أحبابي ؛ أحبابي اللي ما بقى منهم
إلا عجاج السنين وعين مسفوحة
؛
مرّ القدر بي على شارع مساكنهم
نوافذ من خشب وابواب مفتوحة
؛
الله لهم يا زمن وش كنت داينهم
كنهم جنوا بك خطايا غير مدموحة
؛
ما توجعك وقفتي كنّي اعاينهم
ارفع يدي للتحية واكتم النوحة
؛
اخاف لو امهل النوحة تحزّنهم
وأخطي عليّ في خطيّة غير مسموحة
؛
كنّي أنا الغايب اللي مانشد عنهم
وكنهم ؛ هم الحاضر اللي فاقد روحه
؛
يا نسمة الليل غنّي لي وادندنهم
حزين ؛ حلمه يغنّي نوتة جروحه
