أقرا تعابير وجهك واشعر بخوفي
ملامحك .. كنها للبعد مشتاقه
دخيل قلبك وعينك قدر ظروفي
انا بدونك وطن خانوه عشاقه
ياما كتبتك ولاح البرق بحروفي
وياما وعدتك وصان الحب ميثاقه
ما ترحم بحالي الذابل .. ولا توفي
ما كني اللي على شانك ثنى ساقه
أرخصت وصلي وتقديري ومعروفي
ماعاد باقي لأحاسيسي معك طاقه
جفاك موحش وبعدك لاعب بجوفي
عقبك انا العاشق اللي شانت أخلاقه
يا زاد عمري وياشوقي وياشوفي
شف راية الحب وسط القلب خفاقه
مديت لك يا المقام العالي كفوفي
لا تنثني .. دام نفسي فيك تواقه
ما عاد فيني صبر وأرهقني وقوفي
وليالي العمر ،، خطافه وسراقه
ياخوفي تغيب عن عيني وياخوفي
اتجيب قلبي معاك ، وتنوي فراقه ..
رد مع اقتباس
المشاركة الأصلية كتبت بواسطة نوارة الكون
