((((( غـــــــــــــــــــــــــــــيبتك )))))

**نسر البوادي** · 29-08-2018, 09:21 AM

غيبتك لو هي دقيقة تعتبر صــــدّة

الوقت دونك سجن وغيابك أسياجه

لا تعتذر لي ترى مـاعاد فـي شـدّة

أعيد حكي ٍ يكود الصدر مخراجه

دامه يوصف بجود أبيك وبجدّة

وشلون تبخل على المجروح بعلاجه؟

وشلون قاواك قلبك رده وصدّه

مع أنّه بيـّن عليه الضعف والحاجة

يا قوّة قلبك برد ايمينك وردّه

بخلت بمصافحة وارهيت بحراجه

لو ماسقى غيم عينه جرهدي خدّه

تراه يبكي وقلبه يلحق إخلاجه

ولو شفته يمازحك تراه من جدّه

الضحك عن درب ضيق الصدر ما عاجه

غير الغلا والوله عليك وش حدّه

يادرب ليلة ويا مسراه وسراجه

كنـّه يعرفك قبل يلقاك من مدّه

مع أنّ ما بينك وما بينه أمواجه

هواك بدو ٍ نووا للقلب بالشدّة

ورياض قلبي لشوف البدو محتاجة

والوصل..بحر ٍ متى انت بتسمح ابمدّه

السّيف صبري وبحرك شح بامواجه

قصيدي اللي قريته واللي أعدّه

قديم لا يزعلك معناه وإخراجه

وفراغ قلبي غلاك أرهى على سدّه

ليتك تشوف الغلا وأبراجه وعاجه

أقوى رياح العذل ما تقدر تهدّه

والا الجفا لو تنفس هدم أبراجه

تغانم الوصل لن البعد لا بدّه

يأتيك في يوم ثم ياخذك بأدراجه

اللي لي إنّك تلين وتترك الشدّة

واللي لك إنّي ما سولف بك لهراجة

ولاني بزعلان واللي نرتجي مدّه

يا باب قلبي ويا قفله ومزلاجه

زعلة تغلي ومن تزعله من قدّه

ما دام كل ٍ يبي دربك ومنهاجه

غالي وتبخل علي وتطـّول الصدّة