أنا جيتك .. وأنا لغيرك .. بذنبي ما نويت آبوح

**♡سدرة المنتهى♡** · 12-01-2016, 11:06 AM

طلبتك يالله الواحـد .. تِصَبِّـر قلبـي المجـروح
طلبتك ترحم دموعي .. وتبعـد حزنـي وآهاتـي ..

أنا ادري انه .. على بابك .. أكيد ان الرجا مسموح

وقفت بخشيتي وذلي .. لاجل تمحـي لـي زلاتـي..

أنـا بـي هـمْ ذابحني..وقلبـي بالالـم مفضـوح

رجيتك تنتزع همي .. تزيحـه مـن وسـط ذاتـي ..

أنا من جور مافيني .. مليت ارضي دمـوعُ ونـوح

لوِ انِّ الصخْر يسمعني..بكـى مـن كثـر وناتـي ..

أحس ان العنا أصبح..علـى بابـي يجـي ويـروح

مشاوير الحـزن والهـمْ .. بهـا طالـت مسافاتـي ..

تعبت اظهِر فرح زايـف.. وانـا تخنقنـي عبراتـي ..

ياربي هو كذا عمري.. قضيته في لعـب ومـزوح

قضيتـه دون مـا أدري .. غريق فـي ملذاتـي ..

ياربي قبل ما أرحل..وتنزع مـن حشـاي الـروح

أبي تغفـر لـي ذنوبـي.. تِجـاوَز عـن خطيِّاتـي ..

وابي لامن*غدا*جسمي وسط ذاك الثرى مطـروح

تونس وحدتي وضيقـي.. تيسـر لـي حساباتـي ..

على قبري أبي الرحمة.. ترفرف.. تِعتِلي .. وتْلـوح

وابي لامِن قِضى عمري.. يِطيـب بْصافـي نياتـي ..

وابي من بين طيات الكفن ريـح الفضيلـة يفـوح

أبي دمـع النـدم فينـي.. يطّفِّـي حـرِّ جمراتـي ..

وداخل جنتك يارب.. تعَلِّي لـي قمـم وصـروح

وتجعـل زيـن أفعالي..تنيـر سطـور صفحـاتـي ..

أنا جيتك.. وانا لغيرك.. بذنبـي مانويـت آبـوح

أبـي أنـوار غفرانـك.. دليلـي فـي متاهـاتـي..