😜 قابوسية والملامح فرنسية 😝

[رونق مسقط]

وصباحوو جميعاا
شكرا امووره ع المتابعه

وعسى حد يستفيد

تميت شهرين ع هالحال ما شي علاج لين وصفو لنا مستشفى ف بلاد مفتر مخها هههه عن تنعش بس سرنا نظبهم شويه ههههههه

واذكر كان الدكتور يقول لامي الله يرحمها ما فيها بنتش شي يمكن نفسيتها بس متضايقه من شي وامي تقوله حمه توصل 40 من نفسيتها قال عادي يصير
امي قالت بيكون صح قالها انتو هنا الحين سيرو تمشو شوفو هي ايش تحب ويين تبا تسير
عاد امي ما قصرت ربي يغفر لها وجلست لي مو تبي وين تبيي تروحي وانا اقولها ما ابا شي ولا فوادي اروح مكان
سرنا شوي السوق ورجعت بحمتي وساعه 2 طحت لهم ف الفندق خذوني بالاسعاف
وطاح لي دكتور كنه الله سخره قال هذه ما طبيعيه فيها شي خلوها معنا اليوم قالت امي بنرجع باكر قال بس يوم واحد وبعدها رجعو من الفجر يطرشني من اشعه لاشعه وكل مره فحوصات
لين طلب خالي قال اريد رجال اكلمه هنا امي حست في شي بس هداها قال عشان بطرشه ياخذ دوا من خارج المستشفى
وبعد كم ساعه عطانا رخصه وقال خذو التقرير وف عمان عطوهم اياه اذا حست حمه مره ثانيه الدكتور عراقي اذكره

[رونق مسقط]

رجعنا لبلاد وع طول رحنا المستشفى كنت تعبانه
خالي كان يعرف وش عندي اخذ التقرير وعطاهم اياه قالو هذا خطا لازم نحن نعيد صار نزاع بين خالي والدكتور
قال تحرصوها تموت لين تكتشفو امي ما كانت موجوده سالته مو يكتشفو قال ما شي وكان معصب ههههه ما رمت ازيد كلمه عن احصل كف
وخذوني مره ثانيه اشعات وفحوصات وبعدها حولوني مستشفى البريمي تنهجيله من الشرق للغرب
وبعد اسبوع رحنا عشان النتيجه هنا قالو في ورم بالكبد امي تعبت مسكينه وانا ما اعرف كيف استقبلت الكلام
من ايش وكيف ما كان في اجوبه ابدا غير الله كاتب ليش يعني تسالي ما بتستفيدي شي
سالو اذا معنا ف العائله حد ما كان حد فيه
يسالو عن الالم وكل شي عادي ما كنهم قالو لاحد فيك ورم وانا اشوف عليهم وقتها مفروض يكون دكتور مختص يعطيك الخبر ما اي حد يجي يقولك اشكره بس بو معنا هههههه زايده عليهم الثقافه

الاساله وقتها كيف استئصال ولا كيف ولا علاج مطول ولا ولا
امي سلمت امرها لالله وقالت شوفي كل شي من اليوم يتغير اهم شي انتي ونفسيتش ما حد بينفعش
لا تشوفيني تعبانه وتزيدي ما تشوفي ع حد ابدا
كم وكم درس منها تعلمت ان صح كل شي بالنفسيه
علاجي الاولي قالو كيماوي لمده بعدها استئصال بعدها كيماوي مره
ما اقل عن سنه
بديت كيماوي جرعات ف عمان بس كان يطولو المواعيد
لين سافرت عشان ينتظمو الجرعات

[رونق مسقط]

اول الجرعات كانو لمده اربع ايام كنت احس تعب ولوعه بس ما واجد
بديت بعدها اخذ جرعات ف فترات بين اسبوعين عشان العلاج يكون اقوى
الي حلو ف العلاج يعطونا مثل الدروس النفسيه وتقييم المرضى يعني واجبات بعد وزيارات بينا

الي كانو نفس مرضي بالضبط اثنين ماتو من اسمع حد دخل غيبوبه او مات نفسيتي تنهار بس كانت امي تقويني كل مره
ف المرحله الاخيره للعلاج انا تعبت لين دخلت العنايه المركزه لان جسمي خلاص متشبع كيماوي
وقفت امي معي ما كني ف العنايه والدكتوره كانت بعد معي ترفع معنوياتي
بس كنت ما استقبل ولا كلمه اقولهم انتو ما تحسو بالي احسه واصرخ فيهم
لين جاني مريض مثلي قالي شوفي انا اخذت الجرعات سنه ونص وكنت اصرخ مثلش بس شوفي الحين انا كيف عرفت انهم كلهم حاسين فيني ولا ما تشوفي احد قدامش تو هم ما يضحكو عليش بالعكس يتالمو اكثر
انتي مفروض تعطيهم ايجابيه اكثر من هم يعطوش
هههههه طبعا المريض ما عربي ولا مسلم

[رونق مسقط]

طلعت بعد ثلاث ايام من العنايه يمكن ايام صعبه بس ما حسيت فيهم بعدين تغير مزاجي للاكل ما اخذ غير مغذيات
لسبوع كامل وما طلعت من المستشفى بالعاده اخلص جرعه وارجع الشقه بس اذا تعبت اجلس فالمستشفى
مرن 6اشهر وكان وقت الاستئصال

قال الدكتور نجاح العمليه 60 واقل حسب استعداد جسمك
ما كنت افهم بالنسب صراحه ف الطب بس قلت يعني ما شي حل برايه وامي قالت اذا ما شي حل غيره سويو وخلاص متكليين ع الله
قال يمكن نقص جزء من الكبد يمكن بس ما اكيد هنا الواحد ما يعرف كيف شعوره وش يقول
وعملت العمليه والحمد لله ما كان فيها اي مضاعفات
واخذت شهر من غير علاج وغيرنا جو يعني بديت اروح وارجع ما كنت مهتمه لشكل الي وصلت عليه
اهم شي وقتها ابا اخلص وارجع لبلاد
بدت امي تشجعني ادرس بانتداب عشان ما افكر بالعلاج وانشغل بشي
لان باقي لي ما اقل عن ثلاثه اشهر او يزيدو حسب استجابت جسمي

[رونق مسقط]

وسجلت لدراسه امي كانت مدرسه ممتازه لي طبعا ههههههه حال لقشب بس احلى المررحل ف العلاج
الله يرحمها ما خلتني لا لليل ولا نهار تذكرني وتذاكر لي وتشرح وتغير تفكيري
العلاج مع طول المده يكون متعب اكثر من اول بس انا اقولكم عن تجربه النفسيه الي تحسسك ب الصعوبه او لا
كل العلاج لهذا المرض نفسيتكم ثم نفسيتكم
عشت ببيب التنفس لثلاثه اشهر الاخيره بس الحمد لله دام المرض راح ما يهم كل شي

نصيحه بين السنه اعملو فحص كريات الدم مهمه جدا
العلاج ف البدايه اسهل من النهايه
خذو اخوانكم اهلكم للفحوصات بين فتره وفتره

الحين بين كل ثلاث اشهر اروح للفحص ما وسواس دام المرض وصلك مره اكثر الدكاتره ع راي واحد يمكن يرجع

الله يحفظكم واهلكم والناس من الامراض🌷

[رونق مسقط]

‏اللهم اجعل ما تبقى من عمري سـعاده و ابعد عني الهم و الحزن

[رونق مسقط]

غالباً نكون ضُعفاء ونحن في منتصف الطريق، فإن عُدنا سنكون بلا عقل وإن رحلنا سنرحل من غير قلب !

[رونق مسقط]

‏كل عسـرٍ لا دارت الدنيا يليـن ؛
‏وكل ضيق يلقى بأمر الله سعَهہ 💚'

[رونق مسقط]

‏ما أكثر الكلمات التي تتراجع أصابعنا عن كتابتها رغم أنها أصدق ما نشعر به

[رونق مسقط]

عندي شي بقوله بس احس ما وقته بعده 🙇🏿‍♀

المهم غيرنا صراحه عشان الجميليين ما يتعايوو كيف ارد
اسكاود انزل الي تكتبوه عاد سامحوني تراه البارض معي صفرر