أسعد الله أوقاتك بكل خير مدونتي الجميله 🥰
في عندي موضوع صار لي مده يدور ف بالي و كل ما اتذكره أحاول اني افهم تفكير هذلا الفئه من الناس...
المهم الموضوع هو ليش اغلب الناس صاروا يتركون حياتهم الواقعيه اللي عايشينها يراقلوا تفاصيل أشخاص ثانيين مثل مشاهير السوشال و غيرهم... لييييييش؟
طيب انت الله عطاك حياه... يمكن أطفال.... بيت... باختصار معك اسره سواء كانوا رجال أو نساء هذا لا يقتصر ع فئه معينه....
المهم طول وقتهم يتابعوا فلان و يشوفوا فلانه! عجييييب صح 🤔
طيب حياتك ويش وضعها؟
يومك كيف يمضي؟
هواياتك و امورك الثانيه شلون تهتم فيها؟
بإختصار صاروا يشوفوا و يقلدوا...
و تفاصيل حياتهم اللي المفروض يكونوا يعرفوا عنها كل شي للأسف ما يعرفوا شي 🤷‍
فعلا زمن غريب.....

بخبركم موقف صار لي....
زميلاتي كانوا يسولفوا ف موضوع شخصيه مشهوره ع السوشال و كيف اسلوبها و طريقة حياتها و شو تمتلك و شو معها ووووو كثير حاجات ثانيه...
اللي لفت انتباهي ان أدق تفاصيل حياتها معروفه للجميع
طبعا هذا من وجهة نظرهن هن...
المهم الكل كان متحمس و يشارك.. البعض يتذمر من اسلوبها و البعض متحسف ع شو تمتلك و كيف حياة الرفاهية اللي معها....
لحظه شووووووي.... سلامااااات 🙄
ع شو متحمسات انا ما عارفه...
معقوله يتأثرن بهذي السرعه... يعني ولا وحده تجلس كذا تشوف الموضوع من زاويه ثانيه... 🔎
أصلا هذلا الفئه كيف توصل للشهره إلا بسلب عقول الناس حول حياتهم و شو فيها... الحياه اللي تحلم فيها كل بنت و كل شخص و هي حياه بدون مشاكل و كلها سعاده و ما اعرف شو.....
والله بجد شي يضحكني 😂
ترى هذلا حياتهم مو كذا.....
ماشي حياه بدون مشاكل
ولا شي حياه بدون خلافات
هذا جزء فقط من حياتهم قد يكون فقط شكليات لا أكثر
لأنهم يعرفوا الناس شو تحب عشان كذا ترويج لا أكثر
هم شي طبيعي ما راح يصوروا لكم كل تفاصيل حياتهم لان اكيد فيه أمور ثانيه تصير للجميع..
اصلا الحياه مو حلوه إذا كلها فرح و طلعات و سفرات فيها نوع من الملل... و ما يعرفوا معنى قيمة هالحياة الا بتنوع الأمور اللي فيها... يعني لما تتقلب الحياه مره كذا ومره كذا...
هنا تكون حلاوتها....
اتمنى تكون الفكره وصلت لكم....
طيب كيف ممكن نوصل لمرحلة الرضا لحياتنا اللي نحن عايشين فيها بدون لا نقارن روحنا بطريقة حياة اي شخص سواء نعرفه او لا؟
بسيط جدا انا بخبركم كيف...
اول شي لازم يكون معك شي اسمه رضا و قناااااعه داخليه بينك و بين نفسك....
هذا القناعه تكون عباره عن أفكار انت خلاص مؤمن بها و مقتنع فيها وما راح يأثر فيك اي شي تشوفه ف حياتك لأنك باختصار متصالح مع روحك...
لما تمتلك هذي القناعه و الرضا خلاص انت صار معك مثل الدرع إذا نقدر نقول خلاص تشوف كثير أمور و ما يجيك ولو شوي شك بخصوص طريقة حياتك و شو تمتلك ليش لأنك تعرف ان الله هو الرازق و هو اللي يعطي... قد يكون عطاهم فلوس و نعمه ولكن بالمقابل مو مرتاحين ف حياتهم...
وقد تكون تمتلك أمور ع قدك بس مرتاح نفسيا و مبسوط فيها...
ترى الراحه النفسيه اهم شي و هذا ما يمتلك ه كثير ناس معهم فلوس الدنيا...
قد يكون حياتهم مختلفه كليا عنك و لكن لازم تعرف ان هناك أمور ف حياتهم مخفيه عنك هذك الأمور قد يكون انت تمتلكها و هم رغم كل شي مو قادرين يحصلووا عليها
اذن انت ف نعمه بس مو داري عنها لأنك شغلت روحك بالبحث ف حياة الناس و نسيت النعم اللي معك..
نحن فعلا بحاااااجه لوقفه بيننا و بين أنفسنا...
لا تقارن روحك بغيرك
لا تشغل نفسك بحياة الناس
خلك منشغل بحياتك و تفاصيل اللي عايشين معك و حاول تعدل امورك للأفضل...
لازم تمتلك رضا و قناعه داخليه ضروري جدا ومهم لأنه راح ينفعك و يريح بالك من كثير أمور تزعجك...
دائما احمد ربك ع ابسط النعم 💜
الموضوع يطول فيه الكلام لأنه يعتمد ع وجهات النظر...
لكن الشي اللي الكل بتفق عليه انه عائلتك هي الأولى بأنك تقضي وقتك تتابع أدق تفاصيلها لأنه باختصار هي اللي بتنفعك.... 💜