ملخصات اليوم
على اساس اني لازم أخذ سيارة اختي يوم الخميس عشان اوصل صديقتي عرس صديقتها وخبرت ابوي ووافق ..تمت المهمه ..
طبعا الصباح طالعين ساعة 9 و9دقائق إلى مسقط عشان أراجع وزارة التعليم العالي في ما يخص تصديق الشهادة قالوا ما واصلة الموافقة من قنصلية استراليا الموقرة عشان الاجازة يمكن .. بعدها رحت المشفى عشان اخذ موعد مع دكتور عبدالله والعلاج الطبيعي على اساس أروح السجلات واخذ موعد معه قالوا ما يصير لازم طبيب عام يحولك له ورحت انتظر طبيب عام اغتلق السستم وتوقف واغلب الناس راحوا وبعدها صاروا يستقبلون الناس بس ما يدخلوهم عند الدكاترة بس معاينه والسستم صار له 45 دقيقة طافي ويستقبلوا الناس صاروا يكتبوا لهم في أوراق عشان يمشوا المشفى وللحين ما أحد نادى لطبيب يعني سلامات بتجي ساعة 1 وانتم ما مشتغلين لان النظام متوقف ساعة 11 سلامات بقوة .. قلت لهم انا ما اريد اعلاج اريد تحويل قالوا احسن ما نعرف متى يفتح النظام وبعد شوي رحت اسأل فيه أوراق عشان تكملوا عملكم ليش الدكتور ما ينادي واجد أشخاص هنا قالوا الدكاترة ما أحد قلت له تمام لقيت وحده اسمها سارة وجالسين نسولف قالت خلا الإدارة أي طابق قلت لها 4 طلع ما شيء طابق 4 هههه المهم اخر طابق لقينا ما أحد في مكتب المدير العام شافنا دكتور عبدالله الي يعالجني قال شو صاير بنات قالت سارة جايين نستفسر عن الي يصير تحت تقوله نحن من زمان ننتظر وانا عيني تعورني والدكاترة ما دخلوا أحد للحين اما انا جلست اسأله كيفك اخبارك انا جايه وكنت نفس الوقت مع سارة أن في حالات ناس كبيرة وتعبانات ما شفتهم دكتور ما في احد يجي الطبيب ما فيه عله قال تعالي رابعة انتي وزميلتك وراح خبر دكتور محمد الرأس العود المسؤول وجلس يتنازع الدكتور عبدالله ان ليش ما يعالجون المرضى دام المرضى موجودين وجاء واحد يشتغل قال نحن أرسلنا لهم أوراق الطوارئ عشان يكملوا دوامهم قلت له عيل الممرض قال لنا ما شيء هناك دكاترة و روحوا صلوا هنا مسجد هههه قال تمام .. وانتي شو مشكلتك سارة قالت انا فيني كذا وكذا قال تو بتصل في دكتور زاهر ( طاح من عيني ذا الدكتور المهمل ) وخبره قال نحن في مكاتبنا وما ندخل الا الحالات الطارئة قلت له ولا دخل احد قاله دكتور محمد دخلوا الناس عادي وفي سارة الفلاني تو بتجي لك عالجها وراحت ..
قلت له دكتور انا اريد اسوي موعد مع دكتور عبدالله قال عيل ما خبرتيه روحي هذه غرفته رحت عند دكتور عبدالله سلمت عليه وجلست عنده قال ترا رابعة بعدني ما وصلت لك قلت له مال استراليا قال وصلتي لو قلتي من اول كنت بذكر بسرعة بس قلتي رابعة ما زدتيني قلت الحين عرفت عيل والسالفة اني اريد اسوي موعد معك من السجلات قال لازم يحولني لك الطبيب العام وإنا عاد 3 سنوات اتعالج معك قال ترا عشان النظام اذا طافك موعد بعد 3 شهور يحولوك من جديد قلت له طيب كيف يعني الحين قال ولا يهمك نادى الموظفة قال موعدك هذه الأربعاء عشان بعدين اكون إجازة 3 أسابيع تعالي ساعة 1 قلت له تمام قلت له بعد اريد اسوي علاج طبيعي عشان انا كنت اخذ علاج في استراليا قال بحولك ان شاء الله يوم الأربعاء بعدين قالي متى ترجعي استراليا قلت له خلصت قال اووه مبروك عقبال الوظيفة يقولوا النظام تعبان مهكر كيف ما بتصلحيه قلت له عرضت خدماتي بس رفضوا الجماعة المساعدة جلسة يضحك هههه قلت له استاذنك الحين ومشكور ما قصرت قال مستحيل اردك وانتي واصله لي قلت له من احسانك قال ومبارك عليك التخرج مرة .. وعاد خبرت ابوي جاني اني خلصت وخبرته السالفة وضحك قال يستاهلوا

رحنا بيت خالوه نجيبها وبعدها رجعنا البيت والعصر أخذت امي وخالتي وعمتي والجارة العزاء والحين اوديهن عزاء ثاني عاد ابوي قالي وظيفتك الحين النقل الوطني ههههههه