(((( أخاف تْطِيْح دمعة قَهر يخْجَل مِنّها كمّي ))))

[نسر البوادي]

أخاف تْطِيْح دمعة قَهر يخْجَل مِنّها كمّي .

دخيلك .. غمِّض عْيوني .. تعبت مْن السّهَر .. بانام
حرام تعذِّبْ احساسي وتحرق بالغلا دمّي .

كفايه !! .. ذابَتْ ضْلوعي .. كفايه !! صار لي أيام

أحس البرد من كِثْر ارتعاشي مَلّ من ضَمّي .


حرام اللي تسوِّي بي وانا المملي عشق وِهْيام
أخاف تْطِيْح دمعة قَهر يخْجَل مِنّها كمّي .



. أحبّك .. وش تبي أكثر ؟! حبَسْت بْصدري الأنسام
أحبّك من وانا طفل ٍ ينادي لى بكى : أمّي !! .



. غريبه !! .. صَعْب تِتخَيّلْ غلاك تْقول لي : أوهام!!
أحبّك ؟! أدري وْكَنّك تقول اشْلون ؟! يا عَمّي !! .



أحس إنّا تلاقينا قبل ما نلتقي باعوام
أو إنّك حِلْم عِشْتهْ في الخيال وصار من قَسْمي .



رسَمْتِك في جِدَار الشوق لوّنتك بدون أقلام
تخيّلتك فَرَح يفرض حروف اسمك على فَمّي .



وناديتك وشِفْتِك تِبْتِسِمْ واغتاظت الأحلام
وفَزْ طيفك يسابِق لهفة لقانا وجَلَس يَمّي .



نسولِف عنّك .. وننطِر يمرّ العام بَعْد العام
نغَنّي : ياقلوب العاشقين الغضّه ألتمّي .



وجيت فْ موعدك جايب فَرَحْ قلبٍ بحِسْنِك هام
وْوَدَّعْت بْعِيونك يا عيوني حِزْني وْهَمّي .



عَرفْت اش كثر أحبَك ليه أحبّك ؟! كيف حِبّك دام ؟!
لأنّك جيت يااغْلاهم تقول لْفَرحتي تِمّي .



. دخيلك غَمّض عيوني تعِبْت مْن السهر بانام
عَشَاني لا تعَذِّب خافقي أحْرَقْت لي دَمّي .

[حبي خالص]

الله على الابداع
رااائع بإختياراتك أخي

همسه/ يضاف النص لمكتبة النصوص المميزه

[نسر البوادي]

حبي خالص تسلمين ياذووق مرورك شمعه اضاءة الطرح

[الشيخه الفلانيه]

نص جميل اخي لاند ،
يعطيك العافيه '

[نسر البوادي]

الشيخه تسلمين ياذووق مرورك اسعدني

[عملاق الشعر]

رسَمْتِك في جِدَار الشوق لوّنتك بدون أقلام
تخيّلتك فَرَح يفرض حروف اسمك على فَمّي .



وناديتك وشِفْتِك تِبْتِسِمْ واغتاظت الأحلام
وفَزْ طيفك يسابِق لهفة لقانا وجَلَس يَمّي .



لاند


نص في قمة الجمال
وذوووق من الطراااز الملكي


سلمت يداك المبدعة وذوقك الراقي

[مجنونك ما يخونك]