الكون موحش والمسا فاقد إحساس

**حبي خالص** · 14-09-2014, 09:21 AM

الكون موحش والمسا فاقد إحساس
والهم ينسج من خيالي قصيـــــــــده

أكتب همومي بالقلم فوق قرطـاس
وأرسم معاناة الجروح الجديــــــده

القلب وش خلاه مخنوق الأنفـــاس
بين الضلوع العوج ينزف وريـــده

إلا الفراق وغربة الناس للنــــاس
وبعض السوالف والعلوم المكيـده

ياقلب لا تحزن ولا يغلبك يـــــــاس
إرتاح وإستبشر بلحظه سعيــــــده

أقولها يا قلب لا باس لا بــــــــاس
لاتقهرك سود الليال العنيــــــــــده

اللي ذكر طيبي على العين والراس
واللي تجاهلني تجاهلت سيــــــده

ماهمني من باعني دون مقيــاس
عزيت نفسي والأماني بعيـــــــده

أنا كذا طبعي مع كل الأجنـــــاس
القلب عزيته وشديت قيــــــــــده

حوله من الأضلاع حطيت حراس
تحميه من غدر الليال الشديــــده

اللي يذوق الغدر صافي من الكاس
لابــــد يتعلّــــــم وعلمه يفيــــــده

ضويت لي في سود الأيام نبراس
يهدي حياتي للدروب الرشيـــــده

واللي يحاول يسرق اللول والماس
ماطالته عينه ولا طالت إيــــــده

يبطي ويشهر للبشر ذل الإفـلاس
لا بدد أمواله بيفلس رصيـــــده

محشوم فكري عن تفاكير الأدناس
نفسي عن الهفوات دايم زهيده

ماكل صيد يجيبه الحر قرناس
يموت بالرمضا ولا هو يصيده

واللي يحاول يكسر الراس بالفاس
مثل الذي بيده يكسّر حديده

كتبتها جمله أنا بين الأقواس
(لاتقرب النيران جسمك تبيده)

أعوذ بالرحمن من كل خناس
من الوساوس والحياة البليده

ياوجد حالي كل ماهب نسناس
سافرت بأفكاري لدنيا بعيده

أتذكر اللي غاب من خيرة الناس
اللي وصوفه في خيالي فريده

محشوم وافي طيب العرق والساس
بين البشر مافيه شخصٍ نديده

نسله من الأحرار والعرق دساس
رحل عن الدنيا بساعه نكيده

الله يكسي جسمه الغض بلباس
من سندس الفردوس حله جديده

بصبر على فرقاه والقلب حساس
حياتنا ماجت على ما نريده

هذي النهاية تنكتب فوق قرطاس
أرسلتها عبر الأثير بقصيده