مدونتي الشادوهية ,,™ شي غريب ™,,

[shadow_86]

نفس الوقت وفي دبي:
وبالتحديد في المستشفى _غرفة الملاحظة:

منصور على ذاك السرير وابوه جنبه .. وذياب كان يتصل بأبوه يخبره بالي صار عشان اييهم ...

الدكتور دخل ومعاه الممرض الي راح ياخذ دم من منصور ..

الدكتور يكلم حمد:...حمد بناخذ منه دم شوي عشان نشوف كم واصل الهيموجلوبين عنده .. وانا اشوف وضعه الحين احسن (وهو يفحص الشاش).. كلها شوي وبنطلع هذا الشاش من خشمه .. وان شاء الله بنسوي له كوي ..

حمد يشوف على الدكتور:.. دكتور نزف وايد تراه ..

الممرض سحب دم ..والدكتور كان يقرب الادوات عشان يبطل الشاش:.. عين خير يا حمد ..

حمد شاف على منصور .. وما بيده شي غير الصبر والدعاء ...

الدكتور كان يحاول يبطل الشاش بكل عناية عشان ما يبسبب اي نزيف .. ومنصور كان وضعه شبه يالس متاكئ وراسه على السرير ..

وبحمد الله بطل الدكتور الشاش ... وكان النزيف شبه متوقف ...

الدكتور:...الحمدلله ...وضعه احسن والحين نقدر نشله ونسويله كوي ...

حمد فرح من داخله وقال: الحمدلله رب العالمين ...

ذياب شاف على منصور:..منصور ؟.. شو فيك ؟

الدكتور يكلم منصور:... منصور ! ..

حمد وانخض قلبه :.. لا ... منصوووور .. ولدي ..!


منصور فقد وعيه .. !

وفقد الاحساس بكل شي حواليه .. !

اسعفوه بسرعة غرفة العمليات .. وهناك حطوله دم لان دمه نقص .. ووضعه حرج خصوصا مع الالتهاب الي فيه ..

وسوله كوي الي الحمدلله ما طول .. عشر دقايق .. !

ولكن هذي الدقايق كانت على حمد مثل اليمر على فؤاده ..

عقب حطوه تحت الملاحظه ...

حمد تعبان ..!
ووصل عنده اخوه ضاحي ..ووقف ينبه .. وما خلاه لين وصله غرفته عشان ياخذ ادويته .. ويشوفونه الدكاترته ... وكان يتريا خبر عن منصور ..

والحمدلله ياه الخبر بعد نص ساعة /

الدكتور يدخل عليهم وعليه ابتسامه:.. يا حمد قوم ... قوم .. سير شوف ولدك .. يترياك ..

نش حمد من الفرحة .. وضاحي وذياب يسندونه .. وخلوه على كرسي متحرك .. وراحوا كلهم عند منصور ..

وعند باب غرفة الملاحظة..

حمد يكلم ذياب : وقف ذياب ..!

ذياب ولانه يدز حمد بالكرسي.. جان يوقف:.. هاه عمي ..شو هناك ؟

حمد وهو يحاول ينش من على الكرسي:.. نششني الله يخليك... ما اريد ادخل علي منصور بهالكرسي ..

ذياب شاف على ضاحي وابتسموا لبعض:.. ان شاء الله عمي ... قوم خلني اسندك .......

حمد وضاحي على يساره ..وذياب عن يمينه ..

ودخلوا على منصور ..


..

منصور على السرير وكان واعي ..
ويوم شاف ابوه ... ابتسم له ابتسامة شخص متعب وكأنه يقول "طار الشر يابوي".. ووصل حمد عند راس ولده وعاد يروم ينحني ولا ما يروم ذاك الوقت، انحنى وحب ولده على راسه ..

حمد يشوف على ولده:.. شحالك يا ولدي الحين ؟

منصور يمسك ايد ابوه:.. الحمدلله رب العالمين ... احسن ...

الدكتور:.. ان شاء الله بتكون بخير .. واوعدك يا حمد .. باذن الله تعالى ما بيحتاي تشلونه لندن ..

حمد فرح بكلام الدكتور:.. ان شاء الله دكتور .. الله ييزيكم خير ما قصرتوا ...

ذياب ابتسم ونفس الشي ابتسم ضاحي ..

مسك حمد ولده من يده ..وخذ نفس عميق..وقال من بعد ذاك التعب:...الحمدلله رب العالمين ..

منصور شاف على ابوه ورد وقال:..الحمد لله يا بوي .. الحمدلله ان انعم علي بأبو مثلك ..!







مر يومين على منصور وهو في المستشفى .. والحمدلله تعافى ... وما كان له داعي يشلونه لندن ساعتها ...
ولكنه راح يراجعهم بعد 3 اسابيع يوم تعافى ابوه من جروحه... ومرة وحدة راح حمد يتطمن على نفسه من جروح الحادث..

رجعوا من السفر وكانت صحتهم زينة .. وحياتهم بدت ترجع لمثل ما كانت عليه بفضل الله ..










.(نقطة)

(حلقة مفقودة بإسم حمد)






في البريمي وفي نفس السنة ابريل 2009 م:
يوم الاربعاء:
وقت الناس راجعة بيوتها لإجازة الاسبوع

بيت سهيل

سهيل يجادل ولده ناصر: وليش ربيعه ما راح بتكسي ؟؟.. الحين طالع من مسقط وبيلف صوب عبري....
ناصر:..تراه هو مستوي تكسي .. شو تباني اقول بس يا ابوي ..
سهيل يشوف على ناصر:..هذه ثاني مرة يسويها .. انا ما عايبتني هالشغلة ..
ناصر:..ماعلي يا الغالي .. يوم يوصل بالسلامة تفاهم وياه .. تراه ما يردلك كلمة ..
سهيل:..انا مآوي عليه .. تعرفه بروحه مريض ..





وفي الطريج من عبري للبريمي:

بدر: وين بتحصلون حد شراتي هاه ؟
سالم يشوف على بدر:.. بسك بسك .. ذليتنا نعم ..
عمر يالس ورا:..نعم انه ما سكت من يوم ظاهرين من عبري ..
بدر يضحك عليهم :.. لازم احسسكم ههههه...
سالم:...انزين يا ريال لا تسرع …
بدر يشوف على العداد:..والله ما اعرف كيف موصلنها 160 كم ..
سالم يشوف على بدر بنص عين ..
عمر فجأة يصرخ:…..بدررررررررر... انتبه …..

وبعد صاع ..
وعلى طلعة ..والوقت على المغرب...
وعلى سرعة .. تولف كله ..

ثواني سرح بدر وشل عيونه عن الشارع ..

كانن ثلاث نوق يقطعن الشارع …
ماشي مجال ..

بدر عرف انه لازم بيدعمهن :..لا اله الا الـــ....

.
.
.

يتبع >