
وشوقي زاد ولا جفّ ؟
وانته (ف) غيبتك قاسي
تصدق ..
ماقدرت انساك
ولا عيني هوّت إلاّك
مع انه كثير جلاّسي .. على فكره ..!

على فكره ..!
ياما جيتلك ساري
وقلبي للغلا شاري
وظليت انتظر طلّه
لخل(ن) يهتوي خلّه
يقولوا الطير مهما غاب
مصيره يرجع لوكره .. على فكره ..!

على فكره ..!
تراها الدنيا دوّاره
مصير اللي ذبحه الشوق
ودمعه ينسكب (م ) الموق
فجأه تبتسم دنياه
ويظهر للخفوق خفوق
يشاركه الفرح بكره .. على فكره ..!

على فكره ..!
تذّكر كل شي له حد
اذا طوّل جفاك ومدّ
وشفت البعد يحلالك
اخاف انسى الهوى وذكره .. على فكره ..!

اخوكم / رايق البال


~~~~~~~~~

قصيدة : صباح الشووق والأهات والذكرى

http://omaniaa.co/showthread.php?t=21217

يسعد صباحكم / مساكم
هلا بالجميع ..
نص ع السريع للرايق من باب التواجد وأتمنى ينال رضاكم ...


صباح الشوق والآهات والذكرى
صباح الكّر لهمومي ومأساتي
صباح الفقد والاحلام والمسرى
صباح قلوب تتمنى انكساراتي
صباح الآه توقد بالحشا جمرا
يغّذيها دفا صوتك وهمساتي
صباح العز والتقدير يا كسرى
على إيوان خفّاقي ونبضاتي
صباح الحلم والآمال والصبرا
يغنولك حبيبي الأجمل الآتي
حبيب القلب دام بحالتي ادرى
عليك الله تلملم عثر خطواتي
متى تلفي وتجبر بالقلب كسرا
عقب فرقاك بي تاهت مساراتي
ليا من غبت كم يطرا وكم يطرا
ضجيج الشوق في قلبي ونظراتي
صباحي انت والاشواق بي كثرا
ومسائي انت يا أجمل مساءاتي


اخوكم / رايق البال

[رايق البال]

هلا بالجميع ..
شهر نعم مر تقريبا لين تذكرتها هالمدونه ههههه
قايلكم انا ما مال مدونات اصلا
راح اقدم الحين اخر ماكتبت
وادرج الموضوع مع الرابط ^^

[رايق البال]

قصيدة :

للحب ذكرى ( مجاراة لسعيد الغافري وشموس الحق عن نص يطنشني انا الانثى / ملهمتي)

رابط القصيدة :

http://omaniaa.co/showthread.php?t=97514

هلا بالجميع ..

بالبدايه الف شكر للشاعرين الكبيرين / سعيد مصبح الغافري وناصر الضامري ( شموس الحق ) على امتاعنا بهكذا نصوص ..
بأمانه قبل ساعه زمن اطلعت على نصيهما الرائعين وانا اشيك على الرواق من خلف الكواليس رغم اني في اجازه حاليا ههههه ..
ورغم اعترافي بأن ( رحم الله امرء عرف قدر نفسه ) الا ان النص الاول للأخ / سعيد الغافري ومجاراته من قبل الآخ / شموس الحق استمتعت بهما اي استمتاع ..
لذا حاولت من خلال هذا النص البسيط والمتواضع التسلل الى رقي ما كتباه وعذرا للجميع على بساطة وتواضع ماكتبت على عجاله ..
كما انني ارتأيت ان اجمع النصين الذين اشرت لهما هنا لسهولة الاطلاع ..
النص الاول / للاستاذ والاديب الكبير سعيد الغافري
( يطنشني انا الانثى )
رابط النص

http://omaniaa.co/showthread.php?t=97219

النص الثاني / مجاراة الشاعر الرائع والاستاذ شموس الحق
( ملهمتي )

http://omaniaa.co/showthread.php?t=97462

النص الثالث / لرايق البال
( للحب ذكرى )


وفي ركني القصيّ انا
اتابع ذلك المشهد
ويمرق في مخيلّتي
غرامٌ بالجوى يرعد
ونار الشوق تكويني
وقلبي بالهوى عربد
احاول لملمة نفسٍ
تعاندني ولا ترتد
انا مجنون عاشقةٍ
لأسري جيشها تحشد
تكرّ تفرّ في قلبي
وشيطان الهوى يولد
تباغتني على غرّه
برمشٍ يرعد ويزبد
وهمسٍ كم يبعثرني
وغنجٍ يتبعه يسند
واسقط عندها ارضاَ
لوعييً ياملأ افقد
وتضحك عندها جذلى
لفتنه كم بها تعّتد
وتدنو وهي منتشيه
وتهمس لم ولن تصمد
انا ماضيك .. حاضرك
انا لك حبك الاوحد
وتعلو ثغرها بسمه
لنصرٍ للملأ جسّد
بأني دونها تائه
غريبٌ .. متعبٌ .. اوحد
واني دونها ابدو
بقانون الهوى مرتّد
وان هواها يكسوني
ويغلبني ولي يصفد
احاول جمع اشتاتي
واخمد .. مالذي اخمد ؟
انادي الصبر في وهنٍ
وعني يبعد ويبعد
واصرخ عندها مهلاً
حنانيكِ على المُجهد
انا الكاهن بصومعتك
انا لسواك كم مُلَحِد
واعلنها الى موتي
احبك والذي يُعْبد
وان الشوق في قلبي
محالٌ ناره تخمد

طابت صباحاتكم ..
اخوكم / رايق البال

[رايق البال]

للذكرى ..

[رايق البال]

قصيدة / مرني
رابط القصيده

http://omaniaa.co/showthread.php?t=101600

هلا بالجميع ..
نص على السريع من باب التواجد وعذرا لبساطته ..


ومرّني ..
لا هزّتك ذكرى الليال
اللي بها ذقنا الوصال
وعشنا سوى
احلى تفاصيل الجمال
في ليلة ( ن)
فيها تناثر كل شي
وانته وانا والحب
يكمل انسنا ..
ومرّني ..

ياصاحبي
نفسي اسألك
اشتقت لي ؟
حنيّت لأيامي معك ؟
اما انا واللي خلق ذيك العيون
كلّي انا انده عليك
مشتاقلك
محتاجلك
وانطر هطولك يامزون
ومرّني ..

ياصاحبي
خلني عن العالم اغيب
وانسى مساءات التعب
وانسى الأسى
وجرح(ن) تخثّر والتهب
قرب تعال
كلي انتظار انك بعد غيبه تجي
تنده علي
تسأل علي
واعيش في كنفك ليال ..
ومرني ..

طابت صباحاتكم ..
اخوكم / رايق البال

[رايق البال]

لي عوده لإدراج القصيده الصوتيه اللي للأسف انحذفت لما انحذفت معظم المواضيع والمشاركات بالنسبه للكل بعد الصيانه الاخيره للسبله ..

[رايق البال]

هلا بالجميع ..

رابط القصه
فديتك سوسو ^^

http://omaniaa.co/showthread.php?t=103127

عوده اخرى لقلمي وقصه من النوع الكوميدي كما تعودت حيث لا اميل للقصص ذات الطابع التراجيدي ربما لكونها لاتتناسب مع شخصيتي ..
ادري معظمكم دش عشان يعرف من سوسو ههههه وتعمدت اكتب هالعنوان عشان الكل يدش ^^ ..
طبعا القصه واقعيه بس غيرت فالاسم المستعار ..

قبل اسبوعين تقريبا وانا اتجهز بعد المغرب عشان اروح مع الشباب للمقهى اللي تعودنا نجلس فيه ..
جاني اتصال من واحد من الشباب اللي للاسف من شهور ماشفته ..
صاحبي : هلا يسعد مساك .. وينك يالقاطع ؟
انا : موجود والله وادري مقصر فيك وفي كثير ناس بعد
صاحبي : لاحشاك والله عن القصور بس ترا مشاغل والله والدنيا تلاهي صارت ..
انا : بالفعل كلامك صحيح ..
عيني ياعيني على الناس المشغوله ههههه ماتنلام ترا صرت تاجر انست الحين ومحد يقدر يحصلك يالحمارههههه
صاحبي : اي تاجر ولد الحلال خليها على الله بس هههه بس زين فتحت هالموضوع ..
شو رأيك نتعشى مع بعض؟
انا : تمام ولايهمك بس بتصل قبلها بالشباب اعتذر منهم
صاحبي : تم عيل خلاص انتظرك بمطعم ..... الساعه 9
انا : تمام ولايهمك اعتمد
انتهت مكالمتي معه واتصلت بالشباب اعتذر منهم ..
في الوقت المحدد رحت المطعم وحصلت صاحبي سابقني واول ماوصلت ناداني ورحت وجلست معه ..
بعد السلام والدردشه الخفيفه طلبنا عشا واحنا ننتظر العشا لين يوصل ..
سألته : شخبارك مع تجارة الانست ؟
هو : انت مانسيت بعدك ههههه انت عارف اني دشيت بإسم ولد بس اللي صار ماحصلت حد يشتري يادوب كم واحد بس ويسألوني عن البضاعه والسعر وبعدين مايتواصلوا معي مره ثانيه للاسف ..!
انا : اها .. وبعدين ؟
هو : وبعدين الله يسلمك التقيت بواحد من الربع وسولفنا في امور كثيره ومن ضمنها خبرته عن مشروعي وضحك لما قلتله سجلت بمعرف ولد وقال لي انت مافيك عقل اصلا ..
سجل بمعرف بنت افضل وعطاني عدة نصايح اسويها وبالفعل سويت اللي طلبه مني ..
انا : والله ؟ وبعدين ؟
صاحبي : وبعدين الله يسلمك نجحت نجاح ولا اروع هههههه
انا : اوهووو .. لالا مو معقول كلامك هههه وضح لي ياخي ..
وصل العشا وقمنا نتعشى ونكمل سوالفنا ..
صاحبي : الله يسلمك سجلت من جديد بإسم بنت واخترت اسم سوسو وحطيت صوره بنت نسختها من النت عشان تكون اللعبه صح ههههه
انا : الله ياخذ ابليسك على هالفكره الجهنميه هههه كمل وبعدين شو صار؟
صاحبي : قول شو اللي ماصار اصلا ههههه شو عدد المتواصلين وخاصه من الشباب شي ماراح تصدقه ولايخطر على بالك ههههه تصدق عددهم تجاوز ال 300 وانا اول 5 مو لاقي هههه ..
انا : ادري فيهم والله يبوا سبب نعم الله ياخذ ابليسهم بس هههه كمل ..
صاحبي : اول شي سويته طلعت رقم جديد وحطيت رقمي ونفذت كل تعليمات صاحبي اللي نصحني بها ومن ضمنها الغاء المكالمات والمسجات النصيه وخليت الواتس بس شغال ..
انا : ليش تلغي المكالمات .. غريبه ياخي ..!؟
هو : لا غريبه ولاشي بس نفترض احد منهم اتصل وخاصه الشباب وسمع صوتي اللي كنه صوت بعير شو ساعتها راح اسوي؟ ههههه
انا : اها .. صح والله معك حق فاتتني هذي اما انك ذيب نعم ههههه كمل شوقتني شو صار بعدين معاك ؟
صاحبي : الله يسلمك اللي صار كلما صحيت الصبح اشوف ولا 200 رساله على الواتس وتحديدا من الشباب ..
اللي كاتب صباح الحب واللي كاتب صباح الشوق واللي كاتب صباح السعاده سوسو واللي كاتب لك وحشه الغلا واللي كاتب فديتك سوسو .. الخ وانا اقرأ وميت من الضحك عليهم والله هههه .. وقام يوريني مسجاتهم ..
اللي راسل قلب واللي راسل ورده واللي راسل صورته وتحتها بشوي انا اسف سوسو بالغلط رسلت صورتي ههههه بالغلط ها بالغلط ..! علينا هالسوالف ههههه لا والبعض يدلعوه يقولوا له هلا وغلا السووس ههههه ..
قلت له ودموع عيني تنزل من كثر الضحك : الله ياخذ ابليسك مت من الضحك والله حتى ماقدرا اكل زين هههههه وبعدين ؟ كمل لاه ..
صاحبي : قمت اتعامل مع الجنسين بس بالواتس ولما يطلبوا شي اقولهم لو قدرت اطلع بجي بنفسي ولو ماقدرت برسل اخوي ..
عاد الشباب يتضايقوا لما اقول برسل اخوي ههههه بس احاول اهديهم عشان ما اخسرهم لاه ههههه ...
الغريبه البعض منهم ورغم اني اقول لهم برسل لك الاغراض على العنوان اللي رسلتوه خاصه اللي ولاياتهم بعيده عن مسقط يرفضوا ويقولوا لا بروحنا بنجي اصلا معنا اشغال بمسقط ههههه وانا عارف انه لا اشغال معهم ولاشي بس ترا السالفه فيها بنت لازم بيتعنوا وبيمسكوا خط عادي معهم ههههه ..
انا : انت تقول لي ..!؟ هههههه طبعا بيجوا بس لو قايلهم واحد من الربع تعالوا بيطلعوا مية عذر عشان مايجوا معه اعرفهم ههههه ..
صاحبي : شفت كيف هههه تصدق البعض منهم والله العظيم عرض علي يدعمني بفلوس عشان اكبر تجارتي واوسعها والبعض عرض يرسل رصيد بس كلهم والله رفضت اخذ منهم شي ..
صحيح انا لعبتها بهالشكل بس مش ممكن تسمح لي اخلاقياتي اخذ فلوس منهم لأن اللي يهمني بس ابيع اللي اتاجر به مو عشان اتعرف بفلان او فلانه ..
تصدق اني حظرت اكثر من 240 رقم لأن البعض منهم قام يقل ادبه علي للاسف يمكن عشان على بالهم انا بنت وكل واحد فيهم يبي يسولف معها ..
انا : ياربي .. بصراحه شي مذهل اللي قلته وعمري ماتوقعته ..
طيب هذا صاحبي وانا واثق من اخلاقياته وتربيته بس ياترى كم سوسو بكل مواقع التواصل الاجتماعي وراها شاب ..!؟
انتهت قصة صاحبي وانتهى العشا معه واعترف اني انصدمت باللي عرفته عن هالعالم المجهول كليا بالنسبه لي ..
طابت مساءاتكم ..

انتهى ... بقلمي
اخوكم / رايق البال

[رايق البال]

هلا بالجميع ..
قصيدة : صباح الشووق والأهات والذكرى ^^

سبق نشرها هنا على هالرابط :



http://omaniaa.co/showthread.php?t=21217


واغتنم هذه الفرصه لأتقدم بالشكر الجزيل للأستاذه / اسطوره لن تتكرر على تحملها مشاق تصميم ومونتاج واخراج هذا العمل بهذا الشكل الرائع وعذرا من الجميع لضعف نبرة صوتي حيث اعاني مشكله بالحبال الصوتيه مع العلم اني اشتريت مايك عشان اسجل به بس الله ياخذ ابليسه مارضى يشتغل ههههه وبالاخير سجلت بمايك الفون اللهم لا اعتراض ^^ ..


صباح الشوق والآهات والذكرى
صباح الكّر لهمومي ومأساتي
صباح الفقد والاحلام والمسرى
صباح قلوب تتمنى انكساراتي
صباح الآه توقد بالحشا جمرا
يغّذيها دفا صوتك وهمساتي
صباح العز والتقدير يا كسرى
على إيوان خفّاقي ونبضاتي
صباح الحلم والآمال والصبرا
يغنولك حبيبي الأجمل الآتي
حبيب القلب دام بحالتي ادرى
عليك الله تلملم عثر خطواتي
متى تلفي وتجبر بالقلب كسرا
عقب فرقاك بي تاهت مساراتي
ليا من غبت كم يطرا وكم يطرا
ضجيج الشوق في قلبي ونظراتي
صباحي انت والاشواق بي كثرا
ومسائي انت يا أجمل مساءاتي






اخوكم / رايق البال

[رايق البال]

هلا بالجميع ...
الحلم الغريب / بقلمي
رابط القصه

http://omaniaa.co/showthread.php?t=103421

نلتقي مرة اخرى وقصه يغلب عليها طابع الفانتازيا كما يطلق على مثل هذه النوعيه من القصص ربما ..
القصه عباره عن حلم لأحدهم زار مخيلته ذات ليله ..
قبل يومين مر هذا الحلم به وهو نايم حيث حلم بأن هناك مشروع كبير سوف يتم اقامته عن قريب ..
هالمشروع راح يمر على عدة بيوت واماكن لأخوه واخوات يعرفهم ..
ولأنه تم تعيينه مدير لهالمشروع قال في نفسه ليش ما اجمع كل الاخوه والاخوات اللي اعرفهم واعطيهم بعض النصايح عشان تكون استفادتهم اكثر من هالخير اللي جاي بسبب هالمشروع ..
قام ورسل لكل الاخوه والاخوات اللي يعرفهم رسايل بأنه راح يجتمع معهم للأهميه وحدد لكل فريق يوم معين بحيث يكون الاحد الساعه 9 صباحا مع فريق الشباب اللي يعرفهم ولمدة ساعه ويوم الاثنين الساعه 9 صباحا مع فريق الاخوات اللي يعرفهن ولمدة ساعتين لأنه عارف استحاله يقدر يخلص لو كانت المده ساعه وزين بعد تكفيهن ساعتين من لعيانهن هههههه ..
مكان الاجتماع عباره عن مسرح صغير يتوسطه كرسي وطبعا قدام المسرح كراسي وطاولات عشان يجلسوا عليها الاشخاص ..

(

الاسماء اللي سيتم ذكرها ليست حقيقيه وانما مستعاره

)

الاحد ( الساعه 9 صباحا )
وصل للموقع على 8 ونص تقريبا ..
شوي وبدوا الشباب يوصلوا واكتمل العدد على 9 وربع ..
هو : هلا شباب .. شخباركم ؟
الجميع : الحمد لله وانت كيفك يالذيب ؟
هو : الحمد لله ههههه .. جمعتكم اليوم عشان اخبركم بأنه فيه مشروع كبير راح يمر على بيوتكم وقلت فنفسي دام اني مدير المشروع راح انصحكم شوو تسووا عشان تكون استفادتكم اكثر ..
الجميع : تسلم والله ماقصرت
احمد : بصراحه فعلت خير .. نعم اني مفلس وادور البيسه دواره هههههه
عبد الكريم : عيل جتك الهبششه احمدووه هههههه
صلاح : يالله اني نعم ودي اسافر اغير جوو ياخي وزين بتجي هالهبشه عشان نكشح مع الشباب شوي نسافر صوب ذيك الديار ..
سالم : نعم انها جت بوقتها شباب ههههه الشيمه بسرعه ابدأ اجتماعك ورانا اشغال يالحبيب ..
هو : الموضوع عباره عن ...... عشان كذي لازم تسووا ..... عشان تكون الفائده اكثر من هالخير اللي جاي عندكم هههههه
الجميع : تم ولايهمك اعتمد
انتهى الاجتماع بعد نص ساعه تقريبا وقبل نهاية الموعد المحدد بربع ساعه ..

الاثنين ( 9 صباحا )
وصل للموقع على 8 ونص ..
الساعه 9:15 وصلن هنادي وريم وابتسام
الساعه 9:30 وصلت ندى
الساعه 9:37 وصلن اسراء وشجن وعبير
الساعه 9:45 وصلت منال
الساعه 10 وصلت رحاب
اكتمل العدد على الساعه 10 ونص ..
رحب فيهن وقال : هلا بالاخوات .. كيفكن ؟
هنادي : الحمد لله وانت كيفك؟ الشيمه خلص اجتماعك بسرعه نبا نروح للخياط نفصل للعيد وورانا بعد طبخ وتنظيف بيت واشغال وايد ..
رحاب : صح والله .. زين ذكرتيني بالخياط هنووّده كانت ناسيه والله ..
هنادي : واجبنا حبيبتي فديتك انا هههه صح منووله خلاص جهزتي ملابس العيد ؟
منال : لا جهزت ولاشي تعبت من كثر ما ألفّ على هالخياطين ولا واحد فيهم وافق اونه ماما كلاس واجييييد زهمه كله حرمه يجيب ملابس منشان انا ..
رحاب : مافيهم خير اعرفهم .. بفلوسنا بعد ويذلونا
هنادي : صدقتي والله حبي نعم بفلوسنا ويذلونا بعدهم ..
هو بكل هدوء وسعة بال : خلصتن لعيانكن عشان ابدأ ولا لأ ؟
عبير : حشى بياكلنا اكل نعم هفففف مامدانا نتكلم كلمتين ..!
اسراء : صح والله مامدانا نتكلم كلمتين .. وانته شو كاظنك ها ؟ خليك ريلكس الدنيا ترا ماطايره ..
شجن : ولاسياره بعد ولا سفينه هههههه حلووه صح بنات ؟
الجميع : حلوووه موووت شجووونه هههههه خلاص بنسكت ابدأ عن تقول بعد احنا سبب تأخيرك ..
هو : انا شو اللي وهجني بس فيكن واطلبكن للإجتماع ههههه المهم الموضوع عباره عن مشروع كبير راح يمر بيوت كل اللي طلبتهم وطلبتهن لهالاجتماع ..
ولأني مدير هالمشروع وعارف خوافيه قلت فنفسي اخبركم شوو تسووا بالضبط عشان تستفيدوا بشكل اكبر من هالخير اللي جاي لكم على الاقل تذكروني بالخير هههههه..
سعاد : تسلم والله ماقصرت جزاك الله خير
ندى : يبالك بعد ماتخبرنا رغم كل هالعشره اللي بينا هذا اللي ناقص بعد ..! اصلا غصبا عليك تخبرنا
ريم : نعم انه غصبا عليك مو بكيفك ههههه ولا تبانا يعني نعصب عليك ونحرمك من الميراث يبو كشه ؟
هدى : اقولكن بنات كيف صالون ..... معاملته ؟ ياخي الصالون اللي اتعامل معه وايد رفع اسعاره الحين كنه من زين شغلهم عاد ..!
جمانه : على طاري الصالون بنات بعلمكن حركه ههههه كنت لما اروح انقش حنا بالصالون وايد اجلس انتظر دوري رغم اني احيان اوصل من وقت والاحظ بنات يوصلن بعدي ويتقدمن ولما حد من البنات يحتج تقولهن راعية الصالون هذي اونه حاجزه من امس ..!
ندى : صح وايد نشوف هالحركه .. وبعدين ؟ كملي حبي
جمانه : مره وانا احاسبها زدتها ريالين وقلت لها هالمبلغ هديه مني وياربي كيف فرحت ههههه عاد الحين تقابلني بذيك الابتسامه الحلوه لما اروح بأي وقت وتخليني قبل اللي واصلات قبلي ولما حد فيهن يحتج تقولهن هذي حاجزه من امس ..! شفتن كيف الحركه هههههه
الجميع : واااي منها التوووبه ياربي نعم .. مشكوره حبي فعلتي خير بصراحه لما خبرتينا عن هالحركه الختيييره والفززييعه بعد هههههه ..
هو : حرام عليكن عاد اعطني فرصه شوي اتكلم واشرح عن الموضوع ..
ابتسام : وانته ليش ساكت ومن ماسكنك اصلا عن تتكلم ..!؟ ياربي نعم منك حشى شوي شوي علينا مب كذي ؟ خلاص بنسكت هات ماعندك يافتى من نيووز قصدي اخبار هههههه
هدى : والحين بالله عليك هذولا مالقوا غيرك انته يالمينون تمسك هالمشروع الكبير هههههه
شجن : صح والله مالقوا غيرك انت يعني هههههه
هو : الله ياخذ ابليسكن بس ههههه الموضوع يا اخوات عباره عن .......... ولازم تسووا كذا وكذا عشان تكون استفادتن اكثر .. فهمتن ؟
منال : واااي بنات جانا الخير وهذي زغرودة فرح كللللوووووششششش كلوووشششششش كللللوووششششششش ..
هدى : نعم انه جانا الخير الحمد لله كللللوووشششش ههههه ذيك اليوم كنت ماره السوق وشفت عقد يالله كيف طاحت عيني فيه للحين اشوفه قدامي والله وكلما تذكرته احس قلبي يعورني ..
منال : موتك الذهب انتي نعرفك ترا هههههه
هدى : عينك ام العصاقيل
ابتسام : شوف من الحين اقولك .. انا ارضي اباها من فوق واااايد واسعه ومن الوسط ضيقه شوي ومن تحت عريضه واااايد ..
هو : هذا فستان ولا دراعه ابتسام هههههه
ابتسام : عينك .. ينكت بعده ههههه
عبير : وانا ارضي اباها تطل على الوادي واااااي المنظر راح يكون رهيييب وخوووراافي لما الوادي ينزل ..
نجوى : ياااه نفسي اسافر فرنسا بنات
هو : ان شاء الله الخير راح يعم الكل
سعاد : بنات خلاص دام فهمنا كل شي بنروح ورانا اشغال وعاد الساعه 12 ونص وبعدنا ماطبخنا ..
رحاب : ماتنلامي ترا ريلك عصبي نعرفه ههههه
سعاد : عصبي عينك ام عقصين
عبير : فديت ريلي انا اللي بس لو اقوله تعبانه على طول يقول لي لاتطبخي بجيب اكل من المطعم لي ولك ..
ابتسام : عيل يارب يتزوج عليك عشان تحسي يالدبه
عبير : فال الله ولا فالك ابتسامووووه ههههه
سعاد : اعذرنا ولد الحلال وايد ازعجناك وايد بس تدري بنات لاه ههههه وبكل امانه ماقصرت باللي خبرتنا به وجزاك الله الف خير ..
الجميع : صح والله اعذرنا وايد ربشنا وازعجناك ههههه بس انت عزيز وغالي والله واحنا بعد معك نفس الشي ولا ماكنت طلبتنا وفهمتنا شوو نسوي عشان نستفيد من هالمشروع الهام ..
انتهى الاجتماع على الساعه 1 ونص بعدما شكره الجميع واعتذرن منه على الربشه اللي سونها بالاجتماع ...
( انتهى )
بقلمي ...
اخوكم / رايق البال

[رايق البال]

هلا بالجميع ..
اتمنى ان تنال قصيدتي على رضاكم والشكر لكم جميعا بشكل عام وللاستاذه / اسطوره لن تتكرر بشكل خاص على عملية الاخراج والتصميم للفيديو كما التمس العذر من الجميع لضعف طبقة الصوت عندي ..




ياساهر الليل ترقب جيّة الغايب

ريّح خفوقك وشيل الضايقه عنّه

ياساهر الليل لايهمك ابد نايب

وخليك صابر بدرب(ن) انت ماشنه

لا تستمع فيه قول الحاسد العايب

واحفظ عهودك مع التشريع والسّنه

دامه يحبك .. اكيد لشوفتك ذايب

وشي(ن) مؤكد بعادك دوم شاقّنه

لوطال بعده لزوم لديرته آيب

ولو طال همّك اكيد السعد تالنه

وان دق بابك وجالك يعتذر تايب

واقسم ودادك محال يكون ناسنه

راعي ظروفه وقدّر صيحة الثايب

داري خفوق(ن) تترجم لوعته أنّه

يكفيه شوقه .. عذابه .. حظه الخايب

ياساهر الليل لاتخيّب ابد ظنه

اخوكم / رايق البال