｡• روان ومدونتهـــــシــا •｡

[روانـــــووو]

🙄
ما إهمااااال بس يعني أقصد إن هذا شسمه يعني إني صايرة كسولة وما فيني بارض بعد الغرفة مزبلة أشرب الماي وأولف الدبب ويوصلني القصف إنتي عايشة ف زريبة 😔🚶💔

بس صدق أحس فوادي قابضني ما أعرف ليش مع إنه مقرب رمضان وناسة المهم بعيداً عن الجو الكئيب كانت تدرسني معلمة بس ما معلمة يعني لما بالصف الخامس درستني مهارات حياتية إنتداب أو شي من هالقبيل ما أكيد يكون إنتداب يمكن تطوع أصلاً المعلمة اللي تاخذ إنتداب يعطوها راتب .....؟؟؟؟ !! ماعرف اللي أعرفه إنها كانت تدرسني مهارات وبعدين قامت تبيع بالمقصف ومسكت الشغل مال بنات التقوية وألحين هيه أون مدخلة بيانات في الإدارة عينتها الوزارة 😐

زين وأنا صف خامس هيه تعرفني وتعرف كل بنات الصف مالا أنا المهم شافتني وأنا أكبر جدامها يعني من عمري 11 سنة لحد سطعش بعدها طلعت من المدرسة ورحت المدرسة ثانوية وكانت إميزتني والله العظيم وهيه تمسك الرحلات تختار من اللي بيروح يوم كانوا يعطون أوراق موافقة ولي الأمر أنا عاد مستلمة 😌
حركات بعد المهم مرة عاد ^^ تو بيبدا الكذب ههههههه كنا طالعين من حصة الحاسوب وهيه تبا بنات يكتبوا أرقام وبيانات يساعدوها ف أشياء بسيطة وراحن كم بنت والبقية وأنا من ضمنهم روحنا الصف بس قامت وزقرتني قالت تعالي أنتي ؟☻ وتمت تسولف معنا وتمزح و مرة غير بنات صفنا مسويات إزعاج وفاتحات الكيبل مال الكهربا وقاطعتنه بس نقطة تضغط عليها وتبند الكهربا في الطابق الثاني يعني اللي هذا ونحن صف عاشر وصلت حصة الرياضيات وتدخل الأبلة الفصل وكان حررررر اونه البنات مسويات هالحركة عشان ما يدرسن إنزين تقوم أبلة الرياضيات وتفتش الواجب وطلع الصف كله ما حالنه إلا كم حبة اللي مهتمات كان تقولنا ثنتين ثنتين وع الإدارة بس ما إنها وايد معصبة قالت لنا نروح عند الأخصائية وذيك ماشي أبرد منها هههه نعم بااااااردة لأبعد درجة تحس تسويلك تنويم مغناطيسي يوم تسولف تنود وتثاوب لين بس المهم ونحن نازلين الدرج تشوفنا معلمة التوجيه كان تقولنا ليش طالعات كذا من الحصة على وين ردن عليها البنات اللي ورا رايحين رحلة ويضحكن وهيه صدقت ...!!! وصلنا عند الباردة وقلنا لها إنا أبلة الرياضيات مطرشتنا عشان نحن ما حالين الواجب وتمت تقولنا اهتموا بالمادة وانتوا ع أبواب الثانوية ولازم شسمونه وكذاك وتدخل مال التوجيه اللي لقيناها عند الدرج ومعاها مدخلة البيانات وتموا ينازعونا وهذا استهتار وعدم اهتمام ولاااااامبالاة وعاد مال التوجيه معصبة لان البنات كذبوا عليها وقفونا بالطابور اليوم الثاني حتى المديرة صرخت علينا هيه صوتها لما تتكلم عالي كيف عاد لما تصارخ و ف هالأجواء المكركبة سحبتني من ايدي من بين كل البنات مدخلة البيانات ..! وسلمت علي وقالت لي لازم ما تتصرفي كذا وتحلي الواجبات ولا تتأثري بالبنات والحركات وأصدقاء السوء وتمت تنصحني في الدراسة وبس انزين يوم عااااد من الأيام كنا حصة رياضيات بعد ويدق الباب وطلعت مدخلة البيانات وفي ايديها ورقتين موافقة ولي أمر حق بنتين بس يروحوا رحلة مسقط 😍😍😍😍😍 عطت الأولى ونادت الثانية طلعت غايبة قالت لازم نعطي حد الورقة اليوم لان الرحلة باكر وتموا البنات يرفعوا ايديهم ويصارخن واحتشر الصف وأنا جدام موقعي و أصارخ بعد أبا أروح الرحلة بس هيه عينها ما تي صوبي لاني ما موالمتنها ولما التفتت علي سييدة عطتني الورقة والبنات بعضهن ما انتبهن انها عطتني وبعدهن يصارخن قالت خلاص خلااااص اخترنا روان 😃🙈

ومرة في وحدة من البنات مشترية شنطة اللي يعلقوا عليها كاب من ورا وعاد بنات صفنا ما عدهن سالفة اونهن مسويات مقلب فيها ماخذات الكاب وضاماتنه معهن وهذيك تدور عليه رحنا أنا وياها عند مكتب الباردة وخبرناها على البنات من باب المزح اون .. رايحين نزعج الإدارة بتفاهتنا المهم خبرنا وطلعنا وأنا طالعة نادتني الأخصائية قالت أشوف التفت ولا طلعن البنات رابطات شيلتي مسويات عقدة هههه وضحكت هيه والثانية وقلتهلن أنا ما أعرف من اللي عاقدة شيلتي قالت الأخصائية أنا أعرفهن حركات البنات قالت مدخلة البيانات ياخي روان يوم تتكلم تعجبني قسمبالاه قالت كذاك وأنا متبوسمة طلعنا أنا وربيعتي رحنا الصف

ولما تشوفني هالمدخلة بالمرر توقف وتسلم وكانت طيبة في تعاملها معي جداً حتى وأنا طلعت من المدرسة ورحت مدرسة غير كانت اطرش لي سلامات مع أختي الصغيرة دايما وتسأل عني وين انقبلت وما أعرف شو المهم خذت رقم أمي من عند أختي اللي هناك ف المدرسة وصار اللي صار 😭😭😭😭😭
والله العظيم استغربت طلعت كذاك سوووووالفها بس أمي ردت من راسها حتى ما قالت لي ولا أبوي ما يعرف تقولها البنت تبا تكمل دراستها ههههههه ^^ الشيمة 🌚 والله أنا عرفت بسالفة بعد كم يوم المدخلة اتصلت وأمي رفضت وبعدين خبرت أبوي وقال أحسن وأنا خبر خيييررر ...!!! يا ف الجامعة أنعش يا ف البيت فاتحة المدونة أكذب يا شسمه حتى أختي أصغر مني بسنتين تعرف لكن كيفهم انزين خبروني ياخي هههههه !!!!

صح عند بيتنا في الحارة يعني عرس ، عرس من ؟ عرس وحدة بتتزوج أخو زوجها المتوفي يعني ريلها مات خذت أخوه !! ويع أحس ما حلو الإنسانة هذه عندها بنتين صغار وأم زوجها القديم الميت أصرت أن ولدها يتزوج زوجة أخوه لما مات وهيه تصير بنت عمهم أحس غريب هو حلال بس ماعرف كيف يعني كلهم يسكنوا ف بيت واحد اللي هو بيت العايلة وتشوف أخو زوجها هناك وفجأة تنتقل من هنا لهنا 😳 ياربي وبعد مسوين حفيلة صغيرونة عائلية كان ع أساس يتزوجها الأخ الأكبر متزوج وعندها أولاد بس هيه ما وافقت قالت تريد ولدهم اللي ما متزوج من قبل ..!!! ألحين لو حملت بناتها بيصيروا خوات وبنات عم بنفس الوقت 😦 أحس صصصصصصصعب كيف وافقت واااه أنا إنذُهلت !


من سنابي ترا الصورة متعوب عليها بشدة لسببين الأول التصوير من السيارة الثاني ( الميدالية متدلدلة من جدام ) وبس عشان كذا ما انضبطت صح ..!!!

ههههه لحظة اتذكرت بعد سالفة اليوم ما بسكت نعم انزين لقيت بنت معنا في المدرسة اللي فيها المُدخلة بس أنا لاني نطيت مدرسة غير فما حصلتها هناك يعني كنا شويتين صديقات أنا وياها مرة رايحة الكانتين أشرب عصير برتقال وسنكرز ولقيتها هناك ورحت أسلم عليها ولو حد يشوفنا كيف نسلم على بعض وكيف فرحانيين ومن زمان ما متلاقين يالله من سنتين ماتلاقينااااا مشتاقتتلش الدبة ومن هالحكي هذه المحادثة اللي درات بيني وياها عطيتها رقمي قبل ما كان عندي فون هههه المهم ورسلت لي في الواتس وكذاك عاد قمت وايد أتصادف معاها مرة عند البوابة وأنا مروحة البيت كنت يالسة وأي حد يمر لازم بطيح عينها فيني لان موقعي من صوب السكيورتي وهيه اتطلع تصريحها خلت عمرها اونه ما شايفتني وأنا فيني ضحكة مشيتها غريبة عيل حد يمشي ومطير عيونه ف النخل على شو تعايني يا بنية المهم قلت ما بظلمها يمكن عادي بروحها تحب النظر إلى النخيل تعرف صرم ولا لا 😂😂😂😂😂 استغفر الله أمزح لان لو نزلت عينها بطلع أنا وهيه اونه ما شايفتني ضحكتني ياخي حركة عيونها ومشيتها اللي ع جنب ياخي عادي لو وأنتي ماشية السلام عليكم ع السريييع بسم الله ما أحيدني أكل الأوادم المهم مرة 2 كنت أمشي في الممر وتصادفنا أنا وياها بس طلعت لها وجه بوجه هالمرة يعني ما يصير تخلي عمرها ما شايفتني وسلمت مرة غير بعدنا تصادفنا والله عاد هنا أنا ضحكت قسمبلاه ضحكتتت ما قدرت أنا واقفة جدام مرة وهيه ياية تمشي بتروح وعينها مثبتة إلى الأمام ومشت سييييدة وراسها شامخ مرفوع فوق وأنا ضحكت بصوت وما انتبهت عنبوهاااا هالكثر مغيبة ههههههههه والله البنات أفلاااام هندية بعد السلام لله

رمضان يااااانا يوم السبت اوين خلاص بيكون من كذاك اليوم أحش ف أمة محمد 😂😂💔 يوم بيدخل رمضان ما بذكر ولا موقف في المدونة إلا شوية على حسب يعني مواقف عادية ^__*

اللهم ارزقنا رحمتك وغفرانك ورضوانك وبلغنا الشهر الفضيل لا فاقدين ولا مفقودين

السيدة الأولى تشوفي كيف يخلصني أكتب ههههه قولي ماشاء الله عن تصوبين فيني 💔

[روانـــــووو]

مشالله علي شاااااي ف عز عز عز الحر وموهامني شيييي



الجو روعة والمشاعر حية 😂😂😂

انزين ..!!
قبل شوية الضحى رحنا بيت خالوتي المربية نشوف بيبيهم يالله كيف عسلسل وفاتح عيوناته وكذاك يطلع لسانه ياااااربييي 😭😭😭😭😭 م شاء الله م شاء الله أحلى من قبل كان لونه أحمررر لما شفته بالمستشفى ذبت أنا خلااااااص من أول ما عطتني ياه خالتي وسدحته ع ريولاتي نام بالمرة وتميت أسحبه وأحاول أقومه وبدون فايدة والناس تسولف هناك الحريم مرتبشات وكل وحدة تتكلم وتقحم الثانية و كل المواضيع عن الحمل والولادة حسيت نفسي غلط وأنا قاعدة معاهم ذيلا جاراتنا ما مقصرات يسولفن بأدق أدق التفاصيل اونه في وحدة منهم حامل ويخبرنها عشان تستفيد كذاك شكلي كان يوم كنت يالسة أتسمع

😂😂😂😂😂 ياخي تذكرن ان فيه شخص معاكن سولفن عادي بس رفقاً بي !!!

ما علينا دوم الحريم كذا لما يشوفن بعض يتحمسن وينسن حتى أولادهن ذيك بنتها تضارب تبا همبا وهيه تسولف وتقص الفوالة وتضحك وبنتها ترفسها ف ظهرها ويات على يمنيها وشمختها بالسكين أعوذ بالله 😦 خليت ولدهم اللي من ساعة وأنا أمطط خدوده وعفدت أييبلهم لزقة جروح والأم تهدي بنتها اللي يوم شافت الدم بغت تصيح ولا هو ما يعور ورجعت تكمل ضحك على السستر اون 😂😂😂😂

ياربي ذا الحريم فن فن يلستهن حبيتها قسمبلاه إزعااااااااااج ❌

[روانـــــووو]

سكتوا عني مافيني بارض ح ولا شي غير أني أشخبط ف مدونتي💔
قسم بالله ضيقة غير طبيعية ف قلبي بيي رمضان وبتطير ومتأكدة !! منتظرة الإجازة بفاااااارغ الصبر باكر بداوم ح اللعب م عندي شي بس بروح أتحوط ف الجامعة وبعدين بمشي عند الدكاترة أتملق قصدي يعني أسألهم عن طبيعة الامتحان ووايد عندي أشياء بعد أسألهم إياها نعم المدرسة أحلى بواااايد والله العظيم المدرسة أحلى أحلى 😢

ما أحب النكد بس نكدية أنا ذي اليومين لا أٌطاق فعلاً لا أُطاق ...!!!!!

ما أحبني يوم أصير كذا 😢😢😢😢💔💔💔💔

يومي تعيس بدايته الصبح أول ما فتحت عيوني حصلت صراخ محترم من أمي الله يحفظها ومعصبة علي وتتنازع طلعت تقومني ح صلاة الفجر وأنا ما راضية أقوم ما سمعتها قسم رقدت متأخر أمس يالسة أكتب مشروعي لين وقت وما غمضت عيوني إلا س 3 أو 3 ونص من التعب ما قدرت أنام آخر أيام التسليم عاد أستاهل يوم مأخرتنه لين هالوقت بس تخيلوا كنا نشتغل عليه من أول وجهزناه وضبط طلع ما عليه درجات والمستر يقولنا زين تتعلموا من أخطاءكم ولا تكرروها بعدين وخلانا نسوي واحد غير عشان كذا تأخرت في التسليم وانتظرت لين آخر الأيام 💔

رحت أتيدد وأمي ما رحمتني انتي دوم كذاك ما مهتمة بالصلاة ولا تحاتيها بس فالحة تضبطي منبه وياريت لو تقومي بعد !!!! وصليت وتجهزت للجامعة بس ما حطيت ولا نتفة ميكب حتى روج ما حطيت ولا ولا ولا شي كذاك رايحة دخلت الإستراحة أكتب وأخلص أشغالي من ساعة 7:55 دقيقة لين الساعة 10 وبعدني ما مخلصة كل شي وما ماكلة ولا ولا شي غير كوب ماي ورحت المحاضرة مال 10 والمس ما حاضرة 😐 والمبنى بعيد عن الثاني والجامعة يبنوا فيها وما يستوي نسوي إزاحة وعاد اضرب خط في الشمس أنت وكعبك والهواء يطيرك وشكلك 😷 من غير ولا ميكب وتمشي في الممر تلقى شخص ما المفروض يشوفك وأنت بهلحالة 😭😭😭😭😭😭😭

تضيقت نعم ولا أفتح فوني وألقى البنات راسلين تعالي ضروري المس جات كانت في اجتماع رديت عليهن
اني ما بحضر تعبانة أنا ووجهي قالن أون مسوية امتحان عملي لان درجاتنا زفت × زفت ومفولة عليييييييينا رحت أركض وأنا متأخرة وما وحيت ألطخ عمري ألوان دخلت متأخرة قالت لي بعصبية 😳😳 آووووووووت طلعت وسكرت الباب ع الخفيف وعيوني ف الأرض ورجعت ولا تطلع وتناديني ورجعتني القاعة وامتحنت الله يستر لا يكون خبصت 😔

وطلعت من الإمتحان وصديقاتي داخل في اللاب وبعدين يرسلن لي ف الواتس يسألني ويني؟ وأنا أفتح محادثتهن أقراها بس ما أعرفني ليش ما أرد رحت بروحي مصرة هالبنت تحط مكياج ههههههههه عبيت وجهي ورسمت آيلااااينر بعد بغير نفسيتي طلعت لما صرت حليوة وإلا يتصل أبوي راجع من الدوام رديت عليه قال أنا برا بنتظرك إذا مخلصة !!!!! فعلاً كنت مخلصة سلمت مشروعي ورجعت البيت يعني يوم كنت خبصة ووجهي شاحب ولاعبة الشمس فيه لعب ما بقى حد ما شافني ويوم شسمونه اروح 😒 دخلت البيت وأتفأجأ الغدا سمك وأنا خلاص بطيح ع الأرض من التعب والجوع بس ما تكلمت ولا تذمرت ع الغدا وكلهم يعرفون أني ما أكل السمك يات أمي تباني أتغدا وهم أصلاً متغدين عني خلاص لان راجعة 2 ونص البيت قلتلها ما يوعانة قالت يالله انتن مدلعات وكلة تبن ذا الدياي مضروب ابر ما يفيدكن قلتلها لا لا تغديت في الجامعة .. !! بس عشان تخليني وتروح 💔

وما جاني نوم من الجووووع هع

والعصر طووووويل .. بالليل في الجروب رسلوا لي درجاتي وع كثر الجوع اللي فيني تعشيت خبز وجبن وداغوص وبطاطس وبس حتى بدون شاي والله يوعااااااانة بكلكم كلكم تو 😔😔😔💔💔💔💔💔💔💔

[روانـــــووو]

أبشركم النفسية اليوم عال العااااااال 😃👋👋
بلا نكد بلا هم بلا مواضيع تجيب الغم الله الله على القافية ☻
مع إنه اليوم البيت جوه ما كان طيب بس أنا من داخلي نفسيتي أحسن بوايد من أمس والله والله 😍

اكرههه حركه اكتب وشاده حيلي واخر شي امسح الكلام باللغلط ����
المهم قايمه على صوت موظفه في شؤؤن الطلبه �� تكلمني عسب راعي السكن المهم الي غمني انها بنت مفروض تسمعني بس ضاربتني طاف الله وكيلكم هههه مصره انه راعي السكن مسكين وريال فقير وحقه هذا
والقهر وهيه تكلمني انود �� تقولي وينج وبعدين اقولها هني موجوده تتكلم واسكت �� وقسم النومه ماثر عليي
محد قال لهم يتصلوا بوقت غلط
بس الي غامني
ليج الحريم بشكل عام يسمعن حق الرييايل ويسولهم سالفه ترى احنا بنياات مثلكم عادي يعني توقفون معنا � وتسمعونا� وتمشوا امورنا مالازم تعقيدات فيس ابو دمعه
اما الرييايل اللعكس والله يسمعونا ويمشوا امورنا الدنيا خربانه الله وكيلكم
طبعا ماكل اصابع يدكم وحده بس اتكلم عن معظم البنات كذا

تو وش ذا كاتبة بالأصفر عشيتينا *____* !! بس بغير اللون ف الكلام اللي أريده للأسود أنا أختار الألوان بعناية شديدة خوفاً مني على مقلة أعينكم المهم ترا هالكلام صحيح وأنا أشهد الحريم معظمهن وف كل مكان معقدات يعني يهولن بالمواضيع والقانون ما يسمح والنظام ما يسمح ..!! ولا يتساعدن عكس الرياييل يحلوا الموضوع بسهولة أنا يوم أطلع من الجامعة ويكون رياييل ما يتموا يشوفوا تصريحي ويدققوا فيه مثل الحريم اللي حتى يسألني اللي ف السيارة من ؟؟؟ سلامات وش دخلكن تصريح مفتوح مفتوووووووح ماخصكن بعدين هالسؤال غبي يعني واضح أن ريال مابا أقول كبير عن أبوي يعني ناضج في سن الرشد 😂😂 من بيطلع صديقي مثلاً غبااااء يوم سألتني وحدة أذونها ف خشمها من اللي ف سيارة ما رديت عليها ومشيت غير أن أسلوبها وقح سؤالها بايخ يعني شخص في سن الرشد أكيد بيكون أبوي مايبالها كمياء ولا فيزياء واللللاااااااه 😒

وخذلك ستين مثال في المراكز مثلاً مرة مرينا ع المركز هاجين من عمان صوبهم بنسويلهم زحمة شوااااوع وحرمة هناك طلع القبيلة اللي مكتوبة حق أمي غلط يعني أمي قبيلة بس هم قالوا قبيلة غير وكذا وتمت الحرمة تناهق أنا طالع لي هالقبيلة وحشرت الدنيا والموضوع تافه سوته وين كبرررره يا الريال شوية والله ثواني قال لأبوي توكلوا ع الله وبس انتهى ☺

يعني الخبلة لو مريحة راسها مثله مازين !!!

المهم ونحن راجعين البيت قريب المركز شرطي واقف ع يمين مادري يسار الشارع ويأشر بس كان ليل متأخر وأبوي ينود ماشافه ومشا سيدة بس بعدين انتبه له ورجع والشرطي واحد شباب يعني عمره واضح بداية العشرين لكن لساااانه أطول منه نعم ويصارخ اونه ياي النقيب مادري الرئيس يعني المهم شرطي عود راتبه وايد شي كذاك أظني ما أعرف والله بس يعني في الشرطة ما مثلاً أقل الشي الجندي العادي ف المرور وبعدين الضابط وكذاك هوه شي من ذا الطبش يعني شسمه المهم والشرطي اللي راتبه شوية يكلم أبوي خطف اللي راتبه وايد وكذاك يأشر بيديه إخس عليه عطه عطه مخالفة والمخالفة ب 35 ريال أون بس أبوي لانه رجع ما عطوه عاد بو راتب شوية يقول أنا تساهلت معك هالمرة لانه المخالفة ب 35 ريال !!!

اليوم عاد وأمي راجعة اتصلت لي وروحت معها كانت الساعة 11 وبيتنا يصفر ماشي دياي حق الغدا وقفت عند الدكان راعيه ندق عليه وييي الهندي بس طلع مسكر اليوم ، راحت سوبر ماركت صغيرون غير وأنا اللي نزلت أول مرة أدخله مع إنه ف الحااااارة بس معنا م يستوي تنزلي ف الدكاكين عادي تحوطي ف المولات وامشي وروحي وردي بس سوبر ماركت الحارة لا ليش الله أعلم !! المهم خذيت دياي وقوطي ديو وحب و أسكريم بالخمسين اللي بتبقى مال الديو وطلعت ..!! دخلنا البيت أبوي يعرف 😨😨😨 كيف من قاله ؟؟ م نعرف
عاد أبوي يكره ننزل الدكان ذاك لانه ف الحارة بس قلنا ما بيعرف ولا حطينا هذا الاحتمال أمي مارضت وأنا أقولها بنزل شوية وبخذ الأغراض وطالعة عاد ابوي وش دراه هو معه إجازة بس كان طالع من البيت واصل شناص !!!!!!!! كيف عرف كيف ككككيف ؟ وأبوي معصب ويتنازع كيف أمي تتطلع من الدوام وما ترجع البيت سيده لانه إذا ناقص شي فالبيت هو بييبه تقوله أنت بعيد والدكان هذا عند البيت المهم تموا يتناقروا وأنا رحت أخذ شور وطلعت وهما بعدهم ف الصالة يالسين و مبوزين !!! كله مني أنا مابا سمممك مابا سممممك .. يا وقت الغدا رحت وحطيته وزقرتهم أبوي ما يبا وأمي يوعانة تغدينا أنا وياها وخواني وخواتي وأبوي يتابع تلفزيون فتحت أمي السالفة وسألته كيف عرف استغلت الفرصة يوم شافت أبوي هادي هههه طلع عمي هناك وع طول اتصل ح أبوي وقاله حرمتك ياية الدكان ومخليه بنتك تنزل هني تزاحم الرياييل ؟؟؟ اخ اخ عليك من عم حسبي الله عليك فتان وبعدين كمان كيف تقول عن بنت أخوك كذا كرهته نعم شيبه لكن ح السوالف أخس من الحريم اللي يلسن ع الحصير العصر نعم بيتكلم وبيبدي رايه الشخصي بعد !!!
عنبوه ذا العم المتفيق المهم قامت أمي اونه تعتذر وكذاك وبس طاح الحطب وهجم أبوي ع صحن العيش لانه أصلاً يوعان طلع يراكض ويتشرا باغي يسوي صبية بس برستيج العصبية يتحكم فيه بيسوي صبية وسوالف ف الحوش بعد هناك ع جنب ورا الميلس وإحتمال يحطلنا مرياحانات وحركات😍😍😍 يالله أني كارهه ذا العم نعم اونه ازاحمه أصلاً الدكان فيه هنود 2 وواحد شيبة بس هوه ما شفته شكله كان وراي نعم ما انتبهت له ولا بعطيه بوكس وأنا طالعة 😂😂😂😂 أمزح مهما كان ذا عمي حسبت جدي بس قهر كلمته قهرررر قهرررر وش خلا حق الغريب يغيب برايه حسبي الله ونعم الوكيل فيه سبع التحاسيب



لا تذكريني بالمشروع نعم يوم استويت مجتهدة وقلت بخلص أشغالي أول بأول طلع ما عليه ولا درجة بس المستر كان يقول يعني أكيد هذا الشي يميزك يميزني طل مابا أتميز بدون درجات أنا أداوم لدرجات ولجلب الغوازي بعد ذاك 😂😂 هذا اذا توظفت وعمان بادية اطيح شكل عصر النهضة خلاص بينتهي كل مالنا ونرجع ألف خطوة لورا وبيجي اليوم ومابالبعيد يوم ترجع عمان عن ما كانت عليه في الستينيات والخمسينينات وبذكركم بعدين إذا ما ماتت السبلة ☺
العيون الساهرة تسلمي تسلمي وايد أنا لعيان ترا ويسد المشكلة اللي سويتها لو كنت أكل سمك ما صار اللي صار بس أمس مسوين سمك عاد ما كل يوم بستحمل ما أتغدا بعد أنا أنسانه أحتاج طاقة وحركات 💓



صدق !! واه هو طبيعي لان مثلاً موضوع ما يصير ألعي فيه يعني مثلاً شخص منزل قصة ما يصير أكتب فيها وأحط وأتمصخر لإني محصورة بين جميل تسلم ع الإنتقاء بالنسبة للمواضيع النقاشية أفضل أتكلم بالفصحى أو يعني أخلط عامي وفصحى أما المكان اللي يبين في الشخص هادي ولا هذا ترويح القلوب وهالقسم ما نشطة فيه كثير أما المدونة مكان خاص فيني أحط فيها سوالفي وأشياءتي واتكلم بلهجتي يعني ما يخلصني أسولف ف المدونة بالفصحى بعد وكذاك .

مرة فاتحة حساب عماني وقتلتني التعليقااااااات طالعة موضة السب بالأكل ما أعرف إذا كلمة سب مناسبة ولا لا المهم يعني مثلاً تتكلمي حد يقولك علامها الدنجوه ؟ وشفت بالتعليقات في الانستقرام وايد منه يعني مثلاً ..،، حد يقول السحة وحد يقول اللومية يعني ينادوك كذا وابويه علامهم ذيلا بس تعليقاتهم عجيبة غريبة وتضحك بعد بس سخافة كذا يعني عاد الدنجو وايد يستخدموه والجاشع وما أعرف شو وايد منه 😂😂😂😂

انزين أمس بالليل كان عندي عبدالله ويلعب بالحجرة وأنا كنت أذاكر وهوه كاب اللعب ماله ومسوي ازعاج المهم فوق التسريحة شفت شي خمسين بيسة ونطيت وخذيت عبدالله ورحت أركض الميلس عند أمي حتى هو منصدم مني أحس ف خاطره يقول الحمدلله والشكر 😂😂 وفتحت الباب بأقوى ما عندي تقول فاتحة الأندلس وأصارخ أماه أماااااااه أماااااه لحقي عبدالله بلع الخمسين ويصيح قاااطع والله انها انتزقت وما قدرت أكمل المقلب السخييييف البايخ اللي ماله داعي قلتلها أكذب أكذب قبل لا تتفاعل بمرة بسرعة يعني خفت عليها صراحة كيف كانت منتزقة وخااايفة ورجعت أكمل دروسي يعني أحيان أسوي مقالب ف ناس ما تصلح معهم ولا حد يفكر مجرد تفكير إنه يسوي مقلب ف أمه ولا أبوه ولا شخص كبير أصلاً الأم بالذات لما تروح تقومها تفز منتزقة فما بالك عاد تمقلبها ...!!! بس نصيحة ندمت عليها مجربة والله العظيم خفت عليها كيف خافت لاني ياية أصااارخ الله يستر من الأفكار اللي دارت ف بالها ساعتها وأنا ماسكة أخوي وأركض وأصارخ ..!!!!! غبية أنا 😉

وبس

[روانـــــووو]

[روانـــــووو]

بسم الله الرحمن الرحيم

أما بعد

اليوم بالليل بيسوو الجلسة مال رؤية الهلال وبيقولوا وبعد غد السبت سيكون غرة رمضان الخليلي بيقول كذاك هذا والله أعلم **

حماسيشن رمضان جوه سريع


يومي ميت ما فيه تفاصيل كله نوم وخمدة ولامبالاة .... !!

انزين يوم السبت الماضي كتبت هنا بمدونتي إنا وحدة من بنات جيرانا بتتزوج أخو ريلها هذا مات بتاخذ أخوه ومعها بنتين اليوم عرسهم 😍😍😍 أبا أسير أشوف ياخي أمس الأربعاء يايبين حنا مال الريولات ومسوين توزيعات بعد لكن اللي ما حلو إنهم بيسوو عرسهم ف خيمة عند البيت ومسكرين الشارع بعد يعني تبا تخطف لازم تروح من السكة وتلف من الصوب الثاني ياخي مستكاودة أروح ع أساس إني المليك يعني رحت ولا يلست ماحد بيتشره علي 😂😂😂😂 بس أقصد إني أبا أسير أشوف من الأحلى المعرس ولا العروس هههههه استغفر الله ع فكرة توقيتهم أبداً ما غاوي يعني يومين ورمضان !!!

توني عاد فتحت صراحة وحصلت ذا المسج الغاوي 🙁



تباشير الأمل المقصود بالشلخ باللهجة الدارجة الكذب هههه !! ما حماس يوم أنا كذابة 😅👊👊



أنا ما قبل القبول 😅 ع فكرة ترا البلع يطلع بنتيجة طيبة السنة الماضية نحن امتحنا ف رمضان بس السنة طلاب 12 عشر بيبدون ف رمضان حليلهم أصلاً عادي نحن قوم لاتهزنا الجبال العوالي فكيف بورقه كتب عليها أجب عن السؤال التالي !!! و أهم شي تاكلون زين بالليل وعادي ما تعب المذاكرة تو أنا يوم أنصح ف المدونة وأتعب نفسي ومتأكدة ماحد بيقراه علامني شادة حيلي !!! والله صدق بس بنطم 😔💔



ذهب ذاك الزمان وولى أحب لغتي 😢❤❤

ههههههههههههه وشسمه كتبت باللون الأصفر عشان يعانوا ويحسوا فيني وبمعناتي مع الموظفات الحريم خخخ اشدخل ماعرف بس مشيها عاد هههه

ماعرف كل الأهل تفكيرهم كذا الدكان الي مصوب البيت لاتدشوه بس المولات والمحلات عادي اهم شي المكان بعيد هههه على أساس هناك محد بيعرفج
بس عمج يقتل ختمها والله ههههه, الله يخليه لكم
بس زين شوي غيرتوا جو البيت هههه يعني شوي استوى شي حماسي خذيها من جانب إيجابي

😂😂😂😂 صدقتي نعم شوية استوى حماس ف البيت ما مثل اليوم بس نوم ..!! ماشي أكشنات من زمان ما شايفة فيلم هندي وفتحت مدونة حد وتقول فيلم رانبيير كابور يصيح أبا أصيح ياخي بس بعد رمضان بتابعه تو ما فيني بارض ح ولا شي !!!

نعم ازعاج ازعاج اليوم ذا الهنود يدقدقوا دق ما صارت صبية نعم !!! وكذا خاطري ف أرررريج برتقال 🍊❤

[روانـــــووو]

ليلة رمضانية سعيدة 🌜❤

بشخبط ف المدونة على ما يجي وقت السحور ما كأنهم وايد مأخرينه !! يعنا نعم طبعاً بعد اليوم بختفي من السبلة فترة بسيطة ما بطول إن شاء الله عندي إمتحانات برمضان حطيت لي جدول مذاكرة وبإذن الله أمشي عليه ناوية باكر أقوم الصبح من وقت شوية وألتهم العلم إلتهاماً لا مثيل له 😂😂💔

بجرب المذاكرة الصباحية بدون بلع مع إني من النوع اللي فترة المراجع ياخذ استراحات طويلة بسبت الأكل لكن المرة أفكك شي ما عندي حجة أطلع أشيك راحو الدكان ولا لا 💪

فيني هبشات رقاد بعد يلا باكر صيام وعبادة ما بس تلفيف سمبوسة وكنافة !!

تصبحون على خير وكل عام وأنتم إلى الله أقرب

[روانـــــووو]

جدول يساعدنا على ختم القرآن الكريم 💜

اليوم فتحت دفتري وبديت أذاكر وأذاكر والباقي أجلته لبعد أذان المغرب لازم أخلصه كله ياااااربي 😔

تراني فاتحة المدونة أبا أقصر الوقت العرس اللي كاتبة عنه بروحه مال قوم جيرانا اللي بتتزوج أخو ريلها اللي مات كنا متفقين أنا وبنات عماتي و البنات اللي ف الجروب إنا بنسير نشوف خلق الله يعني وسوالف وضحك كان يوم الخميس قبل رمضان بيومين هم مسوينه ف خيمة يعني مالازم الواحد يتعب نفسه ويحط ميكب حلو عادي اللي يطلع معاك سوه مافي مشكل 😂😂 وأنا ولا مرة حطيت ميكب عرس لنفسي وبروحي عاد أذن المغرب وأمي راحت بيتهم موقع العرس اونه تساعدهم معنا إذا وحدة عندها عرس بنتها ولا ولدها لازم الحريم ف الحارة يروحوا بيتهم يساعدنهم إذا شي شغل وإذا ما شي أشغال يروحن بعد ويسولفن وكذاك أهم شي تروح والا بينقدوا عليها سارت أمي بيتهم وأنا ف الحجرة أمكيجني وأون أبا أحط ميكب ثقيل سويت آيلاينر اللي أسويه دايم بس قلت ف نفسي هذا عرس لازم أحط ميكب ثقيل أكثر وزودته وصلته لين فوق حواجبي 😂😂😂😂 أمزح مالدرجة ذي بس بالغت فيه شوية المهم وحطيت آيشدو أوني أبيض 😷 وخلصت وفتحت السبلة لحد ما توصل أمي المهم دخلت أمي ومعها صحن عيش ولحم 😍 الله أبا منه تو بعد الفطور يا الله طعمه فن فن قسم مسوين اللحم شوا مثل اللي ف العيد المهم بعد ما طيرنا أم العشاااا فتحت الواتس كان واصلات المسجات فيه وووين بس أحياناً لما أفتح محادثاتهن أدخل وأقرا وأطلع أقول برد بعدين بس أنسى لما فتحت حصلت وحدة منهم تقول ما بتروح العرس ما يخلصها يوم الا خيمة !!! وقمنا نستكاود انروح لما سألت أمي قالت لي الخيمة الحريم يتعشوا ويروحوا الحركة بتستوي بعدين يوم تدخل العروس وعذرت وما رحت أنا والآيلاينر المتعوب عليه وفتحت السبلة أنزل تهاني رمضانية

النهاية



تصويري قبل قليل 👆 حلو ؟

[روانـــــووو]

سلم روانوووه يلا خلها تكرف يالله 😂😂💔

بعدني ما خلصت امتحانات بس بما إني شبعانة نوم والمزاج أوكي قلت أفتح السبلة وأشخبط ف مدونتي اللي اشتقت لها صايرة ألعي بس بلساني وللأمانة اشتقت للعيان الأصابع ..*☺

المهم في شي يزعجني لما أفتح الواتس وأسولف وشادة حيلي مع شخص ويضربني أبو الطاف أزعل وعادي توصل للبلوك هيه أنا نفسية يعني تخيل نفسك تتكلم وحركات وآخر شي يردوا عليك ( ت ) ( اهاا ) أقهر كلمتين نعم !! اكتشفت بعدين أني مخلية عمري اوني أتضايق من هالأشياء حتى مرة ربيعتي تكلمني بس أسلوبها ما عجبني وكعادتي ما حطيت لها ولا عذر انزين داومت الساعة 8 وهيه بعد كل يوم تداوم 8 لانها من مكان بعيد والنقل بس يجيبهم فالهوقت المبكر كتيررر حتى لو محاضرتها 12 بتدوام 8 المهم أختكم ف الله اللي ما عجبها الأسلوب ف الواتس مع إنه ما كان في شي عادي يعني بس أنا أقول سالفة طويلة ما يندرا صدق ولا كذب هههه لا لا حقيقي المهم وهيه تقرا وبعدين سجلت مقطع صوتي أشرح لها السالفة وردت علي شوية يعني ما كتبت وايد بس إلا كلمتين << أنا بعد يعني أكيد ما بحصل حد فيه بارض يكتب أكثر مني 💔 المهم عاد قامت النفسية ما ترد عليها ف الواتس ورحت 8 ولا حتى خبرتها وهيه بروحها بتفرح لو عرفت ان أنا مدوامة من وقت لان كل البنات يدواموا قبل المحاضرة بنص ساعة إلا هيه يا حليلها !!! المهم اليوم رسلت لي وحدة معنا ف الكلاس ورجعت أقرا محادثتي معها من البداية واكتشفت ...... _!
1)

2)

3)

4)

5)

أني من النوع اللي بس يشوف أخطاء الناس ولا ينظر لاخطائه يعني لو تركزوا ف المحادثات والتوقيت هيه ترسل وأنا بعد فترة أرد عليها أو أحيانا ترسل ولا ارد وتمر ساعة او أحيانا أكثر ويظهر لها أني قاريه وما رديت ترجع ترسل بعدها هذا من غير الأسلوب الميت 😔 !

بس ترا هالبنت مجرد زميلة وليست شسمونه ربيعتي وكذاك عاد ما تبرير أحسن أسكت *___* لا ما بسكت هالبنت ترسل اوفر يعني وايد وغالباً بل دائما سوالفها مالها معنى الله يوفقها

شكلها الحلقة الأخيرة من مسلسل ( ｡• روان ومدونتهـــシــا •｡ ) لاه !!! 😂😂😂

لاني كل مرة أقول فلانة قالت وفلانة اذتني وفلانة شغلت مقطع صوتي لين تو غاصة ع ذي السالفة نعم المهم وبس أتشكى واليوم أشوفني انقلبت ع نفسي صدق الظاهر انه الحلقة الأخيرة بس بعده رمضان ما خلص مسلسلي ترا مثل بعض المسلسلات العمانية اللي بس 15 حلقة تذكرونها 😂

إلا ع طاري المسلسلات العمانية مرة كنت ف الصالة وفاتحين التلفزيون وأنا ع التلفون ويا أخواني الصغار ما بقولكم وش كنا نشوف ف اليوتيوب 🙈🙈 فاتحين برنامج مايا وعمر الصعيدي اللي طلعوا من قناة طيور الجنة ونتابع فيديو اونه تحدي اللهجات السعودية بين مايا وعمر وكانوا اخواني قمة ف الإندماج إلا أنا ^__* ومخلين قناة عمان تشتغل بس محد يشوفها ويوم التفت عليها بالغلط شفت بنت تمشي وواحد متعلق فوق الجبل يعزف وهيه تمخطر ف مكان أخضر وطولت ع الصوت وشت الصغار داخل يتابعوا مايا ما مايا بس صراحة النهاية أليمة تعذب الفواد 😂😂 وصح بعد يتكلموا باللغة الجبالية بس عادي في ترجمة بس فلمهم أنا شفته عبارة عن إعلان لظفار وترويج لسياحة فيها لانهم وايد تكلموا عن عادتهم و حياتهم و رقاصتهم الشعبية وكذاك المهم الفيلم اسمه مرة ف العمر موجود ف اليوتيوب عيشوا الرومنسية العمانية الدهجة ع أصولها 😂😂😂 استغفر الله

بس صراحة غم نعم وصلنا نص رمضان وبعدها اختبارات لكن يوم الثلاثاء خلاااص بتنفرج وبنرتاح شوية ماخذة بريك تو والله ما أفتح كتاب إلا لما تدق 8 بس والمذاكرة الرمضانية متعبة بشكل السعوديين قدموا اختباراتهم اون عشان رمضان !! أحس دراستهم ذيلا غير نمونة يعني السنة الياية رمضان بعده بيتقدم وبعدين من مفهمنهم إنا رمضان بس خماد ترا عادي غزوات صارت زمن الرسول والصحابة وبعدين أنا وش دخلني يالسة أتفسلف قمت أتكلم ف السياسة مادري الاقتصاد المهم الشؤون الآجتماعية يعني ☹

صح ع سالفة السياسة والخمبقة
شوفوا ذا الفيديو 👇

أهم شي عمان فديتها ساكتة 😍 و السلطان قابوس قالها بصحيح العبارة عمان لا تتدخل في شؤون الغير ولا تسمح لأحد أن يتدخل في شؤونها __!!!

ويلا الربع بروح أخذ فرة ع الأقسامات قبل لا تدق س 8 أشوفكم ع خير 🖖

[روانـــــووو]

16 #رمضان
اللهُم نحن مُقصِرون و أنت الكريمُ ، مُذنبون وأنت الحليم ، فقيرون إليكَ وأنت الغني ، اللهُم اعفُ عنا واغفر لنا يا أكرمَ الأكرَمين ❤