♡♡همس ... (حنايا الروح)...السكون♡♡

[حنااايا..الروح]

اليوم شفت ياسمين مع وحدة من البنات
بصراحة شعور جميل يحسسك بالنقاء والايجابية وكأنك تاخذ طاقة منعشة
أنا أحب الياسمين وايد..لما كنت صغيرة كان عندنا شجرة ياسمين قايمة بساقية الماي
وماشاء الله كانت متفرعة وتزهر بشكل فظيع
كنا نتسابق من يلم اكثر وكانوا يشكونه لنا بخيط وابرة مثل العقد ويعلقونه على ملابسنا
الله على الريحة الخنينه لما كل شوي تاخذ لك عبق
سبحان الله الروائح بالصيف تكون قوية وخاصة وقت المغرب او بداية الصبح
تحس ان حاسة الشم في اقوى حالاتها
وحدة من البنات تقول الياسمين يذكرني بريحة جدتي الله يرحمها..دائما يكون معها ياسمين او ريحان
سبحان الله لون ناصع وريحه حلوة..شي يفرح النفس صراحة

[حنااايا..الروح]

ما أشوفه
بس
كل مافيني معاه💓

[حنااايا..الروح]

اذا بليت فكن صبورا... فسوف تنفرج الخطوب
واذا كسرت فلا تبالي...يجبر الله القلوب

[حنااايا..الروح]

لا يوجد شكل ثابت للأنسان
إننا نتغير بإستمرار,تغيرنا الكلمات ,المواقف
الأيام
نحن مجرد ردة فعل لكل مايحدث لنا في هذه الحياه

[حنااايا..الروح]

تدرون وش ريحة طفولتنا زمان
مدري ولكن بأختصرها في شطر
مع إحترامي للزمان وللمكان
ريحة مطر ريحة مطر ريحة مطر

صباحكم ورد..امس طبعاً نزلت زخة مطر قوية ويقولون برق ورعد
وأنا نايمة نومة اهل الكهف عافانا الله ولا دريت بشئ
يمكن عشان ماخذة مسكن قوي عشان شسمه شالعه ذاك الشي الي ما يتسمى ومورم وجهي وصاير معتفس
حد من الناس يقولوا يمكن مسمنه ..سمعتوا حد يسمن صوب واحد والصوب الثاني مسوي دايت مثلاً؟
المهم قمت الصباح وشفت ماي جنب باب الصالة من داخل وجلست افكر متى هالفروخ كبوا ماي وانا ماشفته ؟
طيب انا اخر وحدة داشة انام ومشيكة على الابواب ومسكرة الليتات ذا الماي مهين جاي ؟
اخر شي توقعته ان طايح مطر قوي وداخل من تحت الباب
الحمدلله يتغير الشعور لما ينزل المطر تحس بالتجدد والانتعاش
عاد وانا طالعة الدوام اشوف الشوارع ماي والدوار ماشاء الله من صوب مليان
الله يديمها من نعمة ويجعله صيبا نافعا

[حنااايا..الروح]

النفسية محتاجه حوض فيه ماي بارد وثلج
واغطس رأسي فيه عشان يبرد شوي

[حنااايا..الروح]

الثقة ليست سهلة
فعندما يثق بك أحد
لا تخذله

[حنااايا..الروح]

هكذا هي الحياة
لآ البدايات التي نتوقعها
ولآ النهايات التي نريدها

[حنااايا..الروح]

كثيراً من الأحيان نجد أن الأندفاع نحو رغباتنا دون تأني أو تمهل لنملأ الفراغات في أعماقنا
قد تغمرنا النشوة والشعور بالحب والدفئ ..ولكن مع الوقت نجد أن قلوبنا التى كانت متلهفة
أصبحت فاترة شيئاً فشيئاً واصبح يتسلل إليها الملل على وجووه عدة:
كالانشغال والتخلف عن السؤال او حتى التهاون في الوصل
هكذا حال الأحبة
ربما الانشغال هو الدليل على أن القلب لم يعد كم كان
وأن ما كان بالامس شوق جامح أصبح روتين ممل

همسة:
عندما تجد نفسك قد بدأت تفقد الشغف نحو هدف كان نصب عينيك
وقد اعياك التفكير وجافاك النوم لاجله ,,فلتتوقف
لان إكمال المسير بقصد المجاملة هو آذى بحد ذاته
آذى لنفسك قبل أن يكون للاخرين
فلست مجبراً على أن تعيش مشاعر بدأت تفقد بريقها بقلبك لمجرد رغبتك في اكمال
المسير بلا شغف او ميول

[حنااايا..الروح]

اليوم الخميس واكيد الاغلب اذامب الكل يصير بيت العايلة تجمع على عشاء او غداء
إذا مو الليلة فبكرة او الي بعده
جرب تأخذ معك نوع شوكليت وتوزع على الصغار هالاسبوع
والاسبوع القادم..بتلاقيهم كل اسبوع ينتظرونك على احر من الجمر
وبتلاقيهم سباق كل واحد يبغا يكون اول واحد يسلم عليك
وعاد اذا استمرت هالعادة شهر وكل مرة مفاجأة غير فأكيد النتيجة مبهرة
صدقوني انت بتحس بالغبطة وانت تشوف ابتساماتهم شاقة الوجه وفرحانين
كانت اختي تسويها لما ترجع من الجامعه وكنت اشوفهم ينتظرونها على مدخل البيت وبعد ما تخرجت اختي
وجلست فالبيت مثل حال كثير خريجين صار اخوي يسويها
والموعد بعد المغرب ومن تزوج صارت زوجته تجيب لهم وعاد الفرحة الكبيرة بيض الكندر
تشوف كل واحد جالس بصوب يدور اي لعبة بتطلع له ..والصغار الي يصرخ يبغا حد يركب له اللعبة الصغننه الي طلعت له
وغير الكبار الي ماتعجبه لعبته ويجي بالسياسة ويبادل مع الي اصغر منه
الاجمل من هذا كله حنا كأمهات نفرح مع انه ما يبدنا شي بس فرحة عيالنا كم تسوى الله
جربوها وشوفوا كيف