ديك ابو محمود / بقلمي

[رايق البال]

يسعد صباحكم / مساكم
هلا بالجميع ...

من جديد نلتقي أيها الاحبه وقصه بسيطه من قلمي ...
كنا ولازلنا نسكن في منطقه جيراننا فيها ولله الحمد معاملتهم جميله معنا ومع الجميع ...
وكان من ضمن الجيران الطيبين جارنا ابو محمود ..
رجل كثير كان طيب وكانوا عياله مثله في الطيبه والأخلاق الرفيعه ... مره وانا طالع من البيت بعد المغرب رايح عند الشباب اسهر شفته ولما هو شافني متحرك بسيارتي قام يأشر لي بإيده عشان أوقف ...
وقفت ونزلت من سيارتي وسلمت عليه ..
انا : هلا أبو محمود يسعد مساك .. شخبارك ؟
ابومحمود : الحمد لله كلنا بألف خير .. كيفك انت ؟
انا : الحمد لله .. آمر أبو محمود بشو اخدمك ؟ تبي تروح مكان او شو فخاطرك بالضبط .. قول لي؟
أبو محمود : لا سلامتك .. بس تدري خلاص بيتنا جهز والحمد لله ( كان يبني بيت في بلده ومستأجر البيت اللي ورانا على طول ) وعاد من شفتك الحين
قلت اسلم عليك .. تدري راح ننتقل بعد أسبوعين وجايز ما اشوفك بعدين عشان اسلم عليك ..
انا : اووه جهز بيتكم ماشاء الله ؟ الف مبروك وربي يجعله بيتا عامر بوجودكم يارب .. والله يابو محمود فراقكم صعب لأننا تعودنا عليك وعلى عيالك
الطيبين مثلك وماودنا كان تروحوا بس مالبيد حيله ..
أبو محمود : تسلم والله واحنا بعد ماودنا نروح تعودنا عليكم وعلى المنطقه بس تعبنا ماديا من الإيجار وخلاص دام بنينا بيت احسن ننتقل نعيش فيه مع اننا راح
نفتقدكم ..
انا : واحنا بعد راح نفتقدكم أبو محمود .. و(كملت وانا ابتسم ) .. وراح افتقد الديك بعد ..
أبو محمود وهو مستغرب : أي ديك ؟ مافهمت قصدك ؟
انا وابتسامتي تزيد : هالديك اللي بسطح بيتكم .. ياخي ماصار ديك هذا والله .. انا اللي اعرفه ان الديك يصقع او يصيح عند كل آذان للصلاه ..
يعني على عدد الصلوات بس هالديك مصخها ههههههه من يقوم الفجر لين ينخمد نصايف الليول وهو ماعنده الا كوكووع وكوكووع .. كوكووع وكوكوووع ..!! ..
كأنه بس هو الديك الوحيد الموجود بالمنطقه هههههه ..
أبو محمود وهو ميت من الضحك : الله ياخذ ابليسك .. قتلتني من الضحك نعم ههههههه ..
انا : صدقني والله ولعلمك كأنه يتعمد يعاندني ..!! أرجع من الدوام الظهر وأقول الحين بتغدا وبنام شوي بس اظل ساعه اتقلب لين يجيني نوم بسبب هالديك وصقيعه كل شوي وبالليل نفس الشي لما ارجع من سهرتي اظل ساعه أحاول انام بسبب الربشه اللي مسونها وصياحه .. لا ومرات يقفز من فوق سطح بيتكم ويوقف في جدار حوش بيتنا وعاد انت تعرف ان غرفتي مقابله بيتكم وساعتها يتمشى هو على الجدار ويبدع ف صياحه عشان يقهرني اكثر وانا فيني اللي فيني من القهر منه ههههههه .. تصدق بقولك شي جايز تستغرب منه ..
أبو محمود وهو يضحك : ايش هو .. قول ؟
انا : لعدة مرات افكر اجيك عشان اكلمك اشتري هالديك من عندك
أبو محمود : ليش عاد ؟
انا : شو ليش أبو محمود ..!!؟ أبا اخليه بالغرفه واقفل الباب والدرايش واجلس اطارده لين اهدّ حيله وبعدين اخنقه وابرد قلبي من القهر اللي فيني منه ههههه ..
أبو محمود وهويضحك : اهااا كذي السالفه هههههه ... خلاص بريحك منه ولايهمك وبشله لما بنطلع من البيت ههههههه ..
بعد أسبوعين انتقل أبو محمود وعم الهدوء بعد رحيل الديك ..
بس سبحان الله بعد مرور عدة أيام افتقدت صياحه وربشته وبالفعل أشياء كثير بحياتنا أحيانا تضايقنا بس لما نفقدها نرجع نشتاق لها ونفتقدها .. بدليل كان هذاك الديك رابشني ...
صح انه جنن بي بس والله كان مسوي جو بدل هالهدوء الحين ههههههه ...
انتهى .. بقلمي

اخوكم / رايق البال

[نديم الماضي]

هلا فيك أستاذنا الكبير وبعودتك
وقصصك الجميله والمعبره والمفيده
ودائم ماتحمل في طياتها أشياء رائعه
وفي نفس الوقت فكاهيه وتحاكي أشياء واقعيه
ومواقفك لاتخلوا دائماًمن الأبتسامه

ومثل ماذكرت ماتعرف قيمة الشي
إلا بعد ماتفتقده..


دمت بود وأحترام وتقديرررر..

[حبي خالص]

ههههههههههههههههههههههههههههههههههه كثير تعجبني قصصك واتابعها بس احيان ما انتبه انك منزل قصه
قصه جميله استاذي

بها نوع من الفكاهه وتعبر عن الذكريات
فعلا إنا ما نعرف قيمة الشي الا بعد ما نفقده
أحيان هالشي يكون مصدر ازعاج بس بعد ما نفقده نحن له

أمنيه ..
يااا ليت لما تنزل قصه جديده ترسل لي الرابط لإني بالفعل استمتع بقرأتها
اسلوبك سلسل والاغلب واقعي وفكاهي

[بدر الدجى]

هههههههههه
أوووووووي عليك يالرايج هالكثر شرير حتى الديك م يسلم منك هههههه
م شاء الله سرد فكاهي رائع

[عملاق الشعر]

ههههههههههههههه

رايق البال

قصة رائعة وفكاهية
اسأل الله ان يجعل الابتسامة دائمة فيك

صدقت يوم قلت "للبال رقة ودومه رايقٍ بالك" ههههههههههههه



سلم قلمك الرائع استاذي

[نوارة الكون]

ههههههه
كل العاده قصصك ومواقفك لا تخلو من الفكاهه ربي يعطيك العافيه

[قائد الغزلان]

***مساااء ورد اريج***



***ما شااء الله عليك..جميل جداا هذا الحس الفكاهي..الذي نراه داائماا في كتاباتك القصصية***

***بالفعل يا عمدة..بعد ما نفقد الاشياء التي حولنا..لا نعلم لماذا نحس بقيمتهاا اكثر***

***سبحان الله***

***قصة جميلة جدااا***

***وفقك الله لكل خير ايهاا الرجل المحترم***

***وباارك الله فيك***

***ودمت في حفظ الله ورعايته***

[بنت االعرب]

قصة جميلة
سلمت الأنامل
تحياتي لك

[مفآهيم آلخجل]

قصة رآئعة
ذكرى جميلة
شكرآ آستآأإذي
وسلم على آلديك آذآ شفته^^

[القيصـــــر]

فعلا ما تحس بقيمة الشئ إلا بعد فقدانه
حتى لو كان مضايقك وخاصه إذا متعود عليه فتره من الزمن
ألف شكر لرقي قلمك وحسك الفكاهي ..
قبل لا أقرأ القصه من شفت بقلمي عرفت إن المكتوب شئ من المشاكل
هههههههههه لو أنا مكانك كان سويته صالونه الديك
دمت بحفظ الرحمن