الجزء الرابع...
في يوم ما طلعت حنو من الكلية وجلس ابراهيم ينتظر والبنات يقولن خلا يالله نروح
وبنت عمه(سوسن) كانت معه بالباص حلقة وصل بينه وبين البنات وهي زميلة حنو المقربة
رسل لها رساله ....انتبهوا الزميلة المقربة وليس الصديقة المقربة...
ابراهيم: السلام عليكم....خلاص بمشي ماحد بعده
سوسن:عليكم السلام...ايوا خلاص روح ماحد
ابراهيم:بس شفت بعض المقاعد فاضية قلت يمكن بعدهن داخل بالمحاضرات
سوسن:لا ماحد ...حنان وتهاني وخلود ومروة راحن مع زميلتهن
ابراهيم:اها طيب ...مشكورة،،وعصب ويسوق بسرعه ..هع
حنو اتفقت هي وزميلاتها انهن لما يكون عندهن محاضرة وحده يروحن بالسيارة بس ابراهيم
ما عجبه الامر ...بدأ يتضايق لما ما يشوفها بالباص وعصبي لما يطلبن منه شيء ما يرضى
في يوم كانت حنو معهم بالباص وزميله لهن منومه بالمستشفى وبعدين طلعت من المستشفى
وكانت بالبيت فكرن يروحن يزورنها بس كانت المسأله صعبه ما عندهن وقت ويكونن مجتمعات مع بعض غير لما يكونن بالكلية ..قالن لسوسن خبري ولد عمك بيودينى بالباص ولما خبرته قالها يعني
كلكن كلكن بتروحن ماحد بينقص ردت عليه ايوا كلنا...ابتسم وقال تمام...ههههههه الحب معهن ...سبحان الله من هالقلوب تختار كذا وما تدري القلب الي اختارته يبادلها نفس الشيء ولا
حنو بدت تحس بنظرات ابراهيم لها غير ولما تشوفه تبتسم لا شعوري كأن قلبها بدأ يتحرك له وهي ما عارفه بالامر...
مرت الايام وبدأ ابراهيم يلمح لبنت عمه ويسأل كثير عن حنو حتى هي تضايقت من الامر ..
وحس فيها وانها ما تريد تخبره شيء...تفهم الامر وقال يمكن ما تحب تتكلم عنها مع شاب مو حلوة تسوي كذا....
المحاولة الاولى رسبت حنو في تراي الشارع بس المحاولة الثانية نجحت ...عبدالله حب يشتري لها سيارة في البداية موزة رفضت خايفه عليها ...بعدين وافقت بشروط ما تروح بنفسها الكليه لازم حد يكون معها ...واشترى لها سيارة وخلاص قالت لسوسن بنتقل عن الباص بس بكمل معكم هالاسبوع ،،بدورها سوسن خبرت ابراهيم انه بيقل عدد البنات ويمكن ندخل غيرهن (حنان وتهاني ومرورة ما بيكونن معنا ويمكن معهن سحر ونورة بس ما اكيد
هي تكلمة وهو مو معها..هههه يفكر في الحب ومعصب...حتى الكل بالبيت لاحظ عصبيته وعزلته الدايمة لوحده...فكر في الامر وقال ليش ما اخبر سوسن بالامر
بعدين تردد وتراجع،،،تذكر انه لما كانت سوسن مريضه وما تروح معه بالباص اخذ رقم حنو للتواصل مع البنات ومعرفه متى يخلصن وكذا....بدأ يبحث عن الرقم في هاتفه
في البداية تردد وقال مو حلوة اسوي كذا ...بعدين قال انا قصدي شريف واريدها بالحلال بس اريد اعرف اذا بتوافق ولا بترفض ...
رسل لها رساله
ابراهيم:السلام عليكم ...انا سائق الباص ابراهيم
حنو...شو يريد هذا ،،انا خلاص خبرت سوسن وعطيتها المبلغ مال الشهر...وفي نفس الوقت بداخلها تشعر بالفرح ...لكن تهون معها وكان لابد تتصرف كذا
..قالت لها طيب ردي عليه واطمني من ابراهيم مو من شباب الحين
ماشاء الله عليه اخلاق وماحد اشتكى منه يعني اكيد يريدك في امر ضروري ولا ما كان رسل
حنو...طيب بشوف شو يريد،،وعليكم السلام والرحمة ...هلا ابراهيم
تفضل بغيت شيء
ابراهيم : ياربي ليش كذا ترد علي بهالقسوة ...بعدين صدقها كيف تريدها ترد عليك بضحك
بتردد ...ايوا ممكن اجي اتقدم لك هههههههه بدون مقدمات مسكين ما يفهم
حنو:تهوون تعالي شوفي بسرعه هالرساله وابوي احس نفسي ما قادرة استوعب ..صدق طلع يحبني كنت حاسه بهالشيء بس مافاهمة انه هذا الي يسمى الحب
تهون:اووووووووه وطلع برهوم مو سهل كل هذا يطلع منه...
حنو...شو برد عليه
احم ثقلي يا بنت وصبري اخبرك شو تردي
حنو:تهوون ساعديني بيغمى علي....هههههههه مسكينة مو مصدقه حد يقولها كذا
ردي عليه فاجأتني والامر يحتاج تفكير..
ردت عليه مثل ما قالت لها
هو ارتاح من هالرد معناته انها موافقه انها تفكر في الموضوع
ابراهيم:تمام خذي راحتك فكري ومن تخلصي عطيني خبر وبقولك شيء
بصراحه انا معجب بك بشكل واتمنى ان تكوني من نصيبي
خلاص حنو من سمعت هالكلام صمتت وما ردت عليه غير
ان شاء الله وتهون تضحك عليها وتعلق ع الموضوع وتقولها الي يشوف شكلك
ابراهيم...متردد يقولها هالكلمة لانه ما يعرف شو بيكون ردها بعدين كتب لها
احبك وانت اجمل احلامي....عسى الله يكتب بينا نصيب وما اريد غيرك
حنو..صمتت وما قدرت ترد اختلطت عليها المشاعر وتهون تضحك على الموقف
وردت على رسالته بوردة حمراء
ابراهيم ...ضحك وقال استحت من جرأتي بس صحيح من وين جبت جرأه ويضحك على نفسه هذا الحب يسوي جنون
تهون...قبل من تفكري بنخبر يسوف وبيسأل عنه شوي عشان يكون التفكير صح وكل شيء واضح
قالت صدقك والله طيب الحين بخبره ..
تهون:ثقلي شوي الصباح رباح مو الحين بيستغرب يسوف بيقول بينكم شيء
خلينى نفكر في الامر زين....
حنو:طيب ...بقولك باكر بنروح بالباص
تهون:لا والله بدينا بالمعاكس من الحين صبري شوي بيقول ما صدقت نفسها اقول كلمتين
وعات في وجهي..
تمام انزين حشى بتاكلني ...مر اسبوع وتهون نست تخبر يسوف ، حنو مخجله تقوله
وفي نفس الوقت مو مخلتنها تروح بالباص ..عشان تثقل
وابراهيم ...ما قادر يصبر على الامر ,,
ورسل لها استفهام كأنه معصب
حنو...ياربي شكله معصب بدون كلام رسل استفهام ...ردت عليه
مساء الخير...هاليومين بيكون عندك الخبر
ابراهيم...تمام ...ههههههههه يتغلى من الحين حركات
المهم ما خلتها تهون ترسل له ووعدتها ..
اخر شيء حنو خبرت يسوف وحدها وراح يسأل عنه والكل يمدحه اخلاق وادب واهلة مثله
يوسف:يالله وافقي الولد زين والله يعيني الين ازوج الثنتين الباقيات ...هلكتني كل يوم طلبيه وعشاء اريد افتك منكن واهتم بنفسي شوي ...
حنو:هههههههههه ...بفاتح امي اولا بالموضوع يمكن تعترض
وراح معها يسوف وخبروها وما اعترضت لان ابراهيم عنده وظيفة ثانية غير انه سائق باص
بعد يمكن ثلاثة اسابيع ..راحت بالباص وكانت تشوف ابراهيم وتبتسم وهو بعد لاحظت سوسن
الامر ...بس سكتت
حنو رسلت له انه خلاص متى يريد يجي يتقدم يجي
فرح ابراهيم وكشخ ذك الكشخه واشتري عصير وكيك وشوكولاته لبنات الباص وتهون
مايته من الضحك....ياحليله الشمج كريم وحنو مستحية وكذا
بعدين خبرت سوسن بالامر
عصبت سوسن لانها اصلا تميل لابراهيم وتحبه وما عرفت شو تسوي تضايقت
اتصلت فيه صحيح الي سمعته انك تريد تتزوج حنو
ابراهيم :ايوا صحيح وبالخميس بنروح نتقدم
جاء الخميس وراح هو وامه(عايشة) وخواته الثلاث(سلمى وفاطمة وجواهر) ومعه عمه الكبير
لان ابوه متوفي وجده وخاله ...وتم الاتفاق بموعد الملكة وكل شيء..
سوسن رسلت لحنو رساله
هلا كيف الامور
حنو...الحمد لله بنصير اهل وانا فرحانه كثير كثير
سوسن:::خلاص اتفقتوا وكل شيء
حنو...ايوا الاثنين بتم الملكة بكون ما عندي محاضرات والخميس بنسوي حفلة الخطوبة
واكيد انتي اول المعازيم..
سوسن...مبارك ...اكيد بكون اول المعازيم ..زميلتي وولد عمي
حنو كانت كثير فرحانه شخص حبها بصدق وهي بعد وبيكون من نصيبها طنشت
محاضرة الاحد على قولتها تتجهز...
يوم الاحد الصباح بالتحديد سوسن متضايقة بشدة والغيرة عمت عيونها تتصل بإبراهيم
سوسن:اريد اقولك شيء قبل من تتم الملكة
ابراهيم:خير ان شاء الله شو تريدي تقولي ...
سوسن:تعرف ان حنو صديقتي وما تخفي علي شيء ابدا بخبرك بس خلي الامر بينا
ولا تخبر مخلوق لانه سر هذا..
ابراهيم :قولي بسرعه خوفتيني ...حنان فيها شيء
سوسن:حنو مريضه فيها كذا وكذا ومخبرينها الاطباء انها ما راح تولد ابد
والرحم ما فيها شالوه لان فيها ورم لما كانت صغيرة ....
ابراهيم:ياربي كل هذا فيها...طيب عادي راضي انا المهم اريدها هي وبس والطب الحين تقدم والحمد لله
سوسن:فكر بعقلك مو قلبك ...ماحد ما يريد اولاد وشو ذنب امك ما تشوف احفادها
ابراهيم:والله احس الدنيا ضاقت علي واحس نفسي تعبان
وكان راسل لحنو رساله يخبرها انها تستعد لازم بيطلب يشوفها
وردت عليه بعد ما خلصت سوسن المكالمة
حنو:وليش عاد تريد تشوفني وانت كل يوم تشوفني بالباص
استلم الرساله بس مارد عليها واستغربت من الامر كيف كذا ..معقوله ما يشوف رسالتي ومايرد
ونامت وهي حزينه... وفي الصباح بدأت تستعد للاستقبال اهل ابراهيم بالليل بس هو
من الصباح رسل ليوسف انهم ما بيجيوا ..وماحد خبرها اهل ابراهيم معصبين
ومخجلين من اهل حنو كيف كذا يسوي وما خبرهم السبب
سوسن فرحت وابراهيم بيكون لها خلاص واكيد
خبروا حنو بالامر واستغربت شو الي صار وبكت وخبرت تهون اخذت الهاتف
ورسلت له
ابراهيم ممكن تفسر لي شو الي صار وحد قالك شيء عني
ابراهيم:ما اتمنى غيرك ولا اريد غيرك احبك فاهمة هالكملة بس انصدمت لما
عرفت واكيد اهلي بيرفضوا ...والحين هم معصبين علي خليتهم بموقف صعب مع اهلك
بس مهما كان ما بخبرهم بالسبب
تهون(بهاتف حنو):وشو السبب وليش ما تخبرهم فهمني ...كيف تحبني وتسوي كذا فيني
دمرتني دمرتني...
ابراهيم...لا تقولي كذا لاني احبك ما اريد اعذبك معي بكلام الاهل والناس الي ما بيرحم
تعذبني ...عذبتني وخلاص انتهى الامر...
ابراهيم:قلت لسوسن ما بخبره حد ...انك انتي ما ممكن تولدي وما فيك كذا وكذا
انصدمت تهون من كلامه ...سوسن قالت كذا
ابراهيم :ايوا و..............
تابعونا ......
رد مع اقتباس
المشاركة الأصلية كتبت بواسطة روانـــــووو
ضوابط المشاركة
