العيد مقْبل كلّ عام ن ورا عَام
يتْجهزوا له الناس من قبْل حينه
يشْرون من زين المَلابس والانْعام
لجْل الفرح بالعيد همْ قاصدينه
وانا عبَرت بسكّت ن كلّها زْحام
اناظر بْعيني ف سوق الْمدينة
شاهدت دمع يْطيح ف اطراف الاقدام
اذا بطفل مصارع ايده بعِينه
ينظرْ الى ارضه وكنّه يبا يْنام
من زود ما حزنَه ظلَمه ف سْنينه
ناديته بْقربي يجيني ولا قَام
لين اقْتربت وْسرت امسك يدِينه
قلت شْعلامك ليه ما تنطق كْلام
قال في عيوني كلّ كلْمة حزينه
امّي خذاها الموت من قبل اعْوام
وابوي في هذا الشّهَر فاقدينه
واخْتي يلٍي ما شْفتها عدة ايّام
سمٍعت عنها اليوم جثّة دفينه
واهلٍي سقط فيهم من الجوّ الغام
لا باقيْ فيهم من الاقي حنينهْ
وانا اسير احزان في سجْن الايتام
مو ذنْب من عاشَ الحياه المهينه
من هُوْ يدفيني عن البرد ف الشّام
من غيرك امّي في حياتي معينه
العيد اقْبل وين امّي والارحام
تكفون ابغْي لي ملابس ثمينه
ابغي مثل اطفالٍكم افرح العام
تكفونَ قلبي لا تزيدوا ونيْنه
خلّوا عزاي يْطول ف ثْلاث ايام
وانتوا ثلاث ايامَ عيدن بزينه
ادعي اذا تمّيت بْسجود وقْيام
الله يكْسيني ف قلبي السّكينه
وادعي بانّه الله يحفظ لنا الشام
وارض العراق وكلّ قريه وْمدينه
واحمل رسالة هم مني لحكام
واهل العقول الواعِيه والفطينه
باني انا ابن العروبَه والاسْلام
ابغي حقوقي من ايادي اميْنه
ناصِر الراشديّ
رد مع اقتباس
'
