للأنني خادمه / للكاتبه قلب دبي

[القيصـــــر]

ننتظر أكمال القصه بفارغ الصبر....كل الشكر اخي

إن شاء الله كل الشكر لك

[القيصـــــر]

الجزء السادس // الفصل الأول

طالعتهم منوة بانتقـــــام .. وتمتمت ف خــاطرها : يا مقواهم والله ..
ام خـــالد : عيل وينه خالد ؟
أحمد : اتصلتبه ما رد عليه ..
عذبة بدلع : كان ويا ريلي ف الشركــــة عنده صفقة وياهم ..
ام خالد ابتسمت بخبث وطالعـــت بو خــالد ..
بو خالد ابتسم بهدوء : اتصـــل لي من شوي .. وخبرني انه على وصــــول ..
خلصـــت منوة من توزيع مـــلال التبولهـ ..
سارت وقفـــت ع يــنب .. بعيـــد عن الطـــاولة .. وجريب من بوابــة الملحق الخارجية ..
حسب وصية زوبـــا انها تتم هناك عسب اذا بغـــوا شي اتيـــبه بسرعة ..
بو خــالد : ها يـــا راشد بديت تذاكر ؟
راشد غص ف الأكــــل : كح كح .. آه .. هي من زمـــان ..
بو خــالد : وشو ذاكرت لين الحين ؟
راشد بفخــــر : كل المواااد ..
بو خالد : ماشا الله عليك .. عن أحسدك (باستهزاء ) كل المواد في يوميـــن بس ؟ مسرع ..
اسمــا : ابويـــه والله انه جذاب .. هو 24 ساعــة ع البلاي ستيشـــن ..
راشد يغزها بنظرة : اسكتي يا دلوعة ماما ..
ام خالد بحزم : رشـــود !! عيب عليك .. هاي ختك العودة ..
.
.
ضحكـــت منوة ع راشــــد .. ما تدري شحقه تذكرت سالم ولد مزون ..
وسط سرحـــانها رفعت راســـها صوب البـــاب ..
دش ريــــــــال طويل .. مطــــول شعره ولحيتـــه مبهدلـــة ..
كــــان شكلــــه جنـــــــان !!!
وهاللي خلى منوة تطالعه بإعجـــــاب !! ..
خالد : السلام عليكم ..
الكل : وعليكم الســــلام ..
خالد : ما عليه .. سويتوها فيه .. الله يالخيـــــاااااااااااانة ..
ام خالد : اقول انزرع وكل بلا رمسة زايدة جدام الاكل ..
يلس خـــالد حذال أمـــه بحيـــث انه منوة تجوفه بشكل واضح ..
راشد : خلّـــــودي ..
خالد : خلودي ف عينـــك يالــهرم ..
بو خالد : شو سويت يا خالد ويا ريل اختك ؟
خالد : حميـــد ؟ هذا يباله كفيـــن ع ويهـــه ..
عذبة تطالعه بغيـــظ : ليش شو سوى ؟
خالد : يا بوج يبت له المهندس وخلاص اتفقنا وجيه .. المهندس ظهر له فيلا دوريــــن ويا السرداب .. بس هو الا معـــاند يباهـــا فيلا دور واحــــد ..
عذبة : انا راضية انته شعليك ؟
خالد بقفطة : يزاية احاتي عيالج اللي بيون ف الدرب بدال ما يرقدون كلهم ف حجرة وحدة ويا ويهج ؟
راشد : واااااك الحين عذبو بتزعـــل ..
عذبة بتحدي : ما بزعل .. الأكل حلو وما بفوته عسب ازعل ..
خالد وهو ياكل المعكرونة : يمممم .. زوبا مسوتنــــه .. ؟ ما حيد طبخها فنان جيه ..
راشــد : لا صوفي ..
خالد باستغراب : صوفي ؟!!
راشد : عمرها 20 قد عذبــــو ..
بو خـــالد نش : الحمدلله نعمـــة دايمــة ..
رد صد خالد على رشود : احلف انته ؟
راشد يأشر عليها : هكي جوفها ..
منوة انحرجت .. فادعت انها ما تجوفهم ..
خـــالد بدهشــــة : هاي بشكارة ؟
عذبة : صدقك والله ياخوي .. لو رشود مشبهني ف وحدة ثانية جان زعلت ..
خالد : وانا أتحسبها من الصبح تمثال واقف ..
راشد : تمثال شال صينية من صواني البيت ههههههه ..
أحمد يغرف له شوي من المحـــاشي : اقول انا بسير اكمل يلستي ع اللابتوب .. يلا جااااوات ..
ام خالد : تعـــال ما تبا تاكل حلو ؟
أحمد : هي بعد مسوتنـــه ؟
ام خالد : هيه ..
احمد : خلاص عيل .. باكل المحشي هنيه وامري لله ..
استانســــت منوة لمديحهم .. بس قهرها خالد يوم تحسبها عروسة ..
بعد فترة خلصـــوا العشــــا ..
ام خالد وصت منوة انها تخلي باجي البشاكير يشلون العشا .. وهي خلها تداري السويت ..
راحـــت المطبــــخ ..
وظهـــرت الآيسكريم اللي كان محطوط ف قـــالب .. وخذت كاسات زجاج ..
ولأن الايسكريم كان يحتاي اكثر من المدة اللي حطتها منوة ف الفريزر .. كان شوي سائل ورخو ..
فاستخدمت مكينة الكريم .. وبدال ما تحط الكريم حطت الايسكريم مكانه ومزرت فيه الصينية ..
وظهر شي عجيب !! بشكل حلو ومتقن ..
تفلسفت على عمرها وحطت كرز ع كل كــــاس ..
وكانوا 7 كاسات ..
حطتهـــم ف صينية أنيقة .. وسارت لهــــم ..
هالمرة عطتهم السويت وسارت .. بس لمحت تعليق رشود ع الآيسكريم وانه لذيذ وحلو ..
ردت لهم بدلة القهوة والجاهي ..
ام خالد : ماشا الله عليج يا صوفي .. تسلم ايدج وايد حلو ..
منوة : شكراً ماما ..
ام خالد : خلاص العشـــا دوم بنخليه عليج .. والريوق والغدا على زوبا عسب ما تحتشر ..
منوة : As you like Mum ..
راشد : هندية وتعرف ترمس انجليزي .. اوب اوووب ..
منوة ابتسمـــت له وسارت ..
أحمد : الصراحة ايسكريم عجيب .. رشود بسك عطني اسكريمك ..
راشد: هيه ما شي شغلة .. انا يالس اكله شوي شوي عسب ما يخلص ..
عذبة : فنانة والله ..
ام خالد : عذبة خليها تعلمج الطبـــخ ..
اسما : هيه والله ..
عذبة : لا بويه .. انا بييب لي بشكـــارة ..
ام خالد : طاعوا المنـــكر .. الريال يباله حرمة تطبخـــله ..
عذبة بغيظ : وانتي بعد تراج ما تطبخين لأبويه ..
ام خالد طالعتـــها بصدمة ..
بو خالد بحزم ويصارخ عليها : امج يوم كانت ف كــامل صحتها ما كانت تقصر .. كل يوم أكلة يديدة .. وحتى لو ما كانت تطبخ اظني عيب تراددين امج .. يا راعية الأدب والذوق ..
افتشلـــت عذبة من عمرها .. ونشت بسرعة عسب تخفي دمعتها اللي نزلت ..
خالد يصــد ويطالعهم بغباء : مب جنــه الجو توتر ؟
اســما : الله يهديها عذبــو بس ..
خالد : هي لسان وريلها لسانين .. الله يستر بس ..
راشد : بييبون ولد لسانه ظاهر من حلجه ..
احمد : هيهيهيهييي باااايخة ..
.
.
نرجـــع لمنــــوة ..
اللي من بعد ما لمـــت السويــت وغسلت المواعين .. ردت الملحق ..
كان الشبـــاري من نوع بو طـــابقين ..
يعني كل شبريتين فوق ببعض ..
وكـــانوا 4 شبـــاري .. ويــا من نصيب منوة انها تكون فوق روز ..
زخـــت دفتـــرها الغـــالي وكتبــــت ..
" اليوم هو أول يوم لي في هذا المنزل .. أشعر بالسعادة وأنا معهـــم ..
ولا أعلم لم هذا الشعور يراودني باني سأُكشَف .. ربـــما لأني سأمكث هنـــا طوال العامين القادمين .. "
حطت الدفـــتر تحـــت المخـــدة واستسلـــمت للنوم ..
ما كانت منتبهـــة لروز اللي كانت عيـــونها راصـــدة كل اللي يستوي ..
حتى يوم خشـــت الدفــــتر ..
ولا تنســـون ان روز ماخذة موقف من منـــوة !! ..
والانتقـــام لازال الشغل الشاغل لهــــا ..!! ..
ع حسب رايها ان انتقامهـــا لازم يكون معتبر ..
وف اعتقـــادها ..ان سلاحهـــا بيكون هالدفتـــر ..
لكـــن كيييف بيطيح ف ايدهـــــا ؟؟!!!

/
\
/
\
يتبع

[القيصـــــر]

الجزء السادس // الفصل الثاني ..

بيـــن فترة وفــــترة كانت منوة تكـــتب فهالدفتـــر ..
تعبر عن مشاعرها تجاه كل فـــرد فهالبيــــت ..
مر أسبـــــوع عليها .. وقدرت تفرض احتـــرامها ع الكــــل ..
وهاللي قهـــر روز أكثر واكثر ..
واللي كانت تحاول بشتى الطرق انها تبعدها عنها ..
لكــن تهقون ؟؟ هل بتروم روز على منــــوة ؟!! أو بالأحرى صوفي ؟
.
.
اليــــوم يصادف عزيمة أم خـــالد لاهل ريل عذبـــة ..
خـــاصة ان عرسهم ما تم عليه الا اقل من 5 شهور ..
كان هالعزيمة بمثابة ضرب عصفوريـــن بحجر واحد ..
اولهـــا ان عذبـــة ترد طبيعية بعد الخلاف البسيط اللي استوى ذاك اليـــوم ..
وثانيــها انها تكســب ود نسايبها وتسبقهم بالأصول وتفرض احترامها عليهم ..
أم خالد كانت ناشة من الصبح تعابل الأكل والخدم ..
ييبوا مني وحطـــوا هنـــاك ..
المسكـــينة كانت تمشي على عكـــاز .. كانت رافضة فكرة هالكرســـي المتحرك ..
لسبب واحد ..
احســاسها بالعجــــز .. وانها راح تحس بعمرها عاجزة ..
وهي مب مستعـــدة تسلم نفسهـــا لسخرية القدر أبداً !! ..
.
.
ف المطبــخ التحضــيري بدت دلال الجاي والقهوة تنحــط ..
وصوانـــي الحـــلويـــات اللي انحـــطت ف ثلاجـــات المطبـــخ التحضيــري .. عسب ما توصل ريحة الإكل الها ..
ام خالد : الله يهديج يا زوبا قلتلج سويه مشوي اشعنه مسوية مقلي ؟
زوبا : اوه ماما والله انا في نسيت ..
ام خالد : الحيـــن منو يحــب المقلي .. حلاته المندي بالدياي المشواي .. وهاي وينها عذبو اشنعه ما تكرمت اتي واتعابل الأكل ؟ مب جنه اللي يايين اهل ريلها ؟
منوة بهدوء : ماما يمكن هي في البس ملابس ..
ام خالد : لا حووول من هالبنية .. صوفي حبيبتي سيري فوق وزقريها .. وازقري بالمرة اســمو .. عنبو انا ما يبتهن ع الفـــاضي .. خلهن يعابلن شوي ..
منوة بعطف : ماما انته سير اجلس في مجلس .. كلو تمام ماما ..
ام خالد : الله يهديج أي تمام و كل مرة تظهر لي علة يديدة ؟
منوة : ماما انته روه بدل ملابس ..انا في شوف كل شي .. ما في خوف ماما ..
ام خالد بحنـــان : الله يجبر بخاطرج يا بنتي ...
مشتها منوة لين حجرتهـــا .. وعقب ردت للمطبخ التحضيري ..
كانت الاعدادات على قدم وســــاق ..
وهـــل البيـــت يحـــاولون قد ما يقدرون انهم يبيضون الويهـ ..
الســـويت كان على منوة ..
سوت لهــم كيكة فراولة ..
مع تشيـــز كيـــك ..
وســـوت نفس الايسكريم اللي سوته أول مرة ..
وما نســـت تسوي البسبوســـة اللبنانية على طريقة ام فايـــز ..
ويمـــكن هاي اول مرة تتذكر ام فايز بالخيـــر !! ..
لولاها جان ما كانت الكـــل بالكــل ..
بالأول زوبـــــا الكل بالكـــل ..
والحيــــن كل شي تحــــول ..
هي ...... والعالم !!! ..
.
.
مع قرب موعد وصول الضيوف راحت منوة فوق ..
كانت تمشـــي بهدوء وتفـــكر بأمور مختلفة ..
وانصدمت باللي كان يركض باستعيال .. وصدمها ع جتفها بقوة ..
خالد رفع شعره عن عينه وهو يطالعها بدهشة : سوري ! ..
منوة ما عرفت بشو ترد عليها .. لان حزتها لسانها انربـــط ..
تنهـــدت بصـــوت خــافت .. وطافت عنه ..
حتى خالد طالعها باستغراب : هاي بلاها !!
وصـــلت فــوق لحجــرة عذبــة ودقت الباب ..
فجت عذبة الباب ..
عذبة : ها شو تبين صوفي ؟
منوة : ماما يبي انته ..
عذبة جسفت ويهها : بعدني ما خلصت .. ما تمكيجت ..
منوة : جين خلص بسرعة بعدين ماما سوي جنجال هق انته ..
عذبة : اوكي ..
دقـــت حجرة باب اســـما
أسما وهي جاهزة : ها صوفي ماما تبيني ؟
منوة : ايوة ..
اسما : خلاص الحين بنزل ..
نزلـــت منوة من الدري .. وصادفت خالد للمرة الثانية ..
هالمرة باعدت نفسها وطافت عنه ..
خالد كان مستغرب من ردة فعلـــها ..
بس لمجرد انهــا خدامة ما عطــاها ويه .. وسار ..
.
.
ومع مرور الوقــــت وصلـــوا الضيـــوف ..
ومنـــوة ما قصـــرت من ناحيــة الإشراف ..
وكـــانت " والنعم " مدبـــرة ممتازة ..
بحيث ان يوم حزة الغدا ..
جهزت كل شي مع باقي الخدامات ..
من ناحية الحط والشل ..
ومع هـــاي التحضـــيرات ..
غفلت منوة عنهم بعد ما حست بإرهاق .. واتجهت للملحق ..
زخـــت دفترهـــا ويلســـت تكتـــب ..
بس مـــا كملـــت لانها انتبهت لروز داشة ..
روز بخبث : what are you doing ?..
منوة بغيظ : I think that it's not your business..
روز : Oh. What a nice note !..
منوة غطت دفترها بقهر تحت المخدة : I said that it's not your business !!!..
روز تضحك k ok, but what are you writing about ??..
منوة : I think that it's a bad habit to be carious ..
روز : hahahaha . what a funny thing ..
وســـارت روز عنـــها ..
منوة من قهـــرها يلســـت شويه ..
وعقب ردت للمطــبخ عســب تجـــابل السويـــت ..
الحريــــم كانن متخبـــلات ع شغل منوة وأخلاقها ..
حتى ان ام خالد غزتها بنظرة انها تظهر عنهم لان عيونهم حارة خخ ..
بعد ما خلصـــت من الشـــل والحط ..
سارت المطبـــخ عسب تـــاكل لها لقمة ..
ويا راشـــد عسب يستهبـــل عليها .. خصوصاً انه تعود عليها وايد ..
وغفلــــت عن روز اللي دشت الملــحق مرة ثانية ..
و هدفهـــا الدفتـــر ..
فتشـــت ع شبريتــها .. وحصلت الدفتر بسهولة ..
شلتـــه وتوجهت ع طول لميلس الرياييل ..
:: أحب أخبركم ان ::
روز كانــــت تحب خالد بطريقة غريــبة .. !!
حتى ان راشد دوم كـــان يعاير خالد بهالنقطة ..
وكل ما جاف روز جدامه قال حق خالد هكي حبيبتك ..!!
خالد كان يعاملها حالها حال أي خدامة فهالبيت ..
ويمكن هي فسرت هالحب لانه ما كان ينازعهــا ولا يهزأها ..!!
وصـــلت روز لميلس الرياييل وزقرت خـــالد ..
وعقب ما ظهـــر لها ..
خالد بغيظ : شو تبيــــن ..
روز : I found this note with sofy ..
خالد باستغراب فج الدفتر ..
كان الكلام بخط عربي واضح وفصيــــح ..
قال وهو الصدمة مالتنه : صوفـــــي عربيــــــة ؟!!!

/
\
/
\
يتبع ،،

[روح الحلا1]

واصل استاذي،، شوقتنا..
لا تطول علينا.ههههههه

[القيصـــــر]

واصل استاذي،، شوقتنا..
لا تطول علينا.ههههههه

صباحك خير شكرا على المرور
إن شاء الله ما أطول

[القيصـــــر]

الجزء السابع // الفصل الأول

( مذكـــــرات واعــــترافـــــات ! )

روز باستغراب :what ?..
خالد بعد ما سرح بخياله شوي : لا ماشي ماشي .. خلاص سيري ..
مشت روز عنه وهي متخبلــــة عليه ..
( صدق انها مستخفة )
تم خـــالد واقف بحيرة ..
كيف راح يدش وهالدفتر ف ايده ..
تنــــهد وخش الدفـــــتر بين الزراعـــة ..ورد دش الميلس ..
مر الوقت بسرعـــة .. وع العصر ..
حميد : جذاب انته .. ما تعرف شي ف النت يالجاهل وينه أحمد خله يعلمك ..
خالد : احمد يالس ع النت .. شو تباني استوي مينون شراته .. عيوني اباها والله ..
حميد : اونك عاد خخ ..
خالد : ههههههههههه جفت عاد ؟
( ومع السوالف )
حميد : يلا خالد انا اترخص الحينه .. ادري فراقي صعب بس تحمل شو تسوي بعد ..
خالد : ههههههههه يالله .. وين تبا .. ما بتجوف حرمتك ؟
حميد : بيني وبينك انا غياظ فيها ما بزقرها .. اونه انا اليوم حلوة لازم تجوفني .. خخ ..
خالد : ههههههههههه يا حليلها اختي والله .. ما تدري ريلها سي ان ان الخليج خخ ..
حميد : ف عينك .. ( يطالع بو خالد) يلا عمي .. تسمح لي اجوف عذبــة ..
خالد يطالعه باستهزاء : هذا اللي يبا يترخص من شوي ؟؟
حميد : افا بس .. تبا الفكة يعني .. بعديـــن أنا ما روم ع زعل اختك .. بتاكلني ..
خالد : هههههههههههههه..
حميد : راشد يالغــالي ممكن تزقر عذبة ؟
راشد : يا خي منقووود تجوفها عييييب ..
حميد : طاعوا ها .. ايه هاي حرمتي ..
راشد : حرمت عليك عيشتك ها ها ها ..
بو خالد : عيب يا راشد .. ما عليك يا حميد وانا ظاهر الحينه بسير أزقرها ..
حميد : تسلم عمـــي ..
تخبـــلت عذبة يوم درت ان حميد يبا يجوفها ..
وما استوت دقايق الا وهي ياية ..
حميد : هلا هلا هلا هلا بالغلا كله ..
عذبة : اهلييييييين ..
خالد يطالع راشد : احم احم نحن هناااااااااا ..
حميد : ما سوينا شي .. مالت ع هالويه ..
خالد : ههههههههههههههههه ..
حميد يطالع عذبة : ياختي في ذبابتين واقفين ع راسنا .. حشى الاحساس نعمة ..
خالد : يا خي عندك اللي يجتل الذباب .. سير واضربهن فيه ..
حميد : المشكلة ان مال الذباب اصغر عن حجمهم ..
عذبة بلوم : نشوا يعني ما تحسون ؟
خالد نش وهو يضحك : هههههههههه ..حشى من زينكم الحين ..
وسار عنهم وهم مقهورين منه ..
صدوا على راشد بإجرام ..
راشد : والله بسكر اذني وبغمض عيوني ..
حميد : اخوانج علل ع الجبد ..
عذبة : فديتهم والله دمهم خفيف ..
حميد : مالت !!
عذبة : عليك انته انزين ؟؟
حميد : طاعوا هاي .. يا بوج لا تاكلين فلفل وايد ..
عذبة : زين زين .. بس بذمتك مب ظاهرة حلوة ؟
حميد صد على رشود اللي اونه مسكر عينه وساد اذنه بايده ..
زخ ايدين عذبة ..
حميد : الا قمر وتهبلين .. يا عمري انتي .. يا روحي ..
راشد : راحت روحك قول امين يا الهرم (يطالعه بحزم) شل ايدك عنها ياللي ما تستحي ..
حميد وهو يودر ايدين عذبة : بعد لا تلوميني اذا ما كنت رومانسي وهاييل اخوانج !! ..
عذبة : هههههههههه احسن ..
شل خالد الدفتــــر ووداه حجرته .. وعلى طول رد لقوم حميد ..
بعد مرور الوقت ..
ظهر حميد وهلــــه من البيت ..
اسما : عمتج عوذ بالله منها رزة .. حشى جني انا جنتها مب انتي ..
عذبة : الا كريييييهة وتلوع بالجبد .. بس ما عليج انا بادبها ..
ام خالد : حشى ف حرب مب اوادم ..
عذبة : امييييه قاهرتني ورافعتلي الضغط والسكري .. لا بعد تقول حق صوفي تعالي اشتغلي عندي بعطيج ضعف المعاش .. وين تبا هاي ؟
ام خالد : بس فديتها صوفي بردت خاطريه يوم قالتلها انا مرتاحة هنيه ..
عذبة : انتي صبري عليه يا اميييه ان ما راويتها ..
اسما : عاشت عاااشت ..
بعد ما مر هاليوم بسلام ....
منوة هالمرة ما زخت دفترها خوفاً ان يستوي Touch بينها وبين روز ..
ونــــامت على طول وهي هلكانة من التعب ..
كل هل البيــــت فهالحزة رقود .. عدا خالد ..
بدى تصفح الدفتر اللي عطته اياه روز ..
بدى يحاول يفج طلاسم حيرته ..
بدى بقراية أول مذكرات منوة ..
والله يســــــــتر !! ..
.
.
" ولدت في مكان مجهول ، مع أسؤة لا أتذكرها ، بالكاد أتذكر اني لعبت في حديقة منزلها ، ومشيت على بلاط قصرها، ولكن حادثة الاختطاف قد محت هوية أمي وأبي "
.
.
خـــالد باستغراب : ليكون هذا دفتر صارقتنه من حد كانت تشتغل عنده ! ..
كمل قراية الدفتر ..
.
.
" أم فايز، المنافقة ، أكرهك وأكره كل شيء يذكرني بك، لا أستطيع نسيانك ولو للحظة، لأني أراك تلفحين نفحات الشر في وجهي البارد كي يحترق أكثر .. وأكثر "
.
.
خالد بغباء : أحس بعمري استويت المحقق كونان ..
.
.
" لو أن بيدي ان أنتقم، لانتقمت من أبو فايز ، الذي انتشلني من المجرم الخاطف، آه لو أعرف من هو خاطفي ؟ لكنت ركضت اليه وقتلـــــته ! "
.
.
خالد : حشى قصة بوليسية ..
.
.
" انمحى كل شيء في خاطري وذكرياتي .. الا اسمي الذي لا زال يتردد .. منوة .. منوة .. منوة .. منوة .. أنا منوة ولســــت صوفي "
.
.
خالد بصدمة : الحين منوة ولا صوفي ؟ شو السالفة !
.
.
" لا يحق لهم أن يكونوا جائرين هكذا ، أليس من حقي أن أتعلم في جـــامعة ؟ أنا مواطنـــة .. والله اني مواطنـــة "
.
.
خالد بحيرة : مواطنة وهندية ؟؟ والله اني مب فاهم شي !
.
.
"حسبي الله ونعم الوكيل على من كان السبب، أدري بجواز احداهن والتي تدعي صوفي، ويظنون أني ساتحول من مواطنة إلى هندية بلمح البصر، وسأصدقهم ، تباً لكم، أكرهك يا أبا فايز، وأكره كل شيء يذكرني بك "
.
.
خالد بحيرة أكبر : معقولة كل هالكلام صدقي ؟! ..
.
.
" وها انـــا أكمـــل 20 عاماً ، لأصـــدم بخبر جديد ، هـــه سأخدم في بيوت الناس .. هل أنا لقيطة ؟ "
.
.
خالد بحزن : مسكيـــــنة والله ..
.
.
" سأغمض عيني وأدع سخرية القدر تفعل ما تشاء بي، ربما بذلك ساتخلص من أم فايز وزوجها الحقير إلى الأبد"
.
.
كان خالد يقرى هالصفحات بنهم ..
وكل فضوله يقوده انه يكمل .. و يكمل .. و يكمل ..
منوة كتبت عن حياتها ويا ام محمد وتحرش راجو ومحمد بهـــا ..
مما لا يخفى عليكم ان مب كل المذكرات شفتوها ..
في مذكرات طاحـــت بإيد خالد بس ..
خالد بغيظ : لو أجوف هالحثالة بس .. عنبو مب رياييل هاييل !!
وثانيها مزون وقصـــة حب سيف .. وزواجـــه ..
خالد بغيرة : معقولة كان يحبها ؟ لو كان يحبها بيتزوجها ..
وثالثها مع شهـــد وعمـــر والخيانهـ ..
ورابعهـــا الحيـــن ..
حياتها معاهم ..
كانت كاتبة تعليق لكل فرد فهالبيت ..
استانس خالد يوم جاف ان اكبر مساحة كانت عنه ..

" لا أعلم لم تملكني شعور بالرهبة منذ ان رأيته ، لكنه جرحني حين ظن أنني تمثال يقف أمامه ، أحس به غامضاً، تلف حوله قصص الخـــيال، فلا هو أمير سندريلا، ولا هو وحش الجميلة ، ولا هو مجنون ليلى، هو أسطورة لوحده، كم اتمنى لو أستطيع أن أسحب شعره، هكذا فقـــــط .. بلا سبب ! "

( يا ويــلج من خــالد يا منوة خخ )
خالد : هههههههههههههه تسحبني من شعري ها؟ !
/
\
/
\
يتبع ،،

[القيصـــــر]

الجزء السابع // الفصل الثاني

ماعليه ههههههههههههه .. ( تذكر اللي قراه ) .. معقولة اللي قريته صج ؟؟ خدامتنا اللي تخدمنا واللي استوت الكل بالكل مواطنة !! مواطنة عاد ؟ لا بعد من طبقة غنية وانخطفت وهي صغيرة ودرست بجواز هندي .. يا خي شقايل ؟؟
( ايه انا بنت ) ..
خالد : اوه يا ختي السالفة ماتدش العقل الصراحة !!
( كيفك لا تصدق ) ..
خالد : آه يا قلب دبي .. صدقيني احس بكم هائل من التعاطف تجاهها ..
المسكينة !! ..
تعاطف كبير قاد خالد لمــــنوة ..
شفقــــة ..
و .. حــــــــــزن على حـــالها !
احساس غريـــب حسسه بالألم .. بالحلـــم المستحيل .. بالأمان .. بالحب !!!
خالد : أي حب !! هاي ما استوى لها اسبوع هنيه .. يا الله .. بس شو مصلحة روز انها اتيب لي هالدفتر ؟؟ هي مبين عليها خايفة تنكشف .. وحرام تعرف اني كشفتها .. هالدفتر لازم يرد لها قبل ما تعرف أو بالاحرى تتحسبه ضاع ورد عنها بدون ما يكشفها حد !! ..
ما قدر خالد انه ينام .. بالأحرى ما عرف كيف ينام والأفكار تروح واتييه ..
منوة & صوفي
شخصيتين في بنت وحدة ...!!
اليـــــوم اللي عقبه ...
نـــش خالد مــتأخر على غير العـــادة ...
البارحة كان سهران وهو يفكر بمنوة ..
صعب على الانسان انه يكتشف شي مغاير عن اللي يظنه في شخص !
أم خالد تدق الباب عليه : خالد اميه نش .. بلاك اليوم .. الساعة 12 بسك رقاد ..
خالد وهو متحلف شرات الصمونة : مممم زين زين ..
ام خالد : انا ما يقهرني ولا يرفع لي الضغط الا يوم يقفل هالولد الباب على عمره .. شو عنده مادري ..
خالد كان مغمض عينه .. بس مستمتع برمسة امه وهي تتحرطم عليه ..
أم خالد : صوفي .. اميه صوفي ..تعالي دقي الباب على خويلد لين ما ينش ..
هني فز خالد من رقاده ... صوفي .. يا ويلي !!
تمت منوة تدق الباب ..
خالد يستهبل : منووو ؟
منوة : قوم ..
خالد بعبط : منو انتي ؟
منوة دقت الباب بالقو وسارت ..
خالد : خييييبة ... ما عليه .. ويا هالويه ..
تلبس خالد .. وتعمد يسحي شعره ويسوي التسريحة اللي الشباب هابين فيها هالأيام ..
عاد أونه الأخ متفيج ..
حلاته يوم يرفع ضغط امه وابوه على هالتسريحة ..
نـــزل الصــــالة وهو رااايق ع الآخر ..
خالد يحب راس امه : صبـــــاح الورد والياسمين والمسك والعنبر والعود والبخور ..
ام خالد بلوم: هيه ياللوتي .. ادهن السير .. صح النوم .. جان ما نشيت بالمرة ؟
خالد : والله يا امي الغالية بارحة ما ياني رقاد .. جايسني ارق مب طبيعي !
ام خالد : ارق مب طبيعي ؟؟ الا قول من كثر المغازل يا مسود الويه ..
خالد : افا افا .. عصبت الغالية .. افا عليج يا امي انا مب راعي هالمناكر .. انا ما أغازل .. هم يغازلوني هع هع ..
ام خالد : هي مرررة صدقتك الحين .. بعدين تعال انا مب قايلتلك لا تسوي هالتسريحة الماصخة ..
خالد : ماما هاي هيي المودة هالسنييي ..
ام خالد : ماااالت جان الموضة بتخليكم انتوا والسبلان واحد .. اتخبرك تبا ريوق ؟
خالد : هيه ليش مابا .. ميت من اليووووع ..
ام خالد : صوفي صوووفي .. حطي ريوق حق خالد ..
خالد : الا وينهم الشباب وبو الشباب ؟
ام خالد : اسميك مخرف ... .محد ف البيت .. كلهم برع ..
خالد : حتى أحمدو ؟
ام خالد : هيه
خالد : ويه غريبة أفرج عن لابتوبه ..
ام خالد : ساير ياخذ له واحد يديد الهرم .. عيزت فيه اقوله خذ لك كتاب اقراه ما يبا .. تصدق اونه يقول انه يقرى ثلاث كتب على كمبيوتره ؟
خالد : هههههههههههههه هي مرررة يقرى .. ما تجوفين عيونه بتظهر من الشاشة .. ولا يلسته اللي يقول مجرم ... ما عليج منه يا أمي ..
ام خالد : لا عليه منه .. باجر اذا عرس منو بترضى فيه .. حشى بيتزوجها ولا بياخذ الكمبيوتر ؟
خالد : ههههههههه .. لا بيعقل بس صبرج عليه ..
ام خالد : ان شا الله ..
دشت روز ووياها صينية الأكل ..
خالد بغباء : مب جنج قلتي صوفي ؟
ام خالد : لا بويه انت سبشل .. جان تبا عيون روز بتيبها لك ..
خالد يطالع روز باحتقار : اميه قوليلها تذلف لأني أحس عمري برجع ..
ام خالد تطالعه بابتسامة : صوفي صوفي ..
روز : I'm here Madam..
أم خالد : ويديه هاي شو تقول ؟
خالد يطالعها باستخفاف : سيري زقري صوفي محد يباج انتي ..
منوة دشت الصالة عقب دقيقة : نآم ماما ..؟
ام خالد : اميه اليوم خواتي بيون .. ابغيج تجابلين كل شي من الألف للياء ..
خالد كان يتفحص منوة وف خاطره : ها تبين تمطين شعري يالذكية ؟
( هيه مب من شي دامك استخبرت انها مواطنة يالهرم )
منوة : ان شا الله ماما (تطالع خالد باستغراب)
خالد بعبط : اميه بيضي الويه ما نبا شي كجرى .
منوة رفعت حياتها : انا ما في سوي كجرى زين ؟ يبي شي ماما ؟
ام خالد : لا فديتج روحي ..
سارت منوة عنـــهم ..
خالد ما علق ع نظرتها .. لأنها هي فاهمة كل شي ع الطاير ..
كان قلبه معورنه عليها بمجرد انها مواطنة ..
وتخدمهم !!
بمجرد ان اللبس اللي لابستنه مب لها ..
اللبس هذا لأهله ..
لناس تعودوا عليه ..
ما انجبروا شراتها عليه ..!!
كالعادة منوة كانت بهمة عالية وشدت حيلها ..
وحرصــــت بعد انها تسوي شي زين .
فيما من جهــــة ثانية ..
عطى خالد الدفتر لروز عسب ترده لمنوة بكل سرية تامة .
وفعلاً ..
تمـــــت المهـــمة بنجـــاح ! .
دخــــلت منوة المطبخ التحضيري اللي جريب من الصالة عسب تحط دلال القهوة والجاي ..
وهــي ظاهرة .
ام خالد : اسمع يا خويلد .. انته لازم تتنقى لك وحدة من بنات اختي . تراك لا عندك عم ولا عمه عسب تاخذ عيالهم !
خالد : اميه انا مالي خلق اتزوج الحين .. ما أفكر ف الزواج ف هالوقت ..
ظهــرت منوة من عندهم ..
ما شغـــلت نفســها بالتفكير فـ خالد .
مجرد التفكير فيه يحسسها بقشعريرة غريبة ! ! .
.
.
مع وصول الضيوف .
أم سيـــف // أم هزاع // وعيــــالهم .
أم خالد : حيا الله الغاليات .. اسفرت وانورت والله ! .
أم سيف : النور نورج يالغالية ..
ام خالد : تسلمين والله .. اشحالكم يا بنيات ؟
مهـــرة بدلــع : الحمدلله بخير خالو ..
روضة : انتي شحالج خالو ؟
ام خالد تطالع روضة بإعجاب : الحمدلله بخيـــــر ..
أسما : شميم عندج خبر ان عذبة باجي على عرسها كم شهر ؟
شما : حلفي بس ؟ وانا ما فصلت لين الحين !!
روضة بدلع : أنا (تطالع ام خالد) جسمي حلو .. واروم أحصل قياسي بسرعة .
أم خالد بحب : فديتج والله يا رويــض ..
دشــت منوة بدلال القهوة والجاهي
أم خالد : يالله قولوا آمين تكون روضة من نصيب خالد ..
ضحكت روضــــة بكبريــــاء ..
رفعت منوة راسها عسب تطالع روضة ..
بنت حـــليوة .. كشختـــها ملفتــــة .. وعيونها وساع ..
أسما تهمس لشما : هاي خدامتنا عمرها 20 سنة ..
شما باستغراب : والله ؟؟ انتي (ترمس منوة) شو اسمج ؟
منوة استحت :Sofy..
شما : من وين ..؟
منوة :from India..
روضة باندهاش : عسب جيـــه حلوة .. والله تفر الممثلات صووووب واحد .. غربلاتها ملامحها خليجية ..
منوة انحرجت والتفتت لأم خالد : يبي شي ماما ؟
ام خالد : لا فديتج .. حبيبتي بس جابلي الغدا وحطيه حق الرياييل بعد .
منوة : ان شا الله ..
روضة تطالعها بنظرات غريبة : غربلاتها .. وهاي (تصاصر اسما وعذبة) مجابلة خلودي 24 ساعة ؟
عذبة : مسكينة ولا تطالعه .. قمر شو تبا بخالد ؟
روضة : خلودي وسيم فديته ..
اسما : بس هي أحلى عنه .. انا اتوقع لو هاي ما تشتغل جان ظهرت احلى ..
روضة : خلودي ما يراقبها ولا حاط عينه عليها ؟
عذبة تنرفزت : انتي هب جنج مصختيها .. هو ما خطبج وانتي بعدج مستخفة عليه ؟!!
روضة : اوف !!
.
.
بالنسبة لمنوة اللي جهزت الغدا .. على حسب توصيــــات ام خـــالد ..
الغـــدا ينحط للرياييل أول .. ومن عقب ما يجهز ينحط للحريم ..
حـــطت منوة السماط ف غرفة الطعـــام .. لأن الرياييل ما يرتاحون الا بيلسة الأرض ..
وتمت تتساعد هي والخدامات الباجيات ..
تمـــن القفش ( الملاعق) ..
عاد يوم دشت منوة بالقفش كانوا الشباب توهـــم يالسين ..
تعرفون بعد الشباب ما يصدقون يشمون ريحة الأكل خخ ..
حطت منوة الخواشيق ويلست توزعهم ..
هزاع : يالله الحــــافظ على هالحسن .. هاي بشر ولا ملاك ؟
خالد طالع هزاع بغيظ : عيب عليك !
راشد : ايه ما نرضى على مالتنا .. حقوق البشاكير محفوظة هع هع ..
هزاع : يا حيكم والله يوم ان هالبشكارة مالتكم .. يالله تصبحون بويه قمر .. مب ويه ريتا ولالني ..
خالد يطالع منوة بنظرة قوية : حطي الخواشيق وسيري شو تتريين بعد ؟
منوة حست بالإهــــــــــانة !
طالعت خالد بسخط وظهرت ..
يلست منوة صوب الصـــالة عسب اذا حد زقرها من ميلس الحريم ولا الرياييل تسمعهم ..
كانـــت تحاول تحبس دموعها وقهرها من خالد ..
بس غصب عنها ويهها احمر وانتفخ ..
!!
من بعد ما خلــــصوا غدا ..
نش خالد وفج باب غرفة الطعام المطل على الصالة ..
ولقى منوة تنافخ وويهها أحمر من الخاطر ..
تنحنح شوي ..
منوة حست بوجوده بس صدت بويهها بارتباك ..
خالد : تعالي شلي الغدا ..
منوة بصوت متكسر : زين ..
نشت منوة بتزقر الخدم ..
خالد باستعيال : صوفي ..
صدت له باستفهام ..
خالد حط ايده ع شعره وببراءة : منوة أنا آســـف ..!
منوة وقلبها شوي وبيوقف : منــــــوة !!!!؟؟؟
/
\
/
\
يتبع ،،

[روح الحلا1]

تابع استاذي لا تتوقف..
ننتظر القادم...

[القيصـــــر]

تابع استاذي لا تتوقف..
ننتظر القادم...

كل الشكر لك على متابعتكم المستمره للروايه
تحياتي لك

[um eram]

كل الشكر ع الطرح. ...انتظر اﻹكمال