قــــــــــــصة الحورية

**العود الازرق** · 07-11-2014, 09:10 PM

كل ما ذعذع علي صلف الهـوى حدريـه

يكفخ فؤادي بـصدري قبل يكفـخ ثوبـي

خص لاجـا بـآردً ومذعـذعً عصريـه

يجمع اللي به من الذكرى وياتي صوبـي

قبل يلعب بي وأنا قـد ريت فـي ماريـه

ضايقً من صبح والهاجوس دوبه دوبـي

والله إن كنه يـداوي الجـرح بـالشبريـه

والجوارح من هـواه الصلـف ما صدوبـي

لاذكـرت اللـي رحـل وعيونـه الدريـه

كـل ما لديـت فيهـا تـهـت لا لـدوبـي

تمطـر عيونـي وخفاقـي سـرا ساريـه

ينعصر و أنـا دموعـي للوفـاء عذروبـي

صّمت عن وصل المحبه لانهـا عذريـه

والردى ما هوب من طبعي و لا بسلوبي

أذكر إنه قال لـي مـره وش الحريـه ؟

قلت عكس اللي لقيته منك يـا محبوبـي

أهتوي طاري هلـه مـن حبـي لـ طاريـه

والدروب اللي تجنبهم ما هـي بدروبـي

متعبً رجلي ولـو هـي صوبهـم عبريـه

و أبني أمالي على الترحيـب لاهلـوا بـي

أثرهم ناوين بالنية الشـريـه

وأثرهم دارين وأنا أقول ما شكوا بـي

و أثرني ضايع وأصـدق قصـة الحوريـه

وش ينجيهـم مـن أثامـي الى قفـوا بـي

جزت ما دام الهوى يبغـي عصـا سحريـه

وتبت ما دام القـدر عيـا علـى مطلوبـي

قد همومي ويـن ألاقـي الصيـد بالبريه

وقومةً في وجه ضيفي و أعرف ماجوبي

أصغر أهدافي تزول الدولـة العبريـه

و أكبر أمالي يغفر الله جميع ذنوبي