هملتني للحزن والعبره

[نوارة الكون]

هملتني للحزن والعبره

هملتني للحزن والعبره وليلي الطيوف !!
وخليتني ما بين لوعات .. (الهموم الاربعه )

حزن ٍ / غدا طابع حياتي كل ما اغمض واشوف
مدري هواللي كان يتبعني أو اني اتبعه !!

وليل ٍ / بدونك .. ظلمته (غربه) ولحظاته (سيوف)
تقطع جدار الصمت .. في صدري وتمسي بضلعه

وطيف ٍ / يداعب خاطري حتى وانا بين الضيوف
ومن قال وش بك يا ولد .. سرحااان .. ازريت اقنعه

وش باتعذر به!! وانا مابين هم .. وبين خوف
وشوق .. يغايض قلبي المجروح حتى ينزعه

لو انها بالزين .. كان الزين من غيرك الووف
المشكله .. ( حب العمى ) .. يا جعل ربي يقلعه

ان ابتعدت آموت هم .. وكل ما جي لك شغوف
كنك تعمد ( ضيقة الخاطر ) .. ولو فيها سعه !!

اواه يا قلب ٍ تركته لك !! على بيض الكفوف
واللي مهو يصدق !! على كفك يلاقي مصرعه

تشوفني وتصد مني.. لا !! ولا كنك تشوف !!
تقدر على وصلي واحسك قدك ناوي تقطعه

تقول صبرك !! والصبر ليته يبرد حر جوف
اسهر ليالي البعد .. لين الفجر .. يبلج مطلعه !!

(( غيابك القاسي .. وباقي لهفتي واقسى الظروف
ما غيرت قلب .. ما هو يبغي تكون .. إلا معه ))

إن كان ربي كاتبك لي .. فأنت لي .. رغم الانوف
واذا القدر ما عاد ردك .. يستحيل ان امنعه !!

انت .. ومشيت وما عرف وشهي نهاية ذاالضروف
وصوتك/ ما انا بداري .. هو ربي كاتب ٍ لي اسمعه

لا قدك ناوي ترحل وتقفي معا بيض القنوف !!
قلب ٍ خذيته من صدر راعيه .. تكفى رجعه !!

[نسر البوادي]

ياسلام عليك نواره ابداااع ياذوووق دائما صفحتك مفعمه بالروعه اختي
يعطيك الف عافيه

[أميرة الروح]

نص رائع جدا
راق لي
يعطيك العافية عالانتقاء
بارك الله فيك
دمتي مبدعه
(يستحق ان يتوج بالنجوم)

[اطياف السراب]

إنتقآء رائع جدا

شكرا جزيلا لك على جهودك

[نوارة الكون]

ياسلام عليك نواره ابداااع ياذوووق دائما صفحتك مفعمه بالروعه اختي
يعطيك الف عافيه

اسعدني مرورك اخوي
دمت في حفظ الرحمن

[نوارة الكون]

نص رائع جدا
راق لي
يعطيك العافية عالانتقاء
بارك الله فيك
دمتي مبدعه
(يستحق ان يتوج بالنجوم)

اسعدني مرورج اختي
دمتي في حفظ الرحمن

[نوارة الكون]

إنتقآء رائع جدا

شكرا جزيلا لك على جهودك

اسعدني مرورك اخوي
دمت في حفظ الرحمن