فديتك سوسو ^^ / بقلمي ( قصه واقعيه )

[رايق البال]

هلا بالجميع ..

عوده اخرى لقلمي وقصه من النوع الكوميدي كما تعودت حيث لا اميل للقصص ذات الطابع التراجيدي ربما لكونها لاتتناسب مع شخصيتي ..
ادري معظمكم دش عشان يعرف من سوسو ههههه وتعمدت اكتب هالعنوان عشان الكل يدش ^^ ..
طبعا القصه واقعيه بس غيرت فالاسم المستعار ..

قبل اسبوعين تقريبا وانا اتجهز بعد المغرب عشان اروح مع الشباب للمقهى اللي تعودنا نجلس فيه ..
جاني اتصال من واحد من الشباب اللي للاسف من شهور ماشفته ..
صاحبي : هلا يسعد مساك .. وينك يالقاطع ؟
انا : موجود والله وادري مقصر فيك وفي كثير ناس بعد
صاحبي : لاحشاك والله عن القصور بس ترا مشاغل والله والدنيا تلاهي صارت ..
انا : بالفعل كلامك صحيح ..
عيني ياعيني على الناس المشغوله ههههه ماتنلام ترا صرت تاجر انست الحين ومحد يقدر يحصلك يالحمارههههه
صاحبي : اي تاجر ولد الحلال خليها على الله بس هههه بس زين فتحت هالموضوع ..
شو رأيك نتعشى مع بعض؟
انا : تمام ولايهمك بس بتصل قبلها بالشباب اعتذر منهم
صاحبي : تم عيل خلاص انتظرك بمطعم ..... الساعه 9
انا : تمام ولايهمك اعتمد
انتهت مكالمتي معه واتصلت بالشباب اعتذر منهم ..
في الوقت المحدد رحت المطعم وحصلت صاحبي سابقني واول ماوصلت ناداني ورحت وجلست معه ..
بعد السلام والدردشه الخفيفه طلبنا عشا واحنا ننتظر العشا لين يوصل ..
سألته : شخبارك مع تجارة الانست ؟
هو : انت مانسيت بعدك ههههه انت عارف اني دشيت بإسم ولد بس اللي صار ماحصلت حد يشتري يادوب كم واحد بس ويسألوني عن البضاعه والسعر وبعدين مايتواصلوا معي مره ثانيه للاسف ..!
انا : اها .. وبعدين ؟
هو : وبعدين الله يسلمك التقيت بواحد من الربع وسولفنا في امور كثيره ومن ضمنها خبرته عن مشروعي وضحك لما قلتله سجلت بمعرف ولد وقال لي انت مافيك عقل اصلا ..
سجل بمعرف بنت افضل وعطاني عدة نصايح اسويها وبالفعل سويت اللي طلبه مني ..
انا : والله ؟ وبعدين ؟
صاحبي : وبعدين الله يسلمك نجحت نجاح ولا اروع هههههه
انا : اوهووو .. لالا مو معقول كلامك هههه وضح لي ياخي ..
وصل العشا وقمنا نتعشى ونكمل سوالفنا ..
صاحبي : الله يسلمك سجلت من جديد بإسم بنت واخترت اسم سوسو وحطيت صوره بنت نسختها من النت عشان تكون اللعبه صح ههههه
انا : الله ياخذ ابليسك على هالفكره الجهنميه هههه كمل وبعدين شو صار؟
صاحبي : قول شو اللي ماصار اصلا ههههه شو عدد المتواصلين وخاصه من الشباب شي ماراح تصدقه ولايخطر على بالك ههههه تصدق عددهم تجاوز ال 300 وانا اول 5 مو لاقي هههه ..
انا : ادري فيهم والله يبوا سبب نعم الله ياخذ ابليسهم بس هههه كمل ..
صاحبي : اول شي سويته طلعت رقم جديد وحطيت رقمي ونفذت كل تعليمات صاحبي اللي نصحني بها ومن ضمنها الغاء المكالمات والمسجات النصيه وخليت الواتس بس شغال ..
انا : ليش تلغي المكالمات .. غريبه ياخي ..!؟
هو : لا غريبه ولاشي بس نفترض احد منهم اتصل وخاصه الشباب وسمع صوتي اللي كنه صوت بعير شو ساعتها راح اسوي؟ ههههه
انا : اها .. صح والله معك حق فاتتني هذي اما انك ذيب نعم ههههه كمل شوقتني شو صار بعدين معاك ؟
صاحبي : الله يسلمك اللي صار كلما صحيت الصبح اشوف ولا 200 رساله على الواتس وتحديدا من الشباب ..
اللي كاتب صباح الحب واللي كاتب صباح الشوق واللي كاتب صباح السعاده سوسو واللي كاتب لك وحشه الغلا واللي كاتب فديتك سوسو .. الخ وانا اقرأ وميت من الضحك عليهم والله هههه .. وقام يوريني مسجاتهم ..
اللي راسل قلب واللي راسل ورده واللي راسل صورته وتحتها بشوي انا اسف سوسو بالغلط رسلت صورتي ههههه بالغلط ها بالغلط ..! علينا هالسوالف ههههه لا والبعض يدلعوه يقولوا له هلا وغلا السووس ههههه ..
قلت له ودموع عيني تنزل من كثر الضحك : الله ياخذ ابليسك مت من الضحك والله حتى ماقدرا اكل زين هههههه وبعدين ؟ كمل لاه ..
صاحبي : قمت اتعامل مع الجنسين بس بالواتس ولما يطلبوا شي اقولهم لو قدرت اطلع بجي بنفسي ولو ماقدرت برسل اخوي ..
عاد الشباب يتضايقوا لما اقول برسل اخوي ههههه بس احاول اهديهم عشان ما اخسرهم لاه ههههه ...
الغريبه البعض منهم ورغم اني اقول لهم برسل لك الاغراض على العنوان اللي رسلتوه خاصه اللي ولاياتهم بعيده عن مسقط يرفضوا ويقولوا لا بروحنا بنجي اصلا معنا اشغال بمسقط ههههه وانا عارف انه لا اشغال معهم ولاشي بس ترا السالفه فيها بنت لازم بيتعنوا وبيمسكوا خط عادي معهم ههههه ..
انا : انت تقول لي ..!؟ هههههه طبعا بيجوا بس لو قايلهم واحد من الربع تعالوا بيطلعوا مية عذر عشان مايجوا معه اعرفهم ههههه ..
صاحبي : شفت كيف هههه تصدق البعض منهم والله العظيم عرض علي يدعمني بفلوس عشان اكبر تجارتي واوسعها والبعض عرض يرسل رصيد بس كلهم والله رفضت اخذ منهم شي ..
صحيح انا لعبتها بهالشكل بس مش ممكن تسمح لي اخلاقياتي اخذ فلوس منهم لأن اللي يهمني بس ابيع اللي اتاجر به مو عشان اتعرف بفلان او فلانه ..
تصدق اني حظرت اكثر من 240 رقم لأن البعض منهم قام يقل ادبه علي للاسف يمكن عشان على بالهم انا بنت وكل واحد فيهم يبي يسولف معها ..
انا : ياربي .. بصراحه شي مذهل اللي قلته وعمري ماتوقعته ..
طيب هذا صاحبي وانا واثق من اخلاقياته وتربيته بس ياترى كم سوسو بكل مواقع التواصل الاجتماعي وراها شاب ..!؟
انتهت قصة صاحبي وانتهى العشا معه واعترف اني انصدمت باللي عرفته عن هالعالم المجهول كليا بالنسبه لي ..
طابت مساءاتكم ..

انتهى ... بقلمي
اخوكم / رايق البال

[أميرة الروح]

هههههههه ماهين طلع صاحبك عرف يمشي تجارته
بالفعل هذا واقع نعيشه مايصدقوا يشوفوا اسم بنت بسرعة يتواصلوا ولو مامحتاجين البضاعه
كل الشكر لك أستاذ على القصة الجميلة

[اموووره]

مساياااا ..❤

بصراحه جذبني العنوان هههه ..
اما ربيعك عرف يلعبها صح ..
فعلا الشباب تجارتهم عالنت ماتمشي زي تجاره الصبايا معرف ليش
قصه كوميديه رااائعه رايقنا ..
يعطيك العاااافيه ^^

[روانـــــووو]

مساء الخير من شفت سوسو دخلت استغربت العنوان أمانة ههههه فعلاً لعبها صح وهذه رسالة لسوسات الحقيقيات من المفترض إنهم يتعاملون مع حسابات البيع والشراء بحدود ولا أنصح أي بنت تروح بيوت الحريم إللي يبيعوا في الإنستقرام فساتين أو أعشاب طبيعية إلا إذا كانت فيه ثقة أو إنهم يعرفوها .. قصة جميلة / يعطيك العافية

[نوارة الكون]

ههههههههههههههه
ايه والله لعبها صح
بس بالفعل مب كلهم مثل صاحبك عندهم اخلاق
اغلبهم اخلاقه من عدمه
سلمت يمناك استاذي الكريم

[نديم الماضي]

هلا فيك استاذنا القدير بالفعل
كالعاده قصصك كوميديه وتعرف
كيف تقنع الطرف الآخر
قصه جميله ورائعه وفكاهيه
وكانت الخطه بالفعل مغريه لضعاف النفوس..

يعطيك العافيه مجهود طيب وسرد رائع للقصه..

[السفينة]

لا تنصدم يا عزيزي .. الانست فيه عجائب وغرائب .. وخصوصا اغلب التجار فيه معرفات بنات وهم شباب .. انا عن نفسي عندي حساب وبنفس معرفي .. وهذه الأمور صار معي .. لكن لا اعمل فيهم مقالب ولا شيء .. زفه محترمه اتخليه يدعم الباب قبل لا يطلع .. وفقت في صياغة القصة عزيزي .. بارك الله بك .. حفظك الرحمن ورعاك ..

[رايق البال]

هههههههه ماهين طلع صاحبك عرف يمشي تجارته
بالفعل هذا واقع نعيشه مايصدقوا يشوفوا اسم بنت بسرعة يتواصلوا ولو مامحتاجين البضاعه
كل الشكر لك أستاذ على القصة الجميلة

اميره
هههه دووم الضحكه يارب
بالفعل طلع ماهين ولعبها صح ههههه
الف شكر لمرورك وتعليقك اللي اسعدني
طابت مساءاتك

[رايق البال]

مساياااا ..❤

بصراحه جذبني العنوان هههه ..
اما ربيعك عرف يلعبها صح ..
فعلا الشباب تجارتهم عالنت ماتمشي زي تجاره الصبايا معرف ليش
قصه كوميديه رااائعه رايقنا ..
يعطيك العاااافيه ^^

امووره
ادري فيكم كلكم راح يجذبكم العنوان ههههه
بالفعل سبحان الله تجارة الشباب ع النت ماتمشي زي تجارة الصبايا
الف شكر لمرورك وتعليقك اللي اسعدني
طابت مساءاتك

[رايق البال]

مساء الخير من شفت سوسو دخلت استغربت العنوان أمانة ههههه فعلاً لعبها صح وهذه رسالة لسوسات الحقيقيات من المفترض إنهم يتعاملون مع حسابات البيع والشراء بحدود ولا أنصح أي بنت تروح بيوت الحريم إللي يبيعوا في الإنستقرام فساتين أو أعشاب طبيعية إلا إذا كانت فيه ثقة أو إنهم يعرفوها .. قصة جميلة / يعطيك العافية

روانووو
ادري فيكم العنوان راح يجذبكم هههههه
بالفعل كلامك صحيح والحذر واجب
الف شكر لمرورك وتعليقك اللي اسعدني
طابت مساءاتك