حكايااووصاايا♡

[سراب سنين]

ما عرفت فآي قسم أخليه

[روح طٌفلهـ]

ابرايه خليه اهني



ادارة السبلة العامه

[رندويلا]

هههه شو سالفتج مع العجاايز هاه

ننتظر سالفة العجوزات بكل حمااااس

يعطيك العافية ع الطرح ،،

[بورتريه الوحدة]

احين كل العجايز عندهن فونات
........

[أحبك يا عبري]

شكلها تحب العجايز واجد

[زهرة الخلود]

ههههههه بالعكس سوالف العجايز حماسيشن

[سراب سنين]

واااغشششي دمجتو الموضوعين

زين يعطيك العافية ،، بو دمجتهن زين سويتوا

[سراب سنين]

السلام عليكم عيالي كيف حالكم؟شي علوم؟شي خبر؟

سمحولي عيالي تأخرت عليكم لكن مو أسوي الشيبة شل عني التب توب عوين من تخرّفي؟!!..

عاد ولدي جموووع جابلي واحد غيره..ما قصّر

يالله عاد تسمّعوا سالفة المهر..

هذا الله يسلمكم جارتنا عواش معها بنية غاوية الله يبارك فيها وحرمة هبّة ريح..ما كما هالبنيّات كلّه على الشغالة وهن والا على التب توب والا السوق..جاتني عواش ذاك اليوم وخبرتني ان بنتها جايينها ناس يخطبوها وباغتني أكون معها يوم يجيوا..

قلتلها ما يهمش يووو عوَش انا مثل أختش((كنّي شفتها حاست ثمها يوم قلتلها حسبت اختش ما اعرف مو قصدها!!!)) ..بتحصليني من العصر عندش..

ويوم جا العصر انا قدام بيتهم..((هوووووود هوووووود..يا اهل البيت))..لاقاني رجلها سعّووود ..قالي كيف حالش العجوز موزه ومو علوم الشايب..قلتله((مااشيوبة غيرك انته وحرمتك يالخرفاان والا باغيين تصغّروا عماركم آآآآآآه))..المهم انا دخلت عند عوااش وخبّرتها عن زوجها المصيّخ..قالتلي ما عليش منه ما قصده بس يمزح معش عاد انتيه الله يهديش مرّة فلفل؟!!..

انزين عوّاش خلينا من زوجش ويالله خبّريني مو ناويه تقولي حال العرب؟؟

كم بتحدّي الحق(المهر)؟..ومو طلباتش على المعرس؟؟

عواش: والله ياموزة انا ناوية أحدّ عليهم 8000 ريال الحق.. والذهب والقاعة والفستان عليه..ولازم يجيبلها سيّارة ويبنيلها بيت غاوي يعني فله واسعة وبشوف بعدني كان نسيت شيء!!!

انا يوم سمعتها كذاك تقول فتنت عليها..موووووووو تقووووولي؟!!!

8000 وفوقه هالطلبات يالظالمة وبعدش ناسية شي؟؟..خافي ربش والا نسيتي عمرش..أحيدش مزفوفة على حمارة عجوز تمشي وتوقف..وحقش 200 ريال وكمين ليسو ودشداشة..ومسكننش سعّووود في عريش وما عنده غير حمارة مخرّفة كماش والاّ نسيتي؟؟!!..أشوفش بتبطري على الخلق عواش

قالتلي الله يهديش موزة تو مو ذي الخرّوفة..دهرنا غير عن تو ..انتي تعرفي ان اللحين كل شي غالي.

سمعيني يوو عوَش.. اللحين 100 و1000 ما يكفيّن لكن عاد اللي فيه عقل يشتري اللي يلّه حاجة فيه والفشرة مايلها ..اللحين انتيه 8000 مو باغيتيلهن دام كل شي على المعرس؟!!..صلبي عظمانش عوَش وودري عنش هالخرّوفة..تراه كلّه بيطيح في راس بنتش هالفقيرة.

عواش: كييف يعني بيطيح فراس بنتي؟؟ كلهن الحريم تو كذاك يسوين.

آآآآآآاه اللحين السالفة غياااااااار من الحريم..نوبه الحريم بيعقن عمارهن فالنار روحي سويي مثلهن..كيه مو مافيش عقل؟

الرجال من هين بيجيب فلوس حال كل الطلبات ينتّف عمره والا يسرق؟

عواش: والله يريد حرمة هذي طلباتنا ما يريد بكيفه

عجب أقول عوَش خليي بنتش في حظنش ما حد بيبغاها خليها تشتغللش انتي ورجلش هالخرفان اللي ما رايم يصلبش..وقولي موزوه قالت

دام هذي خدمتش ابوي انا مروحة عنش ابركلي عن يرتفع ضغطي

يالله ياعيالي انا بخليكم لأن هالعجوز الخرفانة رفعتلي ضغطي والمصيبة ان واجد حريم مثلها..وبعدين عاد تجيها بنتها ..يووو ماه معاش زوجي ما يبقى منه شي كلّه يروح في الأقساط والكرهبة والماي !!..ما قادرين نشتري بو نبغاه!!..يالله عاد ذوقيها أشوف. انتي السبب والا مو بيضرش لو حديتي 3000 والاّ 4000 وخليتي العرس فالبيت والا قاعة بسيطة لازم يعني تفوشري عند الخلق!!

أشوفكم ياعيالي ع خير..مع خرّوفة جديدة

حبوتكم موزة

[غـــزلااان]

ههههههههههه حبــــــوه مـــــــــــــــــوزة واللــــــــــــــه دمـــــك عســـــــــــل

بـــس عنــــــدي مـــلاحظــــــــــــــة حبـــــوه
شـــو رايـــــــــك تحطـــي كـــل مـــوضـــوع بـــروحــــه ؟
عشــــان ما تضيـــــــع المواضيــــــع بيـــن الـــردود والســــوالـــــــــف ..

ربـــي يعطيــــــــــــــــك العافيـــــــــــــــــة

[بـــن ظـــآآهـــــــر]

ههههههههههه حبــــــوه مـــــــــــــــــوزة واللــــــــــــــه دمـــــك عســـــــــــل

بـــس عنــــــدي مـــلاحظــــــــــــــة حبـــــوه
شـــو رايـــــــــك تحطـــي كـــل مـــوضـــوع بـــروحــــه ؟
عشــــان ما تضيـــــــع المواضيــــــع بيـــن الـــردود والســــوالـــــــــف ..

ربـــي يعطيــــــــــــــــك العافيـــــــــــــــــة

اختي المميزة غزلان
للعلم تم دمج المواضيع بموضوع واحد من قبل ادارة القسم
حتى يسهل على الاعضاء متابعة الموضوع بما ان الموضوع عباره عن حلقات متواصله

احترامي لك