شاب القصيد وباقي الهم ما شاب،،

**اطياف السراب** · 07-05-2018, 12:20 PM

شاب القصيد وباقي الهم ما شاب ........... ونعيم فكري ما تجاوز جحيمه

يوم انفتح معناي للحرف وانساب ....للحزن قيمه واصدق الشعر قيمه

نويت أمّيلها غزل واكسب إعجاب ........... حديث عشقٍ من نديم لنديمه

لكن حضر هم الشعر والغزل غاب ........... جا للشعر بين المحاني حطيمه

من يحترق ماله عن النار مجناب ....... وماهوب شرط إن العواقب سليمه

والشعر لو جاله جماعات وأحزاب ........... زيف المشاعر لا تمادى ذميمه

ياشينها لا طوّلت حرب الأعصاب .......ما ينتصر فارس ولا من غنيمه

ماجا بدون حساب ماجا له حساب ........... والنصر لاجا سهل مثل الهزيمه

احدٍ عرق وجهه من الوقت صباب ........... واحدٍ عرق غيره مسبب نعيمه

للفعل روايه وللمجلس آداب ........... وللمستقيم أفكاره المستقيمه

والصفحه اللي ضيّعت جهد كتّاب ........... وجودها وسط المجلد جريمه

من عابها يفتح على الناس له باب .....يشيب راسه ما عرف من خصيمه

ومن غض طرفه ضاع والوقت غلاّب ....... والعقل نعمه والجهاله عقيمه

إلى متى زود التفاخر بالأنساب ........... العز من توّج جديدة قديمه

كبوة جواد الروس من حظ الاذناب ........وبعض الاسامي جت لاهلها ظليمه

بس العزى ما ينقص النار مشهاب ........... من شذ محروم ٍعساه الحريمه

والفعل بيت وعزة النفس الإطناب .......يبنى على الشيمة وبذل وعزيمه

ولو نظرة العالم لنا بدو وأعراب ........... حنا الأصول الثابتات المد يمه

حنا بنينا المجد من قوّ الأسباب ........... تاريخنا طبّ العقول السقيمه

وما يلغي التاريخ تظليل الأغراب ........... الحر يفهم والبهيمة بهيمه