//
//
//
غارت اساطين الشعر في خافقي حتى انبريت
اطعن شياطين الحروف اللي لساني يسوقها
فرسانها بيوت الجزل واللي عن الجزلات ميت
والله انّه ما يشرّف هرجتي ومنطوقها
ارهي على بيت الجزل لو بالمشاعر الف بيت
اكحل به عيون العرب ويكفّ عني حلوقها
ولو ما علا صيتي بإسمي لاولاوالله استميت
بين العرب تعرف من وسوم القبايل نوقها
واللي لعب بالنار قلّه مايطفّي النار زيت
تلفح ضلوع القاع حتى تنطفي بشاهوقها
ماترمي من تحت الحزام وتدّعي انك،رميت
واجه مشاعيب النشاما والمراجل ذوقها
واللي رضع خشل المعاني لو على الرمضا يبيت
ما مدّ للحاجة يمينه لو تدّلى عذوقها
وين الزمان اللي مضى لو قد كسر رجلي مشيت
مابين شمطان اللحى كسب (ونعم) معشوقها
اقفت به ذياب الخلا ياللي وحشهن يستميت
حتى نزع كبد الفضيلة من على معلوقها
والحرّ الاشقر ان كفخ ماله بهذا الوقت صيت
الا لشيلات القصايد محتكر في سوقها
ضفنا المعاني والمراجل مالها ياناس بيت
اللي ذرع بين الذيابة شدّته في طوقها
واللي نخى شبه الجزيرة رجالها مدري بكيت!!
شحّت من اشباه الرجال اللي وحينا فروقها
تجري بنا ريح الجفا واللي على الفرقة رسيت
ليتك عباد الله تكفى ما هضمت حقوقها
باشا العمايم واللحى لا كلبشت خال السبيت
قامت يد الزاتا من الاحكام تترس بوقها
وياشاعر الفصحى غدى ذالمجد تمر وماكليت
ياخي ربعنا قد كلوا حتى النوى وتفروقها
ياصاحبي حتى الكتب اصدق من السيف الصليت
قامت تحاربنا ضحى تحت النجوم وفوقها
وتاريخنا كذب ودجل يسرد بخشبة أوبريت
قمّنا نردد (بغبغا) وعقولنا بصندوقها
يكفخ على راس العرب طير المذلة ان طريت
قدس الهدى تنزع كأنك في عيون عروقها
ولاح الربيع اللي بطى يالعن ابوهم ما بطيت
الا وشباشيب الخراب اللي تلوح بروقها
للشاعر فهد الكلباني (عقاب العيون )
رد مع اقتباس
'
