[قبل الظهر]
هلال عاد راح البيت قبلها بساعات....
ومنصور بعده يالس عند ابوه .. وحمد بعده ما كان يحس بالي حواليه ابدا ...
ومرت عليه تقريبا 11 ساعة من يوم مطلع من العمليات ...
منصور وهو يالس حذا ابوه حاول يكلمه:...ابوي ؟؟؟....
حمد وما تحرك ...
منصور رد يتكلم:..ابويه ؟؟ .. ؟؟
وبدون استجابة ...
منصور وفاقد الامل جان يكبس راسه وكفت ايدينه ...
وخذ نفس عميق...
منصور وهو مكبس...ولانه ما رقد طول الليل غفت عينه......ورقد على كرسيه ..
:
:
دقايق وكاان ف غفوته ..
وشوي حس ان حد واقف جنبه ...
منصور وهو يفتح عيونه وصد للشخص الي واقف ... وكان جون ...
منصور عدل يلسته ...
جون تكلم بالانجليزي : سيد منصور .. لازم ترد البيت ترتاح ... وتاخذ ادويتك ...
بردك بعد العصر ... ما اتوقع السيد حمد بينتبه لانه ما كمل الا 11 ساعة من يوم طالع من العمليات ...
منصور يرد عليه: ... بس يمكن ينش في اي لحظة ..
جون: اذا نش بيتصلون بنا وبردك في ساعتها ... وبعدين هو محتاي لك وانت بقوتك وصحتك ...
فالاحسن ترتاح شوي وترد له ..
منصور شاف على جون ورد شاف على ابوه ... بانت عليه ملامح وجنه يقول " ما باليد حيلة " ...
قام منصور من على الكرسي ... شاف على ابوه نظرة اخيرة... وصد على ينب وطلع من العناية وجون وراه ..
وراح البيت ...
الساعة 6:40 المغرب
منصور اول ما دخل حجرته حط راسه على سريره ...ومادرى الا وجون يوعيه:
جون بالانجليزي:...سيد منصور .. قوم لازم تآكل ...عشان تاخذ ادويتك...
منصور نش وهو يشيك على تيلفونه:...يالله...جني وايد رقدت ؟؟؟... ماشي خبر عن ابوي ؟؟؟..
جون:..قبل شوي متصل على المستشفى .. للأسف ما انتبه ...
منصور : احسن انش واسير عنده ....
جون يشوف على منصور وكان ماسك على صدره:...شي يعورك ؟؟
منصور... وكان بالفعل حاسس بألم في صدره...وبسخونة في جسمه..
جون ردد كلامه:...سيدي ؟؟...شكلك تعبان ...تريدني اتصل بالدكتور الخاص بك ؟؟
منصور وضغط على نفسه:...لا ما يحتاي... بيخوز ان شاء الله يمكن من التعب ...
ونش منصور سبح....وصلى...اكل شوي وبعدين خذ ادويته...وطلع طوالي على المستشفى ...
راح ويلس ويا ابوه 4 ساعات ... وحمد ما انتبه ..
وبعدها طلع منصور ويا جون ورد البيت.....
ورد والحزن يعصر فؤاده .....
ذيج الليلة كانت اول ليلة يرقد فيها منصور بروحه... وفي هذا البيت العود...
{سرمد الليل وضوى ليلي
واهجعوا ربعي حوالي
بت تسهرني غرابيلي
من وليف تـــايه بغيه}
يوم الاحد-الصبح الساعة 8:
دخل منصور العناية على ابوه ... ولقاه مثل ما هو ... شاف عليه بنظرة حزن ...
مسك منصور الكرسي ويلس ينب ابوه ... ومسك ايده ..
منصور يكلم ابوه بصوت خفيف:....ابويه ...؟!...
بس حمد ما انتبه لهمسات ولده ...
حط منصور يبهته على ايد ابوه ..
دقايق مرن ... والذكرى تلف بمنصور .. من اول لقاء جمعه بأبوه الين ذيج اللحظة ...
وفجأة حس بحركة خفيفة في اصابع حمد ...
منصور شل راسه بسرعة وشاف على ابوه :.. ابويه ؟......
حمد فتح عيونه شوي ..وشاف على منصور....
يات عيون حمد في عيون منصور وتأوه من الويع:...آه....
منصور حس ان ابوه انتبه:...ابويه ؟؟ تسمعني ؟؟
بس حمد رد سكر عيونه.....ورد فقد وعيه...
منصور يشوف على ابوه ... حس في لحظة انه كان قريب من ابوه...
حس عمره مخنوق ...لدرجة انه ما قام ينادي على الممرضين ولا الدكاترة..
حس عمره تعبان ومب قادر يتحمل يشوف ابوه على هذه الحالة اكثر ...
حس بدوار .... وعيونه تريد تغفى ...
حط راسه على ايد ابوه مرة ثانية ... وسكر عيونه ... وجان يغفى ... ..
.
. .
مرت نص ساعة على منصور وهو في ذيج الحالة ...
منصور وبين لحظات الغفوة..ولحظات احساسه بالي حواليه..
سمع صوت خفيف ومخنوق يقول:....منــــ.. .منــــصور...
منصور انتبه بسرعة ورفع راسه...وشاف ان ابوه فاتح عيونه على قد ما يقدر....
منصور ومن فرحته:....ابوووي !!!!!...
حمد رغم انه كان يتويع ..
منصور:...ابوي شو حاسس ؟؟؟
حمد هز راسه وما قادر يتكلم ...شفايفه اليابسات والمتورمات قدرت تطلع "منــ....ـصو ..ر" .....
هالكلمة خلت منصور يطير من الفرحة....وراح يخبر الدكتور...الي ياهم وعاين حمد....
والحمدلله طلع وضعه مستقر...وكل شي بيكون في اتم حال بعد ما ياخذ فترة علاجه ان شاء الله...
ولان حمد كان يتويع وايد.....قرر الدكتور يخدره بشكل كامل مرة ثانية ومنصور كان موافق.....
وبعد ما تخدر حمد مرة ثانية... قرر منصور انه يروح البيت يرتاح وياخذ ادويته..
الساعة 4:00 العصر
المستشفى:
لان حمد بعده فالعناية ولانه بعده تعبان ،، كانت الزيارة ممنوعة عنه الا لاقاربه من الدرجة الاولى...
وساعتها زاروه ضاحي ومنصور وذياب وهلال...وكان الكل فرحان لسلامة حمد .. ويلس منصور
عند ابوه لين بعد العشاء .. بالنسبة لحمد كانت كلماته قليله وآهاته اكثر .. اما بالنسبة لمنصور
كانت فرحته كبيرة ان ابوه انتبه وكل هذا في كفة ويوم سمع اسمه على لسان ابوه بكفة ثانية. ..
الاثنين الساعة 8 الصبح:
وفي بيت حمد:
غرفة منصور:
وجدام المراية منصور كان واقف يمشط شعره الي راد على اللون البني والي كان
واصل تحت اذنه بشوي...واقف وهو لابس فانيلته..حط المشط على الطاولة..
وسحب الفانيلة من جدام...كان وده يشوف مكان العملية...
وجاطعه حد كان يدق عليه الباب:
منصور صد على الباب وقال بصوت مسموع:..ثواني...!
وكان جون ..ووقف برع يتريا منصور..بدون ما يدخل..
منصور طلع كندورته العربية الي كانت بلون رصاصي ..ولبسها...وطلع غترته الرصاصية
وتغتر بها ...ضرب له جم بخة من العطر الي جدامه....وطلع..
وصلوا المستشفى ..وتم منصور عند ابوه قرابة الاربع ساعات...
حمد يكلم منصور:..ابوي منصور ..
منصور كان يالس على الكرسي:..شو هناك ابوي ؟؟
حمد:..روح البيت...
منصور:...بروح بعدين خلني شوي يالس عندك..انا مرتاح وياك ..
حمد مصر ان منصور يروح:..لا....روح..
منصور:...ابوي لا تحاتي انا بخير..
حمد وهو يتويع:...عمليتك بعدها ما صحت...روح يا ولدي..تعال ... بعدين .... العصر..
منصور ابتسم:...بنزل اشرب ماي وغصب عنك بيلس وياك ساعة زمان....وبعدين عااااد افكر..
حمد صد بويهه:...يالله ...معندك...
منصور قام من على الكرسي:...عاد العصر بيطلعونك في حجرة خاصة ان شاء الله .. بييب فراشي وبرقد عندك...
حمد ابتسم شوي...وما قال شي..
وطلع منصور يريد يشرب ماي...نزل الطابق الارضي...يدور على مكان يشتري منه....وشاف ثلاجة
فيها ماي وغازيات...تقرب منها وطلع دراهم...دخل درهمين وضغط على زر دبة ماي ...
.
.
نزلت دبة الماي...
.
.
منصور انحنى بجسمه عشان يطلع دبة الماي...
.
.
وفي نفس اللحظة مروا من وراه ريايل اثنين وكانوا يتكلمون بصوت مسموع...
..
.
واحد منهم يقول:...كان شارب وانقلبت به السيارة...
الثاني قال:...عيل واحد متمرس مثله كيف بتنقلب سيارته ؟؟ من الهوا ؟؟..
الاول:...يقولك بالمرة سكتوا على الموضوع ...الله اكبر عليهم...
.
.
{هذا تالي تقديرك
تجرحني بتقصيرك
ليت الجرح مو منك
ليت الجرح من غيرك}
منصور وقف زين...وهو يشوف على الريايل الي تكلموا وهم نفسهم الي كانوا واقفين عند عمه ضاحي ليلة حادث ابوه....
منصور رص بيده على دبة الماي وحس بطعون في قلبه.......
منصدم:....عن منو يتكلمون ؟؟...لا يكون يقصدون ابوي؟؟ .... وهذول يعرفون ابوي ولدرجة انهم يوه فالمستشفى ذيج الليلة...!!
فتح منصور غطاة الدبة...ويده بدت ترجف...لكنه مسك الدبة وشرب منها...ساعتها تذكر سعيد زوج امه..
يوم كان يشرب كوب الماي ويقلد السكران...
منصور ومشى يقول في خاطره:...الله ياخذك يا ابليس ... شو هالوسواس الي ياني ....
الريايل الاثنين ذيج الساعة شافوا منصور رايح صوب اللفت وراحوا وراه يبون يسلمون عليه
وهو مب منتبه ويفكر:...لا يكون هو الي يقصدونه ..؟؟... مستحيل ... بس كيف ..؟...
وجاطعوا تفكيره الريايل وسلموا عليه..وصد منصور على وراه مستغرب...
الاول سلم :..السلام عليكم
منصور رد: وعليكم السلام والرحمة....
سلم عليهم وخاشمهم..
الثاني يسأل:..انت ولد حمد ؟؟؟
منصور سكت شوي وهو يشوف عليهم:...هيه...منصور وياك !!
الاول:...السموحة منك يا ولدي ...والله ما عرفناك حتى الحين بعدنا ما كنا متأكدين الين ما قلنا نسلم ونسألك احسن...
الثاني ابتسم:...تستاهل سلامة ابوك...
منصور رد:...الله يسلمكم من الشر ان شاء الله...
الاول:...ما شاء الله عليك ...صدج انك ولد حمد...ما شاء الله عليك هيبة مثل ابوك..ما انساك وانت داخل علينا ذيج الليلة ....
منصور كان يكلم نفسه:..."هيبة ...!!!...اي هيبة اخاف انه هو السكران الي توكم ترمسون عنه"...
الثاني:..سبحان الله....هيه نعم...بالمرة حمد...
منصور ساكت وما تكلم...
الاول:...والله قدر ابوك كبير...قلوبنا ما خلتنا الين ما تطمنا عليه ذيج الليلة...
منصور يشوف عليهم:...هيه اذكر شايفنكم واقفين ويا عمي ضاحي.....يزاكم الله خير ما قصرتوا...
الثاني:...الحين ياين نسلم عليه..بس الاستقبال خبرونا انه بعده فالعناية...شخباره ؟؟ طمنا عليه ؟؟
منصور رد وهو يتلفت:....الحمدلله بخير...نش ويتكلم...بس تعرف عملية ..ومتعور في جسمه...
الاول:..لا أكيد يا ولدي...يباله وقت الين ما يخف...
الثاني:...الحمدلله يوم يات على جذا...ولا الي يشوف سيارته ما بيقول راعيها حي...
منصور وهو يلعب بالدبة بين يدينه:..الحمدلله رب العالمين...
الاول يشوف على منصور: الا ما عرفتوا كيف انقلب ؟؟... شو يااه ؟!!
منصور يبلع ريقه: .. القدر يا خوي ... سبحان الله ..
منصور وقف وياهم شوي....عَرفوا عن عمارهم وكانوا ضباط يشتغلون تحت امرة حمد
ومن ربعه المقربين واعمارهم باينة انهم في اواخر الاربعين...وبعدين ترخصوا عن منصور وطلعوا من المستشفى..
:
:
وطلع منصور باللفت وهو يضرب مليون فكرة في راسه...معقولة ابوه بعده يشرب ؟؟؟.. يعني بيكونون
عن منو يرمسون وهم ياين حق ابوه ؟؟... وسيارته منقلبه ؟؟
:
:
دخل منصور على ابوه..وويهه كان متغير..ويوم دخل حصل ابوه راقد...تقرب منه ووقف حذا السرير....
ويلس يتمعن في ويه ابوه...بس حمد ما انتبه وكان راقد بعمق..يمكن من الادوية الي كانوا يعطونه اياه..
{من غيرك يكون أهون
يمكن يوم ويهون
لكن ماني متخيل
انك في الظهر تطعن}
وفجأة،،صد منصور بويهه وطلع من عند ابوه،،ومن دون ما ينششه ويخبره،،
اتصل بجون وطلع وياه من المستشفى وراح على طول البيت،،وجون يسأله ومستغرب
لانه يشوفه متضايج وما يتكلم،،، لكن منصور ما عطاه أي اجابة،،
منصور كان متضايج،،ويفكر،،يريد حد يجاوبه ويطفي النار الي شبت في داخله،،
وقف جون بالسيارة عند الباب،،،وبالمرة نزل منصور،، دخل الصالة وطلع باللفت الي فالبيت للطابق الثاني،،
وين كانت غرفة حمد،،
دخلة منصور ما كان فيها خير،، دخل وهو يشوف على الغرفة،،
وشوي بدأ ينبش،،
منصور وبضيجة:...الحين بيطلع ....بيطلع اذا عندك شي...
منصور نبش فالادراج...وما حصل شي،،
راح صوب الكبت الي كان بروحه في غرفه منفصلة عن الغرفة الرئيسية،، وفتحه،،زحزح الملابس كلهن على ينب،،،
منصور وهو يتنفس بقوة:...الي عايش هالعيشة.......مستحيل مااااااااااااا يشرب....
وهو يدور فالكبت ... فتح سدة سدة وباب باب....وما حصل شي...
جون لحق منصور وانصدم به يالس ينبش في غرفة ابوه بهذي الصورة،،
جون وقف منصدم:...سيد منصور ؟؟...شو صاير ؟؟
منصور شاف على جون بحرقة وما جاوبه..
جون ولانه حاس بمسؤوليته تجاه منصور رد وكرر كلامه:...شو صاير ؟؟..ليش تسوي جي ؟؟
منصور وقف:...ليش اسووووي ؟؟ خلني انت ماااااااااااااالك خص..
جون:..انا مسؤوول عنك في غياب ابوك .. ارجوك خبرني شو فيك متضايج.؟؟..وليش يالس تنبش في الاغراض بهذي الصورة؟؟؟
منصور طلع من الغرفة:...خوووووز عني...
يتبع >>
رد مع اقتباس
