♡♡همس ... (حنايا الروح)...السكون♡♡

[حنااايا..الروح]

الحياة أجمل عندما نحمد الله على ما ذهب منا ومابقي لدينا
وما سيأتي الينا

[حنااايا..الروح]

اليوم يوم أستثنائي
زميلتي بالعمل راح تطلع تقاعد من بعد خدمة 28سنه
اليوم اخر يوم لها وعاد مسويلها حفلة بسيطة

الشي المحزن على الرغم من شخصيتها الصعبة وتعاملها الجاف الا انها
الموظفة الوحيدة بالدايرة معاي
كانت مونستني ومقضين وقت انا وياها
والحين بتطلع وبصير بروحي بين مجموعه رجال
صراحة تعودت عليها
وعلى صراخها ..مسوية لنا جو
الله يوفقها ويريح بالها
أقولها وش بتجلسي تسوي بالبيت ..هنا على الاقل
نقضي وقت ونسولف ونشتغل
قالت خلاص آن الاوان انا نتنحى ونترك المجال لدماء شابة جديدة

تكمل المسيرة
على الرغم ان العمر الي عشتها معاهم ما يتعدى الثلاث سنين بس اعتبره عشرة عمر
ورصيد حافل بالذكريات الطيبة والاثر الجميل
أسأل الله ان يوفقها بحياتها

[حنااايا..الروح]

الحمدلله حمدا طيبا مباركا فيه
نعيش في كنف الله ونتقلب بنعمه
فالحمدلله ملء السموات والارض ومابينهما

[حنااايا..الروح]

لكل من من يبحث عن الجمال
أنصحكم بزيارة (يوميات صدى صوت)بالسبلة العامة
سرد رائع تجارب اروع وقلم يخط اعذب الحروف

http://up.omaniaa.co/do.php?img=9505

[حنااايا..الروح]

ياعالم الغيب والنيات سبحانك
رحمتك خيرٌ من الدنيا وما فيها

أسالك يارب توفيقك وغفرانك
وسعادة ما تخيب قلب راجيها

صباح معطر برضا الرحمن

[حنااايا..الروح]

الجانب المخيف في هذا العالم (الرحيل المفاجئ)
جنازة خلف جنازة
ربي إن كنت أنا القادمة فإغفرلي وإجعلني من ناطقي الشهادة
يارب اجعلنا ممن أحسنت خاتمتهم وغفرت ذنوبهم وابدلتها حسنات

[حنااايا..الروح]

مهما كنت رائعاً..كريماً..طيباً
ستجد من لا يحبك لأسباب لا تعرفها
فلا تنزعج كثيرا..فبعض البشر مجرد افواه ناطقة

[حنااايا..الروح]

من المواقف الي لازالت عالقة بذاكرتي
ان ولد اختي شوي متدلع ..بحكم انه ولد على كم بنت
وابوه رجال كبير
في يوم قرر انه يطلع من المدرسة لان ربيعه راسب وطالع من المدرسة
واونه ربيعه ينام متى ما بغا ويطلع ويرمس وهو يبغي يسوي مثله
(على فكره كان عمره 11سنه بس)

المهم امه بعد مايأست منه دقت على اخوي(اخوي هذا ما يتفاهم بلسانه كله بيده وله هيبة
وكل الصغار يخافوا منه ونعتبره المصلح الاجتماعي بالعايلة على الرغم هو بروح يباله مصلح هههه)

راح لها ابو الوليد وخبرته أختي السالفة ..ما قصر فيه كف مني وكف مناك ..يشوف يمين يسار
لمح مخمة (الله يكرمكم) جنب الزبالة
يمسكها وينزل عليه ضرب لين انكسرت فظهره(ياحليلك ياحمد كسرت خاطري نعم)
وبعدين شله المدرسة وقال للمدير اذا صار بيوم وغاب هالولد بس اتصلوبي وبجيكم خلال عشر دقايق


ومن يومها وحمد ولو فيه اما فيه ما التعب ما يغيب ..لا وصار يقوم اهله لصلاة الفجر ههههه

اليوم حمد عسكري برتبة محترمة فالبحرية السلطانية العمانية
متزوج وعنده ولد وبنت وحياة زي القشطة
وكلما نذكره بهالسالفة يقوم يضحك

اما ربيعه فكان الانحراف وللاسف الطريق الي سلكه

[حنااايا..الروح]

اللهم احفظنا من شتات الأمر
ومس الضر
وضيق الصدر
وعذاب القبر
وحلول الفقر
وتقلب الدهر
والعسر بعد اليسر
والعقوق بعد البر

صباحكم رضوان من الخالق

[حنااايا..الروح]