#المسلسل الرمضاني# ( سوالفنا عمانية) الحلقة الأولى

[عيون البشر]

المشهد 2
بعد صلاة العصر، سالم يلبس ملابس الرياضه ويتجهز للذهاب للعب. امه سعاده جالسه تتقهوى في الحوش، جرس البيت يرن وسالم يفتح الباب.

سالم: هلا الخاله مرحبا تفضلي قربي امي في الحوش تتقهوى. (في ريبه من امره ليش الخاله رجعت مره ثانيه وهيه قبل ساعتين طالعه من البيت)

تدخل الخاله وتقول: مرحبا بالغالي مرحبا بالمعرس ( تضرب سالم ضربات خفيفه على ظهره) ما شاء الله عليك رجال وشيخ يبغالك عروس.

في ضحكه وخجل سالم يرد: من هين خالتي بعدني توني مشتغل حتى الراتب ما طلع.

تضحك الخاله وتهم بالدخول للبيت مع اختها سعاده، وتقول: ربك كريم حبيبي لا تحاتي شي ناس شارينك...

تردد بصوت مرتفع في الحوش: وينك امك المعرس وينك سعاده.

ترد سعاده من بعيد: قربي الاخت قربي تعالي هنا يبوك تحت البيذامه جالسه رجولي يعورني وزايدنا هالحر.

تجلس الاختان، ويخرج سالم من المنزل في زي الرياضه ويغلق باب المنزل.

[عيون البشر]

المشهد 4
عوشوه تدخل بيتها بسرعه وهي تنادي ابنتها نعيمه..

عوشوه: نعيمه يوووه نعيمه تعالي هينك

نعيمه بثياب مبلله كانت تنظف المطبخ، ورابطه الشيله على بطنها ولافه شعرها وفي ايدها الممسحه تقول: تعالي ماه انا هنا في المطبخ علامك موه صاير ليش كذا تصارخي.

عوشوه الام ترد: تعالي يوه مضنونتي تعالي، تعالي الغاليه.

نعيمه بإستغراب: مالك امي موه جاينش سلامات ماه لايكون محمومه.

الام: ماشي الغاليه بس فوادي اشوف اولادك وافرح فيك يا بنتي.

نعيمه: زين يوه ماه هينه النصيب ترا جالسه وانتظر.

الام: قريب يوووه امي قريب لا تحاتي، احس انه حد بيتقدم لك قريب.

نعيمه: وهي مستحيه تقول: اللي من الله حياه الله بس لا تقوليلي سلووم ولد خالوتي اللي من دخل الجامعة وانتي تحاولي فيني عشانه.

الام: وش فيه سلوم، رحال واخلاق وموظف بيريحك وما بيخلي عليك قاصر بترتاحي.

نعيمه: ماه تعرفي انه سالم كما اخوي صالوح وانا واياه لين قبل سنتين نلقط من تحت النخيل ونقشب امبا في مزوعتنا، كيف اتزوج واحد كما اخوي.

الام: سيري انتي سيري لبسي عباتك اباك ترابعيني الصالون.

نعيمه: مووووه صالون، وانتي في حياتك يوه ماه ما رحتي صالون.

الام: هيه بايه اوديك انتي تتصفدي طشونه. تعبانه من الشغل.

نعيمه: نعم ما رحت مكان.. واقولش ماه خلي هالسالفه عنك.


تكمل نعيمه تنظيف المطبخ. وتخرج امها وهي تنمنم بصوت منخفض: والله وا تاخذيه سلوم.

من بعيد تصرخ الام: نعوووم يا البطرانه تراه خالتك وولدها بيجونا الخميس يتعشو معنا.

نعيمه: زين مرحبابهم

نهاية الحلقه الاولى