لاجيت في مجلس رجاجيل عقال
وساق المعزب دلة الشاذليه
أثقل وخلك يابيض الوجه رجال
خلك رزين وحارب العنصريه
واحذر تزل بكلمة القيل والقال
شرهة كبار السن ماهي شويه
خلك فصيح لسان وموسع البال
وميز ليا من جات هاذي وذيه
وبعض العرب لاتنشده كيف الاحوال
يمكن يصد ويمسح الهاشميه
خفف عنه لاهنت ياطيب الفال
ثم احمد المولى جزيل العطيه
والهرجه اللي جات من حلق دلال
حاول تمشيها ولاهي قضيه
لاتقلل المقدار ولاتقلل المال
وصمتك رجوله لاتحسبه خطيه
ومن جرب الدنيا يكفيه مثقال
والنيه النيه تراها مطيه
لاتكره اعمامك ولاتكره الخال
ذولا حزامك في الليالي القويه
الصبر تاليه الفرج هيه لو طال
وممشاك خله فالدروب النقيه
ولاتستمع في هرج حاسد وعذال
بعض البشر همه يكسبك سيه
ولاتغرك اللي بمشيها دوم تختال
ترا الهواء معروف شدد طميه
هذا كلام الصدق والصدق ينقال
من شاعرن ناره مع القوم حيه
