حكايات من العالم الاخر، تثير الرعب في القلب

[غيمة ،]

موضوع مرعب الصراحة

بالنسبة حالي ما اتذكر شي يستحق الذكر جميعها اشياء تصير لاي شخص _اشياء شبه روتينيه و عاديه_
بس في مره كان ابوي غافي في سبلة الضيوف .. وقت متأخر من الليل .. هو فالعاده يجلس بالساعات ف السبلة بس سبحان الله هذيك اليوم غفا .. المهم يقول ما حسيت إلا حرمة تصحيني و بعدين راحت .. الاهم هو دخل الصاله و حصل الكل نايم .. و خبرنا بالسالفه صباح

ما في بيت يخلا منهم .. لكن بيتنا بصراحة متعدي الحدود هع

[وجودي غير]

بسم الله الرحمن الرحيم ..


موو خلاني ادش اقرأ ولا بعدني كملت عليهن كلهن ..وااااي
اكثر شي يخوف تقرا هالاشياء بالليل وف وقت مثل هذا ..فيس يصيح


محدثتكم من تحت البطانيه ..وجودي


وشررده تسجيل خروج ..

[جمال319]

نحن نعيش في عالم فيه الجن والشياطين
واحيانا نحن نتعدى على ممتلكاتهم وحياتهم الخاصه
ولانسان عليه يحوط على نفسه بالدعاء وبعض الايات الي تم ذكرها في اذكار الصباح والمساء حتى تكون له الحصن الحصين

[أحاسيس إنسان]

بخبركم سالفه


كانت لي عدة تجارب وللآن

المهم

انا لما كنت صغير
احب السهر على التيفي

ويومياً اسمع أحد يناديني بإسمي
والكل في البيت نايم

وعاد يصير فيني فضول أعرف من ينادي

أتبع الصوت إلا هو خارج البيت

أطلع وألف لفة حول البيت وما أحصل حد

واستمريت على هذي الحالة أيام

بعدها خبرت أمي

بس ما علقت على الموضوع

وبنفس الليلة من حستني في غرفتي

قفلت الباب من الخارج


وبعدها حرمت أطلع

نعم انها ادبتني


يُتبع بقصص جديدة .....>>>>>

[حنايا الورد]

موضوع مخيف نوعا ما
مرة فالسكن ايام الدراسة حاطة كيس بطاطس على الطاولة
المهم الساعة 6 الصباح سمعت صوت و كأنه حد ياكل من البطاطس حاولت افتح عيوني ما قدرت و كأنه باب الغرفة كان مفتوح
مع انه مقفول بالمفتاح اول ما فتحت عيني احصل البطاطس فالارض مفتوح
امور كثيرة كانت تصير لنا فالسكن و كنا نخاف بس قررنا انا نشغل سورة البقرة طوال اليوم حتى و احنا نايمين و الحمد لله الامور طيبة

[عيون البشر]

ما أجمل قصصكم المخيفه

بورك مروركم احبتي

[جـمـيـل الـروح]

تذكرت مره لما كنت ادرس ف السكن

قمت من النوم وطبعا الغرفه ضلام عدا منفذا النافذه يجي منه شعاع الليت اللي هو خارج الغرفه

وشفت واحد واقف داخل الغرفه ويظهر عليه لحيه كثيفه وواقف صاد صوبي

المهم انا تجمدت مكاني ولاتحركت .. حتى جلست اقول بنفسي ياخي يمكن احلم خلني اقوم

المشكله اني تاكدت اني قايم وان عيني اللي تشوفه صدق

وقتها حتى السور اللي حافظنها تخلت عن ذاكرتي .

المهم قلت يمكن هذا زميلي ... وبنفس اللحظه اقول اقول تو الساعه كم !!

تذكرت ان اللي ف الغرفه معنا واحد عليه لحيه وبنفس المواصفات .. قلت يمكن هوه دهمان .. وطبعا المكان كان برد ثلج عداي انا كنت اسيل من الحر

المهم انا ماتذكرت بعدها كيف نمت لكن لما نهضت مفزوع على طول رحت حق صاحب اللحيه .. ف البدايه نكر وبعدين قال هذي مشكلتي من يوم صغير احصل نفسي مرات واقف ومرات جالس ..

ومن يومها انا ما اودر المسجد

وسلامتكم

[زهرة الخلود]

انا مو دششني الحين واقرأ سوالفكم المرعبه
.....

[حنااايا..الروح]

ما شاء الله موضوع شيق وجميل...
أنا شخصياً ما أتذكر إني صارلي مثل هالمواقف
بس بذكرلكم سالفة ..
بالمزرعه كان معنا عامل بنجالي صارله كم سنه
ومرة كان ينظف من تحت النخل ويجمع الخوص والحشيش اليابس مكان واحد
قريب من غافة كبيرة ..لان الغافة في الطرف وجنبها مساحة فاضية بعيد عن الشجر والنخل
المهم هو جمع المخلفات قريب الغافة وولع فيهن وكان عصريه قبل المغرب بشويه
واستمرت النار لين انخمدت بعد المغرب
وبعد العشاء راح ينام بغرفته الي بالمزرعه
وحلم حرمه وزوجها وأولادها ثتين معصبين ويقولوله ليش تحرق جنب غافة
وضربوه ضرب وقالوا له لو عدتها مره ثانيه بتشوف شغلك
والصبح قام العامل وظهره يعوره وجاء خبر اخواني بالسالفة
ولما جاء اخوي يشوف ظهره حصلوا العصا مسويه شوارع بظهره هههههه
ومن يومها حرم يحرق شي بوقت العصر وطالع

[القعقــــــاع]

السلام عليكم
شخصياً أقول بأن بعض القصص والروايات وما يسمى بالسحر والجن بعضها مجرد خرافات وتخيلات لا أكثر نتيجة عدم ذكر الله أو الانشغال بملاهي الدنيا والأغاني والمجون ولذلك يسهل على الشيطان اللعب بالأفكار والعقول، والسيطرة على الأحلام في المنام.


شكراً لك🌹