العلاقات الزوجية قدر- ام تجبر وتكبر؟؟؟ قصه قصيره.

[عيون البشر]

سالم في الشركه يشتغل
الهندي المسؤول طالب منه يخلص بعض الاعمال
فجأه تلفونه يصيح، تلفونه شارنه مستعمل ب 8 ريالات
ما مدعوم بأي برامج. فقط اتصال ورسايل نصيه.
( تلفون ابو ليت ) بالتسميه المحليه.
زوجته تتصل، يسترق النظرات للهندي وفي غفله منه يعيد الاتصال في نفس الدقيقه لزوجته.
ترد عليه: وش فيك ما ترد يوم اتصل عليك وش هالحركات اعرفك ما طايقتي.
يسكت سلوم ويلعن ابليس ويسألها تفضلي موه باغيه؟؟
تضحك ذيك الضحكه الخبيثه، ويصير صوتها لين وخفيف.
حشاااا يبوك مسرع ما تغيرتي!!!
عموماً تقوله: اباك تمر السوق وتجيبلي ذيك القطعه اللي شايفتنها البارحه.
سالم يقول: زين البارحه جايبنك وماخذه اللي تبي.
تقول في عصبيه: هذا انته يوم ابغى شي تحرمني منه ومعذبني.
يسكت السلمي ويقولها ان شاء الله.
يغلق تلفونه ابو ليت
يخلص شغله، وبثياب الدوام يدخل السوق وياخذ القطعه اللي باغتنها غاليته.
يدش البيت ويسلم على زوجته واولاده
قبل لا ترد السلام تتناول الكيسه، شكراً سالم ما قصرت.
يصلي الفقير ويلحس الصحن ويبغى يتسدح.
تجيه الشريره وتجلس جنب راسه،
قوم ابغى اروح السوق اخذ كم غرض
سالم يرد: زين بغمض طشونه وبوديك العصر
الزوجه: لا تو توديني بتنام بالليل من وقت.
يلعن الشيطان ويسكر حلقه اللي يتثاوب ويطلع مع السيده السوق
تلف وتلف وتاخذ اللي تبغاه واللي ما تبغاه
تقوله:سالم بخذ حال خواتي
سالم بخذ حال امي
سالم بخذ، سالم بخذ، سالم بخذ
وسالم يدفع وساكت.
ينبها ويقولها: بنت الحلال ما بقى شي من مصروف الاطفال.
يرجعو البيت
يطلع يصلي المغرب ويدخل يطمن على امه وابوه في بيت اخوه الكبير
يطلع من عن اهله راجع للبيت.
جوعان الفقير،، فلانه موه طبختي:ترد عليه والله ما تفيقت اليوم منشغله
وانت وين من يوم المغرب كل هذا مع امك وابوك حشا كأنهم بيروحوا الحج عنك
المهم قالت حال سالم انها كانت مشتغله وما فاضيه
وهيه كانت من يوم راجعه من السوق في جروبات البياعات تحوط. بالواتس اب( تلفونها اخر موديل، سالم ماخذنه حالها تمويل، يدفع اقساطه)
عموما يطلع: يشري عيش ودجاج ويجيبه ويفرش ويتحلقوا الاطفال ع الصينيه
وياكلو العشاء واولهم الشيخه اللي ما متفيقه تطبخ.
سالم طلع يصلي العشاء: تتصل عليه
سالم اباك تروح السوق فوادي في قطعه ما كانت عاجبتني بس تو قالت اختي انها بتطلع حلوه علي.
سالم فقير ينتفخ فواده وبترول ماشي في سيارته.
يقولها : ما بروح ما معي بترول
تعصب الشيخه، تزمجر وتحشر وتتنازع وتقوله: انت الحياه معك عذاب
انت ايش مسولي في حياتي( كل الحريم يستخدمنها)
عموماً تزعل وتنام ع السرير وتنطوي بالبطانيه
من بعد صلاة العشاء
و سالم يركض وراء الاطفال
يغسلهم، يسبحهم، ينظف، يكوي للمدرسه، والصغير مخيس حفاضته وسالم يركض
وهيه منطويه كما النقانق في الخبزه.
ما نايمه بس باغيه تطلع منه ليش قال الها لا
زين والقطعه مال الصبح و الطلعه الظهر واغراض حيانك ما يستاهل تتغاضي عن مره رفض لك طلب فيها؟؟؟
ينامو الاطفال ويجي الجندي المجهول ينام،، يخلي راسه ع المخده وتقوم عنه تطلع برع تشغل التلفزيون
وتجلس تتابع المسلسلات،،،
يرقد الفقير بغصه وهم، وجالس يقول تو انا ما سويت شي والله ما معي فلوس
وهذي ما ترحم
عموماً تبقى على هالحال السيده لين جابو في المحلات قطع وملابس جديده
يرجع من دوامه بعد اسبوع من الزعل ويلقاها تضحك وتقوله:
سالم ابغى اروح السوق

تنتهي حكايتنا مع سالم وزوجته
وتبدأ فكره او عبره ربما تصل لكم او لا تصل
ولكن الله من وراء القصد
ومنها عبره قد نتعلم منها حسن التصرف في العلاقات الزوجيه

[قاتل ضفدع]

واقع حقيقي مؤلم

الله لا يبلينا بمثل هذي النوعيات وهن كثيرات وفيرات

دام انه الزوج فاك فمه وحلقه تراها معاه وإذا قال ما اقدر قامت له حية الكوبرا .. لا حول ولا قوة إلا بالله

بارك الله فيك والله يكفينا بلاوي الحريم

[مائة بيسة]

أوقات لرفضك طلب او اعتذارك لتلبية أمر يخلي غيرك ينسى كل أمورك وشغلاتك الحلوة

[تباشيرالأمل]

مساءالخير
بصراحه هالسالفه احسها من الخيال
معقوله تصير فيه ازواج كذا وزوجات كذا

[قاتل ضفدع]

مساءالخير
بصراحه هالسالفه احسها من الخيال
معقوله تصير فيه ازواج كذا وزوجات كذا

يصير استاذة

الله يصلح الحال

[تباشيرالأمل]

يصير استاذة

الله يصلح الحال

آمين يارب
بس هذي استغلال ماهي حياة زوجيه
الادوار هنا مقلوبه
الله المستعان

[عمانية الهوى والهوية]

القصة مبالغ فيها كثير .. ما اعتقد شي ازواج بنفس سالم يعني اذا شي ما يتجاوز ١٥ % اللي نشوفه في الواقع العكس ...والله المستعان

[حبوه غلوي]

عاد السموحه منك بس خليت سالم الملاك الطاهر
وزوجته الشيطان سمحلي هالنوعيه مو موجوده لهدرجة عاد
ما يصد ولا يرد والله العكس لي صاير الحين

[عيون البشر]

جميل يا اخوان وارائكم متوقعه
بس لا تحاتو ترا للموضوع تكمله


بس ترا هالقصص موجوده بس انا ما عممت

[عيون البشر]

لكن مثلاً
الحرمه ما تقول لزوجها انت وش سويت لي
والا يوم تزعل ما تفجر في الزعل؟؟

ترا يقولوا الحريم عقلهن ناقص من هذي الناحيه انهن ينكرن العشير احيانا
طبعاً بدون تعميم.