ودي أغيب

**جميلة الملامح** · 01-10-2018, 10:50 AM

ودي أغيب ولا يحسون بغيابي
اطوي دروبي واشعل بفكري سراج
ذكر الله وبعض الاماني زهابي
وبعض الهموم اللي لها دايم احتاج
سريت ياحلم توسط شبابي
صدري عراق وقوة البأس حجاج
بجيك لو ماني على السيف رابي
لكن زغايب صاحبك سيف وهاج
والبعد ما يفقدني ابدا صوبي
مدام ترس العزم كأسنه العاج
ساري وبدر بين الافلاك حابي
وسهيل ما يلمع مثل كل الابراج
عقب العتيم بخلوة من صحابي
نصبت بر فيه عوقي ولعلاج
بي ضيقة والليل ضيق رحابي
وامسى على قول العرب مثل الامواج
غيمت وامطرت الالم من سحابي
الكم يمسح والحشا داخلي هاج
احاول اخفي ما بدا من مصابي
لكن دمعي في الصخر شق الافلاج
هذا انا واللي في الكرى يعتزابي
منهل كرم ما له امد ملجأ اللاج
ما خذلت شق الصعايب ركابي
ولا طالها ضلع ولا ردها سياج
شف وضعي وشف كيف حاله ثيابي
وانا نسجت احلى القوافي من الساج
ياليل تكفى لا تبعثر كتابي
ويا صدري اكتم ما نبي ذل واحراج
لن الاوادم ما درت صدق مابي
وبعض العواذل حكيها ملح اجاج
غايب عسى الله يطول غيابي
ويالله عساني من بعد ضيقتي ناج
تفرج ليا من عانق الفجر بابي
كني سجين للابد حصل إفراج