المشهد 3
في حركة هز الفنجان اعلاناً بنهاية القهوه تحرك عوشوه يدها، و اختها سعاده ام سالم امامها جالسه في ريبه وتوجس من امر اختها اللي رجعت البيت بعد ما طلعت من ساعتين فقط.
سعاده تقول: عوشوه عسى ماشر، اشوف رحعتي البيت مره شي في خاطرك؟ محتاجه شي؟ حد من اولادك فيه شي؟
ترد عوشوه: بعيد الشر والبلاء، حشااااااا ياسعادووه ترا قلت احي اتقهوى معك.
تضحك سعاده وتقول: خلي عنك خلي، لو ما اختي ما بقول شي.
وش فيك عواش.
في استحياء عوشوه ترد: والله يالاخت احاتيك، اشوفك تعبانه ورجولك يعورنك ويبغالك حد يساعدك.
سعاده في عجل: الله يخلي سلوم باغي يجيب شغاله اوين حال تقوم في البيت وتخم وتغسل وتطبخ.
عوشوه ترد قائله: بنت الحلال وش تبيها الشغاله، حال المشاكل والمصايب، وولدك رجال، لو تسمعي مشاكلهن الشغالات بيشيب راسك.
في ريبه ترد سعاده: بعيد الشر يالاخت ان شاء الله ما بيصير الا الخير.
تقول عوشوه: وليش ما تزوجي سالم؟؟ بتشوفي ذريته وزوجته بتساعدك وبتقوم في البيت وفيه.
سعاده: زين يبوك سلووم توه متوظف فقير حتى ما مكون نفسه ولا شاري حتى سياره حال دوامه يداوم مع رباعته.
عوشوه: احسن اقولك، رصيه من تو بزوجه حتل يعقل ويجلس عن يجيك باكر باغي يسافر ويروح يجيب لنفسه الامراض.
في خوف ووجل سعاده تتسارع دقات قلبها وتقول: صدقتي عواش سالم قايلي باغي يروح مع رباعته يسافر اوين يشوف الدنيا بعد التعب اللي شافه في الدراسه..
تعاجلها عوشوه برد سريع: شفتي شفتي هذا من تو باغي يسافر
اقولك عن تخليه يسير. ويالله قومي خطبيله فقيره تستره وتساعدك.
سعاده في تعجب تقول: ومن بخطبله بنت الحلال وحدي ما مخليه موضوع زواحه على بالي.
في فرحه وسرور ترد عوشوه: عندي الحرمه موجوده، ليش تدوري مع الغريب والقريب موجود.
سعاده: ومن ذي البنت
عوشوه: وابوي عليك سعاده، بنزوجه بنتي نعيمة. مخلصه الثانويه وجالسه في البيت وماشي طبخه ما تعرفها وما شاء الله شاله البيت ع راسها.
سعاده: زين عوشوه ترا نعيمه وسالم ما مرضوعين على بعض؟
وكما الخوان وحدي اشوفهم.
عوشوه: وش من الرضاعة بنت الحلال انتي داير راسك، ذاك يوم صغار كما الاخوان تو نعوم حرمه وهوه رجال.
سعاده تفرح بكلام اختها وتقرر ان تخطب نعيمه بنت اختها عوشوه لولدها سالم.
تنصرف عوشوه وهي توصي اختها سعاده وتقول: ننتظركم الخميس عشاكم عندنا انتي وسالم بيذوق طبيخ نعوم وعسى يوم يشوفها تعجبه.
تنصرف عوشوه وتبقى سعاده في حالة تفكير واقتناع من زواج ابنها بنعيمه اللي من لحمها ودمها وكأنها بنتها وتمون عليها وتعرف اخلاقها.
رد مع اقتباس