دمعه يتيم....

**نورمان** · 28-06-2015, 11:51 AM

فرحت لك .. وأنا معاليقي حطام
والصدر .. من ما فيه بيّح كنينه
فرحة يتيم .. ليلة العيد ما نام
خالاته , وخواله .. مواعدينه
مواعدينه بشت .. وشماغ بسّام
ويلّعبونه .. في ملاهي المدينة
مانام .. واحلامه تحّراه قدام
كنه يطول أحلامه براحتينه
صبحه تجّلا نوره بعيد الاسلام
وقبل يروح المسجد : ملّبسينه
صلّى وجاء وأمر الله اللي قضى تام
ماهوب داري عنه .. زينه وشينه
بشته عليه .. مهندم ٍ خير هندام
واللي بعمره .. كلهم محترينه
رجع ولكن فرحته ضايعه دام
كل ٍ مشى وأخذ ولده بيمينه
صاروا خواله في نظر عينه أصنام
أحيو بداخله الجروح الدفينة
ولا عنده الا أمه وناب القهر سّام
جاها يبي منها اليدين الأمينة
شعوره اللي حس به مثل الإلهام
وأول سؤال في باله : أبوي وينه؟
جته تعدي , ماهو تخّطي بالاقدام
وشالته بيديها .. وحبّت جبينه
أبوك: جاء البارح وقبل الفجر قام
وشرى لك ألعاب , وهدايا ً ثمينة
لحظه وهو بين الحقايق والأوهام
والدمع الازرق حاير ف.. مقلتينه
يمّه : ترى مانمت والعالم نيام
ماجاء ..ولا لمست يديني يدينه
مدام رقمه معك من بين الارقام
بأكلمه , يوم إنك تكلمينه !
قالت بدون شعور وإدراك وإلمام
. أبوك ! في تراب القبر دافنينه
العام مات .. ومتّ من موته العام
وكني بعد مامات عني سجينة
أبوك جندي للوطن ضد الإجرام
عطاك عمره دون داره ودينه
كل ٍ عذلها .. بين عاتب ولوّام
تصّبري .. خلي ضلوعك متينة
ماهوصحيح ان الضروره لها احكام
اكبر خطاء يوم إنك تعلمينه
بكره تنسّيه الليالي والايام
هو فيه أحد ينسى حدا والدينه ؟
طير السعد في عالمه مابعد حام
والله يعلم وش تخبي سنينه
أنا كذا ! ساكت وصابر ومنضام
لكن كان الفرق بيني وبينه
الدمع ل.. عيون الأرامل والايتام
ودمع الرجل ذل وهوان وغبينة !