ياللي هيبة حضورك باينه من سلامك
ياللي لك قدر غالي فالسما دوم عالي
مت من رمش عينك صوبتني سهامك
اشهد اني حظيظٍ و انته حبي المثالي
اه لا من طريتك او طرالي اهتمامك
ابتسم لاشعوري و يبتسم لي خيالي
دامني في خيالك فالصحى وفي منامك
و انت عندي غلايه غير عن كل غال
غيرتك يا غرامي واضحه من كلامك
و حاجبك لا رفعته منه يا ويل حالي
يا سحايب محبّه و انا وابل غمامك
الميم عاشق متيم و انت ملكي لحالي
لا خلا من كلامك ولا عدم من ملامك
سعد عيني ياغالي يوم اشوفك قبالي
ابشر بمن يعزك يا حياتي ما دامك
ف قلب خلٍ يصونك عاشقٍ للمعالي
ابتدع لك عجايب ف المحبه و غرامك
والله اني اشوفك فرحتي و راس مالي
هات إيدك حبيبي و خلّ تكفى ملامك
في وجودك ياعمري طاب حظي و فالي
في عيوني حبيبي غير عندي مقامك
و انا مكبر حظوظي يوم تهوى وصالي
لا حرمني الرب منك دامك الله دامك
انت يا حروف المحبه و يا إجابة سؤالي
رد مع اقتباس