يا الله على مدونتي طايرة في الصفحات البعيدة العذر والسموحة روان مدحوحة 💔

ف هالأيام صايرة أكبر نفسية أمي تقول نفضي الفراش قبل لا تنامي وإقري سورة الملك دوم أحس في شي قابض لي فوادي 😢

بعيداً عن جو الكآبة✋اللي ما أعرفه ولا هو جوي في بنت تعرفت عليها من شهرين داخلة جديدة أسلوبها في نوع من الوقاحة و إحنا البنات عاد أونا حساسين 🙅 المرة الأولى بنسكت والثانية والثالثة لكن بعدين خلاص بيطفح الكيل هذا الأسلوب اللي تستخدمه معانا اونه قصف الجبهات ☺ كما ما تقول في مرة انا يالسة أتصفد ف حمام مبنانا قالتلي أنتي ما يفيد على هالويه اللي يتلامع !! هذا وأنا بعدني ما أعرفها زين ألحين أنا ويهي يتلامع محد قالي غيرها 🤔 💔 المهم دخلنا اللفت وحصلت جامة ونفس الشي قمت أتمقل في جمالي 😜 إلتفتت وقالت القرد في عين أمه غزال 🙊إنضغطت من هالوقاحة بس سكتت عنها لإن ما أحب أزعل حد مني .. كملنا مشي وألحين نحن واصلين الكلاس وكنا مسوين جروب ف الواتس فيه الشله كلها وأنا مسجلة مقطع صوتي وراسلتنه صوتي أنا يعني ** يوم سالفة طويلة ما يخلصني أكتب ولى الآنسة أقصد المدام هيه متزوجة مدام مدام تشغل المقطع بدون ما تحطه ع إذونها يعني صوتي واضح لا وبعدها عادته لما خلص 😲 والله الشباب اللي جدام إلتفتوا عليي وعليها .. !! هذا كله بحجة المزح وأنا بالذات المزح الماصخ ما أحبه لكن بعدني ما قلتلها شي وأنا ودي أقتلها ساعتها من القهر دوم لما أكلمها أو أكلم غيرها تقولي سكتي ترا ما تضحكين !!!

المهم يوم من الأيام أنا كنت طالعة من الإمتحان واقفة برا القاعة لما خلصت والإمتحان 3 نماذج وطلعت هذه البنت وأنا واقفة أخاسي فوني قالت لي سلامات علامك متوحدة ؟؟ ما رديت عليها متضايقة من الموقف الهمجي لما شغلت المقطع الصوتي قبل لا يحضر الدكتور 💔

المهم كملت وسألتني عن سؤال موجود في نموذج 1 يعني لا نموذجي ولا نموذجها ما أعرف كيف تعرف سؤال ما موجود في نموذجها 🙄 وأنا أرد عليها لما خبرتني السؤال الموجود في النموذج 1 إن نموذجي مختلف بس السؤال متشابه يعني هم طالبين في هذا النموذج شي والنموذج 1 عكس هذا الشي .. ردت علي بصوت عااااالي جدام أمة محمد أنتي غبية ما تفهمي الإستيعاب بطيء في ذا المخ ؟؟ مخ قواطي ما مخ إنسانة !!! أنا ابا منك الإجابة بس قصة حياتك ما تهمني وطبعاً لإني ماخذة في خاطري عليها من وايد مواقف سبيتها أقصد إن رديت عليها بطريقة وقحة جداً بنفس أسلوبها وبصوت رايق جداً وهادي أتوقع عرفتوه هالأسلوب ما أحب أستعمله وما من طبعي أصرخ أو أرفع صوتي والمكان مزدحم بنات وشباب لكنها ما زعلت علي وعلى ردي الوقح !! ومشينا مع الشلة وفي الكافتيريا لما تتكلم ارد عليها بنفس أسلوبها وأكثر يعني مثلاً تسولف ومتحمسة أرد عليها تاء 🏃🏃.. بعد ما بلعت الأكل الروج مالها ساح قمت أضحك عليها وأعلق على شكلها ولمعة ويهها وكل شي فيها بنفس طريقتها بالضبط ودوم أسولف وياها بطريقة وقحة وسخيفة مع إنه هذا ما أسلوبي بس حبيت أعرف إذا أنا حساسة زايدة عن اللزوم ولا هيه زودتها .. توني فتحت الواتس وحصلتها داقتني بلوك 💃💃

اكتشفت أنها ما راضية عن شخصيتها ..!! لأنه لو راضية ما بتزعل هذا أسلوبها معانا وأنا ما سويت شي غير تقمصت شخصيتها واستخدمتها معاها ولا يعني أنه هيه تحس وغيرها لا تو زين كذاك لا صاحب ولا غيره داقة كل الشلة بلوك 😒

المهم أوني أقول بعيداً عن جو الكآبة وأقولكم ذي القصة الفواد غايب المهم في واحد يموتني من الضحك اسمه محمد العريمي مبتعث ف أمريكا ويعرض يومياته ع السناب لقيت سنابه ف إنستقرامه يسولف باللهجة السويقية 😍💪 خاطري أتكلم مثلهم ربيعيه اميه أبايها صديقتيه عموتيه أختيه مستشفيتيه حديقتيه مدرستيه جامعتيه كليتيه تقنيتيه كني مصختها شوية !! المهم طر سوالفهم

انزين سمعوا قصة أختكم المفهية مرة كنت أمشي ف إحدى الأزقة الضيقة و 3 رجال وراي وأنا لابسة كعب بس جداً سهل للحركة وسلس وأمشي طاااايرة أسمع صوت من بعيد السلام عليكم أختي !! وأنا أمشي ولا حتى التفتت الله وكيلكم أركض ما أمشي وذيلاك وراي السلام عليكم أختي والسلام عليكم نزلت من الدرج وهم وراي مريت صوب الكانتين وهم وراي وأنا واثقة الخطوة كالملكة لا ألتفت لا يُمنتاً ولا شمالا ما وقفت إلا عند اللفت 😌🙊🙊
وقفوا وقالوا لي السلام عليكم أختي ! رديت السلام قالوا ممكن ناخذ من وقتك خمس دقايق ما تكلمت بس هزيت راسي وفاكة حلقي علامهم ذيلا 😩 أنا ماشية عند ربيعتي ما معي فلوس يوعانة أبا الكانتين !

طلعوا اونه مال أريدو وعمانتل وجايبين كاميرات وميكرفون لوهله حسيت نفسي أنجلينا جولي 💣 🏃 يركضون وراي بالكاميرا والميكرفون امزح امزح المهم تغاضوا عن هالنقطة تموا يسألوني أسئلة نظام التشغيل وما أعرف شو والله عبالي إمتحان كله أهزهز راسي ولا جاوبت ولا بطيخ هم يسألون ويجاوبون بروحهم المهم واحد منهم حس إني مفهية وطالبة فاونديشن وسألني كم عمرك ؟؟ قلت 19 سنة .. آلتفتوا على بعض وقالوا أهااا وضحكوا وفجأة تغيرت نبرة الصوت وقاموا يمطوا الكلام كنهم يكلموا وحدة عمرها 5 سنين واحد يقول كم تعطين خدمتناااا من عشرااااه ؟؟ ويصفق بإيدينه فهمتوا ذي الحركة 😐
وتموا يمطمطوا الكلام بعدين قالوا يالله يا مااااااماااا روحي الكلاس !!! والله إنصدمت عاد صح إنه شمس وحر وعقلي ما معي بس صراحة أكره شي ف الحياة العلمية والعملية تحت ظل والديكم الكرام السموحة تحمست أقصد يوم حد يمطمط الكلام تكلموا زين ياخي وعن التسحيبة الماصخة ذي 👊

أبا نسكافيه وأبا أتعلم أطبخ أشياءات قديمة دوم لما أدخل المطبخ اسوي عادة بايخة ومالها معنى أحط سماعات ف أذانيي وأطول ع الموسيقى أسمع راشد الماجد 😂 متعذبة الأخت ☻ ما بس كذاك كنت أتسمع من اسمه خالد عبد الرحمن وأصالة !!

وتقشبني أمي عشان مايدخل الجني في رأسي الجميل بسم الله 😨

ويش بعد أبا اخبركم كأن السبلة بادية تموت أحس هدوء غريب فيها اللي يحس مثلي يتذكر السبلة عام 2009 و 2010 و2011 وينطب 😝

مدونتي هاذي فتحتها وأنا رايحة صف 12 سبحان الله تو انا وياها نكبر مع بعض هيه قطعة مني وأنا قطعة منها 👣

بدا التحشيش عاد أحسن لي أدقها خمدة لكن أبا نسكااااااااااافيه 💔💤