للأنني خادمه / للكاتبه قلب دبي

[القيصـــــر]

كل الشكر. ....ونحن بشوق ﻷكمال القصه

ألف شكر لك على متابعتك المستمره

[القيصـــــر]

الجزء الحادي عشر // الفصل الأول

كان اتصال واحد بس ..
كفيل انه يخليه يحــرك باتجــاه الفنــدق ..
صحيح ان شكوكه لا زالت تتردد في ان منوة ممكن تكون اختــه ..
لكــــن هل هي بالفعل اختـــه ؟!
هـــل من المــمكن تتكون هالأخوه بهالسرعة ؟
.
.
شل خالد كل هالأفكار من باله ..
وتم همه الوحيد انه يجحل عينه بشوفه منوة ..
دق جرس السويت .. بس شكلها ما سمعت ..
رد اتصل ع الموبايل
ردت منوة بخمول : الـــو ..
ابتسم خالد بسعادة : فجي الباب ..
منوة وباين التعب عليها من صوتها : زيــن ..
مشت منوة بكشتها لين الباب ..
فجته .. وانصدمت بخالد اللي هلكان من الضحك جدامها ..
استوعبت اللي يستوي ..
جان تسكر الباب ف ويهه وتدش الحمام ..
غسلت ويهها وسحت شعرها وتغطت ..
عقب خمس دقايق فجت الباب ..
خالد بغيظ : لا والله ؟ حلفي انتي بس ؟
منوة ببراءة : والله ..
خالد تنهد بحب : أحياناً أحس اني ارمس ياهل .. ما رمس وحدة قدج ..
منوة بدلع : أصلاً انا بعدني ياهل ..
خالد : ههههههههه .. اقول مب ناوية تدخليني ؟
منوة : حياك ..
دخل خالد .. ويلس ف الصالة ..
خالد : هــا .. شخبارج الحين ؟
منوة بهدوء : الحمدلله بخير ..
لحــظة صمــت امبينهم ..
منوة : اصبر بسير اسوي لي شي ميته من اليوووع ..
خالد : هههههه خذي راحتج ..
ســوت لها نسكافيه .. ولـ خالد كابتشينو ..
حسب معلوماتها ان خالد يتخبل ع شي اسمه كابتشينو ..
بعد ما خلصت يابت له الكوب ويلست ..
خالد ابتسم لها : تدرين اني انا بعد ما تريقت اليوم ؟
منوة : مب زين لازم تاكل .. انته تشتغل .. مب عيب انك تطيح ع الأوادم فـ الشغل ؟
خالد : ههههههه عاد انتي موليه جلبتيها فلم هندي .. لا اليوم ما تريقت لان استوى Touch بيني وبين اميه وظهرت من البيت مغيــظ من الخاطر ..
منوة حطت كوب النسكافيه ع الطاوله اللي جدامها وبصدمة : اتضاربت ويا امك ؟ لييييش ؟!
خالد : هــه .. سالفة تافهة ..
منوة بإحراج : وهالسالفة ما تروم تقولها لي ؟
خالد : مب جيه السالفة .. بس هزاعو .. (تذكر بغيظ) اللي كان دوم الا طايح يتغزل فيج ..
منوة بضيج وهي فهمته بذكاء : هيه قصدك اللي انهزب دوم بسبته .. بلاه ..
خالد : هههههه .. الرويتر جافج وانتي تركبين سيارتي .. وسار خبر اميه .. وامي عادة احتشرت من الخاطر .. وتمت تقولي يالمغازلجي يالـ مادري شي .. وانا عاد من غيظي خبرتها سالفة فتحية واني وديتج المطار .. وظهرت من البيت مفــول من الخاطر ..
منوة بحزن : والله آسفة ..
خالد : منووو .. بعطيج كف الحين .. عن هالحركات ..
منوة : لا صدق يا خالد .. السالفة هب هينة ..
خالد : انتي ما عليج .. بس اللي ضحكني ف السالفة رمسة اميه .. اونه زين ان روضة ما وصلها الخبر ..
منوة قاطعته بضيج : هيه صح خالد .. روضة طرشتلك مسج ..
خالد باستغراب : مسج ؟
منوة وباينة الغيرة عليها : مسج حب وغرام ..
خالد : وشقايل عرفتي انها روضة ؟
منوة بغيظ : هي تراها كاتبة اسمها فـ آخر المسج ..
خالد بخبث : ها ها .. تغاريييين ؟!!
منوة طالعته بإجرام : انا ما قلت شي ..
خالد ابتسم لها بحب : لا تحاتين انا ما أفكر الا فيج ..
منوة تضايجت : خاالد بليييز .. ( تذكرت ) تعااال .. شو سويت بارحة عند بوفايز ؟
خالد تذكر سالفة بارحة وتنهد : كل خير ..
منوة : يعني خبروك شي عني ؟
خالد : مثل شو ؟
منوة : مادري .. انا اسألك ..
خالد تنهد : منوة .. هلج ساكنين فـ فريجنا ..
منوة بصدمة : شو قصدك ؟
خالد بحزن : قال لي ان عندج اخوان وايد ..
منوة طالعته بصدمة : اخوان وايد ؟؟ (تفاجأت) يعني عادي اكون اختك ؟
خالد بحزن : هيه ..
منوة بألم : انتـــه اخووي ؟!
خالد : مب اكيد يا منوة .. بس شي وارد ان نكون اخوان ..
منوة ودموعها تنزل لا إرادياً : وانته تجوفه شي طبيعي اني اكون اختك ف غمضة عين ؟
خالد بألم : منوة دخيلج .. يمكن ما تكونين اختي .. مب بيتنا بس اللي عندهم عيال وايد ..
منوة نزلت راسها : خالد بليز .. ممكن تروح ؟
خالد بحزن : ليش ؟
منوة تصيح : مب قادرة استوعب شي .. مب قاااادرة !
نش خالد : دخيلج يا منوة .. انتي لا تستهمين .. انا بحاول أتأكد ..
ما ردت منوة عليه ..
وبدوره خالد ظهـــر ..
تم يدور فـ الشوارع ..
كان شرات التايه ..
بعد ما كان مقرر انه يتغدى مع منوة .. حتى لو يتعشى بعد !
والحـــين ؟!!
منوة ممكن تكون اخته .. ( برفض ) وممكن ما تكون !
وصــل لإحدى المطاعم اللي تـعود يروح لها وقت الضيج ...
والتقى واحد من ربــعه ..
اللي قـدر ينسيه .. ولو شوي .. من الهم اللي فيه !!!
.
.
أمــا منوة ..
فكان الضيج واصــل أشـد حدوده عنـدها ..
ما لقت الا الراديو الموجود عندها ..
وعلى إذاعـة نور دبـي ..
يلسـت تسمع ..
.
.
,
أنا من وين ماجيبك ،‘، تجيني يالحزن بعناد
طلبتك رخّي شويّه ،‘، ويكفينا ألم وسهاد
أنا أبقى مثل غيري ،‘، في تبريري وتفكيري
ولاني مختلف ياناس ،‘، وشوفوا كل تعابيري
ياطول الليل والقمرة ،‘، يابعدك يا أمل بكره
ومع هذا أنا ناطر ،‘، وكل طعناتي منتظرة
مدام إن الأمل موجود ،‘، تهنّي ياجروحي زود
في قلبٍ وإن غدا دايم ،‘، على أعتاب الفرح مردود
عسى هالوقت يفهمني ،‘، عسى يرضخ ويسمعني
ويعرف وش يبي قلبي ،‘، ولا كل مره يسفهني
،
.
.
المنشـد : احـمد الهـاجري
ألبوم : أدعـوك .
.
.
مـر الوقـت بسرعة على خالد ..
واللي تعمد يطول لين الساعة 1 بالليل ..
عسب ما يرد البيت ويحتك بأمه وتستوي مشكلة ثانية ! ..
على الساعة 2 .. دخل البيت ..
انصدم بوجود امه يالسة ف حجرته تترياه .
ام خالد بفرحة : هلا هلا بولدي هلا بخالد ..
لا إرادياً ركض خالد صوبها يحب راسها : امي اسمحيلي ع اللي استوى اليووم ..
ام خالد تحضنه وتصيح بقوة : انا اللي آسفة يا ولدي .. آسفة لاني شكيت ف لحظة اني ما عرفت اربيك ..
خالد بفرحة : كم مرة قلتلج خلج واثقة مني ؟؟
ام خالد ترفع راسه من حضنها : ما بوثق فيك الا يوم بتيب لي حفيدي حبيب قلبي ..
خالد نش عنها ويلس مجابلنها : ان شااا الله يا ام خالد .. بس قبل جيه عندج عروس ؟
ام خالد باندفاع : روووضة يالسة تترياك .. انته بس قووول وانا حاضرة ..
خالد : لالا شوو .. اميه دخيلج انا روحي بنقي البنية ..
ام خالد بضيج : و شبلاها بنت خويتي ها ؟
خالد : ما بلاها شي بس هب رزينة ..
ام خالد : ويه ويه .. بتعقل بإذن الله بعد ما تاخذها ..
خالد : اميه الخفيف يتم خفيف طول حياته .. بعدين انا ما تطمن لها ..
ام خالد : ما عليك انته .. تتوهم بس ..
خالد يرص ع ضروسه : اميييه رويض يااااهل الا 17 سنـة ..
ام خالد : يا المنكر .. جيه انته تباها قدك ولا اكبر عنك ؟
خالد : ما عليه امي انا ما قلت جيه .. بس رويض هب عاااااااقلة ..
ام خالد : خاطري فيها ..
خالد بعبط : خاطرج فيها ؟ اتزوجيها لوووول ..
ام خالد : صدق انــك ما تخيل ..
خالد : ههههه .. اميه تعالي ..
ام خالد : هلا .. آمر ..
خالد بجد : نحن عندنا اخت انخطفت وهي صغيرة ؟ يعني من 15 سنة ونحن ما ندري ؟
ام خالد تفاجأت : اشووه ؟؟ (ارتبكت) خويييييلد من وين يايب هالرمسة ؟؟
/
\
/
\
يتبع ،،

[القيصـــــر]

الجزء الحادي عشر // الفصل الثاني

ام خالد تفاجأت : اشووه ؟؟ (ارتبكت) خويييييلد من وين يايب هالرمسة ؟؟
خالد شك ف السالفة : بلاج اميه انا أسأل ؟؟
ام خالد غيظت : انته تدري ان رمستك هاي عودة ؟؟ شو وين تبا انته ؟
خالد باستغراب : عادي اميه مجرد سؤال اشحقه غيظتي ؟
ام خالد : لا والله ؟؟ اشحقه اغيظ ؟؟ بنتي مخطوفة من سنة وحطبة .. وانا يالسة مستانسة ؟؟ شو هالرمسة ها ؟
خالد ارتاح نفسياً : مادري قلت يمكن يعني ..
ام خالد تطالعه بشك : انته حد تارس مخك . .شو سالفتك ؟
خالد : ها .. ههههه .. ولا شي .. تعالي اميه .. تهقين الام لو انخطفت بنتها .. شحقه تسكت عنها كل هالسنين ؟
ام خالد : ويه يا خالد .. عادي يمكن توفت الام عقب هالحادثة .. ولا يمكن ريلها ما يبا فضايح ..
خالد : حشى انزين هاي بنته !!
ام خالد : عادي يمكن ماخذه ريل ثاني ..
خالد : حسبي الله عليه جان ما خلاها ..
ام خالد ردت تطالعه بشك : انته عندك شي .. قوله احسن ..
خالد : هههههه لا تحاتين امايه انا جيه بس كنت افكر فهالسالفة .. وفضفضت لج ..
دخلت عذبة : وانا يا خلّود النحس .. شحقه ما تفضفض لي ؟
خالد ابتسم : مقبولة منج يا العروس .. شسويبج امي تسأل وانتي ولا عندج خبر ..
عذبة : هي اعترف انك ما تتشرف اكون بير اسرارك ..
خالد : ايييها .. خلج ويا الهرم حميد .. شو تبين فيه انا ؟
ام خالد : تعالي عـذبة .. حميد ما ياب فلوس الكوشة ؟
عذبة : لا اميه .. حميد خبرني انه بيعطي راعي الكوش الفلوس عقب ما يجوف شغله ..
ام خالد : خله يستعيل .. ترى ما تم شي على عرسج .. بعدين تعالي .. اشحقه يرمسج الحينه هاا ؟
خالد بغباء : ريلها .. كيفه يرمسها متى ما بغى ..
ام خالد : ادريبه ريلها .. بس خلهم يثجلون شوي .. حشى بيملون من بعض بسرعة ..
خالد وطاري منوة على باله : والله انا واحد ما اروم ما ارمس حرمتي ..
عذبة وام خالد طالعوا بعض باستغراب ..
عذبة : حرمتك ها ؟ جيه خلاص ناوي تخطب ؟
خالد : ان شاااااا الله جريب ..
عذبة بفرحة : والله ؟؟ تعال ليكون حاط عينك على وحدة معينه ؟
خالد ارتبك : هاا ؟
ام خالد تقاطعه : اكيد بدون لا يرمس .. روووضة فديت روحها ..
عذبة بغيظ : نعم ؟؟ صدق الرمسة يا خويلد ؟؟ عاد ما شي الا رويض ؟
ام خالد : بلاج تقولينها بليا نفس .. ولا جنج ما تدرين ان روضة محيرة لخالد ؟؟
عذبة : ويه ويه ويه .. هاي تاخذ خالد ؟؟ تخسى وتهبى .. حشى اميه جيه شو ناقصنه خالد عسب تيوزينه هاي ؟؟
ام خالد غيظت : عذبوو .. شو تقصدين يعني ؟؟
عذبة بقهر : اللي سمعتيه يا اميه .. انا هالروضة ما أبلعها ..
خالد ببرود : شربي ماي هههههههه ..
ام خالد تستنجد بخالد : دخيلك سكت اختك .. شكلها مب ناويه تعدي هالليلة على خير ..
خالد : هههههههه انزين شحقه انتي مشتطة عذبو ؟
عذبة : اميه .. حشى شو حصلتي ف روضة .. لا جمـــال ..
ام خالد تقاطعها : الجمال مب كل شي .. بعدين البنية زوينه ..
عذبة : ما عليه خلي الجمال .. الأخلاق . حشى اميه هاي مول فاصخة الحيا ..
خالد يطالع امه باستغراب : وتبيني آخذها ها ؟
عذبة : امك يوم تحلى ف عينها البنية تنسى كل فعايلها وسواياها ..
ام خالد : عذبو بلاج ع البنت .. ايه هاي بنت اختي ..
عذبة : بنت اختج ع العين وع الراس .. بس انها تاخذ خالد لااء والف لاء ..
ام خالد : ايه .. خالد اللي بيعرس مب انتي ..
عذبة : هي عقي عقي عيالج ع بنات الناس .. وعقب طيحي تعبانة علينا من بلاويها و سواياها ..
ام خالد طالعت عذبة بغيظ ..
خالد : خلاص اميه انا ما بنقي الا وحدة على مزاجي ..
طالعتهم ام خالد بنظرة احتقــار ..
وشلت عصاها ومشت بانكسار : آخر زمن .. ايام اول ما كنا نروم نطالع ويوه امهاتنا ونراددهم .. والحين يسكتوننا وفوق ها يخالفون شورنا ويراددونا .. ( بقهر ) حسبي الله ونعم الوكيل ..
وظهرت من حجرة خالد ..
خالد يدز عذبة : نشي اعتذري لها ..
عذبة : اووه يا خالد .. انا ما قلت شي غلط .. بس روضة صدق ما تصلح لك .. روضة متفتحة وااايد .. كل شي free عندها .. عادي عندها تظهر شعرها جدام الرياييل .. كل شي حلال عندها ..
خالد : بس مهما كان .. وبغض النظر اذا انا خذتها او لا .. بتم هاي بنت خالتج ..
عذبة بانفعال : يا سلام ؟ تباني اجوف حياتك تتدمر جدامي واسكت ؟
خالد : وشحقه مغيضة من الأساس ؟؟ اصلاً انا روضة شالنها من بالي .. بس شو نسوي .. امي ولازم نسايرها ..
عذبة : لا والله ؟؟ كيف بتسايرها بعد ؟
خالد : طبعاً ما بقولها موافق اتزوجها . .بس من بحس ان البنت اللي اباها موجودة بخبرها وبترضخ لي ..
عذبة : هيه جيه طمنتني ..
خالد : تعالي صح .. انتي عاطيه رقمي الثاني حق روضة ؟
عذبة باستغراب : لا .. ( تذكرت ) هيه امسات اسمو خذته عني .. اشحقه ؟
خالد : فشلتني والله .. انا هالموبايل عطيته ربيعي .. قالي ان في مسج حب وصل لي منها .. ولا كاتبه اسمها بعد .. تخيلي ردة فعلي جدامه !! ..
عذبة شهقت : كله من اسمو الغبية .. انا بخبرها تهدد المستخفة ..
خالد : هههههههه ايه بلاج كارهتنها جيه ..
عذبة : خلها تولي عنك .. (تطالعه بتمعن) تعال انته حاط ف بالك وحدة تباها ؟
خالد ارتبك : ها .. لا ..
عذبة : خويييلد .. هالسوالف ما تطري علي انا .. انت طول عمرك ما تداني طاري الزواج .. ويوم نطريه جنه طرينا ابليس .. شو استوى بك فجأة ؟ جيه مرررة حبيته ؟
خالد يتهرب : ما حبيته .. بس مهما كان .. ما في واحد ما يتمنى يكون عنده عيال يشلون اسمه ..
عذبة بشك : ولو اني مب مصدقتنك يالخراط ..
خالد دزها : انا خراط ؟
عذبة بتحدي : هييييه ..
خالد : اقول ماااالت عليج عاطنج ويه انا .. ذلفي برقد .. ها بعد عروس وسهرانة .. انا حرمتي لو تتم لين الساعة 10 ما بخليها ..
عذبة : هاااااا جفت ؟؟ بعد رديت وطريت هالسالفة ..
خالد : هههههههههههههه ذلفي احسن ..
عذبة : مب مشكلة .. اللي في الجدر يطلعه الملاس يا حلو ..
.
.
اليوم الثاني ..
سار خالد عند منوة ..
كان حاس انه لازم يبشرها انها مب اخته ..
منوة بدون اهتمام : والله ؟؟ زيين ..
خالد : منو شبلاج ارمسج من الصبح تكلميني بدون نفس ؟؟
منوة نشت بقهر وفرت عليه الموبايل وسارت ..
على طول كانت الشاشه ع الـ Inbox في مجلد الرسايل ..
.
.
صدقني من عرفتك وانت لي كل المشاعر..
ياما في حبك حبيبي افتخر دايم وأكابر..
وين ألاقي مثل قلبك في زمن قاسي وغادر..
مثل طبعك يا حياتي صعب في الدنيا ونادر..
انت في عمري حكايه وانت لي اجمل مشاعر..
(روضة)
.
.
عليكـ .. وفيكـ .. كل الحلى ذاب..
يامنتهى حلم الغلا والمحبة..
عجزت اعرف بناظري سر الاعجاب..
يامن عطاه احلى حلا الناس ربه..
ثقل وعقل .. واسلوب ساحر وجذاب..
أنا اشهد ان لي حظ في حبه..
(روضة)
.
.
تم يطالع المسجــات ..
مسج ورا مسـج ..
وكلها بأسامي روضـة ..
حسها كلها تافهـة ..
الا هالمســـج ..
.
.
خالد أنا أدري انك تحبني بس تتغلى ..
انا عندي استعداد أظهر وياك واسافر معاك ..
لو تباني اكون زوجتك بالسر عادي عندي ..
تدري ليش ؟؟ لاني احبك والكل يحسدنـي ..
(روضة)
.
.
هز راسـه بحيرة ..
هاي شو الحل وياها ؟؟!!
خالد يزاقر : منوة تعالي ..
منوة يت صوبـه ويلست بعيد ..
خالد : منوة انتي لا تتصورين اني ممكن اتزوج ولا أحب اروضة .. روضة هاي فـ حياتي ولا شي .. ولا شي .. ومن بعد هالمسج كرهتها صدق ..
منوة بحزن : خالد انا ما اطلب منك تثبت لي شي .. انته حر في علاقاتك ..
خالد بغيظ : لا مب حر .. يا منوة لو انا كنت اجذب عليج جان ما جفتيني سويت كل ها .. انا احبج يا منوة ..
منوة تصيح : خالد الله يخليك لا تعذبني .. انا هندية .. تعرف شو معناة هالشي ؟
خالد بتحدي : هيه اعرف .. اعرف عدل بعد ..
منوة صاحت بقوة : يعني ع الهامـش .. ع الحضيض .. (تنزل راسها بانهيار) انا ولا شي .. ولا شي !!..
خالد بحزن : منوة تفاءلي بالخبر ..
منوة : كيف اتفاءل وانا حتى ما عندي أي دليل يثبت ان هلي موجودين ؟
خالد : وانتي ليش دوم متشائمة ؟ ليش ؟؟
منوة بانهيار : لاني عادي اكون بنت شوارع .. لقيـطة .. أي شي فهالدنيا ..
ويلسـت منوة تشهق من كثر الصياح ..
خالد بهدوء : مـنوة انتي اسمعيني ..
قطـع عليه رنة التلفون .. برقم غريب ..
خالد : الو ..
...... : مرحبا خالد ؟ وياك بو فايز ..
خالد بصدمة : بو فايز ؟؟ ( منوة رفعت راسها ) ..
بو فايز : عندي لك خبر يسوى ملايين ..
خالد : بهالسرعة ؟؟ شوو ؟
بو فايز : تخيل يعقوب ياني بارحة .. وعطاني مستندات تخص منوة عسب احرقها .. عن حياتها واسم عايلتها ..
خالد بصــدمة : معقــولة ؟؟
بو فايز : كيفك مب مصدق لا اتي .. انا ناوي اعقهم ..
خالد : لالالالا .. الحين ياينك .. اصبر علي ..
/
\
/
\
يتبع ،،

[القيصـــــر]

الجزء الثاني عشر // الفصل الأول

بو فايز : تخيل يعقوب ياني بارحة .. وعطاني مستندات تخص منوة عسب احرقها .. عن حياتها واسم عايلتها ..
خالد بصــدمة : معقــولة ؟؟
بو فايز : كيفك مب مصدق لا اتي .. انا ناوي اعقهم ..
خالد : لالالالا .. الحين ياينك .. اصبر علي ..
بو فايز : بسرعة لاني مستعيل وعادي احرقهم فـ أي وقت ..
خالد : اوكي اوكي ..
بو فايز : وشرات ما قلتلك .. من سبـق لبـق !
خالد باستغراب : من سبـق لبق ؟ شو السالفة ( سكر الخط ف ويهه ) الو .. الووو .. طاعوا .. (يطالع منوة) سكــروا ..
منوة بقلق و صياحها خف : جيه شو السالفة ؟
خالد وهو يحاول يستوعب الموضوع : الا قولي سوالف مب سالفة وحدة !
منوة : خـــالد !! بليز لا تخوفني ؟
خالد يطالع منوة بتمعن : تدرين ان بو فايز اتصل بي وخبرني ان عنده اوراق تخصج وتخص ماضيج ؟
منوة بصدمة : شو تقصـد ؟!
خالد : اقصـد ان بنسبة 90% تحصلين هلج بعد كل هالسنين ..
منوة وهي مصدومة اكثر : وتتوقع بيرضون فيه من بعد هالسنين كلها ؟
خالد بألم : منوة انتي بنتهم .. معقولة ما بيرضون ؟!
منوة وردت الدموع فـ عينها : بس انا ما اباهم ..
خالد تفاجأ : شووه ؟ يعني شو ما تبينهم ؟
منوة وصوتها بدى يعلى : يعني ما أبااااهم .. ما أبا اعرف منو هم .. تفهم ؟!!
خالد غيظ : ما ظني ان هذا تصرف وحدة عاقلة . انزين ؟؟
منوة تصيح بقوة : عيل تباني اسير لهم واقول لهم انتوا هلي تعالوا خذوني ؟!
خالد غيظ زيادة : لا خلج عيل عالة ع المجتمع .. ولا ردي خدامة احسن فـ بيوت الاوادم ..
منوة انهارت : شو قصدك يعني ؟؟ تعايرني مثلاً ؟؟ ( بقهر ) ما لومك يا ولد الحسب والنسب ..
خالد ما عرف بشـو يرد عليـها ..
حسها مغيظة من الخـاطر..
دشـت الحجرة وشوي الا وهي ظاهرة بعباتها وشيلتها وشالة شنطتها ..
طالعته باحتقار : خلاص ما عاد لي مكان بين ناس يعايروني ..
ما انتظرته يقول لهـا شي ..
لان ما عاد له أهميــة ..
خالد شكلـه راح ينتهي شـرات سيف ..
مثـل ما دخـل قلبها بسرعـة ..
ظهر بســرعة !!
.
.
من بـعد ما ظهـرت من الفندق ..
ما عرفت وين تسير ..
بس كان هدفها الوحيد انها تلقى مكان يضمـها ويداوي جراحها ..
ركبـت التـاكسي .. وخـالد كان وراه ..
وصلها راعي التاكسي لمكان شبه مهجور ..
في عمارة سكنية متهالكة بعض الشيء ..
كانت هالعمارة عبارة عن شقق سكنية مفروشة رخيصـة للإيجار ..
فانوس ( الناطور) : خلاص يا بنتي مش مشكلة .. اديني 500 درهم في الشهر ..
منوة تنهدت : دخيلك راعني .. انا على قد حالي ..
فانوس : الاه ؟ دانتي عاوزة شقة كاملة وبتتشرطي كمـان ؟
منوة بألم : خلاص مابا شقة كاملة .. عطني ولو غرفة بس ..
فانوس : مش مشكلة .. حديكي غرفة وحدة بـ 150 في الشهر .. بس دي الغرفة صغيرة اوي .. وكمان هيه موجودة بجنب عيلة كبيرة ..
منوة بخوف : لالالا .. شو تباني اعيش بين ناس ما اعرفهم يعني ؟
فانوس : يا بنتي مللتيني .. طب ازا مش عايزة اتوكلي على الله ..
منوة بضعف حيلـة : خلاص امري للـه ..
.
.
خـالد تم يلـوم نفسه طول الدرب وهو يلحق التاكسي ع الكلام اللي قاله ..
هو دوم يوم يغيظ ما يحاسب ع رمسته ..
بس منوة صدق كانت ترفع الضغط والسكر ..
بعد ما اندل مكانها .. مشى بهدوء من غير ما تحس به ..
وما كان هامنه يعرف هي فـ أي غرفة ساكنة ..
كثر ما كان هامنه يكتشف .. منو هم هـل منوة !!
.
.
فـ بيـت بو فايز .
بو فايز باستغراب : انا اتصلت بك ؟ متى ؟
خالد بتوتر : بو فايز دخيلك لا تحرق اعصابي ..
بو فايز : ياخي بشو تباني احلف لك ان ما عندي رقمك ؟؟
خالد يفكر : هيه صح .. انا يوم قلت لك عطني رقمك ما طعت .. ولا انا عطيتك رقمي ..
بو فايز : جفت ؟؟
خالد بحيرة : عيل منو ؟
بو فايز : وانا شدراني ؟؟
شوي .. الا وتلفون خالد يرن ..
خالد لاحظ رقم غريب ثاني : الـو ..
الريال : هههههههه شرات ما توقعت .. وصلــت يعني لبيـت بوفايز ها ؟
خالد بصدمة : منو انته ؟
الريال : عمك وتاج راسك ههههه .. خبرني .. بعدك مصر تعرف منو منوة ؟
خالد بقهر : وانته اشحقه تتلاعب باعصابي ؟
الريال : الا قول انته اشحقه راز ويهك فـ سالفة منووه الخايسة ؟
خالد غيظ : الخايس هو انته يا عديم الأخلاق ..
الريال : والله حالة .. يهالو ولسانهم اطول عنهم ..
خالد : لو انته ريال جان واجهتني .. يا الجبان ..
الريال : هه .. انا مب جبان .. والدليل اني يالس ارمسك وانا مجابلنك ..
صد خالد على بوفايز بصدمة ..
بس ما كـان يرمس بالتلفون !
الريـال : فج الدريشـة وبتجوفني ..
ركض خالد صوب الدريشة ..
وجاف واحد عند كابينه التلفون العمومي يأشر له وكأنه يقوله ( باي باي )
خالد غيظ : يا حقيييييير ..
الريال : هههههههههههههه
وسكر الخط فـ ويهه ..
ظهر خالد من بيت بو فايز وعلى طول ركض صوب الكابينة ..
بس شرات ما توقــع ..
محـــد !
رن تلفونه مرة ثانية ..
اتلفت خالد حوله يدور كابينه ثانية ..
خالد بغيظ : يا حقيــــــــر !
الريال : هالمرة انا في الكابينة اللي ورا بيته هههههههه ..
ورد خالد يركض لورا بيت بو فايز ..
ونفس الشـي ما حصلـه ..
وتواصلـت الاتصالات اللي يننت خـالد !
.
.
اما بالنسـبة لمـنوة ..
اللي الأقدار صبتها انها تعيش في جناح عايلة كاملة غرفهم مفتوحة على بعض ..
وهي من بينـهم .. مجرد متطفلة !
اللي فاجـأها انهم مواطنين .. بس شو اللي سكنهم هنيه ؟!!
شو اللي حدهم يودرون البيوت الزينة وايون هني ؟؟
دخلت حجرتها ونست تقفل البـاب ..
وبالغلط شيلتها طاحت وهي ترتب شنطتها ..
دخـل شاب طول وعرض فجأة بدون ما يدق الباب ..
الولـد يطالعها بتمعن : مرحبـا .. حيا الله من يانا .. وياج عبيد ..
منوة لبست شيلتها بسرعة وبخوف : شو تبا ياي هني ؟
عبيد : افا عليج ترانا جيران الحين ..
منوة : هذا ما يعني انك تدخل الحجرة بليا احم ولا دستور ..
عبيد : ههههههه .. سوري ..
منوة بغيظ : وقـح ..
عبيد : ههههه مقبولة منج يا وقحـة ..
منوة غيظت زيادة : وقحة يوم فكرت أكلمك يا غبي .. اذلف عن ويهي لا بارك الله فيك ..
عبيد رفع حاجب واحد : على فكرة تراني شرطي .. كلامج هذا يوديج فـ ستين داااهية ..
منوة تنهدت وحاولت تاخذه باللين : انزين شو تبا ؟
عبيـد : ممم ندردش بس .. انا شرطي وانتي شو ؟؟
منوة عقدت حواجبها : انا ما اشتغل !
عبيد : وعندج جنسية ..
منوة ارتبكت : اكيد .. ليش هالسؤال ؟
عبيد : لاني انا بس حامل الجواز .. واتريى الجنسية .. عيل دام عندج جنسية شو يابج هنيه ؟
منوة ارتبكت بوضوح : نـعم ؟!

/
\
/
\
يتبع ،،

[القيصـــــر]

الجزء الثالث عشر // الفصل الأول

توه يا خـالد بيـرد على امـه .. الا وموبايله يرن ..
طالع الرقم واللي كان غريب ورد بسرعة : الووو ..
الريال : وينك يا دلوعة ماما ؟ تعال خذ مرضعتك ههههههههههه ..
خالد غيظ : يا حقيييييييير .. يا جليل الحيااا .. يا ... يا ... يا ....
ظهـر خـالدعنهم وهو يشتم ويتوعـد ع التلفون ..
وســط صـراخ امـه ..
وصــدمة اخـتـه !!
ام خـــالد تزاعج : خالد .. خاااالد .. ( تطالع عذبة) جفتي ؟؟ يوم اقولكم ان ولدي فيه شي محد يصدقني ..
عذبة وهي تصيح : عين وما صلت على النبي .. عين وما صلت على النبي ..
.
.
بالنسبة لخـالد ..
اللي ركب سيارتـه وتم يلف فهالشوارع من غيظه بلا اي هدف ..
الغضب كان مجتاح اكبر العواطف والمشاعر اللي فيـه ..
كفايـة الضرابة اللي قضاها طول هالليل ورا شخص متخفي بلبس غريب ورا كيبلات التلفونات العمومية ..
تنـهد خالد بقهـر .. ووقف سيارتـه ع ينب الشارع ..
سنـد براسه لورى .. وسرح فـ دوامة أفكـاره ..
خالد يفكـر : ليش كل هالتهديدات الغريبة من قبل هالشخص ؟ منو يكون هو ؟ وشو يبا مني بالضبط ؟ وشو عرفه بمنوة ؟ وأنـــا .. آه انا .. شو محلي من الاعراب فـ كل هالمشكلة ؟؟ .. هل انا ملزم أجامل منوة علـى حساب غياظي ؟ و هلي .. آه يا هي .. الشك اللي ذابحنهم من صوبي .. وشغلي اللي ما قمت اجابله شرات اول .. وعرس اختي اللي باجي له كم يوم ؟ والمجهول الزفت هذا ؟؟ وبعدين يعني ؟؟؟
خطرت على بــاله فكـرة .. يمكن تكون مينونة شـوي ..
تنهد وشغـل سيارته باتجاه أقرب مركز للشرطة .
.
.
من صـوب منوة
عبيد بصدمة : ما تبيني ؟
منوة بخوف : لو سمحت انا ما عرفك ولا اعرف عنك شي .. ابــعد ..
عبيد : ليش انزين ؟ ع الاقل قوليلي سبب مقنع ..
منوة وقلبها يدق بالقو : زين خلاص .. خلني اعرفك عدل عقب بقرر ..
عبيد بأمل : أكيــد ؟
منوة والرعب مالي قلبها : اكيـد ..
عبيد : الحمدلله .. ريحتيني ..
منوة : انزين ( بتردد) ممكن تروح الحين ؟ ابغي ارقد ..
عبيد عقد حواجبه : ما في وحدة فهالدنيا تقول حق خطيبها روح !
منوة والرعب رد دب فـ اوصالها : لا بس اليوم .. انا تعبانة .. يلا اعتبره آخر يوم ..
عبيد : آخر يوم حق شو ؟
منوة : ها .. لا اقصد .. آخر يوم اقولك فيه روح ..
عبيد : زين عيل ( يتقرب منها )
منوة تبعد عنه : باجر باجر .. انا اليوم تعبانة ..
عبيد تنهد : آه .. باجر باجر .. اوكي يلا حبيبتي .. باي ..
وبالغـصب طاع يظهر ..
قفلت منوة الباب على عمرها ..
وتمت تتنافض من الزياغ ..
لا إرداياً زخت منوة الموبايل واتصلت بخالد وهي تعض اصابع الندم انها حاولت مجرد المحاولة انها تبعد عنه..
اول مرة اتصـلت مارد عليها وعطاها مغلق ..
ردت اتصلت مرة ثانية عطاها مشغـول ..
تمــت تصــيح بقـوة والرعب مالي كل شي فيها ..
ردت اتصلت مرة ثالثة ..
خالد كان توه ظاهر من مركز الشرطة ..
وتفاجأ باتصال منوة ..
خالد بلهفة : الـــو ..
منوة وهي تصيح بقوة : الحقني يا خالد ..
خالد قلبه قبضه : بلاج يا منوة ؟
منوة برعب: يبا يتزوجني .. يبا يتزوجنيييي ..
خالد ثار : منو هالحيوان اللي يبا يتزوجج ؟
منوة : دخيلك تعال شلني .. دخييييلك ..!!
خالد بغيظ : وينج انتي ؟
منوة تصيح : ماااااااعرف ..
خالد تذكر : الحين الحين ياي ..
حاول خالد يتذكر اكثر المكان .. وزين ان ذاكرته ما خانته ووصل لنفس المكان ..
خالد اتصل بمنوة ..
منوة وهي تشهق : الــو ..
خالد : يلا اظهري انا برع البناية ..
منوة بفرحة : انزين ..
شـلت منوة بعمرها وظهرت برع الحجرة ..
أما خالد اللي الغيـظ ملى قلبه ..
والقهر استحوذ على اي شعور فيه ..
كان الأفكار تحاصره انه ينهي هالمشكلة ..
ومشكلة الاتصالات ..
وفعـلاً قدر يقنع الشرطة انهم يراقبون كيبل التلفون العمومي
واللي تحدد من خلال الأرقام اللي عطاهم اياها خالد انهم كلهم من نفس المنطقة ..
يعني المتصل اكيـد ساكن هني ..
بس اكيد هالشغلة يبالها وقت ..
لين ما يحددون مكان الكيبل اللي المتهم ينوجد فيه عسب يراقبونه ..
ويقبضون على صاحب التهديد ..
ولازال خالد يتريى منوة ..
حسها طولت وايد .. جان يرد يتصل ..
ريال رد : الوو ؟ منووو ؟
خالد تخبل : وين منوة ؟ وين وديتها ؟
الريال : عيل انته اللي متفق وياها ها ؟ ما بتظهر لك لا تحاتي ..
خالد غيظ : يا حقييييييييييييييييييير ..
ظهر من السيارة ودخل العمارة والشرار بيظهر من عيونه ..
انصـدم بمنوة اللي لاصقة في اليدار تترجى عبيد يبعد عنها ..
خالد ركض صوبه وعطاه كف قوي ..
عبيد زخ مكان الصفعة : انته حبيبها يالنذل ؟
خالد زخه من جتفه بقوة : النذل هو انته ياللي ما تراعي حرمة غيرك ..!
عبيد : ههههههه ضحكتني الصراحة .. شل ايدك عني يالـ *****
خالد يقوي قبضته : يوم انك مب متربي عدل انا لازم اربيك ..
عبيد بحقد : شو تبا منها ؟ هاي لي أنا ..
منوة تصارخ برعب : خالد ابعده عني .. الله يخليك ..
عبيد يطالع منوة بقهر : اعترفي منو ها ؟؟
خالد دزه ع اليدار بقوة لين ما طاح : انته ما تستحي ؟ عيب عليك ..
عبيد بخبث : اقص ايديه اذا اللي بينكم حلال ..
منوة انهارت ويلست تصيح بقوة ..
خالد رد رفعة من الارض وعطاه بكس : صدق انك ما تخيل .. واللي تسويه انته يعني حلال ؟
عبيد : النص بالنص .. شو رايك ؟
خالد فقد أعصابه : منوة .. سيري ركبي السيارة ..
عبيد يحاول يسد دربها : ما تروح لو على جثتي ..
خالد : غصبن عنك بتروح فاهم ؟
عبيد عطى بكس لخالد : ابعـد ..
خالد طاع ع الارض من قوة الضربة ..
وهني منوة تيننت ويلست تصارخ وهي منهارة وطايحة ع الارض ..
عبيد ركض صوبها عسب يهديها ..
هني خالد نش على طول .. وبأقرب حديدة ضربها ع راس عبيد ..
اللي طاح من الألم مب قادر يتحرك ..
ساعتها على طول زخ خالد يد منوة ومشاها لين السيارة ..
وهي منهــــارة من الخاطر ..
خالد بحنان : منوة حبيبتي خلاص ما استوى شي ..
ما كانت منوة قادرة ترد عليه ..
شوي الا ويجوفها خالد تغمض عينها باستسلام ..
خالد تخبل .. وشغل السيارة وسار بها لأقرب مستشفى ..
.
.
مع مرور الوقت ..
الدكتورة : انته بتقربلها حاجة ؟
خالد توتر : ها .. هي ..انا .. خطيبها ..
الدكتورة : شكلها متعرضة لصدمة جامدة اوي .. وانت السبب ..
خالد : انا ؟؟
الدكتورة : كلكو كده .. ههههه .. هيه مجرد اغماءة بسيطة ما تخافش ..
خالد طالعها بشك ..
الدكتورة : يوووه ما تخافش ..
خالد : يعني بترقد هنيه ؟
الدكتورة : ايوه .. طمن اهلها عليها .. وان شا الله حتبقى زي الفل ..
تنهـد خالد بقـهر ..
ومشـى بسيارته عسب يرد البيت ..
ما كان حاس بمرور الوقت ..
وان الوقت الحين متأخر ..
وامه مينة من الصياح عليه ..
ام خالد تطالع ويهه بخوف : انته سرت تحارب ولا شو سالفتك ؟
خالد تنهد : لا تحاتين يا اميه .. هذا واحد كان يهددني ع الموبايل .. وبلغت عليه الشرطة ..
ام خالد تصيح : وهالضربات اللي ع ويهك .. ويدييييه بعد كمن يوم عرس اختك .. كيف بتجابل الاوادم وانته جيه ؟؟
خالد : ما عليه يا اميه ..
ام خالد تصيح بقوة : مب انته خالد ولدي اللي اعرفه .. مب انته ..
خالد يحاول يهديها وسار حب راسها : خلاص يا امي لا تحاتين .. المشكلة انتهت ؟
ام خالد بتفاؤل : يعني خلاص ماشي ظهرات نصايف الليل ؟
خالد يبتسم لها : خلاص يا امي ..
ام خـالد تنفست براحة : الحمدلله ..
بعد كمــن يـوم ..
وفـ نفس يوم عرس عذبـة ..
امـه حطتله كمادات لان ويهه كان من الخاطر مزرق .. من آثار ضرب عبيد ..
وفعلاً خف شوي .. بس الأثر تام ..
الفــليل ..
العرس كان مليان ناس ورياييل ..
خالد كان فكره مشغول بمنوة اللي ما زارها هالكم اليوم لانه التهى بالعرس ..
حميد : اتخبرك منو المعرس فينا انا ولا انته ؟
خالد ابتسم له بغصة : انته اكيد .. تستاهل يا المعرس ..
حميد : اح اح هههههه .. تعال اتخبرك ..
( رن تلفون خالد )
خالد طالع الرقم : اخبرك حميد لحظة ( شل التلفون ) الو ..
الريـال : السلام عليكم اخويه خالد .. وياك النقيب حمد ..
خالد : وعليكم السلام والرحمة
الريال : ابشرك ترانا قبضنا ع الريـال اللي كان يهددك ..
خالد بصدمـة : معقـولة بهالسرعة ؟
الريال : لا الريال ظهر مغفل شوي وبسرعة قدرنا نقص عليه ..
خالد : انزين انزين الحيـن ياينكم ..
( سكر التلفون )
حميد باستغراب : وين ساير ؟
خالـد : شغلة ضرورية ظهرت لي فجأة .. اسمح لي يالنسيب ..
ومشـى خالد بسرعة صوب سيارته ..
وحميد تم يزقره .. وهو ولا يرد عليه ..
/
\
/
\
يتبع ،،

[القيصـــــر]

الجزء الرابع عشر // الفصل الأول

أثنـــاء العرس استوى موقف وايد بابخ بالنسبة لخالد ..
يوم أمه أشرت له على روضة عسب يجوفها وهي كاشخة .. عل وعسى تهتز مشاعره بكشختها ويصر انه ياخذها ..
خالد وهو يطالع روضـة وف خاطره : وحليلج يا امي .. ما تدرين ان مشاعري كلها لـ منوة .. لكني ادري ان الزواج منها حالياً صعـب وايد ..
روضة تخبلت خصوصاً انها كانت بين ربيعاتها اللي قامن يدلعنها وحاسدينها ع ولد الخالة الوسيم .. والخالة الطيبة الحنونة ..
من غير سابق انذار .. أحمد غيظ فجأة . وطلب من خالد انهم يظهرون من القاعة ..
وخالد لبى طلبه جنه يباها من الله .. وسلم على حميد وعذبة وظهر ..
.
.
برع القاعة
خالد : بلاك ياخي .. شوفيك معصب ؟
أحمد متنرفز : جايف الوضع داخل وايد حلو يعني ؟
خالد باستغراب :ما فهمت عليك ..
أحمد يحاول يدور له سبب : لا يعني فستان عذبة وايد مكشوف و ..
خالد بشك : الحين ها اللي مضايجنك ؟!!
أحمد : اكيد ..
خالد : ع العموم انته لازم ما تهتم أصلاً لانها بين حريم ..
أحمد بلامبالاة : انزين انزين ..
خالد : تعال رشود وينه ؟
أحمد : يوم زقرت الهرم ماطاع يظهر واتلصق باميه ..
خالد : صدق انه مغازلجي !! ..
مرت هالليلــة بسـلام وعدت على خير ..
.
.
أم خالد اللي يلست تصيح على عذبة وفراقهـا لـ شهر كامل لانها بتسـافر الليلة ..
وخالد .. اللي جفاه النوم .. ما بين تفكيره بمنوة اللي مادرى عنها هالـ كم يوم جانها نشت ولا لا .. وما بين وجود هلها ورفضـها لهـم .. !!
فعلاً شي يحير !!
اليوم الثاني ..
الكل نش بتثاقل عدا بوخالد اللي لازال متطبع بطبع رياييل اول انهم ما يحضرون اعراس بناتهم ..
واللي كان ساير البر بارحة .. وراد ع المغرب ومصلي العشا وراقد ..
من كثر التفكير رقد خالد متأخر .. ونش متأخر ..
لبس ملابسه بسرعة عسب يلحق على شغله المتراكم من فترة ..
خذ له ساعتين لين ما خلص صفقته اليديدة ..
وأجل المواعيد اللي طافته لأيام ثانية ..
وعلى طول طيران للمستشفى ..
.
.
في المستشفى ..
الدكتورة : الحمدلله كلو سليم .. امس استقرت حالتها .. بس لاحظنا عليها اليوم انو الانهيار زاد شويه .. كانت بتحكي عن اسامي وقتل وجرايم .. ماعرفش مالها !! ..امال اهلها فيين ؟؟
خالد ارتبك : اهلها مب ساكنين هني ..
الدكتورة : ربنا يساعدها ...
خالد : والحين شو حالتها ؟
الدكتورة : دلوقتي تمام التمام .. عطيناها منوم .. ولحد دحين هيه نايمة ..
خالد برعب : ليكون استوابها شي ؟؟
الدكتورة : ما تخافش .. ده اثر المنوم دايم يكون كده ..
خالد : اقدر اجوفها ؟
الدكتورة : تفضـل ..
دخل خالد غرفة منوة ..
كانت نايمة والتعب بادي عليها ..
خصلات من شعرها ظهرت من شيلتها المتهالكة ..
عطت منظر لويهها بالمرض والاهمال اللاإرادي ..
خالد يحاول يقومها : منوة .. منوة ..
كانت تحرك حواجبها وكأنها تجوف كابوس ..
خالد بصوت حزين : منوة دخيلج نشي .. دخيييلج ! ..
منوة .. لا تعليق ..
خالد بصوت اعلى يكرر اسمها : يلا يا منوة يلا نشي بلا كسل ..
فجــت عينها بكسل والتركيز صفر بالنسبة لها ..
خالد ابتسم براحة : يلا يا الكسلانة نشـي ..
منوة وهي تحج عيونها بصوت مبحوح : خالد ؟!
خالد ابتسم لها بحـب ..
تأملـته للحظات .. كان لابس كندورة كركمية ومتعصم بغترة حمرا ..
كانت حاسة انها بحلم ..
لين ما اعلنت دموعها الانهمار ونطقت : خالد وينك خوفتني عليك ؟؟
خالد : والله آسف بارحة كان عرس اختي عذبة ..
منوة ابتسمت : والله ؟ مبروووك ..
خالد بخبث : الله يبارك فيج .. عقبالج ..
منوة تنهدت بحزن : لا انا نصيبي مب الحين .. انزين شو سويت في العرس ؟؟
خالد : انتي ما عليج من بارحة وخبريني .. شخبارج الحين ؟
منوة : والله الحمدلله واايد احسن عن بارحة ..
خالد : يعني بتظهرين ؟؟
منوة بخوف : وين اروح ؟
خالد : الفندق بعد وين ؟!!
منوة : لين متى بتم في الفندق .. خلني في المستشفى ..
خالد : من بتشفين بيعطونج ورقـة الظهرة .. مردج للفندق ..
منوة بحزن : خالد انا حاسة بالذنب تجاهك ..
خالد : انا اشتكيت لج ؟
منوة باحراج : لا بس ..
خالد يقطاعها : عيل خلاص خليني على هواي ..
منوة برهبة : خالد انته ذبحت عبيد ؟
خالد بصدمة : انا ذبحته ؟؟!
منوة : تراه طاح من بعد ما ضربته ع راسه ..
خالد : هههههه لا تحاتين ..ما ذبحته .. كان ناش بس مب رايم يتحرك من العوار ..
منوة : شدراك ؟؟
خالد بنرفزة : تراني جفته فـ مركز الشرطة .. صاحي وجنه البخت ..
منوة بقلق : اشتكى عليك ؟؟
خالد : وهو يرووم ؟! اصلاً عارف اني اقدر اطيحه ف ستين داهية .. هاي قضية شرف مب مصخرة ..
منوة : الحمــدلله ..
خالد : منوتي ..
منوة تفاجأت : شووه ؟؟؟
خالد : هههههههه .. شو رايج بمفاجأة ؟؟
منوة : مفاجأة شووه ؟
خالد : شو رايج تترييني اروح واييبها لج ؟؟
منوة : يعني بتطول ؟؟
خالد : والله حسب .. بس بحاول ما اطول ..
منوة : اوكي الله وياك .. وانا اترياك لا تتأخر ..
.
.
ظهـر خــالد ..
ووجهته لبيــت فارس ومنال ..
بالأحرى بيــت منوة ..
وشو من المصــير بيواجهه ؟؟

/
\
/
\
يتبع ،،

[القيصـــــر]

الجزء الخامس عشر// الفصل الأول

منــوة : اميه الســـالفة وااايد طويـــله ..
منال : ونحن شو ورانا .. نركب السيـــارة وفي البيـــت اسمعج لين ما تتعبين وتقولين دخيلج يا اميه انتي اللي رمسي ..
منوة : هههههههههههه ان شــــــا الله ..
مشــــوا مع بعض باتجاه السيـــارة ..
وكل وحدة تفكر فـ شي معين ..
.
.
روت منــوة لأمهـا كل معاناتها اللي مرت بهـا ..
من ام أم فايز وبوفايز ..
ومن ذل فتحيـة .. لـ سجنها ..
ومن طيش راجو ومحمد ..
ومن تجربـة حب سيف وفضيحة العرس ..
ومن عمر وشهد .. والخيانة المفضوحة ..
و أخيراً لعايلة خالد .. ومواقف خالد وياهـا ..!
وسبب طيحتها .. وعايلة عبيد الدخيلة !!!
.
.
دخلت منوة البيت وهي مذهولة من كل هالفخامة الموجودة ..
ما كانت قادرة تستوعب ان مقدار الفخامة هذا كانت عايشتنه وهي صغيرة ..
تذكرت معاناتها فـ بيت بوفايز وفتحية ..
تنهدت على مصير فتحية المؤلم ... السجن !! ..
صدت أمها عليها بعد ما لاحظتها انها تسمرت فـ مكانها : شو بلاج يا منوة ؟
منوة بأسف : تدرين يا اميه .. احس ان كـل اللي انا أعيشه وهم × وهم ..
ام منوة : ليش انزين يا منوة ؟
منوة : انا جربت كل شتى أنواع العذاب يا اميه .. كل حياتي كانت مجرد شقى وتعب .. معقولة أحصل الراحة الحين ؟!
ام منوة دمعت عينها : حسبي الله ع اللي سوى كل ها فيج .. اللـه لا يـ ..
منوة تقاطعها : لا يا اميه .. مب زينه الدعاوي .. ع الاقل آخذ حقي بليا دعاوي ع الناس .. آخذ حقي بإيدي ..
قطـع رمستهم تـواجـد فارس ..
ام منوة صدت على فارس : هذي منوة يا فارس .. شفت ؟ خالد ما ظهر يقص علينا ..
منوة تصاصر أمها : اميه هذا ريلج ؟
ام منوة : هيه يا بنتي .. هذا ولد عمي و ريلي .. سيري سلمي عليه ..
نشت منوة له بكل حب ومدت يدها له : شحالك عمي ؟
طالعها فارس بنظرة حقد .. ومد يده لها : الحمدلله بخير ..
منوة تشنجت من مسكته ليدها ..
ليش يوم سلم عليها حست بطيف الماضي يعيد نفسه ؟!
يلس فارس .. وردت منوة ويلست حذال امها ..
كانت تتطالع فارس بربكة طول هاليلسة .. وما كانت تدري ليش ! ..
ام منوة بقهر : بنتي شقت وتعبت ف حياتها يا فارس .. لازم نبلغ الوجهات المختصة انهم ياخذون حق بنتي ..
فارس اللي كان مرتبك : وكيف بيصدقونج يعني ؟
ام منوة : جواز بنتي المزور .. وفتحية المسجونة عندهم .. كل ها وما بيصدقون ؟؟
صد فارس على منوة بذهول : بو فايز عطاج الجواز ؟
منوة طالعته بصدمة : وانته شدراك بـ بوفايز ؟
فارس بخوف : هـا .. منو بوفايز ؟
منوة بغيظ : انته قلت اسمه .. وانا سمعتك ..
ام منوة : يا جماعة بلاكم شو استوى ..
فارس طالع منوة بحقد : متأكدة ان هاي بنتج ؟ ماحيد تربيتج جيه ..
منوة وقفت وطالعته بتحدي : وهي لحقت تربيني بعد ما خطفني بو فايز ؟ بعدين الزم حدودك فاهم ؟ وتعال انته اللي طريت اسمه ع لسانك .. شو دراك فيه ؟
فارس غيظ زيادة : ايه بلاج انتي يالبشكارة ؟
مـنوة طالعته بصدمة كبيرة ويلست وهي تحاول تداري دقات قلبها اللي تزايدت سرعتها ..
ام منوة طالعته بدهشة : وانته شدراك ؟
منوة وهي تتنافض : اقص ايديه اذا هذا ( تأشر على فارس ) ما كان له يد في السالفة اللي استوت بي .. حسبي الله عليـــــك ! ..
أم منوة بصدمة : اشوووه ؟؟؟ معقولة يا فارس ؟؟ تكلم ؟؟ انته اللي سويت كل ها بمنوة ؟
فارس تنفس بقوة وهو يطالع ام منوة ومنوة .. وبلا رد ..
ام منوة : انطق .. ولا مالك ويه تقول شي ؟
منوة دمعت عينها : انا شو ذنبي اني اعيش بذل كل ذيج المدة ؟
فارس كان ساكت .. لان ماله ويه يتكلم ..
ما كان متوقع ان لسانه بيزل وبينهزم من أول مواجهة مع منوة ..
وين كان إصراره انه يشكك في وجودها ؟؟ ويهدد ام منوة بالطلاق ؟؟ وييين !
تموا ساكتين لـ فترة .
الين ما نطق فارس بنفسه : هي نعم .. انا اللي خطفتج ..
منوة بلعت ريجها وطالعته بصدمة : انته ؟
فارس بتأثر : انا ما سويت هالشي عسب انتقم منج انتي .. ولا قصد مني اني أبهدلج واخليج تتعذبين فـ حياتج .. ( رفع من درجة صوته ) انا كان قصدي ارد خطيبتي لي من بعد ما ابوج صرقها مني .. وما كان في بالي غير الانتقام .. فـ خطفتج ..
منوة طالعته بقهر : حرام عليك اللي سويته .. والله حرام ..
فارس ولأول مرة يبين عليه التأثر : لو كنت أبغي أحطمج ما كانت تكفلت بكل مصاريف دراستج في المدرسة الخاصة .. انا .. انا فعلاً غلطت .. بس هذا ما يمنع اني اكون نادم على غلطتي ..
ام منوة ودموعها تنزل بحرقة : وغلطتك ما دفع ثمنها غيري أنا وبنتي ..
منوة شهقت بألم : وابويه يالظالم .. ابوووويه ! ..
منال بقهر : اظهر من بيتي احسن لك .. ولا والله ما بتحصل شي زين مني ..
فارس بصدمة : بعد كل هالعمر تطرديني يا منال ؟؟
منال : وأي عمر عشته وياك يا الخاين ؟؟ عمري انتهى من غياب بنتي .. والحين بيبدى بعد فراقك ..
فارس بانتقام : انا بظهر يا ست الحسن والدلال .. بظهر .. بس والله بتندمـون ..
ظهر فارس من البيـت وسط صياح منوة وأمها ..
.
.
بدت منـال ( ام منوة ) تصلح كل اللي كان مفروض انه يتصلح ..
ودت بكل الأدلـة الكافية لقسم الشرطة .. مع حرصها على الخصوصية وكتمان السر ..
وهم ما قصروا ودلوها على الأماكن اللي ممكن تساندها فـ هالأزمة ..
وأكيد تم القبض على فارس .. والحكم كان السجن 15 سنة مع الأشغال الشاقة ..
أما منوة .. فتمت اجراءات رد الجواز والجنسية الإماراتية الها بعد شهور من هالسالفة ..
بحيث استوت منوة رسمياً .. مواطنة بجواز إماراتي ..
تم تبديل كل شهاداتها الدراسية من إسم صوفي لإسم منوة ..
.
.
وعـادت كل اشراقات الورد لـ مكانها ..
وعادت منوة لطبيعتها اللي نحن نجهلها ..
قررت منوة تدرس فـ معهد يقويها في الانجليزي لين بداية الكورس الدراسي .. عسب تدخل الجامعة بعد غياب سنتين ..
" حقاً تهللت أسايري بعد أن حُلّت طلاسم العقد البحتة .. إلا أن لغزاً واحداً لم أستطع حله حتى هذه اللحظة ! "
لغز منوة كـان خـالد نفسـه ..
بعد ما استشعرت الحب ... تنـاساها .. او حاول يتركها بصمت ..
وجود خالد هل لا زال له أي معنى ؟
/
\
/
\
يتبع ،،

[القيصـــــر]

الجزء السادس عشر // الفصل الأول

أسما باستغراب : شبلاج منوة ؟ احمد فيه شي ؟
منوة تضايجت من الخـــاطر : اسما هب جنه المفروض ما نرمس عن سوالف شرات هاي ؟
اسما : والله سوري منوة بس من وناستي قلت بخبرج ..
منوة بحزن : لا عادي فديتج ..
اسما انحرجت منها : منوة غناتي برايج انا بخليج الحينه .. بتصلبج باجر اوكيه ؟
منوة : اوكيـه مب مشكلة .. مع السلامة ..
.
.
سكرت عن أسما ولا إرادياً نزلت دموعها بقهـر ..
عيل ليش عذبة بغتني لـ خالد ؟
أنا مب فاهمة شي يا ناااس !
.
.
ما استوت دقايق الا وعذبة متصلتبها ..
تنهدت منوة بضيـج ومسحت دموعها ..
منوة بحزن : الـو ..
عذبة : هلا والله بالغالية .. شو وعيتج من الرقاد ؟
منوة : لا فديتج .. توني كنت ياية برقد بس ..
عذبة : انزيييين يا مرت اخويه ..
منوة تضايجت : مرت اخو مرة وحدة ؟
عذبة : هيه حبيبتي .. انتي مب شويه ..
منوة بدون نفس : مشكورة وما قصرتي .. بس بعد مرت اخوج شويه قويه ..
عذبة : لا والله ؟ تدرين ان خالد تخبـــل علييييييج ؟؟ لا بعد تم يقول اباها عذبو .. ههههههههه يا بوج يننتي الريال .. بس تصدقين غريبة انه ما سأل عن اسمج !! .
منوة ارتبكت وحبت تغير الموضوع : مـاشا الله انتي تبيني لخالد واسما تباني لـ احمد ..!!
عذبة تنرفزت : لا تقوليلي انها اتصلتبج وخبرتج عن سالفة اميه ؟
منوة بضيج : هيـه من شويه كانت ترمسني ..
عذبة بغيظ : هاي اسوم يبالها كف .. اصلاً نحن ما نتشرف ناخذ رويض السووووسة ! ..
منوة بفضول : أتخبرج عذبوو .. انتي شحقه مب طايجتنها ؟
عذبة صخت شويه عقب رمست بغيظ : لانها السوسة وراس الفتنه فهالعايلة ! ..
منوة باستغراب : ما فهمت ..
عذبة بقهر : روضة سوووسة وما ترتاح الا يوم تدمر الواحد .. اسإليني عنها والله اني فاهمتنها ..
منوة بصدمة : معقوولة ؟!
عذبة : والله صـدق .. روضة اذا خذت خالد بتحطمه .. وانا ما ارضـى لاخويه انه يتحطم واسكت لها ..
منوة : بس يا عذبة انا من شفتها ما حسيت انها جيه ..
عذبة : لانها حية وسوسة من تحت لين تحت .. مدام هيه ما فيه خير لأخوها تهقين يكون فيها خير لـ خالد ؟
منوة : والله ما فهمت ..
عذبة بصوت كله ألم : روضة كانت السبب في انه اخوها سيف يودرني .. انا كنت محيرة له من صغرنا وكل الناس تعرف بهالشي .. ومرة من المرات انا تضاربت ويا رويض .. اتخيلي عسب تنتقم مني سارت قالت عني اني هب زينة واني ألعب على سيف ومن هالخرابيط .. ومن هاييج الحزة سيف كرهني ولا عاد ايي بيتنا الا نااادر .. واتخيلي القهر انها يتني تقول انها هي بنفسها كرهت سيف فيـه لاني ما أستاهله!
منوة بصدمة : معقـولة ؟!
عذبة بحزن : انتي ما تدرين كيف كانت حالتي صعبة عقب ما قالتلي .. بس الله فوق وانقذني ويا حميد وخطبني .. والحمدلله ظهر حميد ريال والنعم فيه .. ولا حتى سيف يوصل له بأخلاقه و طبايعه ..
منوة : انزين ما تتوقعين ان ممكن الله هداها الحين ؟
عذبة بغيظ : يمكن .. بس بعد ما بغيها لأخويـه ! ..
منوة : انزين وامج ؟ تراها تباها ..
عذبة تنهدت : اميه روحها سالفة .. تبا ترضي خواتها عسب يلتمون حولها على حساب مشاعر عيالها ..
منوة : والله حرام ! ..
عذبة : ما عليج انتي من هالسالفة .. ويلا خلج مستعدة .. بني نخطب فـ أي وقت .. المعرس مستعيل ويا ويهه ^^ ..
منوة بضيج : دخيلج عذبة .. هالسوالف انا ما حب ارمس عنها ..
عذبة : عاشت عااشت اللي تستحي .. ههههههههه عروس عروس ..
منوة بحزن : يلا عاد عذبووو ! ..
عذبة : انزيييين خلاص هههههههه .. يلا سيري ريحي الحييين وارقدي .. نوم العوافي يا رب ..
منوة : اللـه يعافيج ..
.
.
اليـوم الثـاني ..
و الكل يالس ع الغـدا فـ بيت بو خالد ..
عذبة وهي متعمدة ترمس جدام أبوهـا : ابويه حصلنا عروس حق خالد ..
ام خالد وقفت الأكل وتمت تطال عذبة بغيظ ..
بوخالد : ماشـا االله .. بنت منو ؟
عذبة : بنت المهندس محمد الله يرحمه .. اللي ساكنين فـ فريجنا ..
خالد : ماشـا الله ونعم الأخلاق .. والله انك عرفت تنقي يا خالد .. بالمبارك عليك ..
خالد شق الحلج : الله يبارج فـ حياتك يالغالي ..
ام خالد بغيظ : واشحقه مستانس ها ؟ هب جنه يا مدام عذبة انا قلت بنت محمد لاحمد ؟
احمد : بسـم الله ! .. شبلاج اميه خالد يباها .. حلال عليه ..
خالد يطالع احمد بفخر : تعجبني الصـراحة ..
ام خالد غيظت زيادة : خالد ما بياخذ الا رووووضة .. فاهمين ؟؟
خالد بعصبية : لو تنطبق السما ع الأرض مب ماخذنها .. يا تزوجيني بنت محمد .. يا اني ما اعرس ..
ام خالد : لا والله ؟ وروضـة ؟
عذبة باندفاع : الله يرزقها الريل الصالح .. بس هب خـالد ..
أحمد نش من على الكرسي وطالعهم بغيظ : اميه انا ابا روضـة .. والحين تسيرين تخطبينها لي .. وان ما خطبتيها انسي ان عندج ولد اسمه أحمـد ..
ودز الكرسي بالقـو من غيظه .. وظهر من عندهم لـ حجرته ..
عذبة بدهشـة : ها بلاه ؟؟ ما صدقنا نفج لزقة رويض من خالد .. الحين هو يباها ؟؟!! ..

/
\
/
\
يتبع ،،

[عطر الاحساس]

يعطيك آلعآإفيةة
ننتظر آلمزيد من ج’ـمآل آطروح’ـآتك
دمت بهذآ التآلق والتميز♪

[القيصـــــر]

الجزء السابع عشر // الفصل الثاني


خالد بصدمة : شو يعني ما تطبينه ؟؟ اميييييه تبيني أستخف ؟
عذبة بقلق : شحقه انزين ؟؟
ام خالد ضحكت بكوميدية : صادوه .. ( هب هينة العيوز ) ههههههه ..
خالد بإجرام : وانا قلبي وقف اتحسبج ترمسين جد يا امايه .. الله يهديج بس ..
عذبة : ههههههههههههه والله حركات اميه .. انزين متى نسير الهـم ؟
ام خالد : والله مادري .. بس صبروا شويه .. خله احمد ياخذ ع روضـة بالاول ..
وشوي ويطب عليـهم أحمد ..
كان كاشخ ومتوجه لـ باب الصالة وهو يرمس ع الموبايل
ام خالد : طالع اميه ؟
احمد : لحظة حياتي ( ينزل السماعة ) ها اميه بغيتي شي ؟
ام خالد : اقولك بتظهر ؟
احمد : هيه اميه تبين شي ؟
ام خالد : لا سلامتك .. تحمل ع الدرب ..
احمد : ان شا الله (رد ركب السماعة) حبيبتي الماركة اللي تبينها من غوتشي ولا ديور ؟؟ انزين بكم ؟؟ اوف اوف وااايد .. انزين خلاص ولا يهمج .. ولا يهمج انتي .. بشتريها وبيي عندج ..
وكمل رمسته وهو ظاهر من البيت ..
خالد كان متصنم بغباء وهو يحاول يستوعب شو السالفة ..
عذبة بغيظ : حشى بارحة مالجين .. مسرع بدت الطلبات !!
خالد بقهر : اميه خلاص تعودوا على بعض .. يلا نخطب ..
عذبة : مسرعهم والله ..
ام خالد : ويييه بلاكم انتوا .. قولوا ماشا الله .. الله يهنيهم يا رب ..
عذبة : وعقبال ما اييج احمد يبا فلوس حق هداياها .. اونها عاد استوت راعية ماركات ..
خالد : ايه بلاج .. هاي مرت اخوج ..
عذبة : اتخسي الا هي .. اصبر جان مـا .. ( خالد طالعها بنظرة عسب تسكت ) جان ما حبيتها !! ..
خالد : هههههههه .. يلا اميه وعذبو . شدوا الهمة .. دوركم الحينه اخطبوها ..
عذبة : امييييه بنتصل بيتهم انزين ؟؟ وبنقول لهم ان نحن يايينهم الحين ..
ام خالد : طاعوا هاي .. هب جنه لازم يكون عليهم ولي ولا شي ؟؟
خالد : لا والله ؟؟ الا يعني تدورون لي العلة ؟
ام خالد : لا من صدقي انا يا خالد .. الحين يوم ابوك بيسير يرمس بيرمّس منو ؟
خالد يفكـر : ما عرف ..
عذبة : عاد مب لهالدرجة هم يتامى .. منوة رمستني عن خال امهـا ..
خالد : هيه صح .. حمدان خال امهـا ايي لهم بين فترة وفترة ..
عذبة : وانته شدراك هـا ؟؟
خالد زاغ : سألت بعد شووو ؟؟
ام خالد : ما خلى شي فيها الا وسال عنهـا .. حشى !! ..
عذبة : هاي منوة بنت محمد ..
خالد لا إرادياً : فديتها والله ..
ام خالد : انطب يا مضيع المذهب .. قليل ادب !
عفس خالد ويهه .. وعذبة تمت تضحك عليه ..
.
.
مر اسبـوع كـامل .. وخالد يومياً يحن عليهم ..
عذبة من صوبها بردت وما تمت تآزر خالد ..
.
.
بعد فترة من الوقـت ..
خالد بغيظ : وانا شحقه ما خطبتي لي لين الحين ؟
ام خالد : اتخبرك انته .. هب جنك حاشرنا .. استهدي بالله واتريى ..
خالد : لا واللـه ؟؟ احمد على طوول من بغى ركضتوا وخطبتوله .. وانا ولد البطة السودة يعني مالي رب ؟؟ محد عاطني ويه ؟؟
ام خالد : لا حوووول .. اصبر لين عرس احمد .. والله كـريم ..
خالد غيظ : بـعد اصبر ؟؟ بـــعد ؟؟ اميـه عرسـه بعييييييد ..
ام خـالد : لانه نحنه مرتبشين بعرسه وما فينا ع الحشرة ..
خالد بقهر : انا حشرة هـا ؟؟
ام خالد : يا ربي عليك يا خالد .. اذيتني تراك ..
خالد : خلاص انزين زوجيني وبهدج فـ حالج ..
ام خالد : تراني قلتلك خذ روضة وما طعت .. دواك تم عزوبي الحين ..
خالد : طاعوا (غيظ من الخاطر) الحين انتي تبين تفهميني ان العرس ما تكون فيه فرحة الا اذا كانت العروس روضة ؟؟
ام خالد : لعوزتني تراك انته .. اذلف عن ويهي ..
خالد يصارخ بقوة : جيه انا مب ولدج ؟؟
ام خالد زاغت منه : هيه ولدي بس أحمـد ..
خالد قطع رمسة امه يوم فر الفـازا اللي حذاه بقوة وبغيييظ كبير : تبيني اعيد مسلسل احمد يعني ها ؟؟ ما عليه يا اميه .. لا تلوموني ان سويت شي ما يرضيكم بعد هاليوم ..
وظهر خالد بـكندورة البيت .. وعلى طول ركب سيارته ..
وما حلى الغيظ عنده الا يوم شخط بويل قوي على الانترلوك اللي فـ الحوش !! ..
ام خـالد من صدمتها باللي استوى : عذبة .. عذبة لحقي علي .. عذبووووه ..
يت عذبة وهي تراااكض .. وانصدمت بالزجاج المكسر : ويه ويه وييييه .. شو استوى ؟؟
أم خالد بخوف : قلت لـ خالد بنسير نخطب لك عقب عرس احمد .. غيظ من الخاطر وكسر الفازا وظهر ..
عذبة : حرام عليج يا اميه .. شحقه قلتيله جيه ؟
ام خالد : اووه وانا شدراني انه بيغيظ جيه ؟؟
عذبة : اميه مب ملاحظة ان معاملتج له تغيرت وايد بعد ملجة احمد ؟؟
ام خالد بتأنيب ضمير : بدال ما تلوميني سيري دوري عليييه .. اخاف يسوي شي بعمره ..
عذبة : يا ويلي عليك يا خالد .. دوم الا مغربلينك وما نشكر لك مـول !!..
حاولت عذبة تتصل به كم مرة .. بس ما كان يرد ..
و أثناء اتصالاتها . اتصلت بهـا منوة ..
.
.
عذبة : هلا منوة ..
منوة : هلا والله .. وييينج يالقاطعة .. حشى مول ما فيج خير تعالي واسإلي .. فجأة تختفين ؟؟
عذبة ظهرت من الصالة عسب تاخذ راحتها بعيد عن امها : اتغلى خخخ .. تدرين بعد عرس احمد ربشنا شويه ..
منوة : الله يهنيه يا رب ..
عذبة : ويهنيج وياه بعد ..
منوة استانست ع هالطاري : يلا عاد عن الحركات .. فهمتج تراني ..
عذبة : اونج عاد ..
منوة : فديتني والله خخخخ ..
عذبة : هيه والله .. مخبلة نااااس ..
منوة بحيا : عن الحركات عذبو ..
عذبة : ومن زود خبالهم كسروا الفازا وظهروا مغيظين من البيت .. هههههه ..
منوة بصدمة : حلفي انتي ؟؟
عذبة : والله ..
منوة بخوف : ليش انزين ؟؟
عذبة : اميه قالتله اصبر بنخطب لك عقب عرس احمد جان يغيظ ..
منوة قلبها يدق : وما اتصلتيله ؟
عذبة : عيزت من كثر ما اتصل .. ما يرد .. !! ..
منوة برعب : جربي تتصلين من كمن تلفون ..
عذبة : هي والله صدقج .. يبالي اجرب ..
منوة : انزين عيل عذوبة .. سيري اتصليبه .. وطمنينا ع المستجدات ..
عذبة : ان شـا الله ..
منوة : يلا مع السلامة
عذبة : مع السلامة ..
.
.
زخت منوة موبايلها وحاولت تتصل ..
بس بعد ما كـان يرد .. !
يا فـ بالها انها تطرش له مسج عسب يعرفها ..
( خالد انا منوة بليز رد علي )
بس حسته جاف .. فحبت تخليه بروح دعابة اكثر ..
( صوفي تسلم عليك وتقولك اتصل الحين ههههه )
هم كانوا كمن دقيقة ..
الا وخـالد .. يتصل على طـــول ..
قفلت الباب على عمرهـا عسب امها ما تدش ..
ويلست ع الكرسـي الهزاز ..
منوة بشوق : الو خالد ؟؟
خالد بلهفـة : منـــــوتي !! ..
منوة بفرحة : اشحالك خالد ؟
خالد : بخير دامج بخير يالغالية .. انتي شحالج ؟
منوة : والله الحمدلله زينه ..
خالد بصوت متفائل : والله زين ذكرتينا .. وأخيييراً ؟؟
منوة : مادري .. طرت ع بالي صوفي جان اتذكرك ههههههه ..
خالد : ههههههه .. يالله يا منوة لو تدرين كيف كنت محتاج هالاتصال ؟
منوة بحزن : ليــش ؟؟
خالد : كنت متضايج من الخاطر .. والحين ارتحــت ..
( لحــظات صمـت )
منوة : خـالد انته وييين ؟؟
خالد : احوط فـ الشارع ..
منوة : انزين طلبتك ..
خالد : آمري ..
منوة : رد البيت الحين ؟؟
خالد : تامرين أمر .. ها .. لفيت ع طريج بيتنا ..
منوة بغباء : تسلم والله .. تعال ..
خالد : وين ايي ؟؟
منوة : هههههه اقصد اتخبرك ..
خالد : آمري ..
منوة : استوى لي كذا مرة اني ييت بيتكم .. بس ما انتبهت لوجود كوماري ولا زوبا ولا روز .. جيه وينهم ؟
خالد : خبرج عتيييج .. بعد سيرتج انتي .. شجعتيهن ع الشردة .. روز وكوماري شردن من البيت .. وكنسلنا اقامتهن والحين معمم عليهن .. وحصلنا كوماري بس روز مختفية .. وزوبا خلى البيت عليها سارت صاحت عند اميه عسب تردها بلادها .. عقبها بأسبوع يبنا 4 بشاكير يداد ..
منوة : وحليييلهن .. كله من روز راس الفتنه ..
خالد : هههههههه ترى روز اللي وصلت لي دفترج .. وكشفت حقيقتج ..
منوة بصدمة : احلف ؟؟
خالد : هههه والله ..
منوة : عيل خلاص فديتها ..
خالد تخبل : ههههههههههههههه ..
منوة : انزين عيل مستر خالد .. انا بخليك الحين ..
خالد : ليييش ؟؟
منوة : بس جيـه .. خخخ .. يلا مع السلامة ..
خالد : الله يحفظج ان شا الله ..
.
.
رد خالد البيت واعتذر لامه ..
وامه شكلها ما اتيي الا بالعين الحمرا ..
حزتها بس وعدته انها تسير تخطب له باليوم الثاني ..
وفعلاً .. استوى اللي تمناه خـال وساروا يخطبون ..
الريال كان حمدان خال ام منوة .. ريال وقور وله هيبة .. وبو خالد ارتاح له ..
منها جاف خـالد منوة ..
ومنها تحددت الملجة بعد اسبوع .. سكيتي بلا دق ولا خرابيط ..
.
.
على طريـج المحكمة ..
تـوجه خالد وابوه عسب يلحقون ويملجون بخالد ويفتكون من صدعته ..
الا ورقم غريب ايي خـالد ..
خالد : الو ؟؟
الريال : اذا شفتك صوب المحكمة بتجوف الويل منـي ..
خالد غيظ : منو انتــه ؟؟
سكر الريال فـ ويهه ..
وخـالد ارتبك ..
بو خالد : منو اللي متصل ؟
خالد : ها .. لا محد واحد شكله مغلط ..
وكملوا دربهم .. الين ما خالد نسى سالفة راعي الرقم موووليه ..
.
.
وصلوا للمحكمة ..
وفـ دربهم للبوابـة ..
مر حذاهم ريال متلثم ..
ما ايون الا والريال يغرز سجينه ( سكين ) ع قلب خـالد .. !!
وركض الريال على طول وركب سيارة بدون رقم وشـرد ..!
بوخالد ما عرف شو يسوي حزتها الا انه يصارخ بقوة ..
لين ما يوا السكيوريتي وطلبوا لـه الإسعاف ..
.
.
القهـر اكثر ان منوة وصلها الخبر وهي توها بتركب سيارتهم ..
ركضت لحجرتهـا بقهـر ..
ودموعها تغلب عيونها الحزينة ..
وكتبت فـ دفترهـا .
" لن أتـزوج خـالد .. لأننـي خادمة ! "

/
\
/
\
يتبع ،،