العالم الجليل ونائبه

[رايق البال]

يسعد صباحكم / مساكم
هلا بالجميع ..

نلتقي مرة اخرى ايها الاحبه وقصه بقلمي يغلب عليها الطابع الكوميدي ربما لكوني لا اميل كثيرا للتراجيدي والكوميديا السوداء وغيرها من انواع القصص ..
في احد القرى كان هناك يعيش شاب ..
هالشاب كان صايع ضايع لا صلاه ولا عباده ولا شغله ولا مشغله ..
لحد يوم من الايام قرر يرحل عن قريته على امل يشوف قريه يستقر فيها وتتحسن اوضاعه وتتعدل ..
ومن قريه لقريه ومن بلد لبلد لحد ماوصل لقريه كان ناسها بسطاء للغايه وعددهم قليل وكلهم اميين ..
لما وصل مدخل القريه التقاه شخص وعزمه للغدا ببيته لما عرف انه غريب وهو يقدم له واجب الضيافه سأله صاحبنا بكل عفويه : مالاحظت بقريتكم مسجد ..! انتوا وين تصلوا ؟
تنهد الرجل وهز راسه بأسى وقال : للاسف احنا ناس جهله واميّين ومانعرف نصلي ولا نعرف آيه من القرآن ..!
هنا عاد صاحبنا اظهر الجديه على وجهه ومعالم الغضب وقال : يعني شوو ؟ شو هالكلام اللي اسمعه منك ؟ لا حول ولا قوة الا بالله العلي العظيم .. هذي صلاه وعباده مايصير هالكلام ..!
الرجل انحرج وقام يبوس راسه على باله انه شيخ جليل وعالم وقور هههههه ويستسمح منه ويقول : اعذرنا الشيخ والله احنا ماودنا نكون كذي بس ترانا مانعرف شي والحمد لله اللي جابك لقريتنا عشان تعلمنا اصول الدين وتكون امام تصلي بنا وراح نتكفل بأكلك وشربك وسكنك ... ارجوك وافق عشان اروح ابشر اهل القريه .
صاحبنا تورط وهز راسه وهو يقول بخاطره : ياربي شو هالورطه اللي انا تورطتها ..!؟ انا بروحي ما اعرف اصلي ولا حافظ آيه من القرآن هههههه .. شسوي الحين بهالموقف ..؟
هو يكلم نفسه والرجل يطالعه وينتظر رده بفارغ الصبر ..
بعد شوي عدّل صاحبنا من جلسته وقال بكل هدوء : والله ياخي هذي مسؤوليه كبيره ولكن راح اقبلها وان شاء الله اوفق فيها وانا انسان ادوّر الاجر وعسى الله يتقبل مني ..
الرجل فرح وقام يبوس راسه مره وهو يجلّه ويقدره وطلع بسرعه وبشر اهل القريه وخبرهم باللي صار ..
فرحوا اهل القريه وجوا كلهم يسلموا على هالعالم الجليل ويشكروه على هالجميل اللي راح يسويه وصاحبنا يتكلم بهدوء ووقار بأنه يبغى بس الاجر ..
وبعد السلام وعبارات الشكر اللي انهالت على صاحبنا قال لهم بكل ثقه وهدوء ان الصلاه راح تبدأ من بكره لأنه اليوم واصل ومرهق من الدرب .. وكان هو طبعا يبي يجلس مع نفسه ويرتب الموضوع يخاف يتورط ههههه ..
لما حانت الصلاه باليوم الثاني وقف قدامهم كإمام وهم خلفه وقام يقول اي كلام يخطر بباله وبآخر الكلام يقول الله اكبر واهل البلد يرددوا وراه مساكين على بالهم هذي هي الصلاه ..
استمر على هالوضع عدة ايام وفجأه لمعت بعقله فكره جهنميه وقال الحين اهل القريه دام مايعرفوا شي وعلى بالهم اللي اقوله هو آيات قرآنيه ليش ما استغل الوضع؟ تعبت كل يوم نفس الاكل تقريبا ولابد اتصرف فهالموضوع ..
لما حانت الصلاه وقف كالعاده امام لهم وقام يقول .. ( ايها الناس اطعموا اليوم معلمّكم الدجاج وبعض الفواكه .. الله اكبر ..) ..
بعد الصلاه جاب له غداه الشخص اللي عليه الدور وتفاجأ ان غداه هالمره نفس اللي حدده لما كان يصلي بهم ..
فرح صاحبنا وقال ياليتني من الاول كذي سويت كان كل يوم غداي غير وعشاي غير ههههه ..
استمر شهور على هالوضع كل يوم يحدد لهم اللي يبي ياكله وهم مساكين يسووه له ..
لحد يوم من الايام كان يصلي بهم الظهر وقال ( اليوم اطعموا معلمّكم السمك واللحم وفاكهة من الموز والرمان .. الله اكبر ) ..
فجأه ..
سمع صوت شخص من آخر الصف يتحمحم ويقول : سبحان الله ..
دار راسه صاحبنا لأن هذا معناه حد فاهم موجود من ضمن اهل القريه او شخص غريب وصل القريه وعارف كيف الصلاه والقرآن ..
فكر بسرعه وهمس بقلبه ياربي شو هالورطه ؟ شسوي الحين لو طلع هالشخص فاهم؟ راح انكشف وانفضح اكيد .. وهو يفكر بسرعه فجأه جته فكره وقال بقلبه .. لقيتها لقيتهاا .. راح اعيد القراءه مره ثانيه بنفس الكلام ولو كرر كلامه وتحمحم معناه شكّي في محله ولازم اتصرف بسرعه ولو ماقال شي معناه الوضع عادي وماعلي خوف ..
كرر اللي قاله وهو قلبه يرجف من الخوف واذنه على آخر الصف يبي يشوف ردة فعل هذاك الشخص ..
تحمحم الرجل هذاك مره ثانيه وقال : سبحان الله ..
هنا عاد تأكد صاحبنا ان هالرجل فاهم ولازم يتصرف بسرعه عشان ماينكشف ..
وبسرعه جته فكره جهنميه وقال راح انفذها وعسى بس يفهمها ..
قال بكل خشوع وهدوء ( يا ايها المتحمحمون لا تتكلمون لكم رزق مما يعطون من ثيران بلا قرون .. الله اكبر ) ..
قالها وقلبه تزيد رجفته من الخوف يبي بشوف شو راح يكون موقف هذاك الرجل وردة فعله ..
فجأه سكت الرجل والشيخ صاحبنا ارتاح وتنفس الصعداء على قولتهم بعدما تطمّن ان الرجل فهم قصده هههههه وانتهت الصلاه وقاموا يسلموا على بعض ولما التقت عين الرجل بعين الشيخ الجليل كل واحد فيهم تبسّم لصاحبه وغمز بعينه هههههه ..
صاحبنا قال لأهل القريه اليوم غدا هالشخص الغريب معي ..
رد اللي عليه الدور : تمام شيخنا ولايهمك وضيفك ضيفنا كلنا ..
راحوا اهل القريه كل واحد لبيته والشيخ والرجل مع بعض راحوا ..
قال صاحبنا للرجل : والله انك فعلت خير لما سكت ولا كنت بتورط ..
رد الرجل : تراني فهمت قصدك عشان كذي سكت مع انه دار راسي من الكلام اللي تقوله بالصلاه..! خبرني شو سالفة هالقريه واهلها ؟ وشو هالصلاه الغريبه؟
رد صاحبنا : انا بعد دار راسي لما سمعتك تتحمحم وتقول سبحان الله وقلت ف خاطري ياربي من وين هذا طلع لي بعد ..!؟ انا صار لي سنين ومنين ضاحك على هذولا وبالاخير يجي هذا ويكشفني وانفضح ..! ويطلّعني من النعيم اللي انا عايش فيه ههههه ..! وقلت خليني اسوي هالحركه لعل وعسى يفهم ويسكت والحمد لله انك فهمت الحركه وسكت ولا كان ياويلي منهم ههههه ولد الحلال هذولا ثيران وبصراحه انا واحد صايع ضايع وهم على بالهم اني عالم وشيخ جليل وعاد انا من شفت كذي وضعهم قلت شو مكلفني اتعب عمري ؟ خليني معهم مرتاح .. ماكل شارب نايم من ظهر هالثيران لا واحدد اللي ابيه بعد ههههه ..
ضحك الرجل وقال : اهاا .. كذي السالفه عيل ؟ وانا اقول ليش كذي يقول لما يصلي بهم ههههه؟ ..
ضحك صاحبنا ورد عليه : الحين عاد دام تعارفنا وتفاهمنا .. شو رأيك اخبرهم بأني اخترتك نائب لي؟ وانت شايف كيف انا مرتاح واموري طيبه هههههه ..
ابتسم الرجل وقال : افا عليك تم .. حد يرفس النعمه بريوله ههههه ..!
صاحبنا ضحك ورد عليه وقال : خلاص عيل ولايهمك .. راح ارتب الموضوع اليوم ان شاء الله ..
قبل الصلاه قال الشيخ لأهل القريه اليوم بعد الصلاه لاتروحوا اريد اكلمكم بموضوع مهم ..
ردوا عليه تم شيخنا ولايهمك انت تأمر امر ..
بعد الصلاه وكل واحد من اهل القريه ينتظر بفارغ الصبر كلام الشيخ ..
تنحنح الشيخ وعدّل من جلسته وقال بكل هدوء ووقار : يا اخوان الانسان تحكمه ظروفه وانا اليوم معكم وقايم بواجبي ..
قاطعوه اهل القريه وردوا بصوت واحد : احنا نشهد والله ان لولاك انته كنا في ظلام نعيش ..
رد الشيخ بوقاره المعهود وهدوءه وقال : جزاكم الله خير .. الموضوع اللي اريد اكلمكم فيه هو اني انسان اولا واخيرا .. جايز امرض او اموت او ارحل او اي شي يصير وحرام بعد كل الجهد اللي بذلته ترجعوا للجهاله وعصر الظلام .. عشان كذي راح اخلي هالرجل الغريب نائب لي ويكون بدالي لو صار لي شي لاسمح الله وتطمنوا انا اختبرته وماشاء الله عليه طلع رجل تقي وورع وحافظ القرآن صم مثلي طبعا .. شو قلتوا ؟
ردوا اهل القريه : الله يعطيك طولة العمر وعسانا ماننحرم منك شيخنا .. ومن بعد كلامك احنا مالنا كلمه .. كلمتك على قدام وجزاك الله خير دوم تفكر بمصلحتنا .. وقاموا يبوسوا راسه ويشكروه وهو يردد استغفر الله .. استغفر الله ماله داعي الشكر يا اخوان انا منكم وفيكم وانا انسان ادوّر الاجر ..
كل هالاحداث تصير قدام هذاك الرجل وهو ساكت ويهز راسه ويقول بقلبه ( حسبي الله على ابليسك اسميك داهيه نعم ماينقدر عليك هههههه ) ...
وعاش صاحبنا ونائبه في القريه معززين مكرمين المده اللي كانت لهم بالحياه ..
انتهى ..
بقلمي
اخوكم / رايق البال

[سـاهر العرب]

سبحان الله ههههه
قصه جميله وأستمتعت فيها أستاذي وخصوصا أني توني متغدي سمك هههه
في المره القادمه ياليت تدخل في القصه قاشع وسحناه تعطي تشويق أكبر هههه

دائما أنت الأفضل أستاذي
كل ودي وتقديري

[احساس روح]

قصه جميله جدا ومشوقه وتدل ع دهائهم
واتقنت قوله عندما يطلب الطلبات وينادي ع الي عرف ان كشفه
سلمت يمناك
كنت اتمنى ان يطلع نائبه ادهى منه ويكشفه
عاد متشوقه للوقت الي يكشفوه بس للاسف طلع الا ع شاكلته
( الطيور ع اشكالها تقع)
الف شكر لك امتعتنا

[نديم الماضي]

هلا فيك استاذنا القدير
بالفعل دائم قصصك فيها طابع الفكاها

قصه جميله وطريقة سرد كان اجمل
ننتظر قصصك الجميله
يعطيك العافيه ..😂😂

[الشيخه الفلانيه]

������ ..
قصة جميله أخي رائق جداً اسمتعنا بقرآئتها ،
يعطيك العافيه و بنتظآر جديدگ '

[صوت الحمام]

الـسلام عليكم

فـنانه القصه ههههه عجبتني يا أيها المتحمحمون ههه
أسـلوب السرد جميل جـداً
تسلم الأيـادي

وفقك الله

[نوارة الكون]

سلمت يمناك استاذي
سرد جميل كل العاده
ربي يعطيك العافيه

[قائد الغزلان]

***صباااح ورد اريج***

***رااااااااااااااااااايق...ما شااء الله لديك مخيلة جدااا واسعة***

***طبعاا كالمعتاد..اسلوبك في كتابة قصص هائلة***

***مخيلتك هذه المره جداا ابرهتني ***

***وفقك الله ايهااالكريم***

***واااصل..واحنا كلنا شوق لقلمك المميز***

***بااارك الله فيك..ودمت في حفظ الله ورعايته***

[الصممت هيبةة]

ههههههه.. جميله جداا
واسلوب السرد جداا جميل و رائع .. دمت بخير

[القيصـــــر]

قصه كوميديه جميله
والله الجهل مصيبه والمصيبه الأكبر يعلمهم اللي أجهل منهم هههه
كل الشكر والتقدير على السرد والطرح ،،