^-^ شعورٌ يلامس نبضي °~° ®

[Raba]

عن الرحلة البحرية :
طبعا اول مرة التقي في شواخ في الواقع ما اريد اذكر قصتها للخصوصية بس هي إنسانه جميلة الروح حبابه حتى الطلاب الي تعلمهم يحبوها ومتعلقين فيها الحمدلله ..
مراوي شفتها للمرة الثانية في الواقع المرة الأولى رحت التقي فيها في بيت اختها واذكر صار موقف خلني اروح البيت وشعري طالع من الحجاب بدون ما ينبهني وانا ما عندي خبر والسبب عاجبنهن لون الشعر ومتأكدات اني بروح البيت ما احتاج انتبه على قولتهن..
المهم من المواقف الي صارت ان نحن اكثر بنات في الرحلة مشتعلات كل شيء نجرب نحن الوحيدين الي متبللين ونحن في اليخت بعدنا ما سوينا اي اكتفتي بس منزلين رجولنا ع البحر واليخت يمشي ..
الحين نجي على سالفة الغرق طبعا انا عندي خوف من البحر والسبب يعود إلى استراليا مرة خليت رجلي في البحر والطحالب الي في البحر لمسوا رجلي وفي ذاك المكان في ثعلب البحر والبطاريق وانا تخيلت ان حتى القرش وصل هناك وات الاسماك بياكلوا رجلي اعرف ان هذا تفكير اوووفر دراما بس حقيقي كنت أخاف عشان كنا نسمع في الاخبار حالات القرش متقدم في البحر وهاجم على ناس وكذا ما علينا كنت سخيفة لان ما كان عندي احد يساعدني اتخلص من خوفي هناك . .. المهم جيت الرحلة وانا حاطه في بالي انه خلاص انا راح اتجاوز مرحلة الخوف واول ما طلعت اليخت لبست اللايف جاكت كنت الوحيدة الي لابسه ولبست صديقاتي معي غصب هههه .. المهم في الرحلة طلبت من القبطان اني اسوق اليخت وكنت بصراحة ما اعرف وقتها اقرا الخرائط البحرية بس الحين الامور طيبة وافهم فيهن وما قصر الربان عطاني السكان وعطاني الأوامر ووصلنا بأمان هههه طلعت اسهل من السيارة ..

بعد ما وصلنا الموقع كان في نص البحر بين جبلين ، الحين بنسوي اكتفتي والي تحب تدخل البحر تروح والي تبي تسوي كياك تسوي بالدور يعني وبدل ما نحن ننتظر دورنا قلت انا خلا نقفز في البحر يعني متحمسه وانا من داخلي خايفة بس لابسه لايف جاكيت يعني ما بغرق وبنات حولي يعني إلا احد ينقذني وفي منقذين قريب منا المهم قفزت واذا بي اغرق هههه وانجرحت وكان دم في رجلي وانا احاول اوصل السلم وانادي عليهم ساعدوني وواحد يقول عادي ما بتغرقي فيك لايف جاكيت وعطاني حبل امسك فيه ولما طلعت شفت الدم في رجلي واجد قلت لهم يعني السمك بيجي شم الدم بياكلني وهم على عباطه قالوا ايوا وجلسوا يضحكوا قلت لهم حقيقي تغير وجهي رجعت الخوف الأول قالوا ايوا بعدين قالوا لا ما في أسماك خطرة هنا واغلبها صغيرة ما تتغذى على لحم الإنسان.. المهم بعد فترة كان لازم اتعلم كيف اسبح وكل شوي يعقوا لي الحبل لحد ما وحده قالت لي تعلمي تطفي على ظهرك اسهل وفعلا جربت وتعلمت ذاك اليوم كيف اسبح لأول مرة تضبط معي وزاد الموضوع لما رحت بعيد وما عرفت ارجع وحسيت اني بغرق كانوا يقولوا لي دفعي بيدك عكس التيار بتوصلي وبصراحة استمتعت وفعلا وصلت وحسيت اني أنجزت.. انا دائما اسوي الاشياء الي اخاف منها عشان اقنع نفسي ان ما في شيء يستدعي الخوف عشان كذا دائما احاول اغامر واعيش التجربة

[Raba]

الفترة الماضية كنت منشغلة بالتحرر من culture shocked
كان الموضوع صعب وكئيب كنت احتاج دافع عشان اتأقلم مع الوضع الجديد في الحياة
الحمدلله تعرفت على ناس طبعا كنت اعرف كذا شخص من زمان بس ما كنت اعرف ان عندهم الرغبة بالهايك وتعرفت على ناس في العموم توافقت معهن هواياتي وصرنا ندور مسارات في مسقط والداخلية والباطنة ونروح لها .. كان أجمل فترة لي في عمان حسيت اني قدرت اشارك الناس بعض الاهتمامات وكونت صداقات جديدة رغم طبيعتي الهادئة الا ان جانب المغامرات والاستكشاف دائما حاضر ..

لدرجة اني جربت اسوق المعدات الي تنقل البضائع في المصانع والمواني وكنت فرحانه بالتجربة.. وجربت اطلع أبراج مراقبة واشوف عروس البحر مسقط .. المغامرات ذي كانت سبب اني اتأقلم مع المحيطين حولي وبدل ما اسوي علاقات عميقة مع الناس كنت اكتفي بعلاقات سطحية وعلاقة عميقة مع الطبيعة والمكان .. الحمدلله

[Raba]

بخبركم سالفة 17 أكتوبر يقال انه يوم المرأة المهم انا كنت مداومة الفرع الرئيسي الصبح عندي اجتماعات ولما خلصت من هناك رجعت فرعنا .. المهم فرعنا ما فيه بنات غير انا ووحده متدربة وع اساس يوم المرأة جايبين غداء وتغدوا الشباب قبلنا تخيلوا ما بقولنا الا نص دجاجة انا والبنت نتشاركبها ههههه اقولهم ما منكم ولا يوم المرأة تروحوا تاكلوا قبلنا ليش ؟؟ هههه


المهم كان اصلا في تعويض تاريخ 18 أكتوبر معزومين مع بنات الفرع الرئيسي في فندق (نسيت اسمه الحين بس حلو عند ساحة المعارض سابقا ) ورحنا نتغدى بطبيعة الحال ما مندمجين نحن مع البنات حتى تغدوا قبلنا ما انتظرنا ههههه يضحك الموقف ..
المهم لما خلصنا اكل ولله الحمد طلعنا وانا جايبة المتدربة معي في السيارة عشان ما جايبة سيارتها المهم وانا امشي احس ان الالم جالس يزيد ما حسيت اني اقدر امشي اكثر تسحبت وقلت لها سوقي عني وعبالي خلاص بيقل الالم مجرد مرور سريع منه إلا اني خلاص بدات احس بالاختناق وكل شيء فجأة الحمدلله انه صار بعد الحفل ما أثناء الحفل المهم قلت للبنت نقليني الطوارئ اذا تسمحي وامها كانت جايه تأخذها وعاد خبرتها وانا جلست أخبرها بالشوارع عشان ما تعرف ورحنا السلطاني خلاص انا وصلت ما قادرة اتحمل اكثر وزرعوني ساعتين في الانتظار وانا خلاص مت عاد ولما دخلوني عند الطبيب كان خلاص الكيس منفجر داخلي وانا خلاص من الالم ما اتكلم واختي جات وتتنازع معهم انه عطوها بروفين او بندول عشان يخف ألمها ما رضوا طيب خلي الدكتور يشوفها يعني انا من يوم جيت انا دموعي ما وقفوا من النزول ومتحملة اكثر من اللازم انا في الانتظار ساعتين اونه نمشي بالترتيب سلامات في حالات ما تنتظر ساعتين و3 .. المهم دخلت قالوا احتمال الدودة الزايدة لازم أشعة سونار ما قدرت اسويها من الالم سولي بأسرع ما يمكن قال احتمال في شيء منفجر داخل قلت لهم بس اريد مسكن لا غير اموت بهدوء احسن وسولي مغذي وسقاية بندول ما امزح معكم وانا اعرف ان هالسقاية ما تنفع والبندول ما يأثر فيني واجد في استراليا كانوا يعطوني منوم على طول لان وجهي يكون خلاص اصفر وشفايفي زرق انا في حالة اختناق وتعب ويعطوا مهدى قوي المهم خبرت الدكتور اني احس بآلام وان نوعية المهدئ الي في المغذي ما تنفع انا من الظهر لساعة 10 اتألم صح الالم يتفاوت بالشدة بس يبقى الم قال ما اقدر اعطيك واحد ثاني انتظري المهم قالوا ع اساس الصبح عملية وساعة وحده بالليل عندي أشعة مقطعية وطبعا انا اعتبر صايمة ما اكل شيء بس اجرجر ذاك الماي خلصت ساعة وحده وشيء قالوا ما تاكلي لازم الجراح يجي وطبيب النساء والولادة المهم ما احد جاني لحد اليوم الثاني وانا بجوعي وعطشي عاد اخر شيء جاء الجراح الصبح قال رابعة ما نقدر نطلعك بس ما بنسوي لك عملية لان ما فيك الزايدة الحمدلله بس عندك كيس منفجر وتحتاجي تجلسي في الملاحظة وفريق طبيب النساء والولادة لازم يجي يشوفك وعندهم القرار اذا تريدي عملية تنظيف او إجراء ثاني والألم موجود ما نقدر نعطيك الا مسكن الالم وانا ضحكت قلت له خلاص بطلع قال لا بعدك قلت له غير المسكن عشان ارتاح ... طبعا اول ليلة في المشفى ما عندي وسادة تخيلوا وكل شوي احد يصرخ ودراما وانذار مال الممرضات ما يسكتوه متخيلين الوضع وانا كل ٥ ساعات يسوا لي مهدئات لمدة ٣ ايام ما شيء حل ثاني المهم يوم الثلاثاء أطباء النساء والولادة ما جوا عشان اجازة ودبسوني يوم غيره ببندول اخر شيء خبرت اصدقائي يجوا نغير جو طبعا اول ليلة ما كان معي مقيم لان اختي رجعت عبالها ما يصير يكون في مقيم عاد اليوم الثاني نامت معي المهم العصر جوا منى وايثار ووسام وشو الضحك والسوالف ما كأني مريضة اريد انسى وتخيل الدكتور يوم يمر علي يشوفني مبتسمه قال اول مرة اشوف وحده تصيح وتبتسم قلت له ما رايم تشوف ذاك الصوب تراك تخليني في موقف صعب صدعت وانا منزلة راسي عشان ما احد يشوف دموعي قال لا انتي قوية حتى ما تسوي صوت بس نشوف دموع ووجه اصفر قلت له جالسة اتحمل ترا ... المهم في اليوم الثاني ضغطت على جهاز الانذار مسوين لي سقاية وانا ما ماكله ولا شاربه والسقاية تدخل بشكل سريع 8 دقائق وخلص المحلول وانا ماقدرت اتحمل السرعة الي يدخل فيها لجسمي احس كل شيء فيني صار نار ونزل عندي الضغط وتخيل ما احد جاء من الممرضات يشوف شو صاير واختي تناديهن تقول اصلا وجهها رجع يتعب لما خلصت السقاية وكل شيء عاد انا خلاص ما فيني اكثر اتحمل وقلت حال الممرضة انا احس ان المحلول نار في جسمي قالت هذا مجرد بندول ما معقولة يسبب كذا قلت لها انا جالسة احس بنبضات قلبي ما طبيعية قالت هذا اوهام قلت لها نادي الدكتورة رجعت قالت ليش قلت لها انا اريد اكلمها وعاد دكتورة عبير جاتني قلت لها معقوله عبير اضغط زر الطواري وما احد يجيني وفوق هذا الممرضة تكذبني بإحساسي والمي وين الإنسانية في الموضوع؟؟ وين الإخلاص في العمل وعاد هي اعتذرت مني قلت لها تخيلي الممرضات ما يسمعن كلامنا وحدنا مستبلين بس راح ارفع طلبك للإدارة قلت لها تسلمي والمشكلة ان الممرضة نفسها جات تقيس الضغط وفعلا طلع ناقص وااااجد قالت لا يمكن ما حقيقي نسويلك ثاني قلت لها حقيقي انا ما قادرة اقوم ما كذبت عليك لما اقولك اني احس بشيء غلط المهم راح تعيد فحص الضغط وفعلا طلع ناقص ما اعرف شو ارد عليها .. المهم قلت حال دكتورة عبير جوعانه ترا قالت وليش مصومينك كلي راحت تجيب لي اكل يومين مصومه ما على شيء وجارتي هناك تجي تطل علي لما تسمع اني تعبانه اسمها زمزم جالسة مع امها ربي يعطيها الصحة والعافية .. المهم تعرفت على فطوم نفس حالتي وجالسة تصيح كانت جوعانه وانا رحت عندها جلسنا نتخيل الاكل خاطرها بصحن رز مع فخذ الدجاج وروب بالخيار هههه وانا اضحك واقولها وانا خاطري بعصير مانجوباشن هههه متفيقين.. لما جاء فريق طبيب النساء والولادة يحسبوني في المدرسة ضحكت قلت لهم عاد ما كذا انا موظفة بس لاني ابتسمت عشان بطلع اصير صغيرة قالوا اصلا ما قرأنا العمر قلت لهم احس ما اريد اجلس قالوا نحن ما نقدر نعطيك شيء حاليا لما تزيد حالتك رجعي لنا قلت لهم لو مطلعيني بدل ذي الملاحظة واشرب بندول في البيت كنت قالوا نبي نتأكد ان ما يتحول نزيف وخلاص نقدر نطلعك وانا وحدي قلت لهم اليوم اصلا قادرة امشي زين وعاد اليوم الي بعده دكتوري اتصل في مستشفى ثاني قال تعالي الطوارئ وخبر دكتورة الطواريء تعطيني اللازم وعدتني ادوية للالتهابات بعد ما شافت التقارير الي ما عطوني اياهم في السلطاني وابر فيتامين ب لانه واجد ناقص والكالسيوم كان ناقص وذا النقص هو يسبب الاحساس بنبضات القلب المهم انا حقيقي لحد يوم الأربعاء تاريخ 27 كان الالم فيني بس أقل والحمدلله الحين الامور طيبة

[Raba]

اهلا لأصدقائي المتابعين .. أحس من كثر ما اريد اندمج في المجتمع اريد اشوف الاشخاص الي يتابعوني نتجمع ونسوي أعمال تطوعية كذا نقضي الوقت ونتعرف على بعض ... مجرد امنية فيها قلوب واجدات


المهم على طاري الأعمال التطوعية في حملة لغرس الأشجار في حدائق البيوت في السويق يوم الجمعة أن شاءالله تاريخ 5/11 فحلو الي يلقى فرصة يساهم تغيروا نفسية وتتعرفوا على المجتمع..

[Raba]

مممم ياخي ما اريد اتكلم مع احد .. صايرة نفسية كالعادة ههه
بس حقيقي مرات نفسيتي توديني الجدار مع اني معترفة اني أنفس مرات بس الامور طيبة ..
طالعة اجازة عشان اذاكر عندي اختبار وما ذاكرت للحين مكر .. اتوقع بجيب العيد اريد اجيب شهادات دولية بس مالي خلق ابدأ اذاكر وهيك يعني..

[Raba]

ربي اجعلها امطار خير وبركه علينا 30/11/2021

تاريخ 27/11/2021 الساعة 10:59 صباحا وصلنا خبر وفاة جدتي الله يرحمها ويغفر لها ويسكنها فسيح جناته يارب العالمين..
بيبيه الله يرحمها كان ناقص عندها الدم ونقلوها السلطاني وعاد جلست أسبوعين فيها حمى بعدين قالوا فيها التهاب ويعطوها مضادات قوية انتفخت يدها وبعدين رجلها وبعدين خذت عدوة من المستشفى وصارت تكح والحمى ما خفت وفي يوم الخميس الفجر مال ساعة 2 او 3 بلعت لسانها بس عمتي الحمدلله كانت موجودة وتداركت الموضوع وبس يوم الجمعة صار فيها بلغم ونقص الأكسجين كانت ع الجهاز بس تتكلم بعدها بس الصبح جيت وكلمتها ما تنبهت لي واجد واصلا من بالليل انا حاسه قلت حق اخواني ان بنزور الصبح بيبيه والي يروح يخبرني امر عليه وكلنا رحنا واتصلت على ابوي كان في الطريق اصلا وتلقينا وشفناها وسولفنا معها بس عشان الأكسجين كان واصل 70 ما قادرة تتكلم واجد ورحنا عنها عاد بس ما اخبركم عن ذاك اليوم سبحان الله صورتها قلت اخاف ما اشوفها مرة عاد يوم السبت جانا خبر الوفاة ابوي رسل صوتية وهو يصيح واختي راحت تخبرهم بصراخ انه بيبيه ماتت مع انه انا الي فاتحة الصوتية قلت شكله مستوي شيء وعاد امي ما قدرت توقف وجلسوا يصيحوا انا ما اعرف كيف كنت صامدة حتى اخوي سمع امي تولول تقول ما راحت امي مسكينة واختي الكبيرة جلست تصيح قالت له بيبيه ماتت وجلس يصيح وانا بعدني اقاوم ما متخيلة وانتظرتها لحد ما تجي ونغسلها وفتحت عن وجهها وبستها وانا صامده بس دمعة دمعتين وارجع ادعي وانا ما مصدقة وابوي اتصل علي قبل لا يجيبوها واول ما شفت ابوي وعمي منهارين ما قدرت هزني الموقف واولاد عمي يصيحوا وانا احضن ابوي اصبره خايفة عليه .. الحمدلله على مر القضاء وحلوه كان موقف صعب وللحين مصدومة ما ادري احس حلم ما مصدقة ولا اريد اصدق بعدني اعيش على اني بلقاها اروح غرفتها وكرفايتها وعطرها وادويتها كانت تعطيني من عندها ادوية حال مرضي تقول عندي واجد انتي شليه ودائما تسأل عني حبيبتي ربي يرحمها ويسعدها بالقبول الحسن يا رب

[Raba]

هلاوي فيني ...
نبدأ يوم جديد ربنا لك الحمد حتى ترضى ولك الحمد بعد الرضى ..
أمس كان عندنا تجمع مسوين صدقة عن روح المرحومة حبيبتي جدتي والعصر حسيت بألم هو كان موجود من فترة بس قلت يمكن يخف وزاد عاد رحت المستشفى عن يزيد اكثر ونوموني للحين انتظر التحاليل احس مليت جيت اسولف هنا .. ما عندي سوالف تنذكر هذه الفترة تخيلوا عندي كتاب ما خلصته عاد له معي من ظ¥ اشهر

[Raba]

‏يا مشتكي الهم دعه وانتظر فرجًا
ممن يفرّج كربات المساكينِ
واصبر على محن الأيام ذا جلد
ودارِ وقتك من حينٍ إلى حينِ
ولا تعاند إذا أصبحت في كدرٍ
من النوائب واستقبله في اللينِ
هيهات هيهات أن تَصفو بلا كدرٍ
فإنما أنت من ماءٍ ومن طينِ !

خليل البصير

[Raba]

بس تسجيل دخول والا الحال نفس الحال

[Raba]

وبدأنا رحلات جديدة في عالم الوظيفة والدنيا قد يكون هناك مستقبل مبهر في الأيام القادمة يا رب â™،