عشة الصعاليك (بالعامية المصرية)

[جمال نصير]

عشة الصعاليك....
................
و صاح الديك ..ف الكتاكيت
أنا تعبان بقالى سنين..
وشايل همكم ... حملي...
و من لحمى ومن دمي..
حملت البيض على قلبي..
ولازم تسمعوا أمرى..
أنا ديكم.. وأكبر عُرْف دا عرفي..
وحامي العشة والكتاكيت..
ف صوت واحد...
جميع الفرخ والكتاكيت....
تمام معاليك...
*****
أنا المنقذ ...أنا المختار...
زعيم جبار..
وجيت علشان أخلصكم..
من الارهاب..وم الاشرار
سجنت العلما والاحرار
وقمت بثورة ع الثوار..!!
حكيم الحكما ف العالم ...
بفكر فيكوا ليل ونهار
أنا الحالم..أنا العالم ..
أنا وحدى...
مفيش بعدى ولا قبلى...
ولا مثلى ولو بهزار
ف صوت واحد ...مبايعينك..
ويكفى انك ...بطل مغوار...
وحامى الضيعة للتجار...
*****
وهبنيلكم ....حياة تانية..
تليق بيكم
وعشة جديدة... تحميكم
وهرسم فى الجدار ترعة...
قناة تانية .....هترويكم..
وبيضكم... راح يكون فيكم...
محدش راح يبض بره..
كفاية أبيض أنا ليكم...
وأوعدكم ...
فبيضى ..راح يكفيكم
ف صوت واحد.... تمام نفديك..
ياديك العيلة يا ديكنا
كفايه نبقي نور ف عينك...
كفاية نبقي ليك صعاليك....
*****
أنا الامر...أنا الناهى...
أنا ال راح ابنى من ريشكم... قصور وقصور..
ومش عايز دكر منكم .... عليا يثور
أأذن تركعوا ليا...
أكاكى.... تدفعوا ليا....
ولو بجنية...يوماتى تصبحوا عليا...
ف صوت واحد.... تمام يا كبير...
حدانا فى غابة الصراصير...
مفيش كتكوت بيرفع صوته يوم على ديك...
*****
وقام الديك نفش ريشة...
ومدد رجله من طيشه...
وجاب كام كلب...من جيشه
وكام سفاح......
وكام جزار..
وجيش جبار..
وكام تاجر...
وخلق كتيرة من غير قلب
وكون عشة الصعاليك....
*****
جمال نصير
24 اغسطس 2016

[رايق البال]

هلا فيك جمال ..
اهوو كلهم ديوك ياسيدي نقول ايه بقى
ربنا على المفتري بس ياجمال ههههه
الف شكر لجهدك وتفاعلك الجميل
طابت مساءاتك ..
( نص يستحق النجوم الخمس)

[إغماءة~|]

جولة الباطل ساعة وجولة الحق إلى قيام الساعة
مهما كثرت الديكة أستاذي فهذي سنة الحياة...وعلى السنن ماضون

نص خفيف قريب للقلب
سلم قلمك

[صدى صوت]

عن أبي هريرة رضي الله عنه قال : قال رسول الله صلى الله عليه وسلم :
سيأتى على الناس سنوات خداعات ، يُصدّق فيها الكاذب ، و يـُكـذب فيها الصادق ، و يـُؤتمن فيها الخائن ، و يُخوّن فيها الأمين ، و ينطق فيها الرويبضة ( قيل : و ما الرويبضة ؟ قال : الرجل التافه ، يتكلم في أمر العامة ) .
كثرت الرويبضات يا استاذ جمال ..
واقع محزن ..
نص واقعي يعطيك العافيه

[شموس الحق]

شعر جميل من الادب الساخر .. اجاد شاعرنا الكبير جمال نصير في توظيف المفردة وعناصر بيئته في التشبيهات الادبية لنقل صورة الواقع والمشهد .. لكن من الواضح ان زمام الرمزية فلت بشكل واضح في منتصف القصيدة ..بسبب حماس الشاعر ..واتجاهه نحو المباشرة في القصيد..وضعف عنصر التشويق خاصة في خاتمة القصيدة .. فلم توضح لنا رسالة القصيدة وهدفها .. وترك المجال للمتلقي ان يختم القصيدة على مزاجه....وجهة نظر متواضعة ليست بالضرورة قبولها والتسليم بها ... مع تقديري وشكري لادبك الجميل استاذ جمال

[جمال نصير]

هلا فيك جمال ..
اهوو كلهم ديوك ياسيدي نقول ايه بقى
ربنا على المفتري بس ياجمال ههههه
الف شكر لجهدك وتفاعلك الجميل
طابت مساءاتك ..
( نص يستحق النجوم الخمس)

السيد الكريم رايق البال روق الله بالك كمان وكمان... يا سيدى ماتصلحوا الموقع بتاعكم ده..بيتعبنى كل ما اجى ادخل...كانه مفيرس ولا عليه ندر.....المهم انك واحشنى والله ...وزى ماقلت لك الموقع بيعاكسنى كتير خصوصا فى كلمات المرور..وكمان فى التعليقات بيظهر اعلان غريب كده بيدارى التعليقات ....عموما شرف لى مروركم وتتويجكم لى بنجومكم الخمسة...تقبل شكرى وتقديرى

[جمال نصير]

جولة الباطل ساعة وجولة الحق إلى قيام الساعة
مهما كثرت الديكة أستاذي فهذي سنة الحياة...وعلى السنن ماضون

نص خفيف قريب للقلب
سلم قلمك

الله يسلمك يا إغماءه....من كرمك ..تحياتى

[جمال نصير]

عن أبي هريرة رضي الله عنه قال : قال رسول الله صلى الله عليه وسلم :
سيأتى على الناس سنوات خداعات ، يُصدّق فيها الكاذب ، و يـُكـذب فيها الصادق ، و يـُؤتمن فيها الخائن ، و يُخوّن فيها الأمين ، و ينطق فيها الرويبضة ( قيل : و ما الرويبضة ؟ قال : الرجل التافه ، يتكلم في أمر العامة ) .
كثرت الرويبضات يا استاذ جمال ..
واقع محزن ..
نص واقعي يعطيك العافيه

صدى صوت ..أخى الحبيب... لو فعلا عايز تشوف صدق الحديث ده تعالى وعيشه معانا...على ارض الواقع...هتلاقى كل كلمه فيه اتحققت ....وربنا يحسن ختامنا...شرفت بحضورك الوارف شكرا تليق بكم

[جمال نصير]

شعر جميل من الادب الساخر .. اجاد شاعرنا الكبير جمال نصير في توظيف المفردة وعناصر بيئته في التشبيهات الادبية لنقل صورة الواقع والمشهد .. لكن من الواضح ان زمام الرمزية فلت بشكل واضح في منتصف القصيدة ..بسبب حماس الشاعر ..واتجاهه نحو المباشرة في القصيد..وضعف عنصر التشويق خاصة في خاتمة القصيدة .. فلم توضح لنا رسالة القصيدة وهدفها .. وترك المجال للمتلقي ان يختم القصيدة على مزاجه....وجهة نظر متواضعة ليست بالضرورة قبولها والتسليم بها ... مع تقديري وشكري لادبك الجميل استاذ جمال

تحليل رائع من شاعر رائع اخى شموس الحق...اشكرك عليه..انا لا أجيد الرمزية فى كتاباتى...اميل الى المباشرة ودا طبعى الشخصي حتى فى حياتى اليومية.... ولذا فلن اختلف معك فى رؤيتك لانك على صواب....شكرا تليق بك وبمرورك الطيب المثمر

[ندى الوورد]

قصيده جميله استاذ
بُوركت الانامل