^-^ شعورٌ يلامس نبضي °~° ®

[Raba]

السلام عليكم ورحمة الله وبركاته ...

هلا فيكم جماعة سمحولي مضغوطة عندي 3 تسليمات هالاسبوع واختبار .. يا رب توفيقك



المهم راح اتكلم عن ملاحظتي لدواء اخذت امس 2 تابلتس بعد الاكل كنت احس بصداع ألم في مفاصلي ويدي وبالاخص كوع اليد وهم كان بيا نعاس بالإضافة إني كنت ملانه اشتغل على المشروع الي بسلمه وبعدني باقي لي الكثير أعدل فيه واضيف فيه ..

صح بخبركم شغله طبعا ماما ما تعرف بالي يصير معي الحين الشخص الي يعرف هو بابا وانتم وزميلي لان صديقة دكتور .. الموضوع موترني إني أخبر أمي لان ماما ما شاء الله من النوع الفضولي في قراءة الادوية والأشياء هذي فلو سألتني عن اسم الدواء راح تبحث عنه والدواء نفسه يعطى لمرضى السرطان حمانا الله واياكم منه .. ما أريد اخوفها وفي نفس الشيء أحسها حاسه خاصة امس ما دخلت الواتس من التعب غير الظهر الي هو وقت صبح في عمان ..

[Raba]

هلا جميع كيفكم اخباركم ،،،
مممم اليوم مثل ما توقعت ان أمي راح تتصل فيني وأول سؤال انتي وينك مالك حس ؟!
موجودة ماما انتي كيفك ؟!
الحمدلله كلنا بخير ونبرة الصوت تغيرت شفيك ضيونه ؟!
ما في شيء ماما ضغط دراسة
اها انا قلت انك مشغولة بس عاد ما كذا عاد بنتي كلهم يسألوا عنك حتى بيبيتك وعماتك ؟!
سالت عنهم العافية حبيبتي ،، ها الغالية طمنيني عليكم ان شاء الله كلكم بخير
الحمدلله حبيبتي ناقصنا وجودك كيف الحياة التقيتي في البنات احد جاء عندك زارك ؟!
...... ماما
نعم ضيونه ممم رحت ع العيادة وشفت طبيبة مختصة وأعطتني علاج عشان المرض كان بادي علي وعلى جسمي عشان كذا الفترة الاخيرة ما كنت ادش الواتس حيل وهم زحمة تسليمات
امي لحظة صمت وبدا بصوتها نبرة حزن مال صيحة شو قالت الدكتورة وشو عطتك علاج
عطتني علاج قوي شوي وان شاء الله ينجح معي كل أسبوع راح اقلل الجرعة حتى اعرف الجرعة المناسبة لي وتكلمنا باشياء وإني عرفت درجة تطور المرض
ماما كان ردها : ربي يشفيك حبيبتي ويعافيك عسى العلاج يعطي مفعول وصوتها مخنوق مره
امين يا رب وجميع مرضى المسلمين ،،، مممم شو بعد كيف جيفور ومرتضى
وتغيرت السالفة ...


ندمت شويه اني قلت لها بس الحين ما احس بتأنيب الضمير

[Raba]

اليوم الثالث من العلاج ٢ تابلتس هالمرة ما في صداع بس في الم ونعاس وجوع شديد شكلي
بودع الرشاقة هههه ،، الالم اكثر كان باليد والرقبة والساق والقدم اليمين ،،

[Raba]

من كثر ما احاتي التسليم نهضت 3 مرات الصبح والتسليم بعد يومين إن شاء الله ...

المهم صبااااااحو كيفكم متابعيني عساكم أطياب ...

شو بقولكم صح أمس صارلي موقف يدل على الحول الي فعيوني .. طبعا راسلين لي قطرة من عمان مفيدة للعين والي عندهم مشاكل نقص النظر وما إلى ذلك المهم قلت بسوي القطرة وانا عيني فيها حساسية المهم فتحت الغطى زين شوفيه ان القطرة ما فيها ثقب ما لابسه نظارة لمسي العبوة تحسسيها بيدك ما علينا .. ضيون جلست تضغط العبوة عند عينها لاحد ما انفتح القطور كله وتطاير وراحت نصها العبوة في ملابسي وبطانيتي والجدار وبعدين اكتشفت ان القطرة ما فيها ثقب بعد ما وسخت الدنيا وخلص القطور ���� باقي فيه شويه عاد جاتني صيحة

[Raba]

هلا بيكم جميعا اليوم تحررت من الضغط الداخلي الحمدلله وقبل شوي سلمت كل مشاريعي باقي لي واحد بس واختبار الحمدلله ...


المهم كيفكم طمنوني عليكم بنقطة هههه



مممم اتكلم عن العلاج أخذت في اليوم الرابع والخامس 2 تابلس الظهر اليوم الرابع كان تعب فيه رجلي والركبة والكتف كان يعورني اكثر .. امس الي هو اليوم الخامس كنت منهكة اصلا لأني ما نمت كويس يعني نايمة 4 الفجر فما ادري التعب من شو بالضبط لأن كان ظهري وكان جسمي متكسر ورجلي وجلست تحت الدفاية ... اليوم الي هو اليوم السادس اخذت 2 تابلس يدي اليسار كامل من الاطراف إلى الكتف تألمني صداع بسيط وألم في الأقدام طبعا انا اخذتها من 3 ساعات يعني هذا التعليق ما بيكفي برجع بكتب بليل شو بيصير طول اليوم لأن حالياً فاقدة التركيز وبي نعاس

[Raba]

نتمنى لك الشفاء العاجل ضي اجر وعافيه وطهر ان شاء الله
الام.... سطور وصفحات وكتب ومجلدات نتركها فارغه نعجز وتعجز الاقلام عن رصف حروف تفي حقها الام نبع حنان فياض تان وتنوح بصمت لمن تحب الام حضن نرمي فيه همومنا واوجاعنا ليغمرنا بدفى والاحتواا الله يحفظ كل الامهات ويجزهن عنا كل جزا ويرحم كل امهات المسلمين والمسلمات

امين ويعافيك الله .. شكراً لك اخي الوريث ومن كقلبي أمي اذا ما ضاق بي ذرعا سواد الحال ربي يرحم أمهاتنا وأمهات المسلمين ويرحم ربي موتاهم

[Raba]

ممممم ياخي شو بقولكم صح طلعت ما اعرف اسوي قهوة الي يعرف يكتبلي الطريقة بلا مصخرة ها ما مزاح ههههه ... انا سويتها كانت خفيفة. ما أدري حسيت فيها فلفل هههه كيف جاء ما أدري

[Raba]

السلام عليكم متابعيني ...
مممم شو أقولكم امس كان يوم مجنون تخيلوا ساعة وحدة وشيء الفجر طلعنا من البيت رحنا جريت اوشن رود بصراحة اجن منا ما في الطريق ساعتين وصلنا ساعة 3 وشيء وجلسنا دور مكان ننام فيه اخر شيء لقينا عاد سكن يعني ما عندنا وقت كلها 5 ساعات نجلس عن نفسي نمت 3 ساعات المهم المكان رهيب تخيلوا جبل يطل على شاطئ المحيط ونهر ينزل من الجبل وفي شلال في نص الجبل ينزل الماي بسيط في الشارع يعني وااااو شيء رهيب مره حبيت تخيلوا الجبل اخضر وكله منعطفات وسط غابة وبحر وجبال رباني سبحااااان الله ما أعظم خلقك .. جدا راقي المكان رجعنا البيت عاد ساعة وحدة الظهر ونحن نحس بنعاس ما كافينا النوم نمت لي ساعتين وصحيت ورحت الجامعة مذاكر ...

المهم اليوم تقديري ع العلاج كان سيء تخيلوا انا من النوم الي يحطي يده تحت راسه او امسك بطانية ولا احضن وسادة المهم لازم امسك شيء الحين م اقدر أسوي كل هذا لان يدي تعن .. وهم ركبتي تعورني احس الالم اكثر في يدي ربي يسلها اليوم أخذت تابلس 2 ونفس المشكلة في اليد

[Raba]

عندي زميل ربي يوفقه ويحفظه لعياله يتناقش معي يفهمني لان هو اصلا 10 سنوات يشتغل في الشبكات ما شاء الله .. فالمادة سهله عنده حتى ساعدني في الاسايمنت حجي ما قصر ما شاء الله عليه .. المهم اليوم كنت اسوي براكتس للفاينل إجرام عنده حتى يشوف اخطائي واكتب الملاحظات المهم لما خلصنا فهمني ما قصر جزاه الله خير وجلس يعطيني نصائح .. بعدين سألني شفيك يعني حالك متغير وكان سؤاله مال مزاح ابتسمت قلت له مريضة قال ايوا عندك الزهايمر ضحكت قلت لا عندي كذا وكذا قال شو يعني قلت له يعني مرض كذا كذا سكت قالي مأجورة ابتسمت قلت له ذكر من الله ... بس هو حس بالذنب رسلي رسالة أعتذار قال حسيت نفسي غبي لما سألتك بصراحة هو إنسان أكبر مني اعتذاره يعني لي الكثير انا أشوفه أستاذ يعني هو فعلا يستحق يكون أستاذ لانه يعلمني كيف الوظيفة بتكون وكيف العمل في عمان ويهيئنا قدر المستطاع لحل المشاكل الي ممكن اتعرض لها في مجال العمل .. اعتذاره رسم بسمة لي قلت له ما عليك أستاذ البلاء حق وليس ذنب انحرج منه والحمدلله لا تفكر نفسك غبي ما فكرت بسؤالك أصلا ولا انحرجت منه ..

في ناس راقية لازالت تعي معنى الأخلاق في تعاملها ربي يزيد منهم

[Raba]

خلصنا اسبوع من العلاج وجينا للأسبوع الثاني أمس بدأت واليوم أخذ تابلتس ونص احس بوجع فضيع بجانب اليمين الرجل واليد .. وامس كنا طالعين جروب نشوف الكناغر بس حاسه بالذنب لأني تعبت وحسيتهم يحاتوني وانا مالي خلق اتكلم رجعت البيت ساعة 10 ونحن طالعين من ساعة وحدة الظهر ونمت ساعة 3 الفجر مع أني ميته تعب .. المهم كانت الرحلة ربشة هههه وهم اخذت خاتم لي ولعزووه مكتوب عليه بيست فرند بس تقريبا فيه زئبق لانه يتغير لونه كل فترة حبيته .. وبس