ضاقـــت الارض فيني والفيافـي وساع
كيف وسط السعه ماني محصّل سعه !
شمس قيض المفارق .. وارفه بالشعـاع
وظلّي اللــي تبــعني ، ولّا أنــا أتبــعه ؟
لو أشيل إيدي من الجرح جات السباع
مثـــل نـاس بمصيــبة ناس / متجمّعه !
ألمــح الناس ، هذا شــاري وذاك بـــاع
ما تبيعـــون صدرٍ - ما عليــه أمتعـه ؟!
ودّي أحمّله مـن ضيــق صدري متـــاع
ضيقي يفيض مـن صدري ولا يوسعه !
و حجــم دمع العيــون يزيد يوم الوداع
من يفــارق .. يخيّط لو قدر .. مدمعـه !
أشكر اللي فهم حزني على الاستماع
( وأتمنــى تكــون / أيامكــم ممتـعه ) !
#حمود_بن_وهقه
