!! الشايب وتنكر الماي !!

**نديم الماضي** · 03-02-2015, 03:20 PM

⊙ الشايب وتنكر الماي ⊙

قصة واقعية حصلت في المملكة العربية السعودية .

شايب نوى يشتري له تنكر عشان يسقي مواشيه ، وهالشايب متقاعد وشاري له قطيع غنم وفوقها خمسين ناقه .

فأخذ يجمع له دراهم لين صار عنده حوالي خمسة وثمانين ألف ريال سعودي اي ( مايعادل 8700 ريال عماني ) .

فقام و توكل على الله وقرر يروح يدور له على تنكر ماي .

صدفه و هو يمشي حصل ناس مجتمعين في أرض فضاء كبيرة ، وعندهم تنكر واقف .
تعجب الشايب وقال بس لقيناه خلني اروح
أوصل هناك وأشوف كم سعر التنكر وإذا كان عليه مزاد اشوف كم واصله قيمته .

وصل عندهم الشايب ووقف يسمعهم يزايدون ، وارتاح الشايب لانه مو غالي

وفجأة اخذ الدلال الميكروفون وكمل المزاد 50 ، 52 ، 55 من يزيد من يزيد

فقال الشايب والله ماهو غالي وإن شاء الله يكون من نصيبي ، ودخل معاهم المزاد وقال 56 وهم يزيدون وهو يزود ، واستمر هالحال هم يزيدون والشايب يزود .

المهم وصلوه 75

قام الشايب خربها وقالهم 80
واول ماقال 80 انصدموا وكلهم سكتوا ولا واحد فيهم تكلم .

والتفتوا عليه يناظرونه ويناظرون بعضهم البعض وفجأة جاه واحد فيهم وسحبه على جنب ، وقاله : شف يا رجال أنت باين عليك إبن حلال وطيب وراح نتفاهم
وشرايك لو نعطيك شيك بمليون ريال الان
بس مانشوف وجهك واقف معنا بالحراج

انصدم الشايب

أفتر راسه شوي وقال : وش السالفة ؟
مليون ريال وليش ؟
قال له الرجال : بس خذ هالشيك وتوكل على الله ولالك شغل بالطبخه

وكتب له الشيك بمليون ريال سعودي
وطلع الرجال من الحراج وهو مايدري
وش السالفه .
وقبل لا يروح ويخليهم سال واحد فيهم عن السالفه
فقال له :
الجماعة بيزايدون على مخطط الاراضي
فقال له الشايب : طيب وش سالفة هالتنكر ، فرد عليه الثاني وقال هالتنكر
جايبينه يرشون به الأرض علشان يزايدون
والمخططات في هالمنطقه واصله بــ 56 مليون الى 75 مليون .

والشايب داخل عليهم عرض ولايدري وش السالفه ههههههههههه على باله الموضوع مزاد على تنكر ماي .

وهم يحسبونه هامور وبيلهف عليهم المخطط قاموا صرفوه بمليون ريال
وهو ماصدق طاير من الفرحه .
ويقول في خاطره : عجزت وأنا اجمع خمسه وثمانين الف ويجيني ذا الرزق من الله .

فسبحان الله مقسم الأرزاق على عباده

الرزق مثل الأجل يتبعك وين مارحت

الله يرزقنا بمخطط فيه تنكر ماي
قولوا آمين
😂😂😂