#المسلسل الرمضاني# ( سوالفنا عمانية) الحلقة الثانية

**عيون البشر** · 27-05-2018, 02:45 PM

المشهد 5
يوم الخميس وقت الغداء، سعادة تكلم ولدها سالم في موضوع خطبة نعيمه بنت خالته.
صحن عيش وملة مرق والام والابن متقابلين عليها.
سالم منهمك بالاكل وامه قالت له: سالم حبيبي ابا اخطب لك تراني.
سالم يرد بضحك: من عقلك ماه اتا اتزوج وبعدني توني كم شهر من تعينت. وتشوفي كل شي غالي وانا ما شاري حتى سياره.

الام سعاده: هيه ابوي، انا تعبانه وما قادره على شغل البيت ورحولي يعورني.

سالم: ترا ماه قايلك مطلع مأذونيه بجيب لك شغاله تشل عنك شغل البيت وتريحك.

الام: نعم ما راضيه عليك تجيب شغاله، ابوي ابغى اشوف اولادك واكحل عيوني فيهم قبل لا اموت.

سالم: بعيد الشر ماه الله يعطيك الصحه والعافيه، بس والله بعدني ع الزواج، وانا بصراحه عاجبتني بنيه معنا في الدوام.

الام: خل عنك، ذيلا بنات بليس باغيه تاخذك عني يجلسن يتمسكنن لين ياخذن الولد من امه، نعم وبالعظيم الثقيل ما تاخذها وانا حيه.

سالم بنبرة حزن: ماه ذكري الله والله يستر ع بنات الناس انا قلت عاجبتني ما قلت اعرفها. وليش تحلفي ترا تقولي باغتني اعرس وانا خبرتك في من خاطري.

الام بصوت غاصب: غير نعيمه بنت خالوتك ما خذيت.
البنيه زينه وغاويه واعرفها ومصليه ومسميه وراعية بيت ومغواتها طالعه ع خالتك عوشوه.

سالم بصوت متعجب: ماه انا و نعوميه اخوان ومرضوعين ع بعض تقولي وعمري ما شفتها غير اختي ولا خاطري فيها ماه نعم.

الام: الرضاعه اوين قالت خالوتك ما شبعت يوم رضعتك واوين سآئله مطوع وقالها يصير يتزوحو.

سالم: اه يعني خلاص مخططات ومقررات الخوات

الام: هيه وابغاك توديني الليله بيت خالوتك بنتعشى معهم.

سالم: عن يكون رايحه تخطبي ماه.

الام: لا ابغاك تشوف البنت يمكن تعجبك انت من زمان ما شايفنها.

سالم: ماه ما بروح ولا ابي اشوفها حتى.

الام: نعم ما راضيه عليك ما تروح معي.

سالم يهز رأسه ويقول: ان شاء الله ماه.

**عيون البشر** · 27-05-2018, 02:47 PM

المشهد 6

بيت خالوه عوشوه ام نعيمه بعد الغداء.

نعيمه جالسه تغسل صحون الغدأ في المطبخ وامها واقفه على باب المطبخ.

الام: نعيمه حبيبتي خلي الصحون بتغسلهن اختك انتي قومي لبسي عباتك.

نعيمه: خير ماه تو نص النهار وين بايه تروحي.

الام بنظرة خبث: الصالون.

نعيمه: وبعدك باغيه تنفذي اللي في راسك ماه، انا وسالم ما تصلح لبعض.

الام: سيري انتي سيري وش دراك، بنات اليوم ما يعرفن مصلحتهن، سالم معه خير وامه معها خير وجلسي انتي حرصي واحد منتف يجي يخطبك.

نعيمه: زين ماه اعرفه سالم يبغاني انا كما اخته، حتى يوم نتلاقى يقولي الاخت.

الام: خلي سلوم وامه علي، انتي تراك ما صغيره وسمعي مني انا برتب لك حياتك وبترتاحي وبتكوني قريب مني ومن اهلك واخواتك.

نعيمه بصوت المتردد: والله ماه لو ابي اسمع كلامك بس وحدي ما قادره، ما مرتاحه.

الام تشاهد نعيمه تبكي: كا راضيه عليك اذا ما سمعتي كلامي. انا ما ابيك تروحي بعيد عني وسالم احسن انسان حالش.

نعيمه: زين ماه بشوف

الام: خلا بسرعه لبسي عباتك بيجونا ع العشاء واللي اقولك ياه سوييه فاهمه.

نعيمه: زين ماه

**عيون البشر** · 27-05-2018, 02:49 PM

المشهد 7
سالم وامه يقرعو جرس باب الخاله عوشوه، والخاله تركض بسرعه لفتح الباب وترحب بهم وتدخلهم الى صالة المنزل وهي تقول: تو ما نور البيت مرحبا بسالم الغالي مرحبا بولد الاخت مرحبا بالشمج.

سالم بغيض يرد: هلا الخاله كيف صحتك

الخاله: بخير ابوي بخير دام انت بخير يالغالي.

الام سعاده بنشوة الانتصار تقول: عيل هين عروستنا الحلوه

سالم ينظر لامه ببضيق والام لا تعيره اهتمام والخاله عوشوه في قمة السعاده تنادي نعيمه.

الخاله: نعيمه نعيمه تعالي امي خالوتك مشتاقتنك

تخرج نعيمه كعروس ليلة زفافها، حيث ان الخاله عوشوه دفعت مبلغاً كبيراً للصالون كي يخرجوا نعيمه بأبهى صوره.

نعيمه تمشي بفستانها الضيق والطويل الذيل، استأجرته الخاله عوشوه من احد المحلات لهذه اللحظه.

نعيمه كأنها أحدى جميلات هوليود، واقفه وفي يدها المحناة صينية صغيره تكاد خصلات شعرها المموجه الناعمه ان تسقط في العصير الذي في الصينيه تنظر بأستحياء لولد خالتها سلوم وتقول: السلام عليكم.

الخاله عوشوه تتدخل بسرعه وتقول: سلمي على ولد خالوتك سالم.

نعيمه تقول: كيف حالك سالم

سالم يرد بأنبهار: طيب الحمد لله انتي كيف حالش.

الام سعاده: تعالي حبيبتي جنبي جلسي
ما شالله غواتك يا نعيمه.

سالم لا ينفك ينظر لنعيمة تلك النظرة الغريزيه التي افقدته مشاعره الاصليه لنعيمه.

تفاصيل جمال نعيمه الصالوني اسر عيونه.

يتناول الجميع العشاء ونعيمه تخرج من الصاله الى الغرفه حيث بدأت بمسح المساحيق التي اجهدت بشرتها وهي تبكي انها تصرفت بهذه الصبيانيه.

سالم يتناول العشاء وعقله متعلق بذاك الجسد لا الروح التي رئاها، وعقد العزم ان يتزوجها.

**عيون البشر** · 27-05-2018, 02:50 PM

المسهد 8

سالم لابس لبس العرس وجنب بيتهم الناس يتعشو، والفرحه عامه المكان، الام سعاده مستانسه وتصحك مع الحريم والجو كله فرح.

بيت نعيمة، خيمة العرس ونعيمه حالسه ف الكوشه والبنات فرحانات والكل يرقص.

تم العرس، وتزوج سالم جسد نعيمة لا قلبها ولا حبها..

**عيون البشر** · 27-05-2018, 02:53 PM

المشهد9:

بعد مرور 4 سنوات من العمر، بعد ما ماتت ام سالم سعاده.

نعيمه في البيت تعد الغداء وتصارخ على اولادها عن الربشه والضرابه في الحوش، صار مع نعيمه ولدين وحامل ببنت.

نعيمه بصوت متعب ومرهق: ولاد الحلال بسكم من الربشه هلكتوني جلسو في الارض.

الاطفال: ماه باغيين نلعب، فجأه يركضون للباب وهم يقولون: هيه هيه ابوي جاي ابوي جاي وش جايب النا باباه.

سالم راجع من العمل: ما جبت شي يالله داخل البيت يالله، وين امكم؟

الاطفال: ف المطبخ

سالم يقف على باب المطبخ وينظر لنعيمة بنظره مشمأزه ويقول: السلام عليكم

ترد نعيمه وعليكم السلام اخبارك؟ وصلت ما شاء الله بدل ثيابك وتعال بغرف الغداء.

سالم: ما ابغى،، غدي اليهال بس و اتغدي انتي انا اكلت في الدوام

نعيمة: حشاااا يبوك عاد من شهر ما ذقت لقمه معنا كله ماكل في الدوام.

سالم: وانتي موه يخصك اكل ف الدوام والا غيره. بس ما ابغى كيفي ما خاطري ما ابغى اجرع.

نعيمه: حيلك ود الحلال ما قلت شي نعم كليتني.

سالم: اوووه وش هالعيشه معك.

نعيمه بنبرة حزن وبعبرة تخنقها: احسنت الغالي تو حياتي ما زينه.

سالم يخرج من المطبخ ويتوجه للحمام، يجلس في الحمام ويفتح تلفونه وتعلوه ابتسامه عريضة جدا.

يكتب في الواتس اب لاسم في قائمة جواله ( حياتي انا وصلت البيت)

يرد الاسم: ( الحمد لله ع السلامه عمري، ابيك ترتاح اليوم كان ضغط في العمل)

سالم يكتب: ( دام انتي جنبي في العمل ما احس بالتعب يا قلبي، لو اشتغل 24 ساعه)

يرد الاسم

فديته سلومي العسل)

يبتسم سالم ويكتب: ( الحياه معك جنه يا قلبي، تعالي عيشي معي، فكيني من زوجة الهم اللي معي وعلى فوادي جالسه الله لابارك فيها).

الاسم يرد

خليها عنك حبيبي انا اللي بخليك في عيوني وبنسيك كل تعب عشته)

صوت قرع باب الحمام وصوت نعيمه يقول: سالم تأخرت في الحمام عسى ما شر، شي فيك.

سالم يرد: ما فيني شي، حشااااااا حتى الحمام لاحقتني.

نعيمه ترد: عاد اشوفك متصايق قلت اشوفك، وبعد ابغى اذكرك توديني المستشفي باكر حالي موعد في عيادة الحوامل. عشان تاخذ إجازة حال توديني.

سالم يرد: لالالا ما اقدرد خلي خلفان اخوك يوديك وبخليله 5 ريالات حال البترول انا واجد مشتغل في العمل معي ضغط.

نعيمه: زين بشوفه

يرجع سالم الى هاتفه والا الاسم الذي سلب لبه.
سالم: أحبك
الاسم: اموت فيك، حياتي انا بنام تعبانه نسولف بالليل.

سالم: عساه فيني التعب ولا فيك يوه الغاليه،

سالم يخرج من الحمام ويضع هاتفه قريب منه وينام.