وصية ونصيحة

**بقايا طيف** · 27-07-2015, 12:24 AM

يا صاح لا تشره على الوقت لله
إشره على نفسك ومن كان حولك

الوقت هو الوقت ما به تخله
اللي حصل لك حاصل من فعولك

يا صاح درب الذل لا ترتحله
وحذراك لا تغتر في كبر زولك

ويا صاح درب الهون والذل خله
واحذر على الجره اتعب ذلولك

ويا صاح من ضدك تضده جزله
ولا قال قوله عطه من صعب قولك

ويا صاح ما أحسن كل شي بحله
وبعد النهل ما ينفع إلا علولك

ويا صاح فيه حروف جوفا وعله
وياك تلبس ثوب مهوب طولك

وحملك ثقيل وليت حملك تشله
واترك حمول الغير وانقل حمولك

وسيف بلا فعلا حرام تسله
وحرام تصفي للذي ما صفولك

وقصر طويل ولا يظلك ظله
ولا تفرح بقربه لو بني حولك

وماي تشوفه وما حصل منه بله
ما ينفعك شوفه بليا وصولك

والرأي الاعصم واجب تمتثله
واشرك قوي الرأي يرفي خلولك

وخل المقفي وأقف لا تشتحله
وإلى رضوا فيك أمس ليش ما رضولك

وإلى يضيع ما أسألك لا تدله
ولا تصدق للي دايم صفقوا لك

خله تجي كبده على حر مله
وأمشي لضدك مثل ما هم مشولك

واحذر من اصحاب القلوب المغله
وامن الذي لأجل المصالح لجؤلك

وأعداء لوطن صده وضده عمله
وفي أعداء الوطن بالك تطاوع عذولك

ولا تسامح الخاين إلى جاب زلة
وللخاين احذر لا تبين ميولك

وضده إلى من شان فعله ودله
وخله يعرف ان ضدته ما تهولك

ولا تبين الوقفة لقوم مهله
وقف مع اللي في اللزوم فزعولك